Luke 16
16
1အယ်းနွေ့ာဂ်မောင် ကွိုယ်တော်ယေရှုဟော် ဆပယ့်တိုရယ်ကွို ပုန်ဥဖမောင်တခုနောင့် ဆဂ်လဂ်ပွီး မိင့်တိုမူတော်ခေါ့ “တခေါ်ခေါ့ ဆဌေးတယွောဂ်ဟော် ဆူ့ယယ့်လုတ်ငန်းကွို စီမံခန့်ခွားဖွို့ ဘန်တော်ထိင်းတယွောဂ်ကွို ခန့်ထောလေရယ်။ အယ်းဘန်တော်ထိင်းဟော် ဆဌေးယယ့် ပစ္စည်းဥစ္စော်မျောကွို ဖွှိင်းစောနေကျွောင်း အချောဆူမျောခေါ့ တောင်ကျောကျော့ရယ့်အတွ ဆဌေးခေါ့ဆိဆဆိုးလေရယ်။ 2အယ်းဟော်ကျွောင့် ဆဌေးဟော် ဆူ့ကွိုခိုပွီး ‘နန်ဟော် ငေါ့ယယ့် ပစ္စည်းဥစ္စော်မျောကွို ဖွှိင်းနေကျွောင်း တောင်ကျောကျော့လွို့ ငေါ်ကျောဆိယော့ရယ်။ အယ်းနန်လွို့ နန်ရယ်းမတ်ထောရယ့် ပိဆင်စရန်းမျောကွို ငေါ့ကွိုပေးပေါ်။ နန့်ကွို ဘန်တော်ထိင်းနေယော်မောင် ဆဂ်ပွီးမခန့်ထောနောင်တို့ဘူး’ လွို့ ဟိုးလေရယ်။ 3အယ်းအခေါ် ဘန်တော်ထိင်းခေါ့ ‘ငေါ်စလွိုမျွိုးလုတ်ယော့မလော။ ဆဌေးခေါ့ ငေါ့ကွို ဘန်တော်ထိင်းအလုတ်ခေါ့ ထွိလောဂ်ပီ။ ငေါ်ဟော် မှေတူးဆမောအဖှဂ် အလုတ်ကျောင်းလုတ်ဖွို့လယ်း အောအန်မဆိ၊ တွောင်းစောဖွို့လယ်း ချရယ်။ 4အယ်းအလုတ်ခေါ့ ထွိပါခေါင်ယော့ပွီးယန် လူရယ်ခေါ့ ငေါ့ကွို ဆူတွို့ယယ့်အိင်ရယ်မောင် လဂ်ခေါင်ကျွိုဆွိုကျော့ဖွို့ စလွိုလုတ်ယော့မလောဆွိုတော် ငေါ်ဆိဆပီ’ လွို့ကွိုယ့်ကွိုကွိုယ် တွယ်းလေရယ်။ 5အယ်းယော်ကျွောင့် ဆူဟော် ဆူ့ရယ့်ဆဌေးနောင်းမောင် အကျွေးပေးစရော်ကှန်ဆိရယ့်ဆူအောလုန်းကွို ခိုလောဂ်ပွီး ပထမော့ဆုန်းတယွောဂ်ကွို ‘နန်ဟော် ငေါ့ယယ့်ဆဌေးနောင်းမောင် အကျွေးစလွောဂ်ဆိသလော’ လွို့မေးလောဂ်ရယ်။ 6အယ်းလူခေါ့လယ်း ‘သံလွင်ဆီ ဂါလံတရော်aပေးဖွို့ဆိရယ်’ လွို့ပှန်ဖှေလေရယ့်အခေါ် ဘန်တော်ထိင်းခေါ့လယ်း ‘စရန်းစော်ဝ မှန်မှန်ဆိုးယူပွီး ငေါဆာလွို့ ရယ်းလောဂ်ပေါ်’ လွို့ ဟိုးလောဂ်ရယ်။ 7နွေ့ာဂ်တယွောဂ်ကွိုလယ်း ‘နန့်မောင် အကျွေးစလွောဂ်ဆိလော’ လွို့မေးရယ့်အခေါ် ဆူခေါ့ ‘ဂျုန်စပေါ အိတထွောင်’ လွို့ ဖှေရယ့်အတွ ဘန်တော်ထိင်းခေါ့လယ်း ‘စရန်းစော်ဝမောင် ဆဂ်ရော်လွို့ရယ်းလောဂ်ပေါ်’ လွို့ ဟိုးလောဂ်ရယ်။ 