Luke 16
16
1ရာပ်အာလည် ကိုယ်တော်ကော တပည့်လာပ်သယ် ဆက်သောကဲ့အယ် မိန့်နောကားကော “တစ်ခါလည် သူဌေး ဟော်ဝါကော ဟီမ်ပိုင်နောကားဖူမ်အားလုံးနယ် စီမံနောတီမ် တီတ်ဆာဟော်ဝါလည် ခန့်နောပေးမာ့။ အင်းညယ်ငေါဝမ်ရီ ရာပ်အာလည် အင်းမာ စီမံနောကား ဟီမ်ငေါ ဟီမ်ငါဖူးဖူမ်နယ် အလွဲသုံးစား အောမ်ငါးလည် သူဌေးကော မီမ်းဟော်ဝမ်မာ့။ 2အင်းသယ် စီမံနောကားဟီမ်နယ် ကော်ကဲ့အယ် ‘နာန်ငါ အကြောင်း ငါသပ်မူကာကော် မညယ်သယ်။ နာန်အောမ်ပေးကားစာရင်းဇယား ဖူမ်နယ် ငါလည်ပြလောလိတ်။ နာန်နယ်ရီး စီမံနောကားဟီမ် နေရာပါအာ ဆက်သောကဲ့အယ် ပေးရင်စော်မန်’ ငေါဝမ်မာ့။ 3အင်းမာအချိန်နယ် ဟီမ်ရီး ‘ငါကော မညယ်အောမ်ထော်ပ်ကားသယ်။ သူဌေးကော ငါလည် အလုပ်အားအယ် ထုတ်သောဝါပ်။ ငါကော အလုပ်ကြမ်းအောမ်တီမ် အားရီးအပို။ စိမ်ရောက်ညာပ်တီမ်ရီး မန်းကတန်မာ့။ 4အင်းသယ်မာ့ အင်းကာအလုပ်အားအယ် ထုတ်သောကားခံနောထော်စီရာပ်သော် တီတ်ဆာဖူမ်ငေါ ငါလည် ဟီမ်နာပ်ကာကျဉ်းမား လက်ခံ ကြိုဆိုလောဟီးကွန်းနယ် မညယ်အောမ်ထော်ပ်ကား ငေါကားလည် ငါမီမ်းဟော်ဝါပ်’ ငေါကဲ့အယ် စဉ်းစားလောမာ့။ 5အင်းမာနောက်သယ် ဟီမ်ငေါ သူဌေးပါအာ အကြွေးအီတီမ် ကျန်နောကားဟီမ်နာပ်သယ် ဟော်ဝါစီးဟော်ဝါ ကော်ကဲ့အယ် ပထမဆုံးဟော်ဝါလည် ‘နာန်ငေါ ငါကာသူဌေးပါအာ အကြွေမနေငါသယ်’ ငေါကဲ့အယ် စီမ်ညူဝမ်မာ့။ 6အင်းမာတီတ်ဆာရီး ‘သံလွင်ဆလော စည်တစ်ရာa အီတီမ်ငါမာ့’ ငေါကဲ့အယ် ပြန်နောကဲ့အယ်ဖြေလာမ်မာ့။ စီမံခန့်ခွဲလောကားဟီမ်ရီး ‘စာရင်းစာရွက် မြန်မြန်လာကဲ့အယ် ငါးဆယ်ငေါကဲ့အယ် ရေးလာမ်နိတ်’ ငေါကဲ့အယ် ငေါဝမ်မာ့။ 7နောက်သယ်ကာ ဟော်ဝါလည်ရီး ‘နာန်ပါအာ အကြွေးမနေငါသယ်’ ငေါကဲ့အယ် စီမ်ညူမားလည်ရီ ဟီမ်ငေါ ‘အန် အိတ်တစ်ရာ’ ငေါကဲ့အယ် ဖြေလောကယ်မာ့ စီမံခန့်ခွဲလောကားဟီမ်ရီး ‘စာရင်းစာရွက်ပါအာ ရှစ်ဆယ်ရယ် ရေးလာမ်နိတ်’ ငေါကဲ့အယ် ငေါဝမ်မာ့။ 8အင်းမာချိန်နယ် သူဌေးကော အရိုးသားလောကား စီမံခန့်ခွဲလောကားဟီမ် အောမ်ငါးလည် ချီးမွမ်းနောမာ့။ မဟာအောမ်ကယ်လိုးငေါနော အင်းကာ လောကီသားလာပ်ကော် ဘုရားရှင်ငါ တီတ်ဆာဖူမ်ထက် ပိုလောကဲ့အယ် အခြားတီတ်ဆာလာပ်နောက် ဆက်ဆံနော်ကာအခါလည် ပါးပါးနပ်နပ် အောမ်ဟီးဟာမာ့” ငေါကဲ့အယ် မိန့်နောမာ့။ 