Luke 10
10
1စီးမှါခ့်ခါ ကိုယ်တော်ယေရှုကား တခြားတပယ့်တော် ခုနှစ်ဆယ်တေမယ်ဘန်း ကလိန်းဟူး တစ်တွဲစီအွန်ဘန်း ကိုယ်တော်ဒီကူဘင်းမြို့တေ၊ ထိန်တေပါ ကြိုတာန်သဘန်း လာန်စိန်းယုတ်မှာ။ 2ကိုယ်တော်ကား အန်တာတ်တေ "လပါးကွာမ်းဘေ ရှရှီတေကလောင်းတုံန်းငှါမှာ။ အန်နိမ်စါန်းငှေါဒီ ယာတ်ကူဘင်းသမီဆာကား အစစ်ဆာ၌ငှါလား။ အမှာတွာတ် လပါးကွာမ်းပါ အန်ယာတ်ကူဘင်းသမီဆာ ကလောင်းတုံန်းတာတ်အီယုတ်ညယ် လပါအဆိတ်ပေစိန်ကြီးမှာ။ 3အရာတ်လာန်။ ငါ ဟနိမ်တေတာတ်ပင်းနာကား ဝံပုလွေအုပ်နောင်းပါ သိုးနနူတေဒေ တာတ်နာန်နိမ်ထှာမှာ။ 4ဖူးရှီထောင်း၊ ထောင်းပိုးကြီး၊ ဟက်တင်းတေဒေ အလာရာန်ဆာ။ လမ်းဘေ သမီဆတာတ်ယောက် တူးသပေါက်ပန်း စပ်ပန်းအချိန်အဖြုန်းသကြီးဆာ။ 5ဟနိမ် ကျေမ်းကျေမ်းနာဘေ ဆာန်မှါခ့်ခါ 'အဘင်းကျေမ်းကား အေးချမ်းသယုတ်' ညယ်ဆုစိန်အီကြီး။ 6အန်ဘင်းကျေမ်းဘင်း သမီဆာတာတ်ကား အေးချမ်းသဘင်းတေ လာကာတ်ပန်းကား အန်တာတ်လူကြီးကူ။ အန်နိမ်စါန်းငှေါဒီ အန်တာတ်အလာကာတ်ပန်းကား နာန်ဆုစိန်အီဘင်းနာကား နာန်ပါ ထုတ်ခါန်းရီကူ။ 7ကျေမ်းမာ၌နင်းဘန်း ကျေမ်းဆိတ်နော့ပ်ပင်းနာတေ ယုတ်နင်းကြီး။ ဟမာန်တွာတ်ငှေါဘန်းသာငှေါ အလုပ်အွန်ဘင်းဆိတ်ကား ဟိန်အွန်ဘင်းအားခတေ လူထိုက်သဘင်းအတွာတ်ထှာမှာ။ ကျေမ်းကျေမ်းမှာဟက် ကျေမ်းမှာပါ အလာန်ကြီးဆာ။ 8မြို့တစ်မြို့ဘေ ဆာန်မှါခ့်ခါ အန်ဘင်းမြို့ဟက် သမီဆတာတ်ကား ဟနိမ်တေ ကြိုဆိုသဘန်းကား အန်တာတ် နောပ့်လားတေယုတ်ကြီး။ 9ကနာနင်းဘင်းဆိတ်တာတ်တေ ကုသအီဘန်း 'ဘုရားရှာန်သာသနာတော် ထုတ်အီကူဘင်းအချိန်ကား ထံပိန်' ညယ်အန်တာတ်တေငှေါကြီး။ 10အန်နိမ်စါန်းငှေါဒီ မြို့ဘင်းဆိတ်တာတ်ကား ဟနိမ်တေ အကြိုဆိုသဘန်းကား လမ်းစောက်ပေပူဘန်း 11'ဟနိမ်တေ ဆတီးအီဘင်းအနေယောက် အလေတာဘင်း ကာတေဒေ ခါသအက်ပဲကူ။ အန်နိမ်စါန်းငှေါဒီ ဘုရားရှာန်ဘင်း သာသနာတော် ထုတ်အီကူဘင်းအချိန်ကား