8အယ်းအခေါ် ဆဌေးဟော် မရွိုးဖွောင့်ရယ့်ဘန်တော်ထိင်းယယ့် မိမိကွိုယ်ကျွိုးအတွ လိင်မော်ပေါနောဂ်ရယ့်လုတ်ဆွောင်မှုကွို ခှီးကျူးလေရယ်။ စော်ကျွောင့်လောဟန်ကော ဖရောဆန်ကွို နော်ခေါင်ရယ့်ဆူရယ်ထဂ် ဖရောဆန်ကွို မနော်ခေါင်ရယ့်လူတွို့ဟော် ဆူတွို့လွိုမျွိုး အချောလူမျောနောင့် ဟိုးဆွိုယော်မောင် ပွိုပွီး ပေါပေါနောဂ်နောဂ်ဆိကျော့လေရယ်” လွို့ မိင့်လေရယ်။ 9နွောဂ်တခေါ် ကွိုယ်တော်ခေါ့ ဆပယ့်တိုတွို့ကွို မိင့်ရယ့်ဟော်မောင် “နန်တွို့ကွို ငေါ်ဟိုးခှန်တော်ကော မရွိုးမဆောချော်ဖွယ်ထောရယ့် စည်းစိင်ချောင်းဆော်မျောနောင့် လူတွို့ကွို အကူအညီပေးယန် အယ်းလူတွို့ဟော် နန်တွို့ယယ့်မိင့်ဆွေမျောဖှဂ်လော်ကျော့မယ်။ နန်ဆေပွီးရယ့်နွောဂ်မောင် အယ်းစည်းစိင်ဥစ္စော်မျောကွို နန်တွို့နောင့်အတူ ယူဆိုးနောင်ခှန်းမဆိရယ့်အခေါ်မောင် အယ်းမိင့်ဆွေမျောဟော် အမှားတောင်းနေထောင်ယော့မယ့် ဆွယ်မွှို့တိုမောင် နန့်ကွို ကျွိုဆွိုကျော့လောဂ်မယ်။ 10အဆေးအမွားကိစ္စော့မျောကွိုတအွောင် ရွိုးရွိုးဆောဆောစီမံခန့်ခွားတတ်ဆူမျောဟော် အရယ်းကျွီးရယ့်ကိစ္စော့မျောကွို ရွိုးရွိုးဆောဆောနောင့်စီမံခန့်ခွားတတ်ကျော့ရယ်။ အဆေးအမွားကိစ္စော့မျော လုတ်ဆွောင်ယော်မောင်လယ်း မရွိုးဆောရယ့်ဆူမျောဟော် အရယ်းကျွီးရယ့်ကိစ္စော့မျောကွို လုတ်ဆွောင်ယော်မောင် မယုန်ကျည်ယော့ရယ့်ဆူမျောဖှဂ်လောဂ်မယ်။ 11အယ်းယော်ကျွောင့် နန်တွို့ဟော် ဟော်လိုကော့ဆိ နန်ပေါင်ဆောင်ရယ့်စည်းစိင်ဥစ္စော်မျောကွို စီမန်ခန့်ခွားဖွို့ ယုန်ကျည်စိခှော့ယော့မှု မဆိယန် ဆွယ်မွှို့တိုမောင်ဆိရယ့် စဂ်မင်ရယ့်စည်းစိင်ချောင်းဆော်မျောအတွ ဖရောဆန်ဟော် နန့်ကွိုယုန်ကျည်မောင်မဟွိပေါ်။ 12နန်တွို့ဟော် အချောဆူပေါင်ဆောင်ရယ့်စည်းစိင်ချောင်းဆော်မျောကွို စီမန်ခန့်ခွားဖွို့အတွ ဆဂ်စော်မဆိဆူမျောဖှဂ်ကျော့ယန် ဖရောဆန်ဟော် စော်အယော်ကွိုမောင့် နန်တွို့စီမံခန့်ခွားဖွို့ အတွ ပေးအောဂ်တိုမူမောင်မဟွိပေါ်။ 13စော်အစေခေါင်မောင့် တပှောင်ထယ်း သခန်နေယွောဂ်ကွို အလုတ်အကျွယ်းမပှုနောင်ပေါ်။ စော်ကျွောင့်လောဟန်ကော ဆူဟော် သခန်တယွောဂ်ကွို ငွိုးပွီး အချောသခန်တယွောဂ်ကွို ခှဂ်ခန်လောဂ်မောင်ဖှဂ်ရယ်။ တယွောဂ်ကွို ဆဂ်စော်ဆိယန် နွေ့ာဂ်တယွောဂ်ကွို မလေးမစော လုတ်လောဂ်မယ်။ အယ်းလွိုမျွိုးပယ်း နန်တွို့ဟော်လယ်း ဖရောဆန်နောင့်လောကီစည်းစိင်ကွို တပှောင်ထယ်း အလုတ်အကျွယ်းမပှုနောင်ကျော့ပေါ်” လွို့ မိင့်တိုမူရယ်။ 14အယ်းအခေါ် ပိဆင်မဂ်ရယ့် ဖာရိရှဲတွို့ဟော် ကွိုယ်တော်ယေရှုမိင့်တိုမူရယ့်အကျွောင်းအယော်မျောကွို ကျောရယ့်အခေါ် ကွိုယ်တော်ကွို လွှောင်ပွှောင်ယာမိုးကျော့လေရယ်။ 15ဟော်ပေမယ့် ကွိုယ်တော်ယေရှုခေါ့ ဆူတွို့ကွို “နန်တွို့ဟော် လူတွို့ချယ့်မောင် မိမိကွိုယ်ကွိုဖွှောင့်မတ်ရယ့်ဆူရယ်လွိုမျွိုး ဟန်ဆွောင်တတ်ကျော့ရယ်။ ဟော်ပေမယ့် ဖရောဆန်ဟော် နန်တွို့ယယ့်မကွောင်းရယ့်အကျောင်အစီကွို ဆိမျိုတိုမူရယ်။ လူတွို့ တန်ဖွိုးထောနေကျော့ရယ့်လိုးကော့စည်းစိင်မျောဟော် ဖရောဆန်အတွ သဖိုးမကှော့စရော်ကွောင်းရယ့် အယော်မျောပယ်းဖှဂ်ရယ်။ 16မောရှေယယ့်ပညောဂ်ကျောင်းနောင့် ပရောဖက်မျောရယ်းဆောခယ့်ကျော့ရယ့် ကျောင်းမျောမောင် ယေနဂ်မန်ဂလော် ဆရော်ယောဟန်ပိုလော်ပွီး မန်ဂလော်ဆတန်းကွောင်းကွို ဟိုးကျောခှန်းမပှုမီအထိ နန်တွို့အတွလောဂ်နော်ယော့မယ့် လောင်းစန်မျောအဖှဂ် ဆိခယ့်ကျော့ရယ်။ ဟော်ပေမယ့် အခုမောင်ကော ငေါ်ယော် ဖရောဆန်ယယ့်ဆော်ဆနော်တိုအကျွောင်း မန်ဂလော်ဆတန်းကွောင်းကွို ဟိုးကျောနေပွီဖှဂ်ရယ်။ အယ်းယော်ကျွောင့် လူအမျောတွို့ဟော် ဖရောဆန်ယယ့်ဆော်ဆနော်တိုထားကွို ဝမ်ယွောဂ်နောင်ကျော့ဖွို့အတွ စိအောဆန်ဆန်နောင့် ကျွိုးစောအောထွိနေကျော့ပီဖှဂ်ရယ်။ 17ဟော်ပေမယ့် ဖရောဆန်ယယ့် ပညောဂ်ကျောင်းမောင် ရယ်းဆောဖိုပျော့ထောရယ့် စကားလုန်းတောင်းဟော် အမင်တကာပယ်းဖှဂ်ပျဂ်လော်မောင်ဖှဂ်ရယ်။ ပညောဂ်ကျောင်းထားမောင်ဆိရယ့် စကော်လုန်းတလုန်းကွို ပွှောင်းလားဖွို့ထဂ် ကိုးကန်နောင့်မှေကျွီးပျဂ်စီးဖွို့ခေါ့ ပွိုပွီး လွာလောဂ်မယ်။ 18ကွိုယ့်ယယ့်မိင်းမော့ကွို ကွားပွီး အချောအမျွိုးဆမီးတယွောဂ်ကွို လဂ်ထောဂ်ရယ့်ဆူဟော် အိင်ထွောင်ရယ်းဖွောဂ်ပှန်မုကွို