Luke 17
17
1ကိုယ်တော်ယေရှုကော ဟီမ်ငါ တပည့်တော်လာပ်သယ် “တီတ်ဆာဖူမ်နယ် ဒုစရိုက်အပြစ်ဖူမ် အောမ်ပါတ်စီမ်းငါးအရာဖူမ် နည်းကြီစ်ရယ် ငါမာ့။ အင်းညယ်ငေါဝမ်ရီ သမီပ်သယ် အပြစ်အောမ်ပါတ်ကွန်းနယ် ဖြားယောင်းနောကား ဟီမ်နာပ်ကော နည်းကြီစ်ရယ် ဒုက္ခရောက်သော့ကာ။ 2အင်းမာဟီမ်ငေါ အပြစ်အပေါ်ကာတီတ်ဆာလည် ဒုစရိုက်အပြစ် အောမ်ပါတ်ကွန်းနယ် အောမ်ဟပ်ကားထက်သယ် ဟော်ဝါဟော်ဝါကော ဟီမ်ငါ ကတောက်သယ် သလောင်းဆီတုန်း ဆွဲလောကဲ့အယ် ပင်လယ်နား သက်ဆာမ်ငါမ်ငါးကော အင်းမာဟီမ်နန်း ပိုလောကဲ့ မီးနာပ်။ 3အင်းသယ် နီမ်ညီး ကိုယ်အောမ်ငါးဖူမ်နယ် သတိအောမ်ဟီးလိတ်။
တကယ်လို့ ငါလည် ယုံကြည်လောကား တီတ်ဆာဟော်ဝါဟော်ဝါကော အပြစ်ကြအာကြအာ အောမ်ပါတ်ပါပ်သော် ဟီမ်နယ် ဆုံးမလောလိတ်။ ဟီမ်နောင်တ လူဝါပ်သော် ဟီမ်ငါ အပြစ်ဖူမ်နယ် ခွင့်လွှတ်သောကဲ့အယ် အီရာမ်နိတ်။ 4အင်းမာဟီမ်ငေါ နီမ်နယ် ရာပ်အာလည် ခုနစ်ကြိမ် အမှားဟာမ်း အောမ်ရီး အကြိမ်တိုင်း နီမ်ပါအာ လီကဲ့အယ် တောင်းပန်နော်ဟေရမ်နော် ဟီမ်နန်း ခွင့်လွှတ်သောကဲ့အယ် အီထော်ပ်ကား” ငေါကဲ့အယ် မိန့်နောမာ့။ 5အင်းမာချိန်နယ် သာဝကဖူမ်ငေါ် “အလေဆူလာပ်ကာ ယုံကြည်လောကားစိတ်သယ် ပိုလောကဲ့အယ် ခိုင်မာလောစီမ်းစာန်းဆွမ်” ငေါကဲ့အယ် လျှောက်တင်နော်ဟီမာ့။ 6အင်းသယ် ကိုယ်တော်ယေရှုကော “ကမူမ်းတူတူညယ်ဟာ ယုံကြည်မှုငါမာ့ငေါက်သော် အင်းကာ့ ဖောမ်းတွန်တုန်နယ် တရှန်းပါအာအယ် ဟောက်ပူကဲ့အယ် ပင်လယ်ပါအာ တွန်နာလိတ် ငေါကဲ့အယ် အမိန့်အီရာပ်သော် အင်းမာဖောမ်းတွန်ငေါ် နာန်နယ် နာခံနောပ်ကာ။ 7နာန်ငါအစေခံငေါ လက်ပါးပါအာ လက်ပါးထယ်လော်ပါအာအယ် အင်းညယ်အဟီပ်ရယ် သိုးပေါ်ပါအာအယ် လီဟာမ်းငါးအချိန်နယ် နာန်ငေါ ‘လီရိက်၊ ထောင်းကဲ့အယ် မဟာမဟာ ရောက်အီလိတ်’ ငေါကဲ့အယ် ငေါ့ကာလေး။ 8အင်းမာ ညယ်ငေါ့ကာအစား ‘အဝတ်လဲလောကဲ့အယ် ငါရောက်တီမ် ကြအာကြအာ ပြာန်နောကဲ့အယ် ငါရောက်စီးကား အချိန်ထိ နဘေးရား လေးကဲ့အယ် လင်းနိတ်။ စီးရာပ်သော် နာန်ရောက်ရင်နာ့ပ်’ ငေါကဲ့အယ် ငေါ့ကာယိုလေး။ 9အစေခံငေါ ဟီမ်ငါ့တာဝန်အတိုင်း အောမ်ငါးလည် သခင်ငေါ် ကျေးဇူးတင်နောတီမ် လိုလော်ဝို။ 10အင်းမာတိုင်းမန်း နီမ်ညီး နီမ်နယ် စီမ်းညောက်ပေကာ အလုပ်ဖူမ် အောမ်စီးရာပ်သော် ‘အလေကော် သာမန်အစေခံဖူမ် ထာကယ်အယ် တာဝန်အတိုင်းဟာ အောမ်မီကားထာမာ့’ ရယ်ဟာ ငေါဟီးလိတ်” ငေါကဲ့အယ် မိန့်နောမာ့။ 11အင်းမာနောက်သယ် ကိုယ်တော်ကော ဂျေရုဆလင်မြို့ဝါ လာမ်ငါးလမ်းပါအာမာ့ ရှမာရိပြည်နောက် ဂါလိလဲပြည်ကာ နယ်စပ်ကြားလည် ပလာပ်ကယ်အယ် လာမ်မာ့။ 12ထိန် ထိန်ငါပါအာ ထုတ်အာစန်းနော အနာတုန်ရောဂါသယ် ဆယ်ယောက်ကော ကိုယ်တော်နောက် စာပါအာ စာပ်ကဲ့အယ်လင်းစီးရာပ်သော် ကြိုဆိုလောဟီးကဲ့အယ် 13ကလူပ်ကား အသံဖူမ်နောက် “ဆရာ ယေရှု၊ အလေဆူလာပ်သယ် စာန်ကယ်အယ် ကုလောကဲ့အယ် အီစာန်းဆွမ်” ငေါကဲ့အယ် လျှောက်တင်နောဟီးမာ့။ 14ကိုယ်တော်ကော ဟီမ်နာပ်သယ် ယူပ်မူဝမ်စန်းနော “ပုရောဟိတ်သာပ်အာ လာမ်ကဲ့အယ် နီမ်ငါ့ခန္ဓာကိုယ်လည် ပြလောဟီးရာလိတ်” ငေါကဲ့အယ် မိန့်နောမာ့။ ဟီမ်နာပ်ရီး လာမ်ကဲ့လင်းငါးအချိန်နယ် အနာတုန်ရောဂါဖူမ် မီမ်ဟာမ်းဟူမ်မာန်မာ့။ 15အင်းမာဟီမ်နာပ်ပါအာမာ့ ဟော်ဝါကော အနာရောဂါ မီမ်ဟာမ်းငါကာလည် မီမ်းဟော်ဝမ်စန်းနော ဘုရားရှင်နယ် ကလူပ်ကဲ့အယ် ချီးမွမ်းနောစာပ်ရယ် ကိုယ်တော်ပါအာ လီဟာမ်းမာ့။ 16အင်းမာနောက်သယ် ဟီမ်ငေါ ကိုယ်တော်ယေရှုကာ သာပဲရား ဝပ်သောကဲ့အယ် ကျေးဇူးတော်လည် ချီးမွမ်းနောမာ့။ အင်းမာဟီမ်ငေါ ရှမာရိပြည်သား ထာမာ့။ 17အင်းမာအချိန်နယ် ကိုယ်တော်ယေရှုကော “အနာရောဂါ မီမ်ဟာမ်းငါးကော ဆယ်ယောက် ဟီပ်အိုလေး။ ကျန်နောကား ကိုးယောက်ကော တပါသယ်။ 18ဘုရားရှင်နယ် ချီးမွမ်းနောမယ် လီဟာမ်းငါးကော အင်းကာ ဂျူးလူမျိုးအဟီပ်ကာဟီမ် ဟော်ဝါကာပန်းနယ် ဟင်ဟာမ်း အပိုနာန်” ငေါကဲ့အယ် မိန့်နောမာ့။ 19အင်းမာ ရှမာရိ ပြည်သားလည် “နာန် ယုတ်ကဲ့ လာမ်စာ့ပ်။ နာန်ယုံကြည်လောကယ်မာ့ ဘုရားရှင်ငေါ် နာန်နယ် အနာရောဂါဖူမ် မီမ်ဟာမ်းစီမ်းပါတ်” ငေါကဲ့အယ် မိန့်နောမာ့။ 20ရာပ်အာလည် ဖာရိရှဲကြအာရီး ကိုယ်တော်လည် “ဘုရားရှင်ငါ သာသနာတော်ကော တိုက်မာ ပေါ်လိကားသယ်” ငေါကဲ့အယ် လျှောက်သောဟီးကယ်မာ့ ကိုယ်တော်ကော “ဘုရားရှင်ငါ သာသနာတော်ကော နီမ်ယူပ်မူရင်ငါး ပုံစံနောက် ပေါ်လိကားယို။ 21အင်းကာနေရား ယူလိတ်၊ အုန်းမာနေရားယူလိတ်ငေါကဲ့အယ်ရီ ဟင်ဟာမ်း ငေါရင်နို။ မဟာအောမ်ကယ်လိုးငေါနော ဘုရားရှင်ငါ သာသနာတော်ကော နီမ်ငါ့ကြာပ်ကြားပါအာ ငါကယ်ထာမာ့” ငေါကဲ့အယ် မိန့်နောမာ့။ 22စီးရာပ်သော် ကိုယ်တော်ယေရှုကော တပည့်တော်လာပ်သယ် “နီမ်ငေါ တီတ်ဆာကာ့ဆာအုပ်စိုးလောကားကာ မာန်းရာပ်ဖူမ်ပါအာမာ့ ရာပ်အာဟာဟာမ်း ယူပ်မူကာပ်ရီး အယူပ်မူရယ်လင်းဟပ်ကာ မာန်းရာပ်ဖူမ် ထုတ်အိကား။ 23တီတ်ဆာလာပ်ကော နီမ်နယ် ‘တီတ်ဆာကာ့ဆာကော အုန်းမာနေရားငါမာ့၊ အင်းကာနေရားငါမာ့’ ငေါကဲ့အယ် ငေါဟီးရီး ပြာန်ငါ ပူကဲ့အယ် ဟီမ်နယ် သမ်ညာပ်အာပ်ချီရာ့။ 24မဟာအောမ်ကယ်လိုးငေါနော တီတ်ဆာကာ့ဆာ ကြွလီရာမ်နော် ဟမောက်ပါအာအယ် ဟမောက်ရှီသပ်ကဲ့အယ် ဟမောက်ကြအာလုံး ထွန်းလင်းနောကယ်ညယ် တီတ်ဆာတိုင်း ယူပ်မူဟီးမုကား ထာမာ့။ 25အင်းညယ်ငေါဝမ်ညီ အင်းမာအချိန်အထုတ်ကြီစ်သယ် အရာမ်ဆုံး တီတ်ဆာကာ့ ဆာကော ဒုက္ခဝေဒနာဖူမ်နယ် ခံစားလောထော်ကယ်အယ် ရာမာ့ခေတ်တီတ်ဆာလာပ် ညာမ်းပယ်လော်ကာလည် ခံနောထော်ပ်ကား။ 26ဝေးအလွမ်းမိုးလောကြီစ်ရယ် နောဧa ခေတ်လားမာ့ တီတ်ဆာလာပ် လင်းဟီးရီကာအတိုင်း တီတ်ဆာကာ့ဆာ ပြန်နောကဲ့အယ် အကြွဟေဟော်ပ်ကာအချိန်နယ်ရီး တီတ်ဆာပ်လာပ်ကော လင်းဟိကာ။ 27ဝေးလွှမ်းမိုးလောနိုက်ပန်းသယ်မာ့ နောဧကော သင်္ဘောနား ဆာမ်ကဲ့အယ်လင်းငါးမာန်းရာပ် ထုတ်ကွန်းနယ် တီတ်ဆာလာပ်ကော ရောက်အာမ်၊ အူဝမ်၊ လက်ထပ်ပွဲအောမ်မာန်ညယ် ပုံမှန်အတိုင်း လင်းမီကယ်မာ့ ဝေးလွှမ်းမိုးလောကား ခံနောထော်ကယ်အယ် ဟီမ်နာပ်အားလုံး ရှီးဟီးဟူမ်မာန်ထော်မာ့။ 28အင်းမာတိုင်းမန်း လောတbကာ့ လက်ထက်လားရီး သောဒုံမြို့ဝါးကာ တီတ်ဆာလာပ်ကော ရောက်အာမ်၊ အူဝမ်၊ဈေးမီးရာမ်၊ဈေးငဟေရာမ်၊ စောါက်အာမ်၊ စာဟီးရာမ်ရယ် ပုံမှန် အတိုင်းလင်းဟီးရီကယ်မာ့ 29လောတကော သောဒုံမြို့ဝါးအယ် လာမ်ဟာမ်းပေးကား မာန်းရာပ်သယ် ဟမောက်စုတ်အားအယ် ဝမ်(န)ဟူကားကာ သလောင်ဆီဖူမ် ဝေးလက်လီ ကယ်အယ် မြို့ဝါးကားတီတ်ဆာလာပ်တယ်ရီး ရှီးစီမ်းညီမာ့။ 30တီတ်ဆာကာ့ဆာ ပေါ်လီကာမာန်းရာပ်သယ်ရီး အင်းကာညယ် ထာရီပ်ကား။ 31အင်းမာမာန်းရာပ်ပါအာ ကျဉ်းခေါင်မိုးစုတ်အား ငါကားဟီမ်ငေါ ကြအာကြအာလာတီမ် ကျဉ်းနား ဆာမ်ဟီရာ့။ လက်ပါး ငါကဲ့အယ်လင်းငါးဟီမ်ညီး ကြအာကြအာလာတီမ် ကျဉ်းမာ လီဟာမ်ဟီရာ့။ 32လောတကာအိက်c မညယ်ထာရီမာ့ငေါကားလည် သတိလူဟီလိတ်။ 33ကိုယ်ကာအသက်သယ်ကယ်လောကာပ်ကာ ဟီမ်နာပ်ကော ဆုံးရှုံးနောဟီးထော်ပ်ကား။ အင်းညယ်ငေါဝမ်ရီ ငါကာအတွက်နဲ့အယ် ကိုယ်ကာ အသက်သယ် စွန့်လွှတ်သောကားဟီမ်နာပ်ကော နိစ္စထာဝရအသက် လူဟိကာ။ 34နီမ်နယ်ငါငေါနာပ်။ dအင်းမာ နာန်ကြည်လည် အက်ဆက်ကြအာပါအာဟာ ငါကားကာ တီတ်ဆာကယ်ဟောပါအာမာ့ ဟော်ဝါကော ကော်ကား ခံနောထော်ပ်ကား ထာကယ်အယ် အခြားဟော်ဝါကော ကျန်နီထော်ပ်ကား။ 35အန်ထူကဲ့အယ် လင်းငါးရာပ်ရှီကယ်ဟောပါအာမာ့ ဟော်ဝါလည်ဟာ ကော်ကားခံနောထော်ကယ်အယ် အခြားဟော်ဝါကော ကျန်နီထော်ပ် ကားထာမာ့။ 36လက်ပါးပါအာ တီတ်ဆာ ကယ်ဟောငါရီး ဟော်ဝါလည်ဟာ ကော်ပ်ကား ထာကယ်အယ် အခြားဟော်ဝါကော ကျန်နောပေးရီပ်ကား” ငေါကဲ့အယ် မိန့်နောကယ်မာ့ 37တပည့်လာပ်ကော် “ကိုယ်တော်၊ သမာ့နေရား အင်းကားညယ်ထာ ရီပ်ကားသယ်” ငေါကဲ့အယ် စီမ်ညူလျှောက်တင်နော်ဟီမာ့။
ကိုယ်တော်ရီး “ရှီးစီးကားအရာဖူမ် ငါကားအရပ်လာ လင်းတနူစ်နူeလာပ် အမြဲတမ်း စုလောဟာမာ့” ငေါကဲ့အယ် မိန့်နောမာ့။
Currently Selected:
Luke 17: ktpv-rv
Highlight
Share
Copy
Want to have your highlights saved across all your devices? Sign up or sign in
This translation of the Kanan Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