ထံပိန်' ညယ်ငှေါကြီးရီ။ 12ဟနိမ်တေ ငါငှေါကာတ်ပင်းကား တရားစီရာန်ဒမား မာန်းရာတ်ထုတ်မှါခ့်ခါ သောဒုံမြို့ဘင်း သမီဆတေကား အန်ဘင်းမြို့ဘင်း သမီဆတာတ်ထာတ် အပြစ်စီရာန်သလား ပိုသောဆာတ်ဆာသကူ။ 13"အို ခေါရာဇိန်မြို့ဆားတာတ်၊ ဟနိမ်ကား မာန်းဂလာအဘိုကြီးရား။ ဗက်ဇဲဒမြို့ဆားတာတ်ရီးဒါး အန်နိမ်သဒါး မာန်းဂလာအဘိုကြီးရား။ ဟမာန်တွာတ်ငှေါဘန်းတာတ်ငှေါ ဟနိမ်ဘေကာရီဘင်း အံ့ဩသထာတ်မဲဘင်း နိမိတ်လက္ခဏာတေဒေ တုရုယောက် ဇိဒုန်မြို့တာတ်ပေ အွန်ကာရီဘန်းကား အန်ဘင်းမြို့ဘင်း သမီဆတာတ်ကား ဟလိန်းပါမှါခ့်ခါဟက် လျှော်ကြမ်းဆာန်ဆုန်တေဒေတော်ပန်း ကပွပ်ပေထုံးဘန်း နောင်တလူကြီးကူ။ 14တရားစီရာန်သဘင်း အချိန်မှါခ့်ခါရီးဒါး ဟနိမ်ကား တုရုယောက် ဇိဒုန်မြို့တာတ်ထာတ် ပိုသောခံသထှာကူ။ 15ကပရနောင်မြို့ဆားတာတ်၊ ဟနိမ်ကား ရွှေမြို့တော်ဘေ မြောက်စားခံသထာကူညယ် ကိုယ်ကာတ်ကိုယ် မာန်တာတ်နင်းကြီးလည်း။ ဟနိမ်ကား ငရဲပါဆာတ်လားခံသထှာကူ" ညယ်မိန့်သမှာ။ 16စီးမှါခ့်ခါ ကိုယ်တော်ကား "ဟနိမ်တူးတေ သက်ပင်းဆိတ်ကား ငါတူးဒေသက်ပင်းဆိတ်ထှာမှာ။ ဟနိမ်တေ အလက်ခံသဘင်းဆိတ်ရီးဒါး ငါတေ အလက်ခံသဘင်းဆိတ် ထှာကြီးဘန်း ငါတေလက်အခံသဘင်းဆိတ်ကား ငါတေ တာတ်နီဘင်း ဆိတ်တေရီးဒါး လက်အခံသဘင်းဆိတ်ထှာမှာ" ညယ်မိန့်တော်မူသမှာ။ 17တပယ့်တော် ခုနှစ်ဆယ်တာတ် ထုတ်ခါန်းကြီးရီမှါခ့်ခါ အန်တာတ်ကား အကြီးကျယ်မွန်းဘန်း "ကိုယ်တော်၊ အလေကား အမဲဘင်းနနူတေဒေ ကိုယ်တော်ဘင်း နာမယ်တေနပ်ပန်း အမိန့်အီမှါခ့်ခါ အန်တာတ်ကားသက်ကြီးမှာ" ညယ်လျှောက်တာန်သကြီးမှာ။ 18ကိုယ်တော်ရီးဒါး "ဟမုခ်ဟက် လျှပ်စီးလက်သနိမ် မာရ်နတ်အက်နီဘင်းနာတေ ငါကတုံန်ငါန်မှာ။ 19ငါကား ဟနိမ်တေ ကဖူးကန်းတေ၊ ကာန်းမြီးကောက်တေဒေ ဟယ်ပန်းကောင်ဘူရန်ကွန်းယောက် ဟနိမ်ရန်သူထှာဘင်း မာရ်နတ်တန်ခိုးတေဒေ နားရန်ကွန်း တန်ခိုးအာဏာတေဒေ အီပဲစီးဘန်းထှာမှာ။ 20အန်နိမ်စါန်းငှေါဒီ ဟနိမ်ကား အမဲဘင်းနနူတေဒေ ငါတ်ပူရန်ဘင်းဆယောက် မွန်းဘန်းအနင်းကြီးဆာ။ ဟနိမ်ဘင်း နာမည်တေဒေ ရွှေမြို့တော်ဘေ ရေးသပဲဘင်းနာ၌ဆာ မွန်းကြီး" ညယ်မိန့်သမှာ။ 21အန်၌မှါခ့်ခါ ကိုယ်တော်ယေရှုကား ဉာဏ်အလင်းတော်အနေယောက် "အဘင်းကမ္ဘာလောကယောက် ရွှေမြို့တော်တေ အစိုးရသဘင်း အဝါဘုရားရှာန်။ အရှာန်ကား ရွှေမြို့တော်ဘင်း အကြောင်းတေဒေ အမြော်အမြင်တုံန်းဘင်းဆိတ်တာတ်ယောက် ပညာငှါဘင်းဆိတ်တာတ်စဲ အမိန်းရှာတ်ခါကွန်း ကဆွန်းပဲဘန်း ပညာဉာဏ်နည်းသဘင်း သာမန်သမီဆာတာတ်တေဒေ နားလည်သရန်ကွန်း အွန်အီပဲဘင်းအတွာတ် အကြီးကျယ် ကျေးဇူးတုံန်းမှာ။ အမှာရီးဒါးအဝါဘုရားရှာန် အလိုတော်အတိုင်းထှာမှာ။ 22အဝါဘုရားရှာန်ကား ငါတေ အလုံးစုံတေ အီဘန်းပဲမှာ။ ဆားတော် ဟာဟမဲထှာမှာငှေါဘင်းတေ အဝါဘုရားရှာန်တစ်ပါးဆာ၌ မိန်းရှာတ်ခါလား အဝါဘုရားရှာန်ကား ဟာဟမဲထှာမှာငှေါဘင်းတေရီးဒါး ဆားတော်ယောက် ဆားတော်မယ်ပဲဘင်း ဆိတ်တာတ်ဟက်လွှဲသဘန်း ဟာဟမဲစဲ အမိန်းရှာတ်ခါး" ညယ်မိန့်တော်မူသမှာ။ 23စီးမှါခ့်ခါ ကိုယ်တော်ယေရှုကား ဟိန်တပယ့်တာတ်ပါလှည့်သဘန်း "အဘင်းနာတေဒေ ဟနိမ်ကတုံန်လူဘင်း အခွာမ့်လူဘင်းအတွာတ် ဟနိမ်ကား မာန်းဂလာငှါဘင်းဆိတ်တေ ထှာကြီးမှာ။ 24ဟနိမ်တေ ငါချီလားတေငှေါထှာဘန်းကား ပရောဖက်တာတ်ယောက် ရှာန်းပလာန်တေစဲ ဟနိမ်ကတုံန်လူကြီးနိမ် အကတုံန်ကြီးရီလူဝါး။ ဟနိမ်သက်ပူကြီးရီလူဘင်း နာတေဒေဆဲ အသက်ပူကြီးရီလူဝါး" ညယ်မိန့်တော်မူသမှာ။ 25ရအာမှါခ့်ခါ ကိုယ်တော်ကား သမီဆတာတ်တေ ဟောသကာ ဆွောန်သကာနင်းမှါခ့်ခါ ကျမ်းကျိန်းပေါ့ပင်း အိုးဆကြီးဟော်ဝါကား "ကိုယ်တော်၊ ဟာ၌မှါခ့်ခါစဲအရှီးဘင်းအဆာတ်တေ လူကွန်းငှေါဘန်းကား ဟမာန်တေအွန်ထှာကူဒေ" ညယ်ရဲဘန်း စိန်ယူကြီးမှာ။ 26အန်၌မှါခ့်ခါ ကိုယ်တော်ယေရှုကား "ကျမ်းကျိန်းဘေ ဟာနိမ်ရေးသကာပဲဒေ၊ အန်ဘင်းနာတေဒေ နာန်ဟာနိမ် သဘောပေါက်သောဒေ" ညယ်ပြန်သဘန်း