Luke 17
17
1အယ်းနွေ့ာဂ်မောင် ကွိုယ်တော်ယေရှုဟော် ဆပယ့်တိုတွို့ကွို “လူရယ်ဟော် ဖရောဆန်ကွို နောခေါင်ခှန်းမဆိစေဖွို့ အချောလူမျောကွို အပှဂ်ဒုစရောဂ်ကျူးလွမ်မိစေဖွို့ ဖျောယွောင်းဆွီးဆွောင်မောင် အဆေအချော်ပယ်းဖှဂ်ရယ်။ ဟော်ပေမယ့်လယ်း တယွောဂ်ယွောဂ်ကွို အပှဂ်ဒုစရောဂ်ကျူးလွမ်စေဖွို့ ဖျောယွောင်းဆွီးဆွောင်ရယ့်လူဟော် ကော်တရော်ဆားရားဒုက်ခေါ့နောင့်ကျုန်တွိယော့လောဂ်မောင်ဖှဂ်ရယ်။ 2အယ်းလူဟော် ဆူတပေါကွို အပှဂ်ကျူးလွမ်စေမယ့်အစော ကွိုယ့်လည်ဖန်းကွို ကျွိုးကွမ်းစွဂ်ကွောဂ်တုန်းဆွားပွီး ပန်လာထားကွို ခွိင်ခှော့တော်ကော့ ပွိုပွီးကွောင်းပေါ်လောဂ်မယ်။ 3အယ်းယော်ကျွောင့် နန်တွို့ဟော် တပေါဆူကွို အပှဂ်ဒုစရောဂ်ကျူးလွမ်စေဖွို့အတွ လိင်ညော်ဖျောယွောင်းခှင်း မပှုလုတ်ကျော့ဖွို့ဆတိထောကျော့ပေါ်။ ငေါ့ကွို ယုန်ကျည်ဆူတဦးဟော် အပှဂ်ဒုစရောဂ်ကျူးလွမ်မိယန် ဆုန်းမော့ပေးကျော့ပေါ်။ အယ်းလူဟော် ဆူကျူးလွမ်ရယ့်အပှဂ်ဒုစရောဂ်မျောကွို နွောင်တော့ယော့ခယ့်ယန် ခွမ့်ခွှဂ်ပေးကျော့ပေါ်။ 4ငေါ့ကွို ယုန်ကျည်ရယ့်ဆူဟော် နန့်ကွိုတနေ့ထယ်းမောင်ပယ်း အကျိင်အမျောကျွီး ပှဂ်မောမိပွီး ဆူပှဂ်မောရယ့် အကျိင်တောင်းအတွ နန့်နောင်းကွိုလော်ပွီး ခွမ့်ခွှဂ်ပေးပေါ်လွို့တွောင်းပန်ယန် နန်ဟော်ဆူ့ကွိုခွမ့်ခွှဂ်ပေးယော့မောင်ဖှဂ်ရယ်” လွို့ မိင့်တိုမူလေရယ်။ 5အယ်းအခေါ် အထူးဆပယ့်တိုတွို့ခေါ့ ကွိုယ်တော်ယေရှုကွို “ဖရောဆန်အပို ထောဆိရယ့် ငေါ်တွို့ယယ့်ယုန်ကျည်ချကွို ပွိုပွီးခေါင်မော်လော်စေဖွို့အတွ ငေါ်တွို့ကွို ကူညီပေးတိုမူပေါ်” လွို့ ရွှောဂ်တန်ကျော့လေရယ်။ 6အယ်းအခေါ် ကွိုယ်တော်ယေရှုခေါ့ “နန်တွို့ဟော် ဖရောဆန်ကွို မွိညမ်းစယ့်လွောဂ်ပယ့်ဆိရယ့် ယုန်ကျည်ခှန်းဆိကျော့ယန် ကော်တရော်ကျွီးရယ့်အပန်ကျွီးကွို အမှဂ်ခေါ့နေကွှဂ်ထွိပွီး ပန်လာထားမောင်ဆိုးပွီးပွေါဂ်ပေါ်လွို့ အမိင့်ပေးယန် နန်တွို့အမိင့်ပေးရယ့်အတောင်း အယ်းအပန်ဟော် ရွိဆိုးပွီး ပန်လာထားမောင်အဆေအချော်ပွေါဂ်ယွောဂ်နေလောဂ် မောင်ဖှဂ်ရယ်။အယ်းအခေါ် ကွိုယ်တော်ယေရှုခေါ့ “နန်တွို့ဟော် ဖရောဆန်ကွို မွိညမ်းစယ့်လွောဂ်ပယ့်ဆိရယ့် ယုန်ကျည်ခှန်းဆိကျော့ယန် ကော်တရော်ကျွီးရယ့်အပန်ကျွီးကွို အမှဂ်ခေါ့နေကွှဂ်ထွိပွီး ပန်လာထားမောင်ဆိုးပွီးပွေါဂ်ပေါ်လွို့ အမိင့်ပေးယန် နန်တွို့အမိင့်ပေးရယ့်အတောင်း အယ်းအပန်ဟော် ရွိဆိုးပွီး ပန်လာထားမောင်အဆေအချော်ပွေါဂ်ယွောဂ်နေလောဂ် မောင်ဖှဂ်ရယ်။ 7နန်တွို့ထားမောင် အစေခေါင်တယွောဂ်ဆိရယ်ဆွိုပေါ်စွို့။ အယ်းအစေခေါင်ဟော် သိုးကွှောင်းယော်ခေါ့နေ အယ်းလွိုမောင့်မဟွိ လာထားခေါ့နေ ပှန်လော်ရယ့်အခေါ် ‘လော်ပေါ်၊ ထောင်ပွီး စောဆွောဂ်ပေါ်’ လွို့ နန်တွို့ ဟိုးမလော။ 8အယ်းအစော နန်တွို့ဟော် အစေခေါင်ကွို ‘နန်ယော် သန့်ရှင်းရယ့်အဝဂ်အစောမျောကွို လားပွီး ငေါ်စောဆွောဂ်ဖွို့အတွ အစောအစော်မျောကွိုပှန်ဆန်ပေါ်။ ငေါ်စောဆွောဂ်ပွီးရယ့်အထိ ငေါ့ကွိုကျွယ်းမွယ်းပှုစုပေါ်။ ငေါ်ဟော်စောဆွောဂ်ပွီးမောင့် နန်ဟော်စောဆွောဂ်ပေါ်’ လွို့ပယ်းဟိုးကျော့လောဂ်မောင်ဖှဂ်ရယ်။ 9အစေခေါင်ဟော် စေခေါင်းရယ့်အတောင်း ဆူ့ယယ့် တော်ဝမ်ဝဂ်တရောကွို လုတ်ဆွောင်ယော့ခှန်းဖှဂ်တော်ကျွောင့် နန်တွို့ဟော် ဆူ့ကွို ကျယ်းဇူးတန်မောင်မဟွိပေါ်။ 10အယ်းနည်းတူပယ်း နန်တွို့ဟော် ဖရောဆန်မိင့်တိုမူသမျောတွို့ကွို လုတ်ဆွောင်ပွီးစီးရယ့်အခေါ် ‘ငေါ်တွို့ဟော် အစေခေါင်မျောပယ်းဖှဂ်ပွီး ကျယ်းဇူးတန်ခှန်းကွို ခေါင်စောထောဂ်ရယ့်ဆူမျောမဟွိကျော့ပေါ်။ ငေါ်တွို့ဟော် ငေါ်တွို့ယယ့်တော်ဝမ်မျောကွိုပွီးစီးအွောင် လုတ်ဆွောင်ခယ့်ကျော့ခှန်းပယ်းဖှဂ်ရယ်’ လွို့ဟိုးဆွိုကျော့ပေါ်” လွို့မိင့်တိုမူလေရယ်။ 1111 တနေ့မောင် ကွိုယ်တော်ယေရှုဟော် ဆူ့ယယ့်ဆပယ့်တိုမျောနောင့်အတူ ဂျေရုဆလင်မွှို့နောင်းကျို့တိုမူခှိင် ရှမာရိပှယ်နောင့် ဂါလိလဲပှယ်တွို့ကျောမောင်ဆိရယ့် နာစောဂ်အရောဂ်ကွိုဖှဂ်ဆိုးတိုမူရယ်။ 12ကွိုယ်တော်နောင့် ဆူ့ယယ့်ဆပည့်တိုတွို့ဟော် ဝိုတဝိုနောင်းဝမ်တိုမူရယ့်အခေါ် အနော်ကျွီးရိုးကော်စွားကောဂ်နေရယ့် လူဆာဦးတွို့ဟော် ကွိုယ်တော်ကွို