YouVersion Logo
Search Icon

Luke 21

21
1ဟောည်ႇဒီန် စဝ်ဖြားဟည်ဆကိူဝ်ႈတိူရ်ႈ ယိူဝ်းတိုအီးခြုင်မ်ကဲ ဟံပ်ရိူန်လှူခေဲင် တဲက်င်္ဘာပ်ုန်လှူ။ 2အ်ုန်ယိူဝ်းဘိုး ယာကမာည်းကဝ်အီဖ္လါန်းအူအီး ဟံပ်ရိူန်းဒင်္ဂါးငေါႈခံန်အာရ်ဘျာ ခေဲင်တဲက်ဘာပ်ုန်လှူ။ 3ခိင်ဒီန် စဝ်ဖြားစီဒါႈ “အောနံင်က္လာင်းအခည်းတပဲ။ ယာကမာည်းအီဖ္လါန်းနီန် အ်ုန်ရေဲန်အလှူဒါန မှယ်ဒိုရ်ကဲအီဟံရ် ပည်ဒိုႇဒိုည်ႇ။ 4တိုအီးကဲနီန် ကဲဆမာလှူလိူည် ခံင်ပ်ုန်လှိူဝ်းတကဲ၊ ခံင်ပ်ုန်အာဝ်လိုကဲ။ မိုႈလိူည် ယာကမာည်းနီန် အ်ုန်ဘိူည်ဖ္လါန်းမာ် အ်ုန်လှူပွံတ် ပစေးအုက်စာထာန်မိူဝ်ႈတအ်ုန်။” 5ဟောည်ႇဒီန် ဂေါႇမိုႈတိုအီးမံင်ခ္လကဲဒိူန် ဂီုည်တိူဝ်ႈကနေဲႈ ဘည်ဆံင်တော်ဂြိုခြီုင်ပ်ုန်လှူအူန်း ဘည်ကယံရ်ႈ ဘည်လှာက်ဂါ်ႈမာဝ်းခေဲင်ဗိမာန်တော်ကဲဒီန် စဝ်ဖြားစီဒါႈ 6“ခံင်ပ်ုန်ဂီုည်ယိူဝ်းအူန်းပဲ နံင်လူလှဲဝ်ႏဟာဝ်းဒိုႇယာ့်။ မာဝ်းအူလှေလိူည်မာ် နံင်အာဝ်ဂေါည်ယာ့် ဒီဂေါည်ပြီမ် နံင်ရောတ်အခိင် ကတူႈယာႈႎီုန်ဒိုႇယာ့်။” 7ခိင်ဒီန် ကဲဒီန်မာ်ဆမွံတ်တစဝ်ဖြား “ဆြာ၊ ကီန်းဒည်းကဲဒီန် ဘံန်မှောအ်ုန်နံင်ရောတ်ဒေဲႈ? ခိင်နံင်ရောတ်ကဲဒီန် အတိက်လက္ခဏာဘာည်းမှော အ်ုန်နံင်နှဲဒဲႈ။” 8စဝ်ဖြားစီဒါႈ “ဆဒိမည်းဒဲႈကတူႈ ပ်ုန်ခ္လံဝ်းအီး။ တိုအီးဂဲ နံင်ဒံင်ဒေရေဲန်ပဲန်အော ဒါႈ ‘အောမိုႈခရစ်တော်၊’ ‘အခိင်ဟည်ရောတ်ဒေဲႈ။’ မည်တောပ်ညှူမ်ကဲ။ 9ခိင်ပဲယိူဝ်းဒေတငါဝ်း ဆဒါင်တီုက်ႎှီုန်း ပဲမည်ယော။ ကဲနီန် နံင်ပဲန်ဒေဲႈရအာည်ႇ။ မိုႈလိူည် အီနီန် ညှံမ်မိုႈမ ဒီဆူတ်။ 10ခြိူဝ်းအူခြိူဝ်းတောအူခြိူဝ်း၊ ကုင်အူကုင်တောအူကုင် နံင်ပဲန်ပ္လေါည်ကတီုက်ကပဴင်။ 11အီမ်ယာ၊ အာတ်ဟောမ်အာတ်ဒါ၊ ရောဂါဒေဲႈရောတ်ဂဲနီန် နံင်ပဲန်ဒေဲႈ တောန်ဒီတောန်ဒဲန်ႏ။ တေဲင်ကာင်ဟာဝ်မာ် နံင်လိူရ်ႈဒေဲႈ အတိက်လက္ခဏာ အီမှိူမ်ယော။ 12မိုႈလိူည် အာည်ႇပဲန်ဒေဲႈလှေကဲနီန် ဂေါႇအော တိုအီးကဲနံင်ကတူႈအီးတိုည်း လီလာနဘာည်း၊ စေတ်မေန်းဖါ်ႈပကျောင်အံက်တြား ဒဲႈတာမ်၊ တိုည်းလီပ်ခေဲင်ကဘေဲမ်။ နံင်ကတူႈဘိုး တောႇစေတ်မေန်း