ကျူးလွမ်ဆူပယ်းဖှဂ်ရယ်။ လန်ယွောဂ်ကျောခေါ့ ကွားထောရယ့် အမျွိုးဆမီးကွို လဂ်ထောဂ်ထိင်းမျောရယ့်ဆူယော်လယ်း အိင်ထွောင်ရယ်းဖွောဂ်ပှန်မုကွို ကျူးလွမ်ဆူပယ်းဖှဂ်ရယ်” လွို့မိင့်တိုမူလေရယ်။ 19အယ်းနွောဂ်မောင် ကွိုယ်တော်ယေရှုခေါ့ “တခေါ်ခေါ့ တင်ဖွိုးကျွီးရယ့် ခရမ်းယွောင်ဝဂ်ရုန်နောင့် နူးညောင့်ရယ့်အဝဂ်အထည်ကွို ဝဂ်ဆန်ပွီး နေ့စင်နေ့တောင်းစောပွားဆွောဂ်ပွားပှုလုတ်နေရယ့် ဆဌေးတယွောဂ်ဆိလေရယ်။ 20လူတွို့ဟော် လာဇရုလွို့ခိုရယ့် တကွိုယ်လုန်းမောင် အနော်မျောပွေါဂ်နေရယ့် ဆားရားဆောတယွောဂ်ကွိုခိုလော်ပွီး ဆူ့ယယ့်ချောင်တခေါပွေါဂ်နောင်းမောင် လော်ခှော့ထောလေ့ဆိရယ်။ 21ဆူဟော် ကော်တရော် မွဂ်လော်လွို့ ဆဌေးယယ့် ထမန်းစော်ပွားဝမ်းပိုခေါ့ ကှော့ရယ့်စောကျွမ်းစောကှန်ရယ်ကွို စောခှန်စိနောင့်မျိုနေလေရယ်။ အယ်းအပှင် ခွီးရယ်ဟော်လယ်း ဆူ့ယယ့်အနော်ရယ်ကွို လော်ပွီး ယဂ်နေတတ်ကျော့ရယ်။ 22နွောဂ်ဆုန်းမောင် လာဇရုဆေဆိုးဟော့ပွီး နတ်ဒေဝါရယ်ခေါ့ ဆူ့ကွို ဖွိုးပွောင်ဖှဂ်ရယ့်အာဗြဟံနောင်းကွို ခိုဆိုးကျော့လေရယ်။ ဆဌေးဟော်လယ်း ဆေဆိုးပွီးရယ့်အခေါ် ဆဂျွိုခှန်းကွိုခေါင်ယော့လေရယ်။ 23ဆူဟော် လူဆေမျောနေထောင်ယော် အရောဂ်ဖှဂ်ရယ့် မရဏနိုင်ငေါင်bမောင် ဆွိုးဝါးရယ့်ဒုက်ခေါ့ကွို ခေါင်စောနေယော့ရယ်။ အယ်းနွောဂ်မောင် ဆူဟော် အပိုကွို ကျေ့လောဂ်ရယ့်အခေါ် အာဗြဟံနောင့်အတူထောင်နေရယ့် လာဇရုကွိုမျိုခယ့်လေရယ်။ 24အယ်းယော်ကျွောင့် ဆဌေးဟော် အိုဟဂ်ငွိုကျွယ်းပွီး ‘ဖော့အာဗြဟံ၊ ငေါ်ဟော် မီးထားမောင် ဒုက်ခေါ့ကျွီးကွို ခေါင်စောနေယော့ရယ့်အတွ ငေါ့ကွိုဆနောတိုမူပေါ်။ ငေါ့ယယ့်ဆော်လီးကွို အေးစေဖွို့ လာဇရုယယ့် လဂ်ညွိုးမောင် ယေကွိုဆွဂ်ပွီး ဆူ့ကွို ငေါ့နောင်းစေခွှဂ်ပေးတိုမူပေါ်’ လွို့ ဟိုးလေရယ်။ 25ဟော်ပေမယ့် အာဗြဟံခေါ့ ‘ငေါ့ဆော၊ နန်ယော်အဆဂ်ချန်နေရယ့်အခေါ်ကော့ အကွောင်းဆုန်းအယော်တွို့ကွို ယော့ဆိခယ့်ပြီး လာဇရုမောင်ကော မကွောင်းရယ့်အယော်တွို့ကိုပယ်း ယော့ရှိခယ့်ကျွောင်းကွို ဆတိယော့ပေါ်။ အခုမောင်ကော လာဇရုဟော် ဟော်နေယော်မောင် ဆဆဆော်ဆော်နေယော့ပွီး