Luke 22
22
1ဟောည်ႇဒီန် ဟည်ကဒံတ်ဒေဲႈ ခိင်ပ္လေါည်တော်ကဘအာဝ်တောပ်တဆေး အီဇီုဝ်ပ္လေါည်တော်ပသခါ။ 2ဂေါႇမိုႈ တိုအီးဒါင်းဇူးပုရောဟေက်ဂဲ ကာည်း ဆြာဆမားကျာမ်းဂဲနီန် ယောကူန်ရဝ်မာဂါင် စီပဲန်ကဲဟြီုက်ရဒေင် ယေန်ယေန် ဘည်နံင်ပျံမ်းစဝ်ဖြားယေရှု။ 3ဟောည်ႇဒီန် မာရ်နာတ်ဟည်လီပ်ခေဲင် ယုဒရှကာရုက် တောပ်ဘည် သာဝက အူကိူရ်လေႈအာရ်ပါး။ 4ဟောည်ႇဒီန် ယုဒနီန် အ်ုန်ဟည်ဇည်းတောပ် ခူန်ဗိမာန်တော် ကာည်း တိုအီးဒါင်းဇူးပုရောဟေက်ကဲ ကမိုန်ဘည်မှောနံင်ဘာည်း အာပ်စဝ်ဖြားခေဲင်တည်းကဲ။ 5ကဲမာ် ဟည်ရျံန်ခိုည်း ဆဖေဒေဒဲႈ ရိူန်းတယုဒ။ 6ဂေါႇမိုႈယုဒမာ် ဟည်ဆဖော အ်ုန်ဟည်ရဲ့အခွါင်းကျ ကနာည်နံင်တိုည်းစဝ်ဖြား ခိင်အာဝ်မိူဝ်ႈတိုအီး။
ပ်ုန်ဘြဲဆား ကနာည်ပ္လေါည်တော်ပသခါ 7ဟောည်ႇဒီန် ဟည်ရောတ်ဒေဲႈဆငည်း ပူဇော် သိုးဒဲႇ ကနာည်ပ္လေါည်တော်ပသခါ ပ်ုန်ဒါႈကဲ ပ္လေါည်တော်ကဘအာဝ်တောပ်တဆေး။ 8ဟောည်ႇဒီန် စဝ်ဖြားယေရှုဒါႈတပေတရု ကာည်း ယောဟာန် “ဟာဝ်းဘြဲဆား ကနာည်နံင်ဟောမ်ရူမ်အယ် ပပ္လေါည်တော်ပသခါ။” 9ကဲမာ်ဆမွံတ် “စဝ်ဖြား၊ ဒီမှော စဝ်ဖြားဆိင်ဒဲႈယဲ ဘြဲဆား” 10စဝ်ဖြားစီဒါႈ “ဆာ်ပဲလီပ်ဟာဝ်းခေဲင်ကီုင်း နံင်မိူဝ်ႈတိုအီးကွံတ်အဲင်အိုမ်အူအီး ရံပ်ရိုႈပဲ။ တောပ်ဟာဝ်းဖါ်ႈအ်ုန် စီလီပ်ခေဲင်ဂါင်အ်ုန်။ 11ဆာ်ဟောည်ႇ စီက္လာင်းတကညာဂါင် ‘ဆြာယဲဆူည်ႇယဲဆမွံတ် ႎှါင်ဒီဘိူန်းဟောမ် ပေါမ်မှိူဝ်ပ္လေါည်တော်ပသခါ တောပ်တပဲ့တော်အ်ုန်ကဲ ဒီမှောအ်ုန်မိုႈ။’ 12ခိင်ဒီန် ကညာဂါင် နံင်တောႇဟိုက်ပဲရကႎိုည်ဂါင် နှဲႎှါင်းဒါင်းအူႎှါင်းတပဲ။ ပဲစီဘြဲဆား ကနာည်ပ္လေါည်တော် ပႎှါင်းဒီန်။” 13ဟောည်ႇဒီန် ပေတရုကာည်း ယောဟာန်မာ် လည်လေႈဟာဝ်း တောပ်ဘည်ဒါႈစဝ်ဖြား ဂါရ်ဟောည်ႇယိူဝ်းဖါ်ႈ ဘြဲဆားရဲန်အူန်း ကတီးကရီးပွံတ် ကနာည်ပ္လေါည်တော်ပသခါ။ 