Luke 11
11
1ရအာမှါခ့်ခါ ကိုယ်တော်ယေရှုကား တစ်နေရာဘေ ဆုစိန်စီးမှါခ့်ခါ တပယ့်တော်ဟော်ဝါကား "ကိုယ်တော်၊ ဝဲငွတ်ပင်းမာန်းဂလာ အွန်အီဘင်းယောဟန်ကား ဟိန်တပယ့်တာတ်တေ ဆုစိန်ဘင်းနည်းတေ ဆွောန်သကာအီနိမ် အလေတေရီးဒါး ဆွောန်သကာအီယုတ်" ညယ်လျှောက်တာန်သမှာ။ 2အန်၌မှါခ့်ခါ ကိုယ်တော်ကား အန်တာတ်တေ "ဟနိမ်ဆုစိန်မှါခ့်ခါ 'အဝါဘုရားရှာန်၊ အဝါဘုရားရှာန်ဘင်း ဂုဏ်တော်တေ ချီးမွမ်းသမှာ။ လူ့ပြေပါကြွဒီဘန်း အုပ်စိုးသယုတ်။ 3အလေအတွာတ် မာန်းရာတ်ရအာ၌တိုင်း လိုသဘင်း ယုတ်တင်အူတင်တေဒေ အီယုတ်ဘုရား။ 4အလေစေါက်ပေ အပြစ်အွန်ဘင်းဆိတ်အကုန်လုံးတေ အလေတေကား ခွာမ်းလွှတ်သအီနိမ်၊ အလေဘင်းအပြစ်တေဒေရီးဒါး ခွာမ်းလွှတ်သအီယုတ်။ အလေ အပြစ်အအွန်ကွန်း ဖြားယောင်းသဘင်းနာတေဒေရီးဒါး ကာကွယ်သအီယုတ်' ညယ်ဆုစိန်ကြီး" ညယ်မိန့်တော်မူသမှာ။ 5ပန်းနူ ကိုယ်တော်ယေရှုကား ဟနိမ်နောင်းဟက် ဟော်ဝါဟော်ဝါဘေ မိတ်ဆွေဟော်ဝါငှါဘန်းကား နာတ်ကြယ်ဆာန်းခေါင် အန်ဘင်းဆိတ်ပါလာန်ဘန်း 6'အဆွေ၊ ငါပဟာန်းဟော်ဝါ ခရီးလမ်းစာဟက် ထုတ်အီဟွန် ဟိန်နင်းနောပ့်တင် ငါဘေကား ဟမာန်ကစဲ အဘိုဘန်းဘင်းအတွာတ် မုန့်ဆွန်းဟုပ် ဟယ်အီယုတ်' ညယ်ငှေါဘန်းကား 7နာန်မိတ်ဆွေကား 'ငါတေအဆော်ဆိတ်၊ ပတူးတေဒေရီးဒါး အွတ်စီပဲဆွန်ဘန်း၊ ငါကျေမ်းဆိတ်တာတ်ရီးဒါး အေ့ပ်နင်းဆွန်ဘန်း၊ ငါရဲဘန်း နာန်တေဟမာန်ကစဲ အအီရန်ဘန်း' ညယ်ကျေမ်းနောင်းဟက် ပြန်သဘန်းငှေါဟာန်းကူ။ 8ဟနိမ်တေ ငါငှေါကာတ်ပင်းနာကား အန်ဘင်းဆိတ်ကား ဟိန်မိတ်ဆွေဟော်ဝါထှာဒီဒါး ရဲဘန်းဟာဘင်းနာတေစဲ အီကလားအချီဒီဒါး နာန်ကား ဆာတ်သဘန်းစိန်နင်းဘန်းကား ဟိန်ကား အေ့ပ်ဆေ့စ်ဟက်ရဲရီဘန်း နာန်လိုသဘင်းနာတေဒေ အီကူ။ 9အမှာတွာတ် ဟနိမ်တေငါငှေါကာတ်ပင်းနာကား "စိန်ကြီး လူကြီးကူ။ သန်ဘန်းကား ကတုံန်ကြီးကူ။ ပတူးခေါက်သပန်းကား ဖွါမ်းသအီကူ။ 10စိန်ဘင်းဆိတ်တာတ် လူကြီးကူ။ သန်ဘင်းဆိတ်တာတ် ကတုံန်ကြီးကူ။ ပတူးခေါက်သဘင်းဆိတ်တာတ်တေဒေ ပတူးဖွါမ်းသအီကူ။ 11အန်နိမ်အချီး နာန်ဆအိတ်တာတ်ကား တာန်းငှါနူဝါတေစိန်ဘန်းကားဟာဘင်း အမယ်အဝါကား ကဖူးတေအီကူတေ။ 12အန်နိမ်အတိုင်း နာန်ဆာဆအိတ်ကား အူတီဒေစိန်ဘန်းကား ဟာဘင်းအမယ်အဝါကား ကာန်းမီးကောက်တေ အီကူတေ။ 13အမှာတွာတ် ဟနိမ်ကား အမဲဘင်းသမီဆတေ ထှာနင်းဒီဒါး ဟနိမ် ဆာ၊ ဆအိတ်တာတ်နင်း မဲဘင်းတေဒေ၌ဆာ အီဟာဘန်းကား ရွှေမြို့တော်ဘင်း အဝါဘုရားရှာန်ရီးဒါး ဟိန်ဟက် စိန်ဘင်းဟာဟမဲစါန်းငှေါဒီ ဉာဏ်အလင်းတော်တေဆဲ အီဒင်အတွာတ် အဆာန်တာန့်ငှါမှာ" ညယ် မိန့်တော်မူသမှာ။ 14ပန်းနူမှါခ့်ခါ ကိုယ်တော်ယေရှုကား သမီဆာဟော်ဝါတေ တူးအသပေါက်ခါကွန်း အွန်ပဲဘင်း အမဲဘင်းနနူတေ ငါတ်ပူမှာ။ ကိုယ်တော်ယေရှုကား အမဲဘင်းနနူတေ ငါတ်ပူစီးမှါခ့်ခါ တူးအသပေါက်ခါဘင်းသမီဆာကား တူးသပေါက်ခါန်းဟာရီဘင်းအတွာတ် သမီဆာတာတ်ကား အံ့ဩသကြီးမှာ။ 15အာနိမ်စါန်းငှေါဒီ သမီဆာစယ်ယာကား "အဘင်းဆိတ်ကား အမဲဘင်းနနူတာတ် ရှာန်းပလာန် ဗေလဇေဗုလတန်ခိုးယောက် အဘင်းအမဲဘင်းနနူတေဒေ ငါတ်ပူလား" ညယ်ငှေါကြီးမှာ။ 16တခြားဘင်းသမီဆာတာတ်ရီဒါး ကိုယ်တော်ဒေ စမ်းသပ်သကြီးကာတ်ပင်းအတွာတ် ဘုရားရှာန်ဟက် နိမိတ်လက္ခဏာစားနူတေ ကာကာတ်ကြီးမှာ။ 17ကိုယ်တော်ယေရှုကား အန်ဘင်းဆိတ်တာတ် အဆေင်တေ မိန်းရှာတ်ခါဘင်းအတွာတ် အန်တာတ်တေ "နိုင်ငံတစ်နိုင်ငံဘေ သမီဆာတာတ်အဆေင်ကွဲသဘန်း အချန်းချန်းရန်ထှာနင်းဘန်းကား အန်ဘင်းနိုင်ငံကား အမှါတ်ကျီ ပျတ်စီးသကဘန်းလား။ အန်နိမ်သဒါး မိသားစုတစ်စုဘေရီး အဆေင်ပိုက်ပန်း အချန်းချန်း ရန်ထှာနင်းကြီးဘန်းကာ အန်ဘင်းမိသားစုကား ပြတ်စီးတာန်ကူ။ 18အန်နိမ် မာရ်နတ်ကား ဟိန်ကိုယ်တိုင် ဆန့်ကျင်တိုက်ခိုက်သနင်းဘန်းကား ဟိန်နိုင်ငံကား ဟာနိမ်တည်သရန်ကူတေ။ အရာတ်ရီးဒါး ဟနိမ်ကား ငါကား ဗေလဇေဗုလတန်ခိုးယောက် အမဲဘင်းနနူတေဒေ ငါတ်ပူမှာညယ် ငှေါနင်းကြီးမှာ။ 19အန်နိမ်စါန်းငှေါဒီ ငါကား ဟိန်တန်ခိုးယောက် အမဲဘင်းနနူတေဒေ ငါတ်ပူနင်းမှာငှေါဘန်းကား ဟနိမ်ဘင်း တပယ့်တော်တာတ်ရီးဒါး ဟာဟမဲဘင်းတန်ခိုးအာဏာယောက် အမဲဘင်းနနူတေဒေ ငါတ်ပူနင်းကြီးတေ။ ဟနိမ်တပယ့်တာတ်ကား ဟနိမ်မှားသနင်းမှာငှေါဘင်းနာဘင်း သက်သေထှာမှာ။ 20အန်နိမ်စါန်းငှေါဒီ ငါကား ဘုရားရှာန်ဘင်း ဘုန်းတန်ခိုးတော်ယောက် အမဲဘင်းနနူတေဒေ ငါတ်ပူဘင်းအတွာတ် ဘုရားရှာန်ဘင်း သာသနာတော်ကား ဟနိမ်ဘေ ထုတ်နင်းဘန်းငှေါဘင်းနာတေ ကာနင်းမှာ။ 21ဗလတောင့်သဘင်းသမီဆာဟော်ဝါကား လက်နက်တေဒေငါတ်ပန်း ဟိန်ကျေမ်းတေစောင့်သမှါခ့်ခါ ဟိန်ပိုင်သဘင်းနာတေကား လုံခြုံသနင်းကူ။ 22အန်နိမ်စါန်းငှေါဒီ ဟိန်ထာတ် ဗလတုံန်းဘင်းဆိတ်ကား ဟိန်ပါဒီဘန်း တိုက်ခိုက်သည်ဘန်း နားဘန်းကား ဟိန်အားကိုးသထှာဘင်း လက်နက်တေဒေလာလာန်ဘဲဘန်း ပစ္စည်းတေဒေရီး လာလာန်ဘဲဘန်းနာ သမီတေဒေ မံအီကူ။ 23ငါပါဘေ အပါသဘင်း ဟာဟမဲတေစဲဒါး ငါတေ ဆန့်ကျင်သပင်းဆိတ်ထှာမှာ။ ငါယောက်အတူတူ အနင်းဘင်းဆိတ်တာတ်ရီးဒါး တကွဲတပြားထှာကြီးကူ။" 24အမဲဘင်းနနူကား ဟိန်ဆာန်ပန်းနင်းပင်းဆိတ်ဟက် ပူဘန်း နင်းဒင်နေရာတစ်နေရာတေသန်ဘန်း ပူလာန်ပဲမှာ။ အန်နိမ်စါန်းငှေါဒီ သမီဆာထုတ်လားစစ်ပင်းပုတ်ခါးပါလာန်ဘန်း နားသဒင်နေရာတေသန်မှာ။ အန်နိမ်စါန်းငှေါဒီ တစ်နေရာဆဲ သန်လားအထှာဟာဘင်းအတွာတ် "ငါပူရီဘင်း နေရာပါလာန်ဟာန်းမ၌" ညယ် ငှေါဘန်း ဒီဟာန်းဘဲမှာ။ 25ထုတ်ခါန်းရီမှါခ့်ခါ အစမှာဟိန်နင်းရီဘင်း လာန်ကား သပ်သပ်ရပ်ရပ် ဆောပဲဘင်းကျေမ်းဟူအာနိမ် ငှါနင်းဘင်းတေ ကတုံန်ရာန်မှာ။ 26အန်၌မှါခ့်ခါ အမဲဘင်းနနူကား ဟိန်ထာတ်ဆိုးသဘင်း နောက်ထပ် အမဲဘင်းနနူ စစ်နူတေကော်ရီဘန်း နင်းဘင်းအတွာတ် ကပ်လားခံသထှာဘင်းဆိတ်ကား အရာန်ထာတ်ပိုဆိုးသလာန်ဘဲမှာ" ညယ်မိန့်သမှာ။ 27ကိုယ်တော်ယေရှုကား သမီဆတာတ်တေ ဟောသကာနင်းမှါခ့်ခါ အီးရှီဟော်ဝါကား "ကိုယ်တော်တေ ပန်အီဘန်း နောပ့်အီယုတ်ပင်းအီးရှီကား မာန်းဂလာငှါဘင်းဆိတ်ထှာမှာ" ညယ်လျှောက်တာန်သမှာ။ 28အန်၌မှါခ့်ခါ ကိုယ်တော်ကား "ချီမှာ။ အန်နိမ်စါန်းငှေါဒီ ဘုရားရှာန်ဘင်းနှုတ်ကပါတ်တော်တေဒေ သက်လူဘန်း လိုက်နာသကြီးဘင်းဆိတ်တာတ်ကား ပိုသော မာန်းဂလာငှါဘင်းဆိတ်တာတ် ထှာကြီးမှာ" ညယ်ပြန်သဘန်းမိန့်တော်မူသမှာ။ 29သမီဆတာတ်ကား ဝိုင်းသဘန်းသနင်းကြီးမှါခ့်ခါ ကိုယ်တော်ကား "အယာတ်ခေတ် သမီဆာတာတ်ကား အကြီးကျယ်အမဲဘင်းမျိုးဆာတ်ထှာကြီးမှာ။ အန်တာတ်ကား နိမိတ်လက္ခဏာတေ စိန်ကြီးဒီဒါး ယောနဘင်း နိမိတ်လက္ခဏာဟက်လွဲသဘန်း တခြား ဟာဘင်းနိမိတ်လက္ခဏာတေဆဲ ကာကလားအချီရား။ 30ယောနကား နိနေဝမြို့ဆားတာတ်အတွာတ် နိမိတ်လက္ခဏာစားနူထှာနိမ် သမီဆာဆားတော်ရီးဒါး အရာတ်ခေတ် သမီဆာတာတ်အတွာတ် နိမိတ်လက္ခဏာထှာကူ။ 31ရှေဘပြေအီးရှီရှာန်းပလာန်ကား ပညာငှါဘင်းလျှောလမုန်ဘင်းတူးတေ သက်ကာတ်ပင်းအတွာတ် ခရီးလမ်းစာလားဟက် လမ်းသယ်ဘန်းဒီထှာလား။ အန်နိမ်စါန်းငှေါဒီ အရာတ်ကား ပညာရှိရှောလမုန်ထာတ် ကြီးကျယ်မြင့်မြတ်သဘင်းဆိတ်ထုတ်ပန်းနင်းဘန်း။ အမှာတွာတ် တရားစီရာန်သမားမာန်းရာတ် ထုတ်ပန်းကား ရှေဘပြေအီးရှီရှာန်းပလာန်ကား အရာတ်ခေတ်သမီဆာတာတ်တေ စွဲချက်တာန်သကူ။ 32ယောန ဟောသကာ ဆွောန်သကာဘင်းအတွာတ် နောင်တလူဘန်း ဘုရားရှာန်တေ ဆက်ကပ်သကြီးရီဘင်း နိနေဝေ မြို့ဆားတာတ်ရီးဒါး ဟနိမ်တေ စွဲချက်တာန်သကြီးကူ။ ဟမာန်တွာတ်ငှေါဘန်းတာတ်ငှေါ အရာတ်ကား ယောနထာတ် မြင့်မြတ်သဘင်းဆိတ် ထုတ်နင်းမှာ" ညယ်မိန့်တော်မူသမှာ။ 33စီးမှါခ့်ခါ ကိုယ်တော်ကား "ဝါမ်သပ်ပဲဘင်း ဝါမ်ပလုတ်တေ ဟာဟမဲဆဲ ကဆွန်းဘန်းအပဲရား၊ ကုန်ဟာန်းဟမုတ်ပေရီဒါး အကဆွန်းပဲရား။ ကျေမ်းနောင်းဘေ ဆာန်ရီဘင်းဆိတ်တာတ် ဝါမ်ယားလူကွန်း ဝါမ်ပလုတ်တေတိုင်ဘေဝယ်ပဲကြီးဟာမှာ။ 34ဟနိမ်မိတ်တူရှီတေကား ဟနိမ်လာန် ဝါမ်အရောင်နိမ် ထှာပန်းနင်းမှာ။ မိတ်တူရှီမဲဘန်းကား နာန်လာကာတ်ပင်း ယားဘင်းနာတေဒေ လူရန်ဘန်း၊ နာန်မိတ်တူရှီအမဲဘန်းကား အရာအားလုံးကား ထာန်းပန်းနင်းကူ။ 35အမှာတွာတ် ဟနိမ်ဘေငှါဘင်းဝါမ်အရောင်တေ အထာန်းကွန်း မလဲကလဲအွန်ကြီး။ 36အမှာတွာတ် ဟနိမ်ဘေအလင်းငှါဘန်းကား ဟာဘင်းဆဲ ထာန်းလားအဘိုညယ် ဝါမ်ကျေမ်းရီးဒါး ယားဘင်းအရောင်ယောက် နာန်စောက်ပေယားနိမ် နေရာတိုင်းပေရီးဒါး ယားနင်းကူ" ညယ်မိန့်သမှာ။ 37အာနိမ်မိန့်သစီးမှါခ့်ခါ ဖာရိရှဲဟော်ဝါကား ကိုယ်တော်ယေရှုတေ ယုတ်တင်တေယောက် ဧည့်ခံသကူညယ် ဟိန်ကျေမ်းပါ ပါမ့်တာန်ဘင်းအတွာတ် ကိုယ်တော်ကား ကြွတော်မူသဘန်း စားပွဲဘေထုံးငါန်မှာ။ 38ကိုယ်တော်ကား ယုတ်တင်တေဒေ အယုတ်ကြီ အဆေင်ညယ် စားပွဲဘေ ထုံးငါန်ဘင်းနာတေ ဖာရိရှဲကား ကတုံန်ငါန်မှါခ့်ခါ အံ့ဩသနင်းနာန်မှာ။ 39အန်၌မှါခ့်ခါ ကိုယ်တော်ကား အန်ဘင်းဆိတ်တေ "ဟနိမ်ဖာရိရှဲတာတ်ကား ကကန်းပြန်ပါဘင်းနာတေဖောဘန်းနာ ဟနိမ်ဘင်းဆေင်ကား လောဘတေယောက် စလေစ့်ထာတ်နင်းမှာ။ 40သမီဆာကန်းတာတ်၊ ဘုရားရှာန်ကား နောင်းယောက် ပြာန် ကလိမ်းပိုက်စလုံးတေ ဖန်ဆင်းသအီပဲမှာအချီနော်။ 41ဟနိမ်ဘေငှါဘင်း နာတေဒေ၌ဆာ အဘိုဘင်းဆိတ်တာတ်နင်း အီမှာငှေါဘန်းကား ဟနိမ်အွန်ဘင်းနာတေဒေ ဘုရားရှာန်မွန်းကူ။ 42ဖာရိရှဲတာတ်၊ ဟနိမ်ကား မာန်းဂလာအဘိုကြီးရား။ ဟနိမ်ကား ကလာန်ဟက်ပူဘင်း ရှရှီပလီတေဒေ ရှစ်နူပုံဘန်း ပုံငါတေ ဘုရားရှာန်နင်း လှူသကြီးသည်ဒါး ဟနိမ်ကား သမီတေ ပက်သဘန်း ဘုရားရှာန်တေရီး အမစ်ကြီးရား။ ဟနိမ်ကား ရှစ်နူပုံဘန်း ပုံငှါတေ လှူသဘင်းအပြာန် တခြားဘင်းသမီဆာတေဒေရီးဒါး မျှမျှတတ အစန်အီးကြီးထှာကူ။ 43ဖာရိရှဲတာတ်၊ ဟနိမ်ကား မာန်းဂလာအဘိုကြီးရား။ ဟနိမ်ကား ဓမ္မာရုံဘေရီဒါး စောက်ပေထုံးကြီးကာတ်မှာ။ ဈေးနောင်းဘေရီး သမီဆာတာတ် နှုတ်ဆက်သဘင်းနာတေရီဒါး ကြိုက်သကြီးယုတ်မှာ။ 44အန်ဘင်းတေကား မာန်းဂလာအဘိုဘင်း နာတေထှာကြီးမှာ။ ဟနိမ်ကား အမှတ်သားအဘိုဘင်း ဆာန်းကျိုင်းနောင်းဘင်း ကာပလုန်တေယောက် တူသမှာ။ သမီဆာတာတ်ကား ဆာန်းကျိုင်းမန်း အမိန်းရှာတ်ခါဘန်း ဒီဟာန်းလာန်ဟာန်း နင်းကြီးဟာမှာ" ညယ်မိန့်တော်မူသမှာ။ 45အန်၌မှါခ့်ခါ ကျမ်းပေါ့ပင်း အိုးဆကြီးဟော်ဝါကား "ကိုယ်တော်၊ အန်နိမ်ငှေါဘင်းနာကား အလေတေရီဒါး အပြစ်ငှေါနိမ်ထှာမှာ" ညယ်ပြန်သဘန်းလျှောက်တာန်သမှာ။ 46အန်၌မှါခ့်ခါ ကိုယ်တော်ရီးဒါး "ကျမ်းပေါ့ပင်း အိုးဆကြီးတာတ် ဟနိမ်ရီဒါး မာန်းဂလာအဘိုကြီးရား။ ဟနိမ်ကား သမီဆာတာတ်တေ နိတ်ပင်းဒလေ့ပ်တေ ဖဲစိန်းယုတ်ပန်း ဟနိမ်ကိုယ်တိုင်ကား အန်ဘင်းတေဒေ သဟူးပိုင်းရောက်စဲ အထိသကြီးရား။ 47ဟနိမ်ကား အဟုတ်မလပ် မာန်းဂလာအဘိုကြီးရား။ ဟမာန်တွာတ်ငှေါဘန်းသာငှေါ ဟလိန်းပါမှါခ့်ခါ ဟနိမ် အုတ်တာတ် အတော်တာတ် သာန်းရှီးရီဘင်း ပရောဖက်တာတ်အတွာတ် ဟနိမ်ကား