လော်ယွောဂ်တွိဆုန်ကျော့ပေမယ့် ကွိုယ်တော်အနီးနောကွို မဆိုးခယ့်ကျော့ပေါ်။ 13အယ်းနွောဂ် ဆူတွို့ဟော် “ငေါ်တွို့ယယ့်အဆန် ကွိုယ်တော်ယေရှု၊ ငေါ်တွို့ကွိုဆနောတိုမူပေါ်။ ငေါ်တွို့ကွို ကုဆော့ပေးတိုမူပေါ်” လွို့ကွိုယ်တော်ကွို ရွှောဂ်တန်ကျော့လေရယ်။ 14ကွိုယ်တော်ယေရှုဟော် ဆူတွို့ကွိုမျိုပွီးရယ့်နွောဂ်မောင် “နန်တွို့ဟော် ဂျေရုဆလင်မွှို့မောင်ဆိရယ့် ပုရောဟိတ်မျောနောင်းဆိုးပွီး ကွိုယ့်တကွိုယ်ကွိုပျော့ကျော့ပေါ် အယ်းလွိုမောင့် နန်တွို့ယယ့်အနော်ရိုးကော်ပျွောဂ်ကန်းဆိုးတော်ကွို မျိုကျော့လောဂ်မယ်” လွို့ မိင့်တိုမူရယ်။ ဆူတွို့ ဆိုးနေရယ့်အခှိင်မောင်ပယ်း ဆူတွို့ယယ့် အနော်ရိုးကော်ဟော် ပျွောဂ်ကန်းဆိုးခယ့်လေရယ်။ 15အယ်းဆူတွို့ထားခေါ့တယွောဂ်ဟော် ဆူ့ယယ့်အနော်ကျွီးရိုးကော် ပျွောဂ်ကန်းဆိုးကျွောင်း ဆိဆယော့ရယ့်အခေါ် ကှာလွောင်ရယ့်အဆောင်နောင့် ဖရောဆန်ယယ့်ဂုဏ်ကျယ်းဇူးတိုကွို ဝုန်းမွှောဂ်ဝုန်းဆော်ခှီးမွမ်းယန်း ကွိုယ်တော်ယေရှုဆိယော်ကွို ပှန်လော်ခယ့်လေရယ်။ 16အယ်းနွေ့ာဂ်မောင် ဆူဟော် ကွိုယ်တော်ယယ့်ချေတိုရန်းမောင် ပှောပှောဝို့ ဦးညွှဂ်ပွီး ကွိုယ်တော်ကွိုကျယ်းဇူးစကောဟိုးလေရယ်။ အယ်းလူဟော် ရှမာရိပှယ်ဆောဖှဂ်ပွီးဂျူးလူမျွိုးမဟွိပေါ်။ 17အယ်းအခေါ် ကွိုယ်တော်ယေရှုခေါ့ “အနော်ကျွီးရိုးကော်စွား ကောဂ်နေရယ့်လူဆာယွောဂ်ကွို ငေါ်ကုပေးခယ့်ရယ်။ ဟော်လူမျွိုးချောခေါ့လွားပွီး ကှင်ကွိုးယွောဂ်ဟော် စမော်လော” လွို့ မိင့်တိုမူရယ်။ 18ဟော်ဂျူးလူမျွိုးမဟွိရယ့် လူမျွိုးချောရှမာရိတန်တယွောဂ်ခေါ့ လွားပွီး ကှင်ရယ့်ကွိုးယွောဂ်ဟော် ဖရောဆန်ယယ့်ဂုဏ်ကျယ်းဇူးကွို ခှီးမွမ်းဖွို့ ပှန်လော်ခယ့်ခှန်းမဆိရယ့်အတွ ငေါ်ဟော်စိပျဂ်မိပေါ်ရယ်။ 19အယ်းနွောဂ်မောင် ကွိုယ်တော်ယေရှုခေါ့ အယ်းရှမာရိပှယ်ဆောကွို “ထော့ပွီး ဆိုးပေါ်။ နန်ဟော် ငေါ့ကွိုယုန်ကျည်ရယ့်အတွကျွောင့် နန့်ယယ့်အနော်ရိုးကော်ဟော် ပျွောဂ်ခယ့်ပီဖှဂ်ရယ်” လွို့ မိင့်တိုမူလေရယ်။ 