14ခိင်ဟည်ရောတ်စာ်မ်းအခိင် ကနာည်နံင်ဟောမ်ပ္လေါည်တော် ပသခါ စဝ်ဖြားအံက်ရူမ် တောပ်တပဲ့တော်အ်ုန်ကဲ တပဒဲန်။ 15ဟောည်ႇဒီန် စဝ်ဖြားစီဒါႈတကဲ “အာည်ႇကတူႈအောတကီန်းဒည်းနီန် အောမိူဝ်ႈအလို ကနာည်နံင်ဟောမ်ရူမ်တောပ်ပဲ ပပ္လေါည်တော်ပသခါနီန်။ 16အောနံင်က္လာင်းတပဲ တံင်ဇူႈပွံတ် ပ္လေါည်ပသခါ ခိင်ရဘံန်းဆူတ်ဆူတ် စဝ်ဖြားနီန် အောနံင်အာဝ်ဟောမ်ယာ့် ပ္လေါည်တော်ပသခါ လိူဝ်ႈဘံန်း ဂါအာဝ်ရောတ်စာ်မ်း အခိင်နံင်အူပ်ဘြောင် တောန်တိုအီး၊ တောန်ဒီ။” 17ဟောည်ႇဒီန် အ်ုန်တိူဝ်ႈပွံတ်ဆလောႇ ဟောည်ႇတိူဝ်ႈကနေဲႈဂုင်တော်စဝ်ဖြား “တိူဝ်ႈဆလောႇ လည်ကဆာင်းပဲတျံင်အ်ုန်။ 18အောနံင်က္လာင်းတပဲ၊ ဂါဆာဆနာတော် စဝ်ဖြားအာဝ်ရောတ်ဒေဲႈ ဘံန်မှောမာ်အောအာဝ်တျံင်ယာ့် အိုမ်ပ္လေကဘီနီန်” 19အ်ုန်တိူဝ်ႈကဘ ဟောည်ႇတိူဝ်ႈကနေဲႈဖါ်ႈ ဂုင်တော်စဝ်ဖြား အ်ုန်ဒဲႈပွံတ်တတပဲ့တော်အ်ုန် “ကဘနီန်မိုႈ တိုပိုင်းအောပ်ုန်ဒဲႈအောတပဲယာ့်။ ဟောမ် ဘည်လိူည်ပဲနောႈလှူႈနောႈလှောႈတအော” 20ဘည်လိူည်ဒီန် ဟောည်ႇဟောမ်ဖါ်ႈ စဝ်ဖြားစီ ကိုင်းအူန်းဆလောႇ “အိုမ်ပ္လေကဘီနီန်မိုႈ နှာမ်ပ်ုန်ရီုက်ဒဲႈတပဲ ကနာည်နံင်ဇူႈတဲ ပဋိညာဉ် တောပ်စဝ်ဖြား။ 21မိုႈလိူည် ကဝ်အီနံင်အာပ်ဒဲႈအော ခေဲင်တည်းရာန်ဆူနီန် အ်ုန်အံက်ဟောမ်ရူမ်လိူည်တောပ်အယ်။ 22ကောန်စဝ်ဖြားနီန် အ်ုန်ဘိူည်ဟာဝ်း တောပ်ဘည်ဒါႈစဝ်ဖြားမာ် ကဝ်အီလူည်ႇတေဲင်ကောန်စဝ်ဖြားနီန် အ်ုန်မိုႈလိူည် တိုအီးမိူဝ်ႈအမံင်ဂလာ။” 23ခိင်ဒီန် တပဲ့တော်အ်ုန်ကဲ ဟည်လည်ဆမွံတ်ခနားကဲ ခေဲင်အယ်အဆေမိုႈအီနံင် ရေဲန်ဘည်ဒီန်။