ဆာန်းကျိုင်းဂူတေဒေ စာအီနင်းကြီးမှာ။ 48အန်နိမ်အွန်ဘင်းကား ဟနိမ်အုတ်တာတ်အတော်တာတ် အွန်ဘင်းချီမှာညယ်ဟနိမ် ထောက်ခံသကြီးဘင်းအတွာတ်ထှာမှာ။ အာနိမ်အချီဘန်းကား ဟနိမ်ကား အန်တာတ်သာန်းရှီးရီဘင်း ပညာငှါဘင်း ပရောဖက်တာတ်အတွာတ် အထိန်းအမှတ်ကျောက်တိုင်တေဒေ စုတ်အီကြီးကလားအချီရား။ 49အမှာတွာတ် အရာအားလုံးတေ မိန်းရှာတ်ခါဘင်း ဘုရားရှာန်ကား "ဟနိမ်ပါ ပရောဖက်တာတ်ယောက် တပယ့်တော်တာတ်တေ တာတ်ကူ။ အာနိမ်စါန်းငှေါဒီ ဟနိမ်ကား အန်ဘင်းပရောဖက်တာတ်၊ တပယ့်တော်တာတ် စယ်ယာတေ သာန်းရှီးဘန်း စယ်ယာတေ နှိပ်စါတ်သကြီးကူ" ညယ်မိန့်ဒီလားထှာမှာ။ 50အရာတ်ခေတ်ပင်း သမီဆာတာတ်ကား ကမ္ဘာအစမှာဟက် ပရောဖက်တာတ်တေ သာန်းရှီးရီဘင်းအတွာတ် အပြစ်စီရာန်သဘင်းတေ ခံသကြီးထှာကူ။ 51ပရောဖက်တာတ်ကား အာဗေလဟက်စသဘန်း ဗိမာန်တော်ယောက် ပလ္လာန်ကြားဘေ သာန်းရှီးခံဒီထှာဘင်း ဇာခရိခေတ် ထုတ်ကွန်းထှာမှာ။ အမှာတွာတ် အန်ဘင်းတေအတွာတ် အရာတ်ခေတ်သမီဆတာတ်ကား အပြစ်ဒဏ်စီရာန်သလား ခံသထှာကူညယ် ငါအသေအချာငှေါရန်မှာ။ 52"ကျမ်းပေါ့ပင်းအိုးဆကြီးတာတ်၊ ဟနိမ်ကား မာန်းဂလာအဘိုကြီးရား။ ဟနိမ်ကား ဘုရားရှာန်ယောက်ဆိုင်သဘင်း အသိဉာဏ်ပတူးသော့တေ လာပဲကြီးဘန်း ကိုယ်တိုင်ရီးအဆာန် သမီတေဒေရီးဒါး တားဆီးသကြီးမှာ" ညယ်မိန့်သစီးမားနောက်တေ 53ကိုယ်တော်ကား အန်ဘင်းအရပ်ဟက် ကြွတော်မူသမှါခ့်ခါ ကျမ်းပေါ့ပင်းအိုးဆကြီးတာတ်ယောက် ဖာရိရှဲတာတ်ကား ကိုယ်တော်စေါက်ပေ ဝေဖန်အပြစ်တာန်သကြီးဘန်း ကိုယ်တော်တေ အကြောင်းအရာ ကလောင်းတုံန်းယောက် ပတ်သက်သဘန်း စိန်ယူဒင် ကလောင်းတုံန်းတေ စိန်ယူကြီးမှာ။ 54အန်ဘင်းဆိတ်တာတ်ကား ကိုယ်တော်မိန့်သဘင်း တူးတေဟက် အချီဘင်းတူး ပါဒီဘန်းကား ကိုယ်တော်တေ အပြစ်တာန်သဒင်အတွာတ် အန်နိမ်စိန်ယူကြီးလားထှာမှာ။
Currently Selected:
Luke 11: ktpv-rv
Highlight
Share
Copy
Want to have your highlights saved across all your devices? Sign up or sign in
This translation of the Kadu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