ရအာည်ႇကညာအာဏာ ကာည်း ဟောခံမ်း။ 13မိုႈလိူည် ကဲနီန် နံင်မိုႈအခွါင်းအရေး ခါမ်ဆံက်ဆေ တေဲင်ဆဒါင်မှိူမ်မံင်ဂလာနီန် ကနာည်ပဲ။ 14ဂေါႇဘည်ဒီန် ပဲမည်နောႈမှည် ကနာည်နံင်လိုပဲ တက္လာင်းဆံင်ခံတ်ကြောႈ။ 15ဂေါႇမိုႈအောနံင်ပနောဒဲႈ ငျာန်ပိင်ငျာ ကာည်း ပဇာရ်အိုမ်ကြောႈ ပ်ုန်အာဝ်ဘယ်အီးတထဴင် ဆံင်ခံတ်။ 16မိုႈလိူည်ကူန်မာပဲ၊ ႎါႎည်ပဲ၊ ခြိူဝ်းမျိုးပဲ၊ ဘဝ်ကီုက်ဂေါပဲ နံင်လူည်ႇဆေတ်စာတေဲင်ပဲ။ နံင်ပျံမ်ယံမ်း ခေဲင်ပဲမံင်ခ္လ။ 17ဂေါႇမိုႈပဲညှူမ်ဒါ တောပ်ဒေဲႈရဘံန်းအော စီပဲန်တိုအီးဂဲ နံင်ကအီရ်ႈဒိုည်ႇပဲယာ့်။ 18မိုႈလိူည် ဟုကိင်ပဲအူညံင်လိူည်မာ် နံင်အာဝ်ဘိူန်းမလူလေဲဝ်။ 19ဆာ်ပဲဇံင်းမံင်ရီတ်ရီတ် ကာည်း ဆာ်ပ်ုန်ညှူမ်ပဲမံင် ပဲနံင်ကတူႈပ်ုန်ကဇောည်စဝ်ဖြားယာ့်။” 20စဝ်ဖြားယေရှု စီဒါႈဘိုး “ခိင်ပဲယိူဝ်း တံပ်ဆီုက်ဂဲ ဂေါည်ကပါ်ႇ ကီုင်းဂျေရုဆလင် ပဲလိုနံပ်အူန်း ကီုင်းဒီန် အာဝ်လှေင်ဒါင်း နံင်လူလေဲဝ်ဟာဝ်း။ 21ဆာ်ရောတ်ခိင်ဒီန် ကဲအီဂေါည် ကပီုန်ယုဒ ဒဲႈပဲဒဝ်ဟိုက်တေဲင်ဂေါင်။ ကဲအီဂေါည်ခေဲင်ကီုင်းမာ် ဒဲႈပဲဒဝ်လေႈဒိုႇ နှာရိူဝ်ႇကီုင်း။ ဆာ်ပဲဂေါည်နှာရိူဝ်ႇကီုင်းမာ် မည်လီပ်ဒေဲႈ ခေဲင်ကီုင်းအေ့။ 22ဂေါႇမိုႈ ဆငည်းဒီန် မိုႈဆငည်းနံင်ဒဲႈတာမ် စေ့စေ့စုင်စုင်တောပ်ဘည်ဘေဲႇကျာမ်း ပ်ုန်ကိက်အူန်း။ 23အခိင်ကဲဒီန် မိုႈအခိင်နံင်ဇောႈရောတ် ကီန်းဒည်းဒါင်း တေဲင်တိုအီးကုင်ယုဒကဲ၊ ဂေါႇမိုႈ အမျက်တော် စဝ်ဖြားနံင်ဇောႈရောတ် စီပဲန်နံင်ဇေဝ်ဇ တမာကောန်ဒဲႇဂဲ ကာည်း တိုအီးကောန်တတိုဂဲ။ 24မံင်အီး နံင်ကတူႈယံမ်း တဘိုတ် မံင်အီးနံင်ကတူႈအီးတိုည်း ဟာဝ်းပကီုင်းဟံရ်။ ကောန်ကုင်ဟံရ်ဒီန် နံင်ဆီမ်းလာည်း ကီုင်းဂျေရုဆလင် ခြံင်ထီပ်ညဲ့တက်ုတ် ဂါခေတ်ကာပ်ကဲအာဝ်ဒိုႇ။” 25ဟောည်ႇဒီန် စဝ်ဖြားယေရှုစီဒါႈ “ဆာင်ငည်း၊ ပ္လါင်ကျံရ် ကာည်း ဆမဴင်ကဲနီန် နံင်နှဲဒေဲႈ အတိက်လက္ခဏာ အီလှာက်။ ဂေါႇဟံမ်းအိုမ်ပါင်လာည်၊ သမုဒ္ဒရာကဲနီန် တိုအီးကဲအီဂေါည်တေဲင်ကံမ်ဖာ နံင်ယောနံင်နောႈမှည် အာဝ်နံပ်ပ်ုန်နံင်လိုတရေဲန်။ 26ဂေါႇမိုႈ တဂိုးတေဲင်ကာင်ဟာဝ် နံင်ယယူႈ တိုအီးကဲ နံင်တဂေန်းဒါပ်ုန်နံင်ပဲန်ဒေဲႈရအာည်ႇ ယောကံပ်နံင်ယံမ်းဘီရ်ဒိုႇ။ 27ႎါည်းဒီန် တိုအီးကဲ နံင်ယိူဝ်းဒေ ဂြူပ်ကောန်စဝ်ဖြား စွရောတ်ဒေဲႈ ခေဲင်အီုင်အူႇ တောပ်တဂိုးတော်အနန္ဒ၊ ဂုင်တော်အနန္ဒ။ 28ဂေါႇဘည်ဒီန် ဆာ်အတိက်လက္ခဏာဇေဝ်ဇနီန် ဇူႈဒေရောတ် ပဲနံင်လောတ်ဘိုန်းဒါႇ ကီန်းဒည်းဆာင်ဆရာ ငိူဝ်ႈအူန်းကိင်ပဲဇံင်းနှာင်းမံင်မံင်။” 29ဟောည်ႇဒီန် စဝ်ဖြားက္လာင်းနှဲ ပုင်တဲႇတကဲအူလှေ “တိူရ်ႈတံင်ပ္လေကဒိုတ်ကာည်း တံင်ဟေအီဟံရ်။ 30ခိင်ပဲယိူဝ်း လှာညောတ်လေႈဒေဲႈ အလိုလိုအ်ုန် ပဲနံပ်ပွံတ် မိုႈဟည်ရောတ်ခိင်မှည်။ 31ဘာည်းလိူည်နီန် ဆာ်ပဲယိူဝ်းဘည်ပဲန်ဒေဲႈ ဘည်မိုႈဘည်ဘာည်း ပ်ုန်က္လာင်းအောကဇေန်နီန် ပဲလိုနံပ်မိုႈတ ဆာဆနာတော် စဝ်ဖြား နံင်ရောတ်ဒေဲႈစာ်မ်း။ 32အောနံင်က္လာင်းအခည်း။ ခံင်ကဲနီန် နံင်ပဲန်ဒေဲႈ အာည်ႇယံမ်း ကဲအီဆီုင်ဂီုည်မိူဝ်ႈအဆာက်ကဇေန်နီန်ကဲနီန်။ 33ကာင်ဟာဝ် ကာည်း ကတာည်းဒါင်းနီန် ဘိူည်အာဝ်မံင်ထာဝရမာ် ကြောႈပ်ုန်ဒါႈအော အ်ုန်နံင်မံင် ထာဝရယာ့်။” 34စဝ်ဖြားယေရှု စီဒါႈဘိုး “ဂေါႇဘည်ဒီန် ပဲလိုအူန်းဆဒိ မည်ဒဲႈအခိင်ပဲဒိုႇ တောပ်ဟောမ်ဒါတျံင်ဒါ၊ နောႈမှည်ဒါတဇိုဇာတ်ပဲ။ ဆာ်ပဲဂီုည်ပ်ုန်ချှူမ်လိူည်အခိင်ဘည်ဒီန် ဆငည်းဆူတ်အ်ုန် နံင်နှေရ်ႎံ ရ်တိင်တိုဘြည် ရောတ်ဒေဲႈတပဲ။ 35ဆငည်းဒီန် အ်ုန်နံင်ကဆီုဝ်ကဆဲင်ဒိုႇ တိုအီးဂဲအီဂေါည်တေဲင်ကံမ်ဖာနီန် ပည်ဒိုႇဒိုည်ႇ 36ဂေါႇဘည်ဒီန် ဒဲႈအယ်ကောန်လောတ်ဒါႇ ခံင်အီနံင်ပဲန်ဒေဲႈဒီန် ကနာည်နံင်ဇံင်မံင် ရအာည်ႇစဝ်ဖြား လိုမှာန်းဆုထာန်မိူဝ်ႈတအခိင်။” 37ဟောည်ႇဒီန် ခိင်ဆငည်း စဝ်ဖြားဟောက္လာင်းပနံဝ်းဒဲႈ ခေဲင်ဗိမာန်တော် ခိင်မှိူဝ်စီဟိုက်ဂေါည် တေဲင်ဂေါင်တာန်လူန်။ 38တိုအီးကဲမာ် ရောတ်ဒေဲႈခေဲင်ဗိမာန်တော် ခီညှာဇေဝ်း ကနာည်နံင်တငါဝ်း တြားတော်ပ်ုန်ဟောစဝ်ဖြား။

Currently Selected:

Luke 21: stpv-rv

Highlight

Share

Copy

None

Want to have your highlights saved across all your devices? Sign up or sign in