စိန်ယူမှါခ့်ခါ 27အန်ဘင်းဆိတ်ကား "နာန်ဘုရားရှာန်တေ လာန်၊ အဆင်၊ နှလုံးပါ ဆွန်းမျိုးစလုံးယောက် ကြည်ညိုသကြီးညယ် ရေးသပဲနိမ် ကိုယ်ကျေမ်းပိုက်တာတ်တေရီးဒါး ကိုယ်ကာတ်ကိုယ် မစ်နိမ်မစ်ကြီး" ညယ်ရေးသပဲမှာ" ညယ်ပြန်သဘန်း လျှောက်တာန်သကြီးမှာ။ 28ကိုယ်တော်ရီးဒါး "ချီမှာ။ အန်နိမ်အွန်ဘန်းကား နာန်ကား ဟာ၌မှါခ့်ခါစဲ အရှီးဘင်းအဆာတ်တေ လူကူ" ညယ်မိန့်သမှာ။ 29အန်နိမ်စါန်းငှေါဒီ ကျမ်းပေါ့ပင်းအိုးဆကြီးကား ကိုယ်ကာတ်ကိုယ် မဲမှာငှေါဘင်းတေ ကာကာတ်ခွန် ကိုယ်တော်ယေရှုတေ "အန်နိမ်ငှေါဘန်းကား အလေကျေမ်းထာန်ကစက် ငှေါဘင်းကား ဟာဟမဲတေကား" ညယ်စိန်ယူမှါခ့်ခါ 30ကိုယ်တော်ကား "သမီဆာဟော်ဝါကား ဂျေရုဆလင်မြို့ဟက် ယေရိခေါမြို့ပါ လာန်ဘင်းလမ်းဘေ ဓါးပြတေရာက် ကတုံန်မှာ။ အန်ဘင်းဓါးပြတေကား ဟိန်တေ ရှီးထန်ကွန်း သာန်းဘန်း ဟိန်ဆာန်ဆုန်တေဒေရီးဒါး ဟွပ်ပန်းလာလာန်ဘဲကြီးမှာ။ 31ဂျူးပရောဟိတ်ဟော်ဝါကား အန်ဘင်းလမ်းအတိုင်း ဒီမှါခ့်ခါ ဒဏ်ရာတေယောက် ပေါ်နင်းဘင်း အန်ဘင်းသမီဆာတေ ကတုံန်ဒီဒါး တစ်ခြားလမ်းပါဟက် ကွာမ်းသဘန်းလာန်ဘဲကြီးမှာ။ 32အန်နိမ်ဒဒါး လေဝိအမျိုးနွယ် သမီဆာဟော်ဝါရီးဒါး အန်ဘင်းဘေထုတ်ရီမှါခ့်ခါ ဟိန်တေကတုံန်ဒီဒါး တခြားလမ်းပါဟက် ကွာမ်းသဘန်း လာန်ဘဲဟာန်းမှာ။ 33အန်နိမ်စါန်းငှေါဒီ အန်ဘင်းနေရာပါ ခရီးပူရီဘင်း ရှမာရိနယ်ဆားဟော်ဝါထုတ်အီမှါခ့်ခါ ဟိန်တေကတုံန်မယောက် အစန်နာန်ဘင်းအတွာတ် 34ဟိန်ပိုက်ပါလာန်ဘန်း ကနာလူဘင်းနာတေဒေ သံလွင်ဆလော၊ စပျစ်ဝလဲတေယောက်ဖောဘန်း အဝတ်ယောက် ပတ်သအီရာန်မှာ။ စီးမှါခ့်ခါ ဟိန်တေမြည်းစေါက်ပေ တာန်သဘန်း တည်းသလားလူဘင်း ကျေမ်းပါကော်လာန်ဘဲမှာ။ အန်ဘင်းကျေမ်းဘေထုတ်မှါခ့်ခါ ကနာနင်းဘင်းဆိတ်တေ ပြုစုစောင့်ရှောက်သအီမှာ။ 35နောက်မာန်းရာတ် ဟလာမ်းရားမှါခ့်ခါ ဟိန်ကား တည်းသဘင်းကျေမ်းပိုင်ရှင်တေ ဒေနာရီဖူးကလိန်းပါတ်တေအီဘန်း "အဘင်းကနာနင်းဘင်းဆိတ်တေ ပြုစုစောင့်လျှောက်သအီယုတ်။ ဟိန်တေပြုစုသဘန်း အဘင်းထာတ်ဆွန်ဘန်းရီးဒါး ငါဒီဟာန်းမှါခ့်ခါ အီဟာန်းကူ" ညယ်ငှေါပဘဲမှာ။ 36စီးမှါခ့်ခါ ကိုယ်တော်ယေရှုကား "အန်ဘင်းသမီဆာဆွန်းဟူးဘေ ဓါးပြတိုက်ခံသထှာပန်း သာန်းခံသထှာဘင်းဆိတ် ကျေမ်းထာန်ကစက်ကား ဟာဟမဲကား" ညယ်စိန်ယူမှာ။ 37အန်၌မှါခ့်ခါ အန်ဘင်းကျမ်းကျိန်းပေါ့ပင်း အိုးဆကြီးကား "ကနာနင်းဘင်းဆိတ်စေါက်ပေ အစန်ဘန်း အွန်အီဘင်းဆိတ်ထှာမှာ" ညယ်ငှေါမှါခ့်ခါ ကိုယ်တော်ကား "နာန်ရီးဒါး အန်ဘင်းအတိုင်းအွန်" ညယ်မိန့်တော်မူသမှာ။ 38စီးမှါခ့်ခါ ကိုယ်တော်ကား တပယ့်တာတ်ယောက်အတူတူ ဆာတ်သဘန်း ခရီးလာန်နင်းစာတ် ထိန်ထိန်းနူဘေ ထုတ်အာန်မှာ။ အန်ဘင်းထိန်ဘေ မာသညယ်ကော်ဘင်း အီးရှီဟော်ဝါကား ကိုယ်တော်ယောက် ဟိန်တပယ့်တော်တာတ်တေဒေ ဟိန်ကျေမ်းပါ ပါမ့်တာန်မှာ။ 39အီးရှီဘေ မာရိ ညယ်ကော်ဘင်း နရှီဟော်ဝါငှါမှာ။ မာရိကား ကိုယ်တော်မန်းဘေထုံးဘန်း တရားတော်တေဒေ သက်ပန်းနင်းမှာ။ 40မာသကား နန်တေအတွာတ် ဧည့်ခံသဒင် အလုပ်ရှုပ်သပန်းနင်းမှာ။ စီမှါခ့်ခါ မာသကား ကိုယ်တော်ပါလာန်ဘန်း "ကိုယ်တော်၊ ငါနရှီကား ကျေမ်းအလုပ်တေဒေ ငါဟော်ဝါဆာတေ အွန်တင်အတွာတ် သက်ပဲလာန်ဘဲဘင်းအတွာတ် ငါနင်းအွန်ဘုတ်တင်အတွာတ် ဟိန်တေငှေါအီယုတ်" ညယ်လျှောက်တာန်သမှာ။ 41အန်၌မှါခ့်ခါ ကိုယ်တော်ကား "မာသ၊ နာန်ကား အွန်တင်ကလောင်းတုံန်းအတွာတ် အဆင်တေရှုပ်သနင်းဒီဒါး 42အဟုတ်မလာပ် အွန်ထှာကူဘင်းနာကား စားနူ၌ငှါလား။ မာရိကား မဲဘင်းစားနူတေ မယ်စီးဘန်းဘင်းအတွာတ် အန်ဘင်းတေ ဟိန်ဟက် ဖယ်သလားအလူဘန်း" ညယ်မိန့်တော်မူသမှာ။
Currently Selected:
Luke 10: ktpv-rv
Highlight
Share
Copy
Want to have your highlights saved across all your devices? Sign up or sign in
This translation of the Kadu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