20တနေ့မောင် ဖာရိရှဲတခှို့ခေါ့ ကွိုယ်တော်ယေရှုကွို “ဖရောဆန်ယယ့်ဆော်ဆနော်တိုဟော် စော်အခှိင်မောင်လော်မလော” လွို့မေးရွှောဂ်ကျော့ရယ့်အခေါ် ကွိုယ်တော်ယေရှုခေါ့ “ဖရောဆန်ယယ့်ဆော်ဆနော်တိုဟော် လော်နေပီ၊ ဟော်ပေမယ့်လယ်း နန်တွို့မျဂ်စိနောင့် မျိုနောင်လောဂ်မောင်မဟွိပေါ်။ 21ကျေ့ပေါ်လော။ ဖရောဆန်ယယ့်ဆော်ဆနော်တိုဟော် ဟော်အရောဂ်မောင်ဆိရယ် အယ်းအရောဂ်မောင်ဆိရယ် လွို့ လူတွို့ကော့ ဟိုးဆွိုကျော့လောဂ်မောင်မဟွိပေါ်။ စော်ကျွောင့်လောဟန်ကော ဖရောဆန်ယယ့်ဆော်ဆနော်တိုဟော် နန်တွို့အထားမောင် ဆိနေခယ့်ပွီးဖှဂ်ရယ်” လွို့ မိင့်တိုမူရယ်။ 22တဖန် ကွိုယ်တော်ယေရှုခေါ့ ဆူ့ယယ့်ဆပယ့်တိုမျောကွို “နန်တွို့ဟော် ငေါ်လူဆောတိုဆိနေရယ့် နေ့ရတ်မျောထားခေါ့တရတ်ကွိုတအွောင် ကော်တရော်တွိမျိုဖွို့အတွ အလွိုဆိကျော့ပေမယ့်လယ်း မတွိမျိုယော့မယ့်နေ့ရတ်မျော ယွောဂ်လော်လောဂ်မယ်။ 23နန်တွို့ကွို လူတွို့ခေါ့ ‘ကျေ့ကျော့ပေါ်၊ မေရှိယဟော် ဟော်အရောဂ်မောင်ဆိရယ်။ အယ်းလွိုမောင့်မဟွိ မေရှိယဟော် အယ်းအရောဂ်မောင်ဆိရယ်’ လွို့ ဟိုးကျော့ပေမယ့်လယ်း အပှင်ကွိုထွပွီး မချော်ဖွယ်ကျော့ဝါးနောင့် နန်တွို့ဆိနေရယ့်အရောဂ်မောင်ပယ်း နေထောင်ကျော့ပေါ်။ 24အကျွောင်းမောင်ကော ငေါ်လူဆောတိုကျို့လော်ရယ့်အခေါ်မောင် ကိုးကန်မောင်ဆီးပွေါဂ်လဂ်လွို့ ကိုးကန်တခုလုန်း လန်းလဂ်ဆိုးသလွိုမျွိုး လူတောင်းမျိုနောင်မယ့်ပုန်စောင်နောင့် ကျို့ယွောဂ်လော်မောင်ဖှဂ်ရယ့်အတွကျွောင့်ဖှဂ်ရယ်။ 25ဟော်ပေမယ့် အယ်းလွိုမဖျဂ်ပျဂ်ခန်မောင် ငေါ်လူ့ဆောတို့ဟော် ပှင်းထောင်ရယ့် ဆားရားဒုက်ခေါ့မျောကွို ခေါင်စောယော့မောင်ဖှဂ်ပွီး ခုနေ့မောင် အဆတ်ချန်နေထောင်ကျော့ရယ့် လူတွို့ယယ့် ညမ်းပါခှန်းကွို ခေါင်ယော့တို့မောင်ဖှဂ်ရယ်။ 26နောဧအဆဂ်ချန်နေခှိင်မောင် ဖှဂ်ပျဂ်ခယ့်ရယ့် ယေလွမ်းမွိုးခှန်းနောင့် မကျုန်တွိယော့ခန်မောင် လူတွို့ပှုမူနေထောင်ခယ့်ကျော့သလွိုမျွိုး ငေါ်လူဆောတိုပှန်ကျို့လော်မယ့် အခှိင်မတောင်ခန်မောင်လယ်း လူတွို့ဟော် အယန်ခေါ့အတောင်းပယ်း