Luke 7
7
1ကိုယ်တော်ယေရှုဟာ လူပရိတ်သတ်တိကို ဒေအကြောင်းအရာတိကို ဟောပြောသွန်သင်ပြီးရေအခါ ကပေရနောင်မြို့ကို ကြွတော်မူခရေ။ 2ယင်းမြို့မာ ရောမတပ်မှူးတစ်ယောက်a နီပြီးကေ သူ့မာ အလွန်တရာနှစ်သက်အားကိုးရရေ အစီခံတစ်ယောက်ဟိရေ။ ယင်းအစီခံဟာ ဖျားနီပနာ သီလုမျောပါး ဖြိုက်နီရေ။ 3ယင်းတပ်မှူးဟာ ကိုယ်တော်ရဲ့သတင်းကို ကြားရေအခါ သူ့အစီခံကို လာလို့ကုသဖို့အတွက် သူဟာ ဂျူးလူမျိုးခေါင်းဆောင်တချို့ကို ကိုယ်တော်ပါးကို လွှတ်လိုက်ပြီးကေ တောင်းဆိုခိုင်းလိုက်တေ။ 4ယင်းလူတိလည်း ကိုယ်တော်ပါးကို လားပနာ “ဒေတပ်မှူးဟာ ကိုယ်တော်ရဲ့အကူအညီကို ရထိုက်တေလူ ဖြိုက်ပါရေ။ 5အဇာဖြိုက်လို့ဆိုကေ သူဟာ ကျွန်နော်ရို့လူမျိုးတိကို ချိုက်ခင်ရေအတွက်ကြောင့် ကျွန်နော်ရို့အတွက် ဓမ္မာရုံတစ်ခုကိုလည်း ဆောက်လို့လှူဒါန်းပီးခရေလူလည်း ဖြိုက်ပါရေ” လို့အလေးအနက် တောင်းဆိုကတ်တေ။ 6ယင်းဟာကြောင့် ကိုယ်တော်ယေရှုဟာ သူရို့နဲ့တတူ လိုက်ပါတော်မူပနာ တပ်မှူးအိမ်နဲ့ ကောင်းမဝီးရေနီရာကို ရောက်လာရေအခါ တပ်မှူးဟာ သူ့မိတ်ဆွေတချို့ကိုလွှတ်လိုက်ပနာ ကိုယ်တော်ကို “အရှင်၊ ကျွန်နော့်အိမ်ကို အရှင်ကြွလာဟာ ကျွန်နော်နဲ့ မထိုက်တန်တဲ့အတွက် အပင်ပန်းခံပနာ ကြွလာတော်မမူပါကေ့။ 7ယင်းအပြင် ကျွန်နော်ဟာလည်း ကိုယ်တော်ပါးကို လာတွိ့ဖို့မထိုက်တန်လို့ထင်ပါရေ။ အရှင် အမိန့်ပီးလိုက်ဟာလောက်နဲ့ ကျွန်နော့်ရဲ့အစီခံဟာ ကျန်းမာလာပါလိမ့်မယ်။ 8ယင်းပိုင်ပြောရဟာက ကျွန်နော်ကိုယ်တိုင်လည်း အထက်အရာရှိရဲ့ လက်အောက်မှာ ဟိပိုင်မျိုး ကျွန်နော့်လက်အောက်မာလည်း တပ်သားတိမကန်ဟိပါရေ။ ကျွန်နော်က တပ်သားတစ်ယောက်ကို ‘လား’ လို့ပြောကေ သူဟာ လားရပနာ၊ ‘လာ’ လို့အမိန့်ပီးလိုက်ကေ သူဟာ လာရပါရေ။ ကျွန်နော့်အစီခံတိကို ‘ဒေဟာလုပ်’ လို့ပြောကေ သူရို့မာ လုပ်ရပါရေ” လို့လျှောက်တင်ခိုင်းလိုက်တေ။ 9ယင်းစကားကို ကိုယ်တော်ကြားတဲ့အခါ အံ့ဩလားပနာ သူ့နောက်ကလိုက်လာတဲ့လူတိကို လှည့်ကြည့်ပြီးကေ “အသင်ရို့ကို ငါပြောမေ။ အစ္စရေးလူမျိုးတိထဲမာ ဒေလောက်ယုံကြည်မှုကြီးရေလူကို မတွိ့ဖူးသိမ်း” လို့မိန့်တော်မူလိုက်တေ။ 10ယပြီးကေ တပ်မှူးစီလွှတ်လိုက်တေလူတိလည်း အိမ်ကို ပြန်ရောက်လာခါ ယင်းအစီခံဟာ လုံးဝနီပြန်လို့ကောင်းဟာကို တွိ့လိုက်ရရေ။ 11နောက်တစ်နိန့်မာ ကိုယ်တော်ဟာ သူ့ရဲ့တပည့်တော်တိနဲ့အတူတူ နာဣနလို့ခေါ်ရေမြို့ကို ကြွရေအခါ လူပရိတ်သတ်တိလည်း ကိုယ်တော်ရဲ့နောက်ကနီ လိုက်ပါလာကတ်တေ။ 12မြို့ဝင်ပေါက်နားကိုရောက်တေခါမာ လူသီအလောင်းတစ်လောင်းကို သင်္ဂြိုဟ်ဖို့အတွက် လူတစ်စုက အလောင်းစင်နဲ့ ထမ်းပနာ မြို့ပြင်ကို ထုတ်လာကတ်တေ။ သီနီရေလူဟာ မုဆိုးမတစ်ယောက်ရဲ့ တစ်ဦးတည်းသောသားဖြိုက်ပနာ မြို့သူမြို့သားတိကလည်း ယင်းမမါ့နဲ့အတူတူ လိုက်ပို့လာကတ်တေ။ 13ကိုယ်တော်က ယင်းမုဆိုးမကို မြင်ရေအခါ ယင်းမမါ့ကို ကောင်းသနားလားပြီးကေ သူမကို “မငိုပါကေ့” လို့မိန့်တော်မူလိုက်တေ။ 14ယေပနာ ကိုယ်တော်ဟာ လူတိထမ်းလာရေ အလောင်းစင်အနားကိုလားပနာ ယင်းအလောင်းစင်ကို လက်နဲ့ထိလိုက်တဲ့အခါ အလောင်းစင်ထမ်းလာရေလူတိက ရပ်လိုက်ကတ်တေ။ ယင်းခါ ကိုယ်တော်က “အချေ၊ အသင့်ကိုငါပြောမေ။ ထဖိ” လို့မိန့်လိုက်တေ။ 15ယေခါ သီနီရေလူဟာ ထထိုင်လိုက်ပနာ စလို့စကားပြောခရေ။ ကိုယ်တော်ကလည်း သူ့ကို သူ့အမိသည်ပါးကို ပြန်အပ်လိုက်တေ။ 16ယင်းခါ လူတိဟာလည်း အထိတ်တလန့်နဲ့ အံ့ဩလားခကတ်ပနာ “ငါ့ရို့မှာ မြင့်မြတ်တဲ့ပရောဖက်တစ်ပါး ပေါ်ထွန်းလာခယာ။ ဘုရားရှင်က သူ့ရဲ့လူမျိုးတိကို ကူညီဖို့ ရောက်လာရာ” လို့ဘုရားရှင်ကို ချီးမွမ်းကတ်တေ။ 17ကိုယ်တော်ရဲ့သတင်းတိဟာ ယုဒပြည်တစ်ခုလုံးနဲ့ အနီးနားပတ်ဝန်းကျင်က ဒေသတိအားလုံးကို ပျံ့လားခရေ။ 18ယပြီးဟာနဲ့ ရီနှိုက်မင်္ဂလာဆရာယောဟန်ရဲ့တပည့်တိဟာ ဒေအကြောင်းရာတိအားလုံးကို ယောဟန်ကို ပြောပြကတ်တေ။ ယေခါ သူဟာ တပည့်နှစ်ယောက်ကို ခေါ်လိုက်ပနာ 19အရှင်ပါးကို စီလွှတ်ပြီးကေ “အရှင်ဟာ ကြွလာတော်မူဖို့ဆိုရေအရှင်လား မဟုတ်ဘဲနဲ့ ကျွန်နော်ရို့ဟာ အရာတစ်ယောက်ယောက်ကို စောင့်ရဖို့သိမ်းလား” လို့မီးလျှောက်စီရေ။ 20ယင်းလူတိဟာ ကိုယ်တော်ယေရှုပါးသို့ ရောက်လာကတ်တေခါ “ရီနှိုက်မင်္ဂလာဆရာယောဟန်က ကျွန်နော်ရို့ကို ကိုယ်တော်ပါးကို လွှတ်လိုက်ပနာ ‘အရှင်ဟာ ကြွလာတော်မူဖို့ဆိုရေလူပါလား မဟုတ်ဘဲနဲ့ ကျွန်နော်ရို့ဟာ အရာတစ်ယောက်ယောက်ကို စောင့်ရဖို့သိမ်းလား’ လို့ မီးလျှောက်ဖို့အတွက် အရှင့်ပါးကို စီလွှတ်လိုက်ပါရေ” လို့လျှောက်လိုက်တေ။ 21ယင်းအချိန်မာ ကိုယ်တော်ဟာ အနာရောဂါသည်တိ၊ ဖျားနာနီတဲ့လူတိနဲ့ မကောင်းဆိုးဝါးဝင်ပူးခံနီရရေလူတိကို ကုသပီးပြီးကေ မျက်စိကန်းနီရေလူတိကိုလည်း မျက်စိပြန်မြင်ရအောင် ကုသပီးခရေ။ 22ကိုယ်တော်က ယောဟန်ရဲ့တပည့်တိကို “မတ်ရို့မြင်ခ၊ ကြားခဟာတိကို ယောဟန်ကို လားပြောလိုက်ပါ။ မျက်စိမမြင်ရေလူတိဟာ မျက်စိ ပြန်မြင်ကတ်ယာ။ ခြီတိလက်တိ မသန်စွမ်းရေလူတိဟာ လမ်းလျှောက်နိုင်ယာ။ အနာကြီးရောဂါသည်တိဟာ ရောဂါပျောက်လားခကတ်ယာ။ နားမကြားရေလူတိဟာ နားပြန်ကြားခယာ။ သီခရေလူတိလည်း ပြန်ရှင်ကတ်ယာ။ ဆင်းရဲရေလူတိလည်း မင်္ဂလာသတင်းကောင်းတိ ကြားနီကတ်ရယာ။ 23ငါ့ကို သံသယမရှိပဲယုံကြည်တဲ့လူတိဟာ ဘုရားရှင်ရဲ့မျက်နှာသာပီးခြင်းကို ခံရလိမ့်မယ်” လို့မိန့်တော်မူလိုက်တေ။ 24ယောဟန်ရဲ့တပည့်တိ ပြန်လားရေအခါ ကိုယ်တော်ဟာ ယောဟန်အကြောင်းကို လူထုပရိတ်သတ်ကိုဟောပြောခရေ။ ကိုယ်တော်က “အသင်ရို့ဟာ တောကန္တာရထဲမာ အဇာတိကို ကြည့်ဖို့ လားကတ်ရောင်။ လီတိုက်တိုင်းယိမ်းနီရေ ကျူပင်တိကိုလား။ 25ယင်းပိုင်မဟုတ်ကေ အဇာတိကိုမြင်ချင်လို့ လားကတ်ရောင်။ ဈီးကြီးတဲ့အဝတ်ကောင်းကို ဝတ်ထားရေလူတိကို မြင်ချင်ကတ်ဟာလား။ ယင်းပိုင်ဈီးကြီးရေ အဝတ်တိကို ဝတ်ထားပနာ စည်းစိမ်အပြည့်နဲ့နီရရေလူတိကို ရှင်ဘုရင်ရဲ့နန်းတော်ထဲမာရာ တွိ့နိုင်ဖို့။ 26ယင်းပိုင်မဟုတ်ဘဲ အဇာကိုမြင်ချင်လို့ ထွက်ကတ်ဟာရောင်။ ပရောဖက်တစ်ယောက်ကို ကြည့်ချင်လို့ လားကတ်ဟာလား။ မှန်ယေပါ့။ မတ်ရို့ကို ငါပြောချင်ဟာက ယောဟန်ဟာ ပရောဖက်တစ်ယောက်ထက် ပိုလို့ကြီးမြတ်တေ။ 27အယင့်အယင်က ပရောဖက်တစ်ယောက်က ကျမ်းစာထဲမာ ယောဟန်အကြောင်းကို ရေးထားဟာက ‘ငါဟာ ငါ့ရဲ့စေတမန်ကို သင့်ထက်အယင်စီလွှတ်ဖို့။ သူဟာ အသင့်ရဲ့လမ်းကို အလိုက်သင့် ပြင်ဆင်ပီးလိမ့်မေ’ ဆိုပနာ ဖြိုက်တေ။ 28မတ်ရို့ကို ငါပြောမေ။ မမါ့တိပါးကမွီးလာတဲ့လူတိထဲမာ ယောဟန်ထက် ကြီးမြတ်တေလူ တစ်ယောက်ချေလေ့မဟိ။ ယေတာလဲ ဘုရားရှင်ရဲ့သာသနာတော်ထဲက အရေးမပါဆုံးလူတောင်မှ ယောဟန်ထက် ပိုကြီးမြတ်တေ” လို့မိန့်တော်မူခရေ။ 29ယေခါ အခွန်ကောက်သမားတိကစလို့ လူတိဟာ ယောဟန်ပါးမာ ရီနှိုက်မင်္ဂလာကို ခံယူခကတ်ဟာကြောင့် ကိုယ်တော်ယေရှုရဲ့စကားကို ကြားရတဲ့အခါ ဘုရားရှင်ရဲ့လမ်းစဉ်ဟာ မှန်ကန်ကြောင်းကို ဝန်ခံကတ်တေ။ 30ယေတာလဲ ယောဟန်ပါးမာ ရီနှိုက်မင်္ဂလာမခံယူထားတဲ့ ဖာရိရှဲတိနဲ့ကျမ်းတတ်ဆရာတိက သူရို့အတွက် ဘုရားရှင်ကြံစည်ထားတော်မူရေအရာတိကို ငြင်းပယ်ခကတ်တေ။ 31ယပြီးကေ ကိုယ်တော်က ဆက်လို့ပြောခဟာက “ဒေခေတ်ကာလလူတိကို ငါက အဇာနဲ့နှိုင်းရဖို့ရောင်။ သူရို့ဟာ အဇာနဲ့တူရောင်ဆိုကေ 32သူရို့က ဈီးထဲမာထိုင်ပနာ ‘ငါရို့က မတ်ရို့အတွက် ပလွေကို မှုတ်ပြတာလည်းသို့ မတ်ရို့က မကကတ်။ ငါရို့က ငိုချင်တဲ့သီချင်းတိ ဆိုပြနီတာလည်း မတ်ရို့ မငိုကတ်’ လို့ အချင်းချင်း အော်ပြောနီကတ်တေ အစိတ်ကေချေတိနဲ့တူရေ။ 33အဇာဖြိုက်လို့ဆိုကေ ယောဟန်ဟာ ပုံမှန်အစားအစာကိုလည်းမစား၊ မူးစီရေစပျိုက်ရည်တိကိုလည်းမသောက်ဘဲ လားလာနီဟာကို ‘ယောဟန်ဟာ မကောင်းဆိုးဝါးဝင်ပူးနီရေလူ’ လို့အသင်ရို့ပြောကတ်တေ။ 34ယင်းပိုင်မျိုး လူ့သားတော်က စားသောက်နီပြန်ကေဖြိုက်ဖြိုက်၊ လားလာနီကေဖြိုက်ဖြိုက် အသင်ရို့က ‘ဒေလူကို ကြည့်ပါ။ သူဟာ အစားမက်ရေလူဖြိုက်ပနာ အခွန်ကောက်တေလူတိ၊ အပြစ်ဒုစရိုက်သားတိနဲ့ အပေါင်းအသင်းဖွဲ့ပနာ စားသောက်နီရေ’ လို့ပြောကတ်တေ။ 35ယေတာလဲ ဘုရားရှင်ရဲ့ ဉာဏ်ပညာက မှန်ကန်တဲ့အကြောင်းကို သူ့ကိုလက်ခံတဲ့လူကတဆင့် သက်သီပြနီပါရေ” လို့မိန့်တော်မူခရေ။ 36ယပြီးကေ ရှိမုန်လို့ခေါ်တဲ့ဖာရိရှဲတစ်ယောက်ဟာ ကိုယ်တော်ယေရှုကို သူနဲ့တတူ သူ့အိမ်မာ ညဇာဖက်ထမင်းစားဖို့ ပင့်ဖိတ်လိုက်တေ။ ယင်းဟာကြောင့် ကိုယ်တော်ဟာ ယင်းလူရဲ့အိမ်ကို ကြွတော်မူပနာ စားသောက်ဖို့အတွက် စားပွဲမာထိုင်တော်မူခရေb။ 37ယင်းမြို့မာ အပြစ်ဒုစရိုက်များတဲ့မမါ့တစ်ယောက် ဟိခရေ။ ယင်းမမါ့ဟာ ဖာရိရှဲအိမ်မာ ကိုယ်တော် ညဖက်ထမင်းစားနီဟာကို ကြားသိရဟာကြောင့် သူမဟာ အကြီးကျယ်ဈီးကြီးရေ ဆီမွှီးတစ်ပုလင်းကိုယူပနာ ယင်းနီရာကိုလာခရေ။ 38ယပြီးကေ ယင်းမမါ့ဟာ ကိုယ်တော်ရဲ့အနောက်ကိုလာပြီးကေ ရပ်ပနာငိုရင်းနဲ့ သူမရဲ့မျက်ရည်တိဟာ ကိုယ်တော်ရဲ့ ခြီထောက်ကို စွတ်လားဟာကြောင့် သူမရဲ့ဆံပင်တိနဲ့ သုတ်ပီးလိုက်တေ။ ယေပနာ ကိုယ်တော်ရဲ့ ခြီတော်အစုံကို နမ်းလိုက်ပြီးကေ ဆီမွှီးနဲ့ လိမ်းပီးခရေ။ 39ယေခါ ကိုယ်တော်ကို ဖိတ်ထားရေ ဖာရိရှဲမြင်ရေအခါ “ဒေလူဟာ ပရောဖက်မှန်ရေဆိုကေ သူ့ကို လာထိရေမမါ့ဟာ ပဇောင်ပိုင်မမါ့မျိုး ဖြိုက်တေဆိုဟာကို သိသင့်ရေ။ အဇာဖြိုက်လို့ဆိုကေ ယင်းမမါ့ဟာ အပြစ်ဒုစရိုက်များတဲ့မမါ့ ဖြိုက်တေ” လို့စိတ်ထဲမာ စိုင်းစားနီခရေ။ 40ကိုယ်တော်က ယင်းဖာရိရှဲကို “ရှိမုန်၊ အသင့်ကို ငါပြောစရာတစ်ခုဟိရေ” လို့မိန့်တော်မူလိုက်တေခါ ရှိမုန်က “ပြောပါ၊ ဆရာ” လို့လျှောက်လိုက်တေ။ 41ကိုယ်တော်က “ပေသာချေးရေလူတစ်ယောက်တည်းပါးမာ လူနှစ်ယောက်ဟာ ပေသာချေးကတ်တေ။ တစ်ယောက်က ဒေနာရီဒင်္ဂါးcငါးရာ၊ အရာတစ်ယောက်က ဒေနာရီဒင်္ဂါးငါးဆယ် အကြွီးတင်နီရေ။ 42သူရို့ဟာ အကြွီးရှင်ကို ပြန်မဆပ်နိုင်ကတ်ယာဖြိုက်ဟာကြောင့် အကြွီးရှင်က သူရို့ နှစ်ယောက်စလုံးရဲ့အကြွီးတိကို ပြန်ပီးစရာမလိုယာလို့ ပြောလိုက်တေဆိုကေ အသူက အကြွီးရှင်ကို ပိုလို့ကျေးဇူးတင်ဖို့ရောင်” လို့မီးလိုက်တေ။ 