Luke 12
12
1အန်၌မှါခ့်ခါ တစ်ထောင်းအကသဘင်း သမီဆာကလောင်းတုံန်းတာတ်ကား စုရုံးသကြီးရီဘန်း ဟော်ဝါယောက်ဟော်ဝါ ကောင်ပတ်ကူနိမ်စဲ ငှါနင်းကြီးမှာ။ ကိုယ်တော်ယေရှုကား တပယ့်တော်တာတ်တေ အရာန်ဦးဆုံး မိန့်သဘင်းနာကား "ဖာရိရှဲတာတ်ပင်း တဆေးနိမ်၊ သူတော်ကောင်းအယောင် ဆောင်သပဲဘင်းဆိတ်တာတ်တေ ဆတီးပဲဘန်း ရှောင်သကြီး။ 2ကဆွန်းဘန်း ပဲလားလူဘင်းနာညယ် အဘိုဝါး။ အန်ဘင်းနာတေကား အချိန်စားနူထုတ်အီမှါခ့်ခါ ပေါ်ဒီကူလားထှာမှာ။ 3အမှာတွာတ် ထာန်းလားဘေ ဟနိမ်ငှေါဘင်းနာတေဒေ ယားလားဘေရီးဒါး သက်ပူကြီးထှာကူ။ ပိတ်သပဲဘင်း ကျေမ်းနောင်းဟက် ယူရှီရှီငှေါပဲဘင်းနာတေရီးဒါး ခေါင်မိုးစေါက်ဟက် ဟာတ်ပန်းငှေါနိမ် ထှာကြီးရီကူ" ညယ်မိန့်တော်မူသမှာ။ 4"ငါမိတ်ဆွေတေထှာကြီးဘင်း ဟနိမ်၊ ဂရုစိုက်သဘန်းသက်ကြီး။ ဟနိမ်တေ သာန်းရှီးကူဘင်းဆိတ်တာတ်တေ အစါတ်ကြီးဆာ။ အန်တာတ်ကား နာန်လာန်တေဆာ သန်းရှီးရန်ဘန်း တခြားဟာဘင်းနာတေစဲအသန်းရှီးရန်နား။ 5အန်နိမ်စါန်းငှေါဒီ ဟနိမ်စါတ်ထှာကူဘင်းဆိတ်ကား ဘုရားရှာန်တပါး၌ဆာငှါလား။ ဘုရားရှာန်ကား ဟနိမ်အဆာတ်တေ လာရန်လားဆာအချီ၊ ရှီးစီးဘန်း ငရဲပါရီဒါး ဆာတ်ရန်ဘင်း အာဏာငါဘင်းဆိတ်ထှာမှာ။ အမှာတွာတ် ဟနိမ် အန်ဘင်းဆိတ်တေ အဟုတ်မလပ်စါတ်ကြီးထှာကူ။ 6အူစိတ်ဆာ ဟာနူတေ ဖူးနှစ်ပဲနီယောက်မာမှာအချီနော်။ အန်နိမ်စါန်းငှေါဒီ ဘုရားရှာန်ကား အူစိတ်ဆာနူဝါတေစဲအမှတ်နား။ 7ဟနိမ်ဟလာမ်းဘေ ဟလာမ်းဟူးဟာ၌တားငှါမှာ ငှေါဘင်းတေ အန်သပဲမှာ။ အမှာတွာတ် ဟနိမ်အစါတ်ကြီးဆာ၊ ဟနိမ်ကား အူစိတ်ဆာတာတ်ထား ပိုသောအဖိုးတန်သမှာ။" 8"ဟနိမ်တေ ငါငှေါကာကူ၊ ငါတပယ့်ထှာဘင်းအကြောင်းတေ သမီဆတာတ်မန်းဘေ ဝန်ခံသဘင်းဆိတ်တေ ငါရီးဒါး ဘုရားရှာန်ဘင်း မဲဘင်းဟမန်းတာတ်မန်းဘေ ဟိန်ကား ငါတပယ့်ထှာဘင်းအကြောင်းတေ ဝန်ခံသကူ။ 9အာနိမ်စါန်းငှေါဒီ ငါတေ သမီဆာတာတ်မန်းဘေ ငြာမ်းပယ်သဘန်းကား အန်ဘင်းဆိတ်ကား ဘုရားရှာန်ဘင်း မဲဘင်းဟမန်းတာတ်မန်းဘေရီးဒါး ငြာမ်းပယ်သလား ခံသထှာကူ။ 10သမီဆာဆားတော်တေ တူးယောက် ပြစ်မှားသဘင်းဆိတ်ကား အပြစ်ခွာမ်းလွှတ်ခံသထှာရန်ဒီဒါး ဉာဏ်အလင်းတော်ဒေ ပြစ်မှားသဘန်းကား အပြစ်ခွာမ်းလွှတ်ခံသထှာကလားအချီရား။ 11ဟနိမ်တေ ဓမ္မာရုံတေပါ၊ ဟလာန်းစါတ်တုံန်းတာတ်ယောက် အုပ်ချုပ်သဘင်းဆိတ်တာတ်မန်းဘေ စီရာန်သဒင် ကော်လားခံသထှာသည်ဒါး ဟာနိမ်ပြန်သဘန်း ငှေါထှာကူငှေါဘင်းတေ အစါတ်ကြီးဆာ။ 12အန်ကားအချိန်မှါခ့်ခါ ဟနိမ်ဟာနိမ် ပြန်သဘန်ငှေါထှာကူ ငှေါဘင်းနာတေ ဉာဏ်အလင်းတော်ကား ဆွောန်သကာအီကူ" ညယ်မိန့်တော်မူသမှာ။ 13စီးမှါခ့်ခါ သမီဆာကလောင်းတုံန်းဟက် ဟော်ဝါကား "ကိုယ်တော်၊ အဝါကား အလေအတွာတ် အီပဘဲဘင်း အမွေတေဒေ ခွဲသအီဒင်အတွာတ် ငါအမူးတေ အမိန့်ချသအီယုတ်" ညယ ကိုယ်တော်တေ လျှောက်တာန်သမှာ။ 14ကိုယ်တော်ကား "အဆွေ၊ နာန်ယောက် နာန်အမူး ရှုတ်သနင်းဘင်းကြားဘေ တရားစီရာန်သအီတင် ဟာဟမဲကား ငါတေ အာဏာလွှဲသပဲဒေ" ညယ် ပြန်သဘန်းမိန့်တော်မူသမှာ။ 15စီးမှါခ့်ခါ ကိုယ်တော်ကား သမီဆာတာတ်တေ "လောဘအတုံန်းကြီးဆာ။ ဟနိမ်ဘင်း စစ်မှန်သဘင်းဘဝတစ်ဆာတ်ကား ပစ္စည်းဥစ္စာဆွာမ်းလားဘေ မူတည်သနင်းလားအချီရား" ညယ်မိန့်တော်မူသမှာ။ 16စီးမှါခ့်ခါ ကိုယ်တော်ယေရှုကား သမီဆာတာတ်တေဒေ ဥပမာစားနူယောက် မိန့်ဆိုသဘင်းနာကား "ပန်းနူမှါခ့်ခါ သူဌေးဟော်ဝါကား ဟိန်လပါးဘေ ရှရှီတေကလောင်းတုံန်းပူဘင်းအတွာတ် 17ဟိန်ကား 'ငါဘင်းရှရှီတေဒေ ပဲဒင်နေရာ အဘိုဘင်းအတွာတ် ငါဟာနိမ်အွန်ထှာကူတေ' ညယ်စဉ်းစားသဘန်းနင်းမှာ။ 18စီးမှါခ့်ခါ ဟိန်ကား 'ငါ အာနိမ်အွန်ကူ။ ငါဘုတ်ခူးတေဒေ ဖြာတ်သပန်း တုံန်းဘင်းဘုတ်ခူး နယားတေဝါရာန်ကူ။ အန်ဘင်းဘုတ်ခူးနောင်းဘေ ငါဘင်းရှရှီတေယောက် တခြားမဲဘင်းနာတေဒေ စါန်းဘန်းပဲကူ။ 19အန်နိမ်ငှေါဘန်းကား ငါဘေ အနားပလီးတေမှါခ့်ကွန်းအတွာတ် မဲဘင်းယုတ်တင်တေဒေ စါန်းပဲစီးဘန်းထှာဘင်းအတွာတ် အရာတ်ဟက်စသဘန်း ငါကား အေးအေးဆေးဆေးနင်းဘန်း ယုတ်အာန်၊ အူရာန်ညယ် ပျော်ပျော်နင်းကဘန်း' ညယ်စဉ်းစားသနင်းမှာ။ 20အန်နိမ်စါန်းငှေါဒီ ဘုရားရှာန်ကား ဟိန်တေ 'ကန်းဘင်းသမီဆာ၊ အယာတ်နာတ်ကြယ်ဘေ နာန်ရှီးထှာကူ။ နာန်စုသပဲဘင်း ပစ္စည်းတေကား တခြားဘင်းဟော်ဝါပါ ထုတ်အာန်ကူ' ညယ် မိန့်တော်မူသမှာ။ 21အန်ဘင်းနာကား ဘုရားရှာန်မန်းဘေ ဆွာမ်းဘင်းနာတေအချီညယ် ကိုယ်အတွာတ်၌ဆာ ပစ္စည်းဥစ္စာတေဒေ စုဆောင်းသပဲဘန်း ဆွာမ်းမှာညယ် ကိုယ်ကာတ်ကို ထာန်သနင်းဘင်းဆိတ်တာတ် ကြုံသထှာကူဘင်းနာတေထှာမှာ" ညယ်မိန့်သဘန်း ဥပမာတေ အဆုံးသတ်တာန်မှာ။ 22စီးမှါခ့်ခါ ကိုယ်တော်ယေရှုကား တပယ်တော်တာတ်တေ "အမှာတွာတ် ဟနိမ်တေ ငါငှေါကာတ်ပင်းနာကား၊ ဟနိမ်အဆာတ်စားထှာကူဘင်းအတွာတ် ယုတ်ထှာကူ၊ ဟမာန်တေ နိတ်ထှာကူငှေါဘင်းတေ ကားဘန်းအနင်းကြီးဆာ။ 23အဆာတ်ကား ယုတ်တင်၊ အူတင်တေထာတ် အရေးတုံန်းလားအချီနော်။ လာန်ရီးဒါး နိတ်တင်၊ တော်တင်တေထာတ် ပိုသဘန်းအရေးတုံန်းမှာအချီနော်။ 24အူဟားတာတ်တေ ယူကြီးရာန်။ အန်တာတ်ကား အစုတ်ညယ်၊ ယာတ်တင်အလိုသဘင်းအပြာန် စါန်းဒင် ဘုတ်ခူးတေရီးအဘိုကြီးရား။ အမှာတေဆဲ ဘုရားရှာန်ကား အန်တာတ်တေ နောပ့်ပန်းအီပဲမှာ။ ဟနိမ်ကား အူစိတ်ဆာတာတ်ထာတ်ပိုသဘန်း တန်ဖိုးငှါမှာအချီနော်။ 25အဆေင်ကားနင်းဘင်းကား ဟနိမ်အဆာတ်တေ တစ်နာရီပိုသဘန်းစားစိန်းလဲ။ 26ဟနိမ်ကား အစစ်ဆာဘင်း အမှုကိစ္စတေဒေဆဲ အအွန်ရန်ဘန်းကား တခြားဘင်းအလုပ်တေအတွာတ် ဟမာန်ငြား ကားနင်းကြီးဒေ။ 27ပုတ်ခါးဘင်း ပပါးတာတ်တေယူရာန်။ အန်တာတ်ကား အလုပ်ရီးအအွန်၊ အန်တာတ်အတွာတ် နိတ်တင်တေရီး အအွန်ကြီးရား။ အန်နိမ်စါန်းငှေါဒီ ဟနိမ်တေ ငါငှေါကာတ်ပင်းကား မာအယ်မှါခ့်ခါငှါရီဘင်း ရှောလမုန် ရှာန်းပလာန်တုံန်းဘင်း နိတ်တင်၊ တော်တင်တေဆဲ ပုတ်ခါးဘင်း ပပါးတေနယ် အတင့်တယ်သဝါး။ 28အို ယုံကြည်သလားစစ်ပင်းဆိတ်တာတ်၊ ဘုရားရှာန်ကား မာန်းရာတ်ရီး အစစ်ဆာ၌ဆာစားဘန်း နောက်မာန်းရာတ်ပေ ဝါမ်နောင်းဘေ တက်ခံသထှာကူဘင်း ပုတ်ခါးပပါးတေဒေဆဲ ကတန်စိန်းတင် ဖန်းဆင်းသအီဘန်းကား ဟနိမ်တေကား ပိုသောဖန်ဆင်းသအီကူအချီနော်။ 29ဟနိမ်ကား ယုတ်တင် အူတင်အတွာတ် အဆေင်အကာကြီးဆာ။ 30ဘုရားရှာန်တေ အမိန်းရှာတ်ခါဘင်းဆိတ်တာတ်၌ အမြဲကားနင်းကြီးလား။ အန်နိမ်စါန်းငှေါဒီ အဝါဘုရားရှာန်ကား ဟနိမ် ဟမာန်လိုသမှာငှေါဘင်းနာတေဒေ မိန်းရှာတ်ခါမှာ။ 31အမှာတွာတ် ဘုရားရှာန်ဘင်းသာသနာတော်အတွာတ်တေ၌ဆာ အရာန်အွန်ကြီး။ အမှာမားဆာ ဟနိမ်လာကာတ်ပင်းတေဒေ ဘုရားရှာန်ကား အွန်အီကူ။" 32"သိုးရှရှာတေ၊ ဟနိမ် အဝါဘုရားကား သာသနာတော်တေ အီဒင် အလိုငှါဘင်းအတွာတ် အစာတ်ကြီးဆာ။ 33ငှါဘင်းပစ္စည်းတေဒေမာဘန်းနာ အဘိုဘင်းဆာန်းရဲဆားတာတ်နင်းအီကြီး။ အဘွတ်ရန်ဘင်း ရှီထောင်းတေဒေအွန်ဘန်း ဟနိမ်ဘင်းဥစ္စာရတနာတေဒေ သူခိုးတာတ်အထုတ်ရန်၊ နနူတေ အဖျတ်ဆီးသရန်ဘင်း ရွှေမြို့တော်ဘေ ပဲကြီး။ 34ဟမာန်တွာတ်ငှေါဘန်းတာတ်ငှေါ ဟနိမ်ပစ္စည်းဥစ္စတေငှါလားပါ ဟနိမ်အဆေင်ကား ထုတ်ပန်းနင်းဟွန်ထှာမှာ။" 35"ဟနိမ်ကား ဟိုင်းစွပ်နိမ်
မြဲသကွန်း ဝါမ်ပလုတ်တေ အဆာန်တာန့် အွန်ဘန်းပဲကြီး။ 36အမှာမားဆာ ကျေမ်းဆိတ်ကား မာန်းဂလာပွဲဟက် ဒီဟာန်းဘန်း ပတူးခေါက်သည်မှါခ့်ခါ ချတ်ချန်းရဲဘန်း ဖွာမ်းသအီရန်ကလား။ 37ကျေမ်းဆိတ်ကား ဟိန်ဒီဟာန်းကူဘင်း အချိန်တေ ဆတီးယောက် ဒဲဘန်းနင်းဘင်းအစေခံတေဒေ ဆုတော်လပ်တော်တေ အီကူ။ ဟနိမ်တေငါချည်လားငှေါထှာဘန်းကား၊ ကျေမ်းဆိတ်ကား ဟိုင်းစွပ်တေဟွတ်ပန်း အန်ဘင်းအစေခံတေဒေ ယုတ်တင်တေယောက် ဧည့်ခံသကူ။ 38အဆိတ်ကား နာတ်ကျယ်စါန်းထှာကာတ်ထှာ၊ အတိုင်စါန်းထှာကာတ်ထှာ ဒီဟာန်းမှါခ့်ခါ အဆာန်တာန့်ဒဲနင်းကြီးဘင်း အစေခံတေဒေ ကတုံန်လူဘန်းကား အဆိတ်ကား အကြီးကျယ်မွန်းကူ။ 39ကူပင်းဆိတ်ကား ဟာ၌မှါခ့်ခါဒီကူငှေါဘင်းနာတေ ကြိုတာန်သဘန်းမိန်းရှာတ်ခါဘန်းကား ကျေမ်းဆိတ်ကား ဆတီးပဲဘန်းနင်းဘင်းအတွာတ် ကူဘင်းဆိတ်တေ ဟိန်ကျေမ်းနောင်းဘေ ဆာန်ဘန်းကူရန်ကလား အချီရား။ 40အမှာတွာတ် အမြဲတမ်း ဆတီးပဲဘန်းနင်းကြီး။ ဟမာန်တွာတ်ငှေါဘန်းတာတ်ငှေါ သမီဆာဆားတော်ထှာဘင်းငါကား ဟနိမ်အမျှော်လင့်သမှားအချိန်ဘေ ပြန်သဘန်းကြွဒီကူဘင်းအတွာတ်ထှာမှာ" ညယ်မိန့်သမှာ။ 41အန်၌မှါခ့်ခါ ပေတရုကား ကိုယ်တော်ဒေ "ကိုယ်တော်၊ အဘင်းဥပမာကား အလေအတွာတ်ငှေါလာရဲ၊ တခြားသမီဆာတာတ်အတွာတ်ပါရဲ" ညယ်လျှောက်တာန်သမှာ။ 42အန်၌မှါခ့်ခါ ကိုယ်တော်ယေရှုကား "ငါကား ကျေမ်းဆိတ်တာတ်တေ အချိန်မှန်မှန် ယုတ်တင်အူဒင်တေဒေ အဆာန်သင့် ပြာန်ဆာန်သအီဒင် ကျေမ်းဆိတ်ကား ခန့်သပဲဘင်း ပညာငှါဘန်းနာ သစ္စာငှါဘန်း အစေခံငှေါဘင်းကား ဟာဟမဲကား။ 43အန်တာတ်ကျေမ်းဆိတ် ဒီဟာန်းမှါခ့်ခါ အလုပ်တေအွန်ဘန်းနင်းဘင်းအစေခံတေ ကတုံန်မှါခ့်ခါ အန်ဘင်းအစေခံကား ဆုတေအီခံသထှာကူ။ 44ဟနိမ်တေ ငှါချည်လားတေငှေါဘင်းကား၊ ကျေမ်းဆိတ်ကား ဟိန်ဘင်းပစ္စည်းဥစ္စာငှါဘင်းတေဒေ အန်ဘင်းအစေခံတေ အပ်သဘန်း စောင့်ရှောက်သစိန်းကူ။ 45အာနိမ်စါန်းငှေါဒီ အန်ဘင်းအစေခံကား 'ငါကျေမ်းဆိတ် ဒီဟာန်းယုတ်ကလားအချီရားညယ် တွေးသဘန်း တခြားဘင်း အစေခံတေဒေ တင်းဘန်း ယုတ်အာန် အူရာတ်မူးသနင်းဘန်းကား 46အန်ဘင်းအစေခံဘင်းကျေမ်းဆိတ်ကား ဟိန်အမာန်တာတ်ပင်း မာန်းရာတ် အချိန်တေဒီဟာန်းမှါခ့်ခါ ဟိန်တေအပြစ်ကြီးကျယ်တုံန်းတေအီဘန်း သစ္စာအဘိုဘင်းဆိတ်တာတ်ယောက် အတူတူနင်းစိန်းယုတ်ကူ။ 47ကျေမ်းဆိတ်အလိုက်တေ မိန်းရှာတ်ခါစါတ် ပြာန်ဆာန်သဘန်းအအွန်ပဲဘင်း အစေခံကား အပြစ်ဒဏ်တုံန်းတေ အီလားခံသထှာကူ။ 48အာနိမ်စါန်းငှေါဒီ ကျင်းဆိတ်အလိုက်တေ အမိန်းရှတ်ခါဟွန် အပြစ်အွန်ပတ်ပင်းဆိတ်ကား စစ်ဆာ၌ဆာအပြစ်အီလားခံသထှာကလား။ ဆုတေကလောင်းတုံန်း လူဘင်းဆိတ်ကား တာဝန်တေပိုသောငှါကူ။ စီးဘန်းရီဒါး ယုံကြည်သလား ကလောင်းတုံန်း လူပဲဘင်းဆိတ်ကား ပိုသဘန်း စိန်လားခံသထှာကူ။ 49"ငါကား အဘင်းကမ္ဘာတေ ဝါမ်ဟူစိန်းဒင် ငှါဒီမှာ။ အန်ဘင်းနာတေ ဝါမ်ဟူစီးလား ထှာစိန်းဘင်းနာတေဆဲငငါအလိုငှါမှာ။ 50ငါကား အမှါတ်ကျီ အကြီးကျယ်တုံန်းဘင်း