ပှုမူနေထောင်ကျော့လောဂ်မောင်ဖှဂ်ရယ်။ 27အယ်းအခိင်ကော့ လူရယ်ဟော် ဆူတွို့ပှုနေကျော့အတောင်း စောဆွောဂ်လောဂ်၊ လဂ်ထောဂ်လောဂ်၊ ပေးစောလောဂ်နောင့် နေနေခဲ့ကျော့ရယ်။ နောဧဟော် ဆူဆွောဂ်ထောရယ့်ခှယ်ထားကွို ဝမ်ယွောဂ်ရယ့်နေ့မတောင်မီအထိ လူရယ်ဟော် အယ်းအတောင်းပယ်း ဆဂ်လဂ်နေထောင်ခဲ့ကျော့ရယ်။ အယ်းယော်ကျွောင့် ရို့တရ ယေလွမ်းမွိုးခှန်းကှော့ယွောဂ်လော်ရယ့်အခေါ် ဆောင်းဖုန်းမပှင်ဖဂ်မောင်ဆိရယ့် လူအောလုန်းဟော် ယေနဂ်မွှုပ်ပွီး ဆေးဆုန်းခယ့်ကျော့လေရယ်။ 28အယ်းလွိုမျွိုးပယ်း လောတယယ့် လဂ်ထဂ်မောင် သောဒုံမွှို့ဆိ လူတွို့ဟော် အယန်ခေါဂ်လွိုမျွိုးပယ်း စောဆွောဂ်လောဂ်၊ ယွောင်းဝါလောဂ်၊ ဥယန်ချောင်မျောစောဂ်လောဂ်၊ အိင်ရယ်ဆွောဂ်လောဂ်နောင့် နေထောင်ခယ့်ကျော့သလွိုမျွိုး ငေါ်ပှန်ကျို့လော်မယ့်အခှိင်မောင်လယ်း လူတွို့ဟော် အယ်းလွိုမျွိုးပယ်း ပှုမူနေထောင်ကျော့လောဂ်မောင်ဖှဂ်ရယ်။ 29ဟော်ပေမယ့် လောတဟော် သောဒုံမွှို့ခေါ့နေ ထွဆိုးရယ့်နေ့မောင် ဖရောဆန်ဟော် မီးနောင့်အတူ လွောင်နေရယ့်ကွှောဂ်တုန်းမျောကွို ကိုးကန်ခေါ့နေ ကှော့စေပွီး လူအောလုန်းကွိုဆေကျေပျဂ်စီးစေခယ့်ရယ်။ 30အယ်းလွိုမျွိုးပယ်း ငေါ်လူဆောတို ပှန်ကျို့လော်မယ့်အခှိင်မောင်လယ်း နန်တွို့မျိုလန့်မထောရယ့်အယော်မျောဟော် ဟော်လွိုမျွိုးပယ်း တလန့်တဆန့်ဖှဂ်ပျဂ်လောဂ်မယ်။ 31အယ်းအခှိင်မောင် အိင်ခွေါင်မွိုးပိုမောင်ဆိနေကျော့ရယ့်လူ စူမဆွို ကွိုယ်ပေါင်ဆောင်ရယ့် ပစ္စည်းဥစ္စော်မျောကွို ယော့ယူဖွို့အတွ အိင်အွောဂ်ကွို မဆန်းကျော့နောင့်။ လာကွမ်းထားမောင်ဆိနေကျော့ရယ့် စူမဆွို ကွိုယ့်ယယ့်အိင်ခေါ့နေ ကွိုယ်ပေါင်ဆောင်ရယ့် ပစ္စည်းဥစ္စော်မျောကွို ယော့ယူဖွို့အတွ အိင်ကွို မပှန်ကျော့နောင့်။ 32လောတယယ့်မိင်းမော့a စလွိုမျွိုး ဖှဂ်ပျဂ်ခယ့်သလောဆွိုတော်ကွို ဆတိယော့ကျော့ပေါ်။ 33အကျွောင်းမောင်ကော ဟော်လိုးကော့မောင် ကွိုယ့်အဆဂ်ကွို ကာတန်လွိုရယ့်လူ စူမဆွို နိစ္စော့ထော်ဝရော့အဆဂ်ကွို ယော့မောင်မဟွိပေမယ့်လယ်း