43ရှိမုန်က “ပေသာအများကြီးချေးထားရေလူက ပိုလို့ကျေးဇူးတင်လိမ့်မေလို့ ငါထင်ရေ” ဆိုပနာ ပြန်လျှောက်လိုက်တေ။ ကိုယ်တော်က “သင်ထင်ဟာ မှန်ရေ” လို့မိန့်တော်မူလိုက်တေ။ 44ယပြီးကေ ကိုယ်တော်က ယင်းမမါ့ဘက်ကို ပြန်လှည့်ကြည့်လိုက်ပနာ ရှိမုန်ကို “ဒေမမါ့ကို မြင်လား။ အသင့်အိမ်ကို ငါကြွလာရေအခါ အသင်ဟာ ငါ့ခြီထောက်ကိုဆီးဖို့ ရီမပီးခတာလဲ သူမက ငါ့ခြီထောက်ကို သူ့မျက်ရည်တိနဲ့ ဆီးပီးခပနာ သူ့ဆံပင်တိနဲ့ သုတ်ပီးခရေ။ 45ငါကြွလာရေအခါမှာလည်း အသင်ဟာ ငါ့ကို နမ်းလို့မကြိုဆိုခ။ ယေတာလဲ သူမကကျကေ ငါဝင်လာတဲ့အချိန်ကစလို့ ငါ့ခြီထောက်ကို ဆက်တိုက်နမ်းခရေd။ 46အသင်ဟာ ငါ့ခေါင်းကို သံလွင်ဆီနဲ့ မလိမ်းပီးခကေလည်း သူမက အကြီးကျယ်ဈီးကြီးတဲ့ဆီမွှီးနဲ့ ငါ့ခြီထောက်ကို လိမ်းပီးခရေ။ 47ယင်းဟာကြောင့် အသင့်ကိုငါပြောချင်ဟာက ဒေမမါ့ရဲ့ အပြစ်တိ အများကြီးကို ခွင့်လွှတ်ခံရဟာက သူမရဲ့ ချိုက်ခြင်းမေတ္တာတရားကြီးမားဟာကို ပြသနီဟာဖြိုက်ကြောင့်တေ။ ယကေလဲ အနည်းချေရာ ခွင့်လွှတ်ခံရရေလူဟာ ချိုက်ခြင်းမေတ္တာအနည်းချေကိုရာ ပြရေ” လို့မိန့်တော်မူခရေ။ 48ယပြီးကေ ကိုယ်တော်က ယင်းမမါ့ကို “သင့်အပြစ်ဒုစရိုက်အားလုံးကို ခွင့်လွှတ်လိုက်ယာ” လို့မိန့်တော်မူလိုက်တေ။ 49ယေခါ စားပွဲမာ ကိုယ်တော်နဲ့အတူတူထိုင်နီကတ်တေ အရာလူတိက “အပြစ်ဒုစရိုက်ကိုတောင်မှ ခွင့်လွှတ်နိုင်တဲ့ ဒေလူဟာ အသူရောင်” လို့အချင်းချင်း ပြောနီကတ်တေ။ 50ယေတာလဲသို့ ကိုယ်တော်ယေရှုက ယင်းမမါ့ကို “အသင့်ရဲ့ ယုံကြည်ခြင်းက အသင့်ကို ကယ်တင်လိုက်ဟာဖြိုက်ဟာကြောင့် ငြိမ်းငြိမ်းချမ်းချမ်းလားနိုင်ရာ” လို့မိန့်တော်မူလိုက်တေ။
Currently Selected:
Luke 7: stpv-rv
Highlight
Share
Copy
Want to have your highlights saved across all your devices? Sign up or sign in
This translation of the Southern Rakhine Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