ဒုက္ခတုံန်းယောက် ဝဲငွတ်ပင်းမာန်းဂလာတေခံသထှာကူ။ အန်ဘင်းတေ အစီးချည် ငါကား ဒုက္ခတေအကြီးကျယ်ထုတ်နင်းယုတ်ကူ။ 51ငါကား အဘင်းကမ္ဘာစောက်ပေ ငြိမ်းချမ်းသစိန်းဒင် ဒီလား ညယ်ထာန်သနင်းလဲ။ အချီရား။ ငါဒီထှာဘင်းအကြောင်းကား သမီဆာတာတ်တေ ခွဲသဒင်ဒီမှာ။ 52အရာတ်ခက်စသဘန်း သမီဆာဟာဟူးငှါဘင်း ကျေမ်းကျေမ်းမှာဘေ ကလိန်းဟူးကား ပယ်အာ၊ ဆွန်းဟူးကား ပယ်အာ ဟော်ဝါယောက် ဟော်ဝါ အဆေင်ပိုက်ကြီးကူ။ 53အမယ်ယောက်ဆအိတ်၊ အဝါယောက်ဆာ၊ အထောင်ယောက်နန်း အချန်းချန်း အဆေင်ပိုက်ကြီးကူ" ညယ်မိန့်သမှာ။ 54စီးမှါခ့်ခါ ကိုယ်တော်ကားသမီဆာတာတ်တေ "ဟနိမ်ကား ဟလိန်းဘင်းအရပ်ဟက် ထာန်းဘင်းဟာန်းချီဟယ်ရီဘင်းတေ ကတုံန်ဘန်းကား ဟလာန်းဝဲကဘန်းညယ် ချတ်ချန်းငှေါကြီးမှာ။ ဟနိမ်ငှေါဘင်းအတိုင်းရီးထှာဟာမှာ။ 55တောင်အရပ်ပါဟက် ဟလာန်းမွန်နီဘန်းရီး နွေရာသီထုတ်ကပန်းညယ် ဟနိမ်ငေါကြီးဟာမှာ။ ဟနိမ်ငှေါကြီးဘင်းအတိုင်းရီးထှာဟာမှာ။ 56သမီဆာမလဲနိမ် အယောင်ဆောင်သနင်းဘင်းဆိတ်တာတ် ဟနိမ်ကား ဟမုခ့်ယောက် ကာတေယူပန်း ဟလာန်းအချေအနေတေခန့်မှန်းသရန်ဒီဒါး အယာတ်ကားအချိန်ဘေကား ဟာနိမ်ထှာနင်းမှာငှေါဘင်းနာတေ ဟမာန်အတွာတ် ဟနိမ်အမိန်းရှာတ်ခါတေ။ 57ချီဘင်းအမူတေအွန်ဒင် ကိုယ်ကောက်ကိုယ် ဟမာန်ငါး အဆုံးဖြတ်သရန်ကြီးတေ။ 58သမီဆာဟော်ဝါကား နာန်တေ တရားစွဲသဘန်းကာ တရားရုံးပါအထုတ်ကျီ ကျေအေးသရာတ် ဆွေးနွေးဒကြီး။ အာနိမ်အချီဘန်းကာ တရားသူကြီးကား နာန်တေအပြစ်ငှါမှာညယ် သတ်မှတ်သဘန်း တာဝန်ငှါဘင်းဆိတ်တာတ်ပါ အပ်သဘန်း နာန်တေ ထောင်ချတာန်ကူ။ 59နာန်အီထှာကူဘင်း အကြွေးဆွန်ကွန်း အအီမချန်း နာန်ထောင်ဟက် ပူလူကလားအချီရား" ညယ်မိန့်တာန်မှာ။
Currently Selected:
Luke 12: ktpv-rv
Highlight
Share
Copy
Want to have your highlights saved across all your devices? Sign up or sign in
This translation of the Kadu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