ပ်ုန်ကထဴင် အဆေမိုႈအီမျြံ တ်မှယ်ဒိုရ် 24ဟောည်ႇဒီန် တပဲ့တော်အ်ုန်ကဲ ဟည်လည်ကထဴင် အဆေမိုႈအီမျြံ တ်မှယ်ဒိုရ် ခေဲင်ကဲ 25စဝ်ဖြားစီဒါႈ “ဟောခံမ်းကုင်အီဟံရ်ကဲနီန် ကဲဘိူည်ဆမာဒါ အာဏာအူပ်ဘြောင် တေဲင်ကူန်ရဝ်မာဂါင်ကဲမာ် ကဲဆိင်ဒဲႈလိူည် တိုအီးကဲ တောႇဒါႈ တိုကဲမိုႈတိုအီးရေဲန်ဒဲႈ အကျိုး၊ ဆိင်ဒဲႈအီးထာင်ကဲမိုႈ အီအွံရ်မှိူမ်အီအွံရ်ကျ။ 26မိုႈလိူည် ပဲအာဝ်လိုဘာည်းကဲ။ ခေဲင်ပဲကဝ်အီအရေးဒါင်း ဘိူန်းဒါမာ် လိုဂေါည်လိူည် တိုအီးအာဝ်ပဲန်ဒါ အီအွံရ်မာ် လိုဂေါည်ဘာည်းလိူည် တိုအီးဟောမ်စာင်ရေဲန်ဇီုင်း။ 27ကဝ်အီအံက်တေဲင်ပဒဲန် ကနာည်နံင်ဟောမ် ကာည်း ကဝ်အီဘြဲဆားဒဲႈပ်ုန်ဟောမ်နီန် အဆေမျြံ တ်မှယ်ဂါရ်? အာဝ်မိုႈ? ကဝ်အီအံက်တေဲင်ပဒဲန်ဒီန် မျြံ တ်မှယ်။ မိုႈလိူည် အောမိုႈလိူည် တိုအီးတစားကဝ်အီဘြဲဆားဒဲႈ ပ်ုန်ဟောမ်ဒီန်။ 28ပဲကဲဒီန် မိုႈတိုအီးနံင်ဇံင်းတောပ်အော ခိင်ကတူႈအောတခ္လံဝ်းကချှူး။ 29ဘာည်းလိူည် ကူန်အောဒဲႈအခွါင်းတအောအူပ်ဘြောင် ပဲမာ် ဂေါႇမိုႈအောဟည်ဒဲႈ အခွါင်းအူပ်ဘြောင်တပဲ 30ပဲကဲဒီန် နံင်ဘိူန်းဒေ ဟောမ်ဒါပပဒဲန်အော ကာည်း နံင်ဘိူန်းဒေအံက်ဒါတေဲင်ပလ္လင်အော အူပ်ဘြောင်ခြိူဝ်းမျိုးအစ္စရေးကဲ အူကိူရ်လေႈအာရ်ခမို။” 31စဝ်ဖြားယေရှုစီဒါႈဘိုး “ရှိမုင်၊ ရှိမုင်၊ တငါဝ်း၊ ဘာည်းကညာဂီုင် ကကာႈကအာင်ငှေါ ကာည်း ကာ့်အ်ုန် မာရ်နာတ်မာ် ဟည်မှာန်းအခွါင်း ကနာည်နံင်စာမ်းကကာႈတိူရ်ႈပဲ ဟောည်ႇအူအီးမိုႈအူအီး။ 32မိုႈလိူည် အောမှာန်းဒဲႈအူန်းဆု ကနာည်ဘည်ညှူမ်မည်း မံင်။ ခိင်ႎီရ်နံပ်မည်း ကဇောည်ရေဲန်ဒဲႈဘိုး တတပဲ့တော်မည်းအီဟံရ် ကဲအီမိုႈႎါႎည်မည်းကဲ ကနာည်နံင်မံင်ဘည်ညှူမ်ကဲ။” 33ခိင်ဒီန် ပေတရုစီဟြာင်းက္လာင်း “စဝ်ဖြား၊ ခေဲင်ကဘေဲမ်မာ်လ၊ ဒီယံမ်းမာ်လ အောနံင်ဂေါည်တောပ်စဝ်ဖြားယာ့်” 34စဝ်ဖြားစီဒါႈ “ပေတရု၊ အောနံင်က္လာင်းတမည်း။ အဒိူဝ်အာည်ႇကဒိုရ်အျံရ်လိူည် မည်းနံင်ႎှါင်းဒါႈ အာဝ်နံပ်အော အိုည်လိူဝ်ႈလလ။” 35ဟောည်ႇဒီန် စဝ်ဖြားစီဆမွံတ် တပဲ့တော်အ်ုန်ကဲ “ခိင်ပ္လေႈအောတပဲ အာဝ်ဘိူန်းဒိူည်းဟာဝ်း ချှူပ်စာပ်၊ ရိူန်း ကာည်းကပျာဝ်းကဲနီန် တပဲမိူဝ်ႈ ဘည်ကီန်းဒည်း အူမျိုးအူလှေ”
