Luke 18
18
1အင်းမာနောက်သယ် ကိုယ်တော်ယေရှုကော တပည့်လာပ်သယ် စိတ်ရီးအပျက်သော ၊အားလျော့လောကား အပေါ်ရယ် အမြဲတမ်း ဆုစိမ်ထော်ပ်ကား အကြောင်းနယ် ပုံဥပမာကြအာနောက် မိန့်နောကားကော 2“မြို့တစ်မြို့ပါအာ ဘုရားရှင်နယ် အကစာပ်၊ ပြည်သူလာပ်သယ်ရီး လေးအအောမ်ရယ်လင်းငါး တရားသူကြီးဟော်ဝါ ငါမာ။ 3အင်းမာမြို့ဝါး ငါကားကာ မုဆိုးမ ဟော်ဝါကော တရားသူကြီးပါအာ ‘ငါကာအမှုလည် မှန်ကန်နောကွန်းနယ် စီရင်နောကဲ့အယ်အီစာန်းဆွမ်’ ငေါကဲ့အယ် ခနခနသပေါက်မာ့။ 4အချိန်နည်းနည်းဟာ မာတ်အာမ်ငါးအထိ တရားသူကြီးကော မုဆိုးမကာ့ တောင်းဆိုချက်သယ် ညာမ်းပယ်လီမာ့။ အင်းညယ်ငေါဝမ်ရီ နောက်ဆုံးငါးကော ဟီမ်ငေါ ‘ငါကော ဘုရားရှင်နယ်ရီး အကစာပ်ကယ်ညယ် တီတ်ဆာလာပ်သယ်ရီး အလေးအောမ်မီယိုး။ 5အင်းညယ်ငေါဝမ်ရီ အင်းကာ မုဆိုးမကော ငါလည်အမြဲတမ်း စိတ်နှောက်ယှက်သောကဲ့အယ် လင်းကယ်မာ့ ဟီမ်ငါအမှုလည် မှန်ကန်နောကွန်းနယ် စီရင်နောကဲ့အယ် အီမားလည်ထာ့ကား။ အင်းညယ်မားလည် ဟီမ်ငေါ ငါပါအာ ခနခနလီကဲ့အယ် အနှောက်ယှက်အီစောမ်းဟပ်ကာယို’ ငေါကဲ့အယ် စဉ်းစားလောမာ့” ငေါကဲ့အယ် မိန့်နောမာ့။ 6အင်းမာနောက်သယ် ကိုယ်တော်ကော “အင်းမာ အတရာလော်ကာ တရားသူကြီးငေါကားဖူမ်နယ် နီမ်စဉ်းစားလောစာန်းနိတ်။ 7အင်းကာညယ် အတရာလော်ကာ တရားသူကြီးဟာမ်း မုဆိုးမဟနန် တရားမျှတလောကွန်းနယ် အောမ်ကဲ့အယ် အီရာမ်းနော ဘုရားရှင်ငေါ် ဟီမ်ပါအာအယ် ကူညီလောကဲ့အယ် အီတီမ် အမြဲတမ်း ဆုစိမ်ကဲ့အယ် လင်းငါးကာ့ ဟီမ်ရွေးချယ်လော်ပေကာဟီမ်နာပ်သယ် တရားမျှတလောကွန်းနယ် အောမ်ကဲ့အယ် အိကား သေချာလောကဲ့အယ် ဟီမ်နာပ်သယ် ကူညီလောကဲ့အယ် အီတီမ် အချိန်မာပ်မာပ်ရယ် ဆွဲလောပေ့ကာယို။ 8နီမ်နယ် ငါငေါ့နာပ်၊ ဘုရားရှင်ငေါ် ဟီမ်နာပ်ခနန်း မြန်မြန်ညယ် စီရင်နောကဲ့အယ် အီပ်ကား။ အင်းညယ်ငေါဝမ်ညီ တီတ်ဆာကာ့ဆာကြွဟေကာ အချိန်နယ် ကမ္ဘာပေါ်ဝါး ဘုရားရှင်နယ် ယုံကြည်လောကားဟီမ်နာပ်သယ် ယူပ်မူမုကားနာန်” ငေါကဲ့အယ် မိန့်နောမာ့။ 9စီးရာပ်သော် ကိုယ်ကာနောက်ကိုယ် ဖြောင့်မတ်သောမာ့ ငေါကဲ့အယ် မသပ်ခါကယ်အယ် သမီပ်သယ် နှိမ်ချလောဟာကာ့ ကြအာတီတ်ဆာလာပ်သယ် ကိုယ်တော်ကော ပုံဥပမာကြအာနောက် မိန့်နောမာ့။ 10“တစ်ခါလည် ဖာရိရှဲဟော်ဝါနောက် အခွန်ကောက်သောကားဟီမ်ဟော်ဝါကော ဆုစိမ်တီမ် ဗိမာန်တော်ဝါမ်းပါအာ လာမ်ဟီးမာ့။ 11ဖာရိရှဲကော စာပ်ကဲ့အယ် ‘ဘုရားရှင်၊ ငါဆူကော အခြားဟီမ်နာပ်ညယ် လောဘကြီးလောကား အပို၊ မရိုးမသား အောမ်ငါးရီး အပို၊ အိမ်ထောင်ရေး အဖောက်ပြန်နော်ကာပြာန်နယ် အင်းကာ့ အခွန်ကောက်ညယ် အဟီပ်ကယ်သယ်မာ့ ဘုရားရှင်ငါ ကျေးဇူးတော်လည် ချီးမွမ်းနောမာ့ဆွမ်။ 12ငါဆူကော တစ်ပတ်သယ် ကယ်ရာပ် ရောက်ကား ရှောင်နောကဲ့အယ် ဆုစိမ်မာ့a။ ငါဆူလူကားကာ့ ဖူးအားလုံးပါအာအယ် ဆယ်ပုံတစ်ပုံနယ် ဘုရားရှင်ဟနန်း လှူဒါန်းနောမာ့’ ငေါကဲ့အယ် ဆုစိမ်မာ့။ 13အင်းညယ်ငေါဝမ်ရီ အခွန်ကောက်သောကားဟီမ်ငေါ ဗိမာန်တော်ပါအာမာ့ အခြားတီတ်ဆာလာပ်နောက် စာပါအာ စာပ်ကဲ့အယ် ဟမောက်သယ်ဟာမ်း အယူဟေစာပ်ရယ် ရင်နယ် ထုလောစာပ်ရယ် ‘အို ဘုရားရှင်၊ အပြစ်ဒုစရိုက်နံတင်းငါးကာ့ ငါဆူလည် စာန်ကယ်အယ် အီစာမ်းဆွမ်’ ငေါကဲ့အယ် ဆုစိမ်မာ့။ 14နီမ်နယ် ငါငေါ့နာပ်။ အင်းမာကယ်ဟော ကျဉ်းမာ ထုတ်ထာစန်နော် ဘုရားရှင်ငေါ် ဖြောင့်မတ်သောမာ့ ငေါကဲ့အယ် သတ်မှတ်သောကား ခံနောထော်ကာဟီမ်ငေါ ဖာရိရှဲအဟီပ်ရယ် အခွန်ကောက် ထာမာ့။ မဟာအောမ်ကယ်လိုးငေါနော ကိုယ်ကာနောက်ကိုယ် ချီးမြှောက်သောဟာကာဟီမ်ငေါ ဘုရားရှင်ငါ နှိမ့်ချခံနောထော်ကဲ့အယ် ကိုယ်ကာနောက်ကိုယ် နှိမ့်ချလောဟာကာ့ ဟီမ်ငေါ ချီးမြှောက်သောကား ခံနောထော်ပ်ကား” ငေါကဲ့အယ် မိန့်နောမာ့။ 15ရာပ်အာလည် ကြအာကာတီတ်ဆာဖူမ်ငေါ ဟီမ်နာပ်ကာ့ ဆဟာဖူမ်နယ် ကိုယ်တော်ယေရှုကာ ထော်နောက် ထာကယ်အယ် ဘုရားရှင်ပါအာမာ့ ကလန်ငါဖူမ်နယ် လူမူကွန်းနယ် ကော်ဟီးရီကာလည် တပည့်လာပ်ကော် ယူပ်မူဝမ်စန်းနော အင်းမာညယ် အအောမ်တီမ် စမ်းမာန်မာ့။ 16အင်းညယ်ငေါဝမ်ရီ ကိုယ်တော်ယေရှုကော ဆဟာလာပ်သယ် ကော်ကဲ့အယ် “ဆဟာလာပ်သယ် ငါပါအာ လီစီမ်းနိတ်။ ဟီမ်နာပ်သယ် တားလောပေးဟီးရာပ်။ မဟာအောမ်ကယ်လိုးငေါနော ဘုရားရှင်ငါ သာသနာတော်ကော အင်းကာ ဆဟာလာပ်ညယ်ကာ့ တီတ်ဆာလာပ်ခနန်းဟာ ထာမာ့။ 17နီမ်နယ် ငါအမှန်ငေါထော်ဝမ်နော် ဘုရားရှင်ငါ သာသနာတော်လည် ဆဟာ ဟော်ဝါညယ် လက်အခံနော်ရယ် လင်းမန်းနော နီမ်ငေါ တိုက်မာဟာမ်း ဆာမ်ခွင့် လုကားယို” ငေါကဲ့အယ် မိန့်နောမာ့။ 18တစ်ခါလည် ဂျူးလူမျိုးခေါင်းဆောင် ဟော်ဝါကော ကိုယ်တော်ပါအာ လီကဲ့အယ် ကိုယ်တော်လည် “ကောင်းမြတ်သောကား ဆရာ၊ နိစ္စထာဝရအသက်သယ် လူကွန်းနယ် ငါဆူ မဟာအောမ်ထော်ပ်ကားသယ်” ငေါကဲ့အယ် လျှောက်သောမာ့။ 19အင်းညယ်ငေါဝမ်ရီ ကိုယ်တော်ယေရှုကော “မဟာအောမ်ကယ် ငါလည် ကောင်းမြတ်သောမာ့ ငေါကဲ့အယ် ငေါကားသယ်။ ဘုရားရှင်ငါပန်းနယ် ကောင်းမြတ်သောကားဟီမ် ဟင်ဟာမ်း အပို။ 20ဘုရားရှင်ငါ ပညတ်တော်ဖူမ်နယ် နာန်မီမ်းဟော်စီရာပ် ထာမာ့။ အိမ်ထောင်ရေး ဖောက်ပြန်နော်မို။ သမီပ်ကာ အသက်သယ် ကတ်ရှီမို။ သမီပ်ကာ ဥစ္စာလည် ကူစ်မူဝိုး။ သမီပ်ကာ့ အကြောင်းနယ်ရာ ပက်သော်ကဲ့အယ် ငေါမို။ အော်ပ်ဝါလာပ်သယ် ရိုသေလောလိတ်” ငေါကဲ့အယ် မိန့်နောမာ့။ 21အင်းမာဟီမ်ငေါ “ငါဆူကော ဆဟာမားအယ် အင်းကာ ပညတ်တော်ဖူမ်အားလုံးနယ် လိုက်နာ ကျင့်သုံးနီမာ့” ငေါကဲ့အယ် လျှောက်တင်နော်မာ့။ 22ကိုယ်တော်ယေရှုကော အင်းမာလည် သပ်မူဝမ်စန်းနော အင်းမာဟီမ်နယ် “နာန်အောမ်တီမ် ကြအာငါတူမ်း။ နာန်ပိုင်နောကားကာ့ အရာဖူမ်အားလုံးနယ် ငဟေကယ်အယ် လူကားကာ ဖူးလည် အပေါ်ဟာကားဟီမ်နာပ်ခနန်း လှူဒါန်းနောလိတ်။ အင်းမာညယ် အောမ်မန်းနော နာန်ငေါ ရွှေမြို့တော်ပါအာ ဥစ္စာစည်းစိမ်ဖူမ် လူဟပ်နာပ်။ စီးရာပ်သော် ငါကာတပည့်တော်အဖြစ် ငါကာနောက်အား လီရာပ်တိတ်” ငေါကဲ့အယ် မိန့်နောမာ့။ 23အင်းညယ်ငေါဝမ်ရီ ဂျူးလူမျိုးခေါင်းဆောင်ငေါ် တအားဆွာမ်း တင်းငါးဟီမ် ထာသယ်မာ့ အင်းမာလည် သပ်မူဝမ်စန်းနော တအား ဝမ်းနည်းလောတင်းကဲ့အယ် စိတ်ပျက်သောကဲ့အယ် လင်းမာန်မာ့။ 24အင်းမာဟီမ် တအားဝမ်နည်းလောတင်းကဲ့အယ် လင်းငါးလည် ယူပ်မူဝမ်စန်းနော ကိုယ်တော်ယေရှုကော တပည့်တော်လာပ်သယ် “ဖူးဆွာမ်းငါးဟီမ်နာပ်ကော ဘုရားရှင်ငါ သာသနာတော်ပါအာ ဆာမ်တီမ် တအား ခက်ခဲလောမာ့။ 25ဆွာမ်းငါး ဟီမ်ဟော်ဝါကော