နန့်မောင်ကော ဒုက္ခေါ့ဝီဆနော်ကွို ခေါင်စောနေယော့ရယ်။ 26အယ်းယော်တအွောင်မကော့လွို့ နန်နောင့်ငေါတွို့ကျောမောင် ကော်တရောကွိုနဂ်ရယ့် တွမ်းနဂ်ကျွီးတခုချောထောလေရယ်။ အယ်းယော်ကျွောင့် ဟော်နေယော်ခေါ့နေ နန့်နောင်းကွို စူမောင့် မကူးလော်နောင်သလွို နန်ဆိနေရယ့် အယ်းအရောဂ်ခေါ့နေလယ်း ငေါ့တွို့နောင်းကွို စူမောင့်ကူးလော်နောင်မော် မဟွိပေါ်’ လွို့ဆွိုလေရယ်။ 27ဆဌေးခေါ့လယ်း ‘ဖော့အာဗြံဟံ အယ်းလွိုဆွိုယန် လာဇရုကွို ငေါ့ယယ့်ဖော့အိင်နောင်းကွို စေဆိုးပေးဖွို့ တွောင်းပန်ပေါ်ရယ်။ 28စော်ကျွောင့်လောဟန်ကော ငေါ့မောင် ညီအကွိုငေါယွောဂ်ဆိရယ်။ အယ်းယော်ကျွောင့် လာဇရုကွို ဆူတွို့နောင်းကွိုဆိုးပွီး နွောင်တော့ဆောင်ဝီကော့ယော့ကျော့ဖွို့ ဆတိဆိုးပေးစေမောင့်ပယ်း ဆူတွို့ဟော်လယ်း ဒုက်ခေါ့ဝီဆနော်ခေါင်စောနေယော့ရယ့် ဟော်အရောဂ်ကွို ယွောဂ်လော်ကျော့လောဂ်မောင်မဟွိပေါ်’ လွို့ရွှောဂ်တန်တန်လေရယ်။ 29ဟော်ပေမယ့် အာဗြဟံခေါ့ ‘နန့်ယယ့် ညီအကွိုတွို့မောင် မောရှေယယ့်ပညောဂ်ကျောင်းနောင့် ပရောဖက်မျောရယ်းဆောထောခယ့်ရယ့် ကျောင်းမျောဆိကျော့ရယ်။ ဆူတွို့ဟော် အယ်းကျောင်းတွို့ကွို ဖတ်ရှုပွီး နွောင်တော့ဆောင်ဝီကော့ယော့နောင်ကျော့ရယ်’ လွို့ဟိုးရယ့်အခေါ် 30ဆဌေးခေါ့ ‘ဖော့အာဗြဟံ၊ ဟော်လွောဂ်နောင့် မလုန်လွောဂ်ဆေးပေါ်။ ဆေပွီးရယ့်လူရယ်ထားခေါ့ တယွောဂ်ယွောဂ်ဟော် ဆူတွို့နောင်းကွိုဆိုးပွီး ဆတိပေးမောင့်ပယ်း ဆူတွို့ယယ့်အပှဂ်ဒုစရောဂ်မျောခေါ့နေ နွောင်တော့ဆောင်ဝီကော့ ယော့ကျော့မောင်ဖှဂ်ရယ်’ လွို့ဆွိုလေရယ်။ 31ဟော်ပေမယ့် အာဗြံဟံခေါ့ ‘ဆူတွို့ဟော် မောရှေယယ့်ပညောဂ်ကျောင်းနောင့် ပရောဖက်မျောယယ့်ကျောင်းမျောကွိုတအွောင် လောဂ်နော်ခှန်းမဆိကျော့ယန် ဆေယော်ခေါ့နေ ပှန်လော်ဆူတယွောဂ်ယယ့် စကောကွိုလယ်း ယုန်ကျည်လဂ်ခေါင်ပွီး နွောင်တော့ဆောင်ဝီကော့ယော့ကျော့လောဂ်မောင် မဟွိပေါ်’ လွို့ဆွိုလေရယ်” လွို့မိင့်တိုမူလေရယ်။
Currently Selected:
Luke 16: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