9နောက်သယ်ကာပ်ဝါ့ ကိုယ်တော်ကော တပည့်တော်လာပ်သယ် မိန့်နောကားကော “နီမ်နယ်ငါငေါနာပ်။ နီမ်ငေါ အမြဲလောကားကာ လောကီစည်းစိမ်ဖူမ်နယ် သုံးနောကဲ့အယ် နီမ်ဟနန်း မိတ်ဆွေဖူမ်လူကွန်းနယ် အောမ်ဟီးလိတ်။ နီမ် ရှီးရာမ်ငါအခါလည် အင်းမာ လောကီစည်းစိမ်ဖူမ်ငေါ နီမ်နောက်တူတူ အပါလော်ရီ ရွှေမြို့တော်ပါအာ ငါကားကာ့ ဘုရားရှင်နောက် ဟမန်းနာပ်ကော် နီမ်နယ် ကြိုဆိုလောကဲ့အယ် လက်ခံနောပ်ကာ။ 10အင်းညယ်ငေါဝမ်ရီ အမှုကိစ္စဆဟာဖူမ်နယ် သစ္စာငါကားဟီမ်နာပ်ကော နံတင်းငါးကာအမှုကိစ္စဖူမ်ပါအာ သစ္စာငါမာ့။ အင်းညယ်ငေါဝမ်ရီ အမှုကိစ္စဆဟာဖူမ်ပါအာ သစ္စာအပေါ်ကာဟီမ်နာပ်ကော နံတင်းငါးကာ အမှုကိစ္စဖူမ်ပါအာရီ သစ္စာအပေါ်ကာဟီမ်နာပ်ထာမာ့။ 11နီမ်ငေါ အင်းကာညယ် အမြဲလောကား လောကီစည်းစိမ်ဖူမ်နယ်ဟာမ်း သစ္စာအပေါ်ဟီရန်နော် စစ်မှန် နော်ကာစည်းစီမ်ဖူမ်နယ် နီမ်ပါအာ ဟင်အပ်သော့ကာသယ်။ 12နီမ်ငေါ သမီပ်ကာပစ္စည်းဖူမ်နယ်ဟာမ်း သစ္စာအပေါ်ဟီရန်နော် နီမ်ပိုင်ဆိုင်နောတီမ် ပစ္စည်းဖူမ်နယ် ဟင်ဟာမ်း အီပ်ကားယို။ 13သမာ့အစေခံဟာမ်း သခင် ကယ်ဟောလည် တစ်ပြိုင်တည်း အစေခံနော်ရင်နို။ မဟာအောမ်ကယ်လိုးငေါနော ဟီမ်ငေါ ဟော်ဝါလည် ယူနီကယ်အယ် ဟော်ဝါလည် မူမ်းဟပ်ကာ။ ဟော်ဝါလည် သစ္စာငါဝါမ်းနော နောက်သယ်ဟော်ငါဝါလည် မလေးမစား အောမ်ဟပ်ကား။ အင်းညယ်တိုင်မန်း နီမ်ငေါ ဘုရားရှင်နောက် လောကီစည်းစိမ်နယ် တစ်ပြိုင်တည်း အစေခံနောရင်ဟပ်ကားယို” ငေါကဲ့အယ် မိန့်နောမာ့။ 14အင်းမာနောက်သယ် ဖူးမက်သောကား ဖာရိရှဲလာပ်ကော် ကိုယ်တော်ယေရှု သပေါက်ကားဖူမ်နယ် သာပ်မူစန်းနော ကိုယ်တော်လည် လှောင်ပြောင်နောကဲ့အယ် နီးကာပ်ချီမာ့။ 15အင်းညယ်ငေါဝမ်ရီ ကိုယ်တော်ကော ဟီမ်နာပ်သယ် “နီမ်ငေါ တီတ်ဆာလာပ်ကာ မန်းနားငေါက်သော် ကိုယ်နောက်ကိုယ် ဖြောင့်မတ်သောကားဟီမ်နာပ်ညယ် အောမ်ဟီးဟာမာ့။ အင်းညယ်ငေါဝမ်ရီ ဘုရားရှင်ငေါ် နီမ်ငါ အကလန်ငါကာစိတ်သယ် မီမ်းဟော်မာ့။ တီတ်ဆာဖူမ် တန်ဖိုးပေးပေးကားကာ လောကီစည်းစိမ်ဖူမ်ငေါ ဘုရားရှင်ဟနန်းငေါ စက်မေကာ့ဖူမ် ထာမာ့။ 16ဝေးငဟူပ်ကာမင်္ဂလာ ဆရာယောဟန်လက်ထက်ထုတ်ကွန်းနယ်အထိ တီတ်ဆာလာပ်ကော မောရှေကာ့ ပညတ်ကျမ်းနောက် ပရောဖက်သာပ်ကာကျမ်းဖူမ်နယ် လိုက်နာလောဟီရီမာ့။ အင်းညယ်ငေါဝမ်ရီ ရာ ငါကော ဘုရားရှင်ငါ့ သာသနာတော်အကြောင်း သတင်းကလန်နယ် ဟောလောကားအခါလည် တီတ်ဆာလာပ်ရီး ဘုရားရှင်ငါ သာသနာတော်နား ဆာမ်ရင်ကွန်းနယ် အစွမ်းကုန် ကြိုးစားလောဟီးရီမာ့။ 17အင်းညယ်ငေါဝမ်ရီ ဘုရားရှင်ငါ နှုတ်ကပါတ်တော်ပါအာမာ့ တူစီစ်ခန်ဆုံး ကျိန်းတူဝါ့ ပျက်တောတီမ်ထက်သယ် ဟမောက်နောက် ကာကော မီမ်တီမ် ပိုလောကဲ့လွယ်လောဟန်မာ့။ 18ကိုယ်ကာ အိက်သယ် ဖာပ်ကဲ့အယ် အခြားယာပ်ရှီဟော်ဝါနောက် လက်ထပ်သောကားဟီမ်နာပ်တိုင်း အိမ်ထောင်ရေး ဖောက်ပြန်နော်ကာလည် ကျူးလွန်နော်ကာဟီမ်နာပ် ထာမာ့။ ဟလားကော ဖာပ်ပေးကား ယာပ်ရှီလည် လက်ထပ်သောကားရီး အင်းမာတိုင်းမန်း ထာမာ့” ငေါကဲ့အယ် မိန့်နောမာ့။ 19စီးရာပ်သော် ကိုယ်တော်ကော “တစ်ခါလည် ဈေးနီပ်ကယ်အယ် ကလန်ငါကာ အဝတ်ဖူမ်နယ် ဖူမ်ကဲ့အယ် မာန်းရာပ်တိုင်း စည်းစိမ်ခံစားလောကဲ့ လင်းငါးကာ သူဌေးဟော်ဝါ ငါမာ့။ 20အင်းမာနေရား လာဇရုကော်ကားကာ တစ်ကိုယ်လုံး အနာဖူမ် ပေါက်တောကားကာ့ အပေါ်ဟာကားဟီမ်ဟော်ဝါရီး ငါမာ့။ ကြအာတီတ်ဆာလာပ်ကော ဟီမ်နယ် ကော်ရီကဲ့အယ် အင်းမာ့သူဌေးကာ ကျဉ်းခြံကဖာန်ပေါက်ဝပါအာ ပေးဟီးရီဟာမာ့။ 21ဟီမ်ငေါ သူဌေးကာ့ သားစားပွဲ ပါအာအယ် လက်ကားကာ့ အကြွင်းကျန်ဖူမ်နယ် ရောက်ကာပ်အီမာ့။ အင်းမာပြာန်နယ် ကြည်ဖူမ်ရီး ဟီမ်ငါအနာဖူမ်နယ် ရှလီးနောက် သာပ်ချီရီဟာမာ့။ 22ရာပ်အာလည် လာဇရု ရှီးစီးရာမ်စန်နော် ဟမန်းဖူမ်ငေါ် ဟီမ်နယ်ဟီမ်ငါဘိုးဘေး ထာကာကာ့ အာဗြဟံနောက်အတူတူ ငါမောက်တီမ် ကော်ဝမ်မာ့။ သူဌေးရီး ရှီးရာမ်စန်နော် တီတ်ဆာလာပ်ကော ဟီမ်နယ် ဂူနား စာန်းဟီးရာမ်မာ့။ 23အင်းမာ သူဌေးကော မရဏနိုင်ငံbပါအာ ဒုက္ခဆင်းရဲဖူမ်နယ် ခံစားလောထော်ကယ်အယ် ဟီမ်ငါစုတ်အား ယူဟေရာမ်စန်းနော အာဗြဟံနောက်အတူတူ ငါကားကာ လာဇရုလည် စာပါအာအယ် ယူပ်မူဝမ်မာ့။ 24အင်းမာချိန်နယ် ဟီမ်ငေါ ရမ်းကဲ့ ဟပ်စာပ်ရယ် ‘အဝါအာဗြဟံ၊ ငါဆူလည် စာန်ကယ်အယ်ဆွမ်။ ငါဆူကော အင်းကာ့ဝမ်နား ပြင်းနောတင်းငါး ဝေဒနာလည် ခံစားလောထော်ကယ်မာ့ လာဇရုကာ လက်ညိုးလည် ဝေးစူစ်သော်ကယ်အယ် ငါဆူကာ့ ရှလီးလည် ဆီမ်ကွန်းနယ် ဟီမ်နယ် သာပ်ကဲ့အီစာမ်းဆွမ်’ ငေါကဲ့အယ် စိမ်ငါမ်မာ့။ 25အင်းညယ်ငေါဝမ်ရီ အာဗြဟံ ငေါဟာမ်းငါးကော ‘ငါ့ဆာ၊ သတိလူလိတ်။ နာန် အသက်ဆိုင်းကဲ့လင်းငါး အချိန်နယ် ကလန်ဟန်ဆုံးဖူမ်နယ် လူရီကဲ့အယ် လာဇရုကော အကလန်ငါဖူမ်နယ်ဟာ လူရီကားလည် သတိလူလိတ်။ အင်းညယ်ငေါဝမ်ရီ ရာ့လည် လာဇရုကော သက်တောင့်သက်သာ လင်းမူကယ်အယ် နာန်ငေါ ပြင်းနောကား ဝေဒနာလည် ခံစားလောထော်မာ့။ 26အင်းမာဟာ အဟီပ်ရယ် နီမ်နောက် အလေကာ ကြာပ်ကြား ဆူပ်တင်းငါးကာ ထွာမ်တုန်းကြအာ ငါကားသယ်မာ့ နီမ်ပါအာ ဟင်ဟာမ်းအလာမ်ရင်ကယ်ညယ် အလေပါအာ ဟင်ဟာမ်း လီရင်နိုး’ ငေါကဲ့အယ် ငေါဝမ်မာ့။ 27သူဌေးရီး ‘အဝါအာဗြဟံ၊ အင်းညယ်ငေါက်သော် လာဇရုလည် ငါဆူကာ့ အဝါကာ့ကျဉ်းမား သာပ်ကဲ့အီတီမ် တောင်းပန်နော်မာ့ဆွမ်။ 28ငါဆူကာ အန်းချန်နရှီ ငါးယောက်သယ် ဝေဒနာခံနောထော်ကာ အင်းကာ့အရပ်လာ အထုတ်ရယ် လင်းကွန်းနယ် ဟီမ်နာပ်သယ် လာမ်ကဲ့အယ် သတိအီရာစီမ်းကာပ်မာ့’ ငေါကဲ့အယ် လျှောက်တင်နော်မာ့။ 29အာဗြဟံရီး ‘နာန်ငါ အန်းချန် နရှီဖူမ်ပါအာကော် မောရှေနောက် ပရောဖက်သာပ် ရေးလောပေးရီကာကာ့ ပညတ်ကျမ်းဖူမ် ငါဟီးမာ့။ အင်းမာဖူမ်နယ် ဟီမ်နာပ် လိုက်နာလော်ဟီစာမ်နိတ်’ ငေါကဲ့အယ် ငေါမာ့။ 30သူဌေးကော ‘အဝါအာဗြဟံ၊ အင်းကာညယ်ဟာနောက်ကော လူဝို။ ရှီးကားဟီမ်နာပ် ပါအာမာ့ ဟော်ဝါဟော်ဝါကော ဟီမ်နာပ်ပါအာ လာမ်ကဲ့အယ် သတိအီရာမားလည်ဟာ ဟီမ်နာပ်ကော နောင်တသံဝေဂတရားလူဟိကာ’ ငေါကဲ့အယ် ငေါမာ့။ 31အင်းမာချိန်နယ် အာဗြဟံငေါ ဟီမ်နယ် ‘ဟီမ်နာပ်ကော မောရှေနောက် ပရောဖက်သာပ်ကာ ပညတ်ကျမ်းဖူမ် နယ်ဟာမ်း အသပ်လာပ်ချီးရမ်းနော ရှီးပါအာအယ် လီဟာမ်းငါးကာ့ တီတ်ဆာကော ဟီမ်နာပ်ပါအာ လာမ်ကဲ့အယ် သတိအီရာရီး နောင်တသံဝေဂ လူဟိကာယို’ ငေါကဲ့အယ် ငေါဟာမ်းမာ့” ငေါကဲ့အယ် မိန့်နောမာ့။
Currently Selected:
Luke 16: ktpv-rv
Highlight
Share
Copy
Want to have your highlights saved across all your devices? Sign up or sign in
This translation of the Kanan Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