ဘုရားရှင်ငါ သာသနာတော်ပါအာ ဆာမ်ရင်တီမ် ထက်သယ် ကုလားအုတ်နူဝါကော မီစ်ထည် အပေါက်ပါအာ ဆာမ်တီမ်ဟာမ်း ပိုလောကဲ့ လွယ်လောနာ့ပ်” ငေါကဲ့အယ် မိန့်နောမာ့။ 26တီတ်ဆာပရိသတ်ဖူမ်ငေါ် အင်းမာလည် သပ်မူဝမ်စန်းနော ကိုယ်တော်ယေရှုလည် “အင်းမာညယ်ငေါက်သော် မညယ်ကာ တီတ်ဆာကော ကယ်တင်နောကား ခံနောထော်ပ်ကားသယ်” ငေါကဲ့အယ် လျှောက်သာမ်မာ့။ 27ကိုယ်တော်ယေရှုကော “တီတ်ဆာလာပ် အအောမ်ရင် ငါးကာ့ အရာဖူမ်ငါမာ့။ အင်းညယ်ငေါဝမ်ရီ ဘုရားရှင်ငေါ် မဟာဟာမ်း အောမ်ရင်နာ့” ငေါကဲ့အယ် မိန့်နောမာ့။ 28အင်းမာချိန်နယ် ပေတရုကော “ကိုယ်တော်၊ အလေဆူလာပ်ကော အရာအားလုံးနယ် စွန့်လွှတ်သောကဲ့အယ် ကိုယ်တော်ကာ့ နောက်အား လီရာပ်ချီးကား” ငေါကဲ့အယ် လျှောက်သာမ်မာ့။ 29ကိုယ်တော်ကော “နီမ်နယ် ငါအမှန်ငေါကားကော၊ ဘုရားရှင်ငါ သာသနာတော်နန်း ကိုယ်ကာကျဉ်း၊ အိက်၊ အန်းချန်နရှီ၊ အော်ပ်ဝါ၊ ရှိတ်ဆာ အင်းမာဖူမ်နယ် စွန့်လွှတ်သောကား ဟီမ်ငေ 30ရာ့ကာ ဘဝပါအာရီ ကလန်ငါဖူမ်အားလုံးနယ် လုကား ထာကယ်အယ် ရွှေမြို့တော်ပါအာရီ နိစ္စထာဝရအသက်သယ် လူဟိကာ သေချာလောမာ့” ငေါကဲ့အယ် မိန့်နောမာ့။ 31စီးရာပ်သော် ကိုယ်တော်ကော သာဝက ဆယ့်နှစ်ယောက်သယ် ဟီမ်ပါအာ လီစီမ်းကဲ့အယ် “သပ်ချီးလိတ်။ ရာ့ အလေကော် ဂျေရုဆလင်မြို့ဝါး လာမ်းဟီးကားထာမာ့။ ပရောဖက်သာပ် တီတ်ဆာကာ့ဆာအကြောင်းနယ် ရေးလောပေးရီကာ မှန်သမျှဖူမ်ငေါ အင်းမာနေရား ထာရီထော်ပ်ကား။ 32ဟီမ်နယ် ဂျူးလူမျိုးအဟီပ်ကာဟီမ်နာပ်ပါအာ အပ်သောဟိကာ။ ဟီမ်နယ် လှောင်ကဲ့အယ် နီးကာပ်ချိကာ။ စော်ကားလောဟိကာ။ အာပ်ဝေးနောက် ထောက်စာပ်ကားလည်ရား ခံနောထော်ပ်ကား။ 33အင်းမာနောက်သယ် ကြိမ်လုံးနောက် သမ်းကနာဟီကယ်အယ် ရှီးကွန်းနယ် ကတ်ရှီးဟိကာ။ အင်းညယ်ငေါဝမ်ရီ ဆွန်းရာပ်မြောက်သောကား မာန်းရာပ်သယ် အသက်ပြန်နောကဲ့အယ် ဆိုင်းဟေပ်ကား” ငေါကဲ့အယ် မိန့်နောမာ့။ 34အင်းညယ်ငေါဝမ်ရီ ကိုယ်တော်ယေရှု သပေါက်ကားလည် တပည့်တော်လာပ်ကော နားလည်လော်ဟီရင်နို။ အင်းမာစကားအဓိပ္ပာယ်လည် ပီးကူစ်ပေကယ်မာ့ ဟီမ်နာပ်ကော ကိုယ်တော်ကာ့ ဆိုလိုရင်းနယ် နားလည်လော်ဟီရင်နို။