ငေါ့အတွကျွောင့်နောင့် ကွိုယ့်အဆဂ်ကွိုတအွောင် စွမ့်နောင်ရယ့်စိဆိယန် နိစ္စော့ထော်ဝရော့အဆတ်ကွို ယော့လောဂ်မောင် ဖှဂ်ရယ်။ 34နန်တွို့ကွို ငေါ်ဟိုးခှန်တော်ကော ငေါ်ပှန်ကျို့လော်မယ့်ညော့မောင် အိယော်တခုထယ်းပိုမောင် အိနေရယ့် လူနေယွောဂ်ထားခေါ့ ငေါ့ကွိုယ်ယုန်ကျည်ဆူတယွောဂ်ကွိုပဲ ဆွယ်မွှို့တိုကွို ခိုဆွောင်ခှန်းခေါင်ယော့မောင်ဖှဂ်ပွီး ငေါ့ကွိုမယုန်ကျည်ဆူတယွောဂ်ကွိုကော ခှန်ထောခယ့်မောင် အဆေအချော်ပယ်းဖှဂ်ရယ်။ နန်တွို့ကွို ငေါ်ဟိုးခှန်တော်ကော ငေါ်ပှန်ကျို့လော်မယ့်ညော့မောင် အိယော်တခုထယ်းပိုမောင် အိနေရယ့် လူနေယွောဂ်ထားခေါ့ ငေါ့ကွိုယ်ယုန်ကျည်ဆူတယွောဂ်ကွိုပဲ ဆွယ်မွှို့တိုကွို ခိုဆွောင်ခှန်းခေါင်ယော့မောင်ဖှဂ်ပွီး ငေါ့ကွိုမယုန်ကျည်ဆူတယွောဂ်ကွိုကော ခှန်ထောခယ့်မောင် အဆေအချော်ပယ်းဖှဂ်ရယ်။ 35တနေယော်ထယ်းမောင် စပေါကျွိနေကျော့ရယ့် အမျွိုးဆမီးနေယွောဂ်ထားခေါ့ ငေါ့ကွိုယ်ယုန်ကျည်ဆူတယွောဂ်ကွိုပဲ ဆွယ်မွှို့တိုကွို ခိုဆွောင်ခှန်းခေါင်ယော့မောင်ဖှဂ်ပွီး ငေါ့ကွိုမယုန်ကျည်ဆူတယွောဂ်ကွိုကော ခှန်ထောခယ့်မောင် ဖှဂ်ရယ်။ 36တနေယော်ထယ်းမောင် လာလုတ်နေကျော့ရယ့်လူနေယွောဂ် ထားခေါ့ ငေါ့ကွိုယ်ယုန်ကျည်ဆူတယွောဂ်ကွိုပဲ ဆွယ်မွှို့တိုကွို ခိုဆွောင်ခှန်းခေါင်ယော့မောင်ဖှဂ်ပွီး ခိုဆွောင်ဆိုးမောင်ဖှဂ်ပွီး ငေါ့ကွိုမယုန်ကျည်ရယ့်ဆူကွိုကော ခှန်ထောလောဂ်မောင်ဖှဂ်ရယ်” လွို့မိင့်တိုမူတော်ကျွောင့် 37ဆပယ်တိုတွို့ခေါ့ ကွိုယ်တော်ကွို “ကွိုယ်တော်၊ ဟော်အယော်မျောဟော် စော်အရောဂ်မောင်ဖှဂ်ပျဂ်ကျော့မလော” လွို့ မေးရွှောဂ်ကျော့ပွီး ကွိုယ်တော်ခေါ့ “လန်းတော့ငတွို့စုဝေးနေကျော့ရယ့်ဟော်ကွို ကျေ့ပွီး အလွောင်းကွောင်မျော စော်အရောဂ်မောင်ဆိကျော့ရယ်ဆွိုတော်ကွို လူတောင်းဆိဆကျော့သလွိုမျွိုး ဟော်အယော်မျောဖှဂ်ပျဂ်လော်မယ့် နေယော်ကွိုလယ်း လူတောင်းခေါ့ ဆိဆကျော့မောင်ဖှဂ်ရယ်” လွို့ မိင့်တိုမူခယ့်လေရယ်။
Currently Selected:
Luke 17: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