35ကိုယ်တော်ယေရှုနောက် တပည့်တော်လာပ်ကော ယေရိခေါမြို့နောက် ထံပါအာ ထုတ်အီကားအချိန်နယ် မီပ်တူ အယူပ်မူကားဟော်ဝါကော လမ်းဘေးရား ထောင်းကဲ့အယ် စိမ်ရောက်ညာပ်ကယ်အယ် လင်းမာ့။ 36ဟီမ်ငေါ တီတ်ဆာအုပ်တုန်း ပလာပ်ကယ်အယ် လာမ်ငါးကာ့အသံနယ် သပ်မူဝမ်စန်းနော မဟာဖူမ် ထာကယ်အယ်လင်းငါးသယ် ငေါကဲ့အယ် စီမ်ညူဝမ်မာ့။ 37တီတ်ဆာကြအာကော နာဇရက်မြို့ပါအာမာ့ ကိုယ်တော်ယေရှု ပလာပ်ကယ်အယ် လာမ်ငါး ငေါကဲ့အယ် ငေါဟာမ်းမာ့။ 38အင်းမာချိန်နယ် ဟီမ်ငေါ “ဘုရင်ဒါဝိဒ်ကာ့မျိုးဆက် ယေရှု၊ ငါဆူလည် စာန်ကယ်အယ်ဆွမ်” ငေါကဲ့အယ် ရမ်းနာန်မာ့။ 39ကိုယ်တော်ယေရှုကာ မန်းနား လာမ်ငါးကာဟီမ်နာပ်ကော ဟီမ်နယ် ဆီမ်ရှင်းရှင်းလင်းတီမ် ငေါဟီးရာမ်မာ့။ အင်းညယ်ငေါဝမ်ရီ “ဘုရင်ဒါဝိဒ်ကာ့မျိုးဆက် ယေရှု၊ ငါဆူလည် စာန်ကဲ့အယ်ဆွမ်” ငေါကဲ့အယ် ပိုလောကဲ့ ကလူပ်ကဲ့ရမ်းနာန်မာ့။ 40ကိုယ်တော်ယေရှု သာပ်မူဝမ်စန်းနော ရပ်သောကဲ့အယ် အင်းမာမီပ်တူအယူပ်မူကားဟီမ်နယ် ဟီမ်ပါအာ ကော်ရီတီမ် တီတ်ဆာကြအာလည် အမိန့်အီရာမ်မာ့။ အင်းမာဟီမ် ထုတ်အီစန်းနော 41ကိုယ်တော်ကော “ငါကော နာန်နန်း မညယ်အောမ်ကဲ့အယ် အီထော်ပ်ကားသယ်” ငေါကဲ့အယ် စီမ်ညူဝမ်မာ။ အင်းမာဟီမ်ငေါ “အရှင်၊ ငါဆူကော မီပ်တူ ယူပ်မူဟာမ်းကာပ်မာ့” ငေါကဲ့အယ် လျှောက်တင်နာန်မာ့။ 42အင်းမာချိန်နယ် ကိုယ်တော်ယေရှုကော “မီပ်တူ ယူပ်မူဟာမ်းစန်ညူပ်။ နာန်ငါ ယုံကြည်ခြင်းငေါ နာန်နယ် ဇလားဟာမ်းစီမ်းပါတ်” ငေါကဲ့အယ် မိန့်နောမာ့။ 43ဟီမ်ငေါ ချက်ချင်း မီပ်တူယူပ်မူဟာမ်းကယ်အယ် ဘုရားရှင်နယ် ချီးမွမ်းနောစာပ်ရယ် ကိုယ်တော်ယေရှုကာ နောက်အား လာပ်မာ့။ အင်းမာအဖြစ်ပျက်သယ် ယူပ်မူကား တီတ်ဆာဖူမ်ရီး ဘုရားရှင်နယ် ချီးမွမ်းနောဟီးမာ့။
Currently Selected:
Luke 18: ktpv-rv
Highlight
Share
Copy
Want to have your highlights saved across all your devices? Sign up or sign in
This translation of the Kanan Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