တပဲ့တော်အ်ုန်ကဲဒါႈ “အာဝ်မိူဝ်ႈမ။” 36ခိင်ဒီန် စဝ်ဖြားစီဒါႈ “ကဇေန်နီန် ဆာ်ပဲမိူဝ်ႈကပျာဝ်းရိူန်း တိူဝ်ႈဟာဝ်း။ ကပျာဝ်းမာ် တိူဝ်ႈဟာဝ်း။ တပဲဆာ်အာဝ်မိူဝ်ႈ ဘိုတ်မာ် ယံင်းဂြူပဲမံင်လှေ ဇိူရ်ႈဘိုတ်။ 37အောနံင်က္လာင်းတပဲ တောပ်ဘည်နှဲအူန်းဘည်မိုႈအော ခေဲင်ဘေဲႇကျာမ်းa ‘နံင်ကတူႈအီး ပ္လအူန်းဒါႈအ်ုန်မိုႈတိုအီး မိူဝ်ႈအီုင်ဂ္လံတ်’ နီန် ဟည်မိုႈနံင်စေ့စုင်ဒေဲႈယာ့်။” 38ခိင်ဒီန် တပဲ့တော်အ်ုန်ကဲ ဒါႈ “စဝ်ဖြား၊ တိူရ်ႈဆဲ့။ တယဲမိူဝ်ႈပွံတ်ဘိုတ် အာရ် ပ္လါႇ” စဝ်ဖြားစီဒါႈ “ဟည်ဂိူပ်ကျံဝ်းယာ့်။” 39ဟောည်ႇဒီန် တောပ်ဘည်စဝ်ဖြားကျာင်းဒေရေဲန် အ်ုန်စီစွဟိုက်ပွံတ် ပဂေါင်တာန်လူန်။ တပဲ့တော်အ်ုန်ကဲမာ် တောပ်ဟာဝ်းဒိုႇ ရဘံန်းအ်ုန်။ 40ခိင်ရောတ်ကဲတဒီဒီန် စဝ်ဖြားစီဒါႈ တပဲ့တော်အ်ုန်ကဲ “ကနာည်နံင်အာဝ်ကတူႈအယ် တခ္လံဝ်းကချှူး မှာန်းဆုတစဝ်ဖြား။” 41ဟောည်ႇဒီန် စဝ်ဖြားစီဟာဝ်းအံက်ဆီႇကြိုင်း မှာန်းဆု 42“အို ကူန် စဝ်ဖြား၊ ဆာ်စဝ်ဖြားမိူဝ်ႈပ်ုန်လိုတေဲင်အော မည်ဒဲႈခံင်အီဇေဝ်နီန် ပဲန်ဒေဲႈ ဘာည်းဒေဲႈအေႇ။ မိုႈလိူည် ဒဲႈလိူည်အ်ုန်ဘာည်း ဘည်အလိုတော်စဝ်ဖြား။ မည်ဒဲႈအ်ုန်ပဲန် အလိုတော်အော။” 43ခိင်ဒီန် မိူဝ်ကန်ုမ်ဒေဝါအူပါး ရောတ်ဒေဲႈ ဒဲႈရဲင်တစဝ်ဖြား ပဆျှိုည်မျို့တော်။ 44စဝ်ဖြားနီန် အ်ုန်ဟံပ်နောႈဟံပ်ဖိူမ် ခါမ်စာဒါဝေဒနာဒါင်း အံက်မှာန်းဆု အိုမ်ရမူရ်ႈယိူဝ်ႇတစဝ်ဖြားဇောႈလေႈ တေဲင်ကတာည်း နှေရ်ပွံတ်ကဇွံတ်နှာမ်။ 45စဝ်ဖြားဟောည်ႇမှာန်းဆုဘာည်းဒီန် ခိင်အ်ုန်ႎီရ်ရောတ်ပဂေါည် တပဲ့တော်အ်ုန်ကဲ အ်ုန်ဟည်ယိူဝ်း ကဲနောႈလေဲဝ်၊ နူန်း၊ အီတ်ဆငဲႈလာ်ဒါ 46စဝ်ဖြားစီဒါႈ တတပဲ့တော်အ်ုန်ကဲ “ဆေဘာည်းပဲစီအီတ်ဒေဒါ။ ယိူဝ်ႇမှာန်းဆု မည်းဒဲႈအယ်ဇောႈ ခေဲင်ပ်ုန်ကချှူး ပ်ုန်ခ္လံဝ်းအီး။” 47ဇိုချီုင်က္လာင်း စဝ်ဖြားတကြောႈ ခေဲင်သာဝကအူကိူရ်လေႈအာရ်အီး နီန်အူအီး အ်ုန်အီမိုႈ ယုဒရှကာရုက် အ်ုန်တောႇဒေဲႈ ဖုင်တိုအီးအူဖုင် တစဝ်ဖြား အ်ုန်ခြီတ်ဒါ ဇည်းစဝ်ဖြား။ 48စဝ်ဖြားစီဆမွံတ်အ်ုန် “မည်းနံင်ခြီတ်လာ်ဒါ လူည်ႇဆေတ်စာတေဲင်ကောန်စဝ်ဖြား?” 49ခိင်တပဲ့အ်ုန်အူအီး ယိူဝ်းဘည်မိုႈဒီန် အ်ုန်စီဆမွံတ် “စဝ်ဖြား၊ စဝ်ဖြာ အယ်နံင်လိုလာ့် ဒါဘိုတ်တီုက်ကဲ?” 50ဟောည်ႇဒီန် ကဲစီဒါဘိုတ် က္လကတ်ုတ်ပွံတ်လှာဟျာ့် တိုအီးတောပ်ရဘံန်း တိုအီးဒါင်းပုရောဟေက်အူအီးဒီန်။ 51စဝ်ဖြားဟောည်ႇဒါႈ “ဇံင်းလိူည်ထာန်နီန်” အ်ုန်စီဒါတည်းအ်ုန် စီႇလှာဟျာ့်အီကတ်ုတ်ဇောႈဒီန် စီႎီရ်ဘာည်းဘိုး အီပြီမ်။ 52ဟောည်ႇဒီန် စဝ်ဖြားစီဒါႈတကဲ အီဒေဲႈကနာည်နံင်တိုည်းအ်ုန် ကဲအီမိုႈ တိုအီးဒါင်းပုရောဟေက်၊ ကောန်ဆီုက်ကဲအီရဲ့ ဗိမာန်တော် ကာည်း အီအွံရ်ခြိူဝ်းမျိုးဇူးကဲ “ဆေဘာည်းပဲစီကိုင်းပွံတ် ကဆား၊ ဘိုတ် ဘာည်းပဲတိုည်းတိုအီးစိုန်ကဲ။ 53ခိင်အောဂေါည်ခေဲင်ဗိမာန်တော် ဆေဘာည်းပဲစီ အာဝ်ဒေဲႈတိုည်းအော? မိုႈလိူည် အခိင်နီန်မိုႈ အခိင်ပဲ မာရ်နာတ်မာ် မိုႈအခိင်ရေဲန်အ်ုန် တပုင်ရံင်ဇေဝ်ဇ။” 54ဟောည်ႇဒီန် ခိင်ကဲတိုည်းစဝ်ဖြား တိုန်းဟာဝ်းပဂါင် တိုအီးဒါင်းပုရောဟေက်ဒီန် ပေတရုနီန် စီတောပ်ဟာဝ်း ရဘံန်း ရာမ်ကယာန်စရီတ်စရီတ်။ 55ခိင်တိုအီးမံင်ခ္လကဲဒိူန် အံက်ႎှါတ်ငံရ် ပေတရုမာ် လီပ်အံက်ပွံတ် ခနားကဲ။ 56ခိင်ကောန်အီပ်ုန်အူအီး ယိူဝ်းပေတရုအံက်ဒီန် အ်ုန်စီနှဲဒါကနူးတည်းအ်ုန် “တိုအီးနီန်မိုႈ တိုအီးတောပ်ယေရှု။” 57ခိင်ဒီန် “ပေတရုစီဒါႈ အောအာဝ်နံပ်မ တိုအီးနီန်။” 58ဂေါည်အူကဇီန် မိူဝ်ႈတိုအီးအူကဝ် ယိူဝ်းပေတရု အ်ုန်စီဒါႈ “မည်းမိုႈတိုအီးခေဲင်ဖုင်ကဲ အူအီး” ပေတရုစီႎီရ်ဒါႈ “အောအာဝ်မိုႈမ တိုအီးခေဲင်ဖုင်ကဲ။” 59ဂေါည်လှေင်ကပံတ်အူနြီ အူအီးဟံရ် စီဒါႈကတီးကရီးပွံတ် “တိုအီးနီန် မိုႈတိုအီးကောန်ကပီုန်ဂါလိလဲ အ်ုန်ဂေါည်တောပ်ဒေဲႈ ယေရှု။” 60ဟောည်ႇဒီန် ပေတရုစီႎီရ်ထဴင် “အောအာဝ်နံပ်မ ဆေမိုႈပ်ုန်ဒါႈမည်း။” ဇိုချီုင်ဒါႈကဲဘည်ဒီန် အျံရ်ဟည်ကဒိုရ်ပွံတ်။ 61ခိင်ဒီန် စဝ်ဖြားဟည်ကပံတ်တိူရ်ႈ ပေတရု။ ဂေါႇမိုႈ ပေတရုဟည်ႎီရ်ကအာ်မ်း ကြောႈပ်ုန်ဒါႈစဝ်ဖြား “ခိင်မှိူဝ်နီန် အာည်ႇကဒိုရ်ကအျံရ် မည်းနံင်ထဴင်ဒါႈဒေအာဝ်နံပ်အော အိုည်လိူဝ်ႈလလ” 62အ်ုန်လေႈပွံတ်ဒါနှာရိူဝ်ႇ အံက်ယာမ်းပွံတ်အစဴင်အရဴင်။ 63ကဲအီနှံက်ဒေတိူရ်ႈကဲနီန် ကဲလီုမ်ဒါစဝ်ဖြား မဲႈကထာႇအ်ုန်။ 64ကဲဒါ ဂြူဘက်ဘိငါည် စဝ်ဖြား “ဟောဆဲ့တိူရ်ႈ အဆေမိုႈအီမဲႈမည်း” 65ကဲဒါရဒေင်တောန်နဲ လီလာနဘာည်း၊ လီလာနဒါႈတစဝ်ဖြား။ 66ခိင်ႎါရ်ႈဘြည် တိုအီးဒါင်းပုရောဟေက်ဂဲ၊ ဆြာဆမားကျာမ်းဂဲ ကာည်း အီအွံရ်ခြိူဝ်းမျိုးဇူးကဲ စေတ်မေန်စဝ်ဖြား ပဘ္လံက်ချှာင်တြား။ ကဲဒါႈတစဝ်ဖြား 67“ပ္လါန်ဒဲႈဆဲ့ မည်းမိုႈ အာဝ်မိုႈ မေရှိယ။” ခိင်ဒီန် စဝ်ဖြားစီဒါႈ “ဆာ်အောက္လာင်းတပဲမာ် ပဲနံင်အာဝ်ညှူမ်မ။ 68ဆာ်အောဆမွံတ်ပဲမာ် ပဲအာဝ်ႎီရ်က္လာင်းမ။ 69မိုႈလိူည် ဇူႈဆငည်းအဒိူဝ်နီန် ကောန်စဝ်ဖြား အ်ုန်စေ့စုင် တဂိုးတော်အနန္တ၊ ဂုင်တော်အနန္တနီန် နံင်အံက်ဒါကဒါႇ လံပ်တံမ်ကူန်စဝ်ဖြား အူပ်ဘြောင်ဟာဝ်းဒိုႇ။” 70ခိင်ဒီန် ကဲစီဆမွံတ် “ဆာ်ဘာည်းဒီန် မည်းမိုႈ ကောန်စဝ်ဖြား?” စဝ်ဖြားစီႎီရ်ပ္လါန်ဒါႈ “မိုႈဘည်ဒါႈပဲဒီန်ယာ့်။” 71ကဲမာ်ဒါႈ “တိုအယ်ဟည်ယိူဝ်းဒေတငါဝ်း ဘည်ဒါႈအ်ုန်နီန် ဆံက်ဆေပ်ုန်ဟံရ် အာဝ်လိုယာ့်။”
Currently Selected:
Luke 22: stpv-rv
Highlight
Share
Copy
Want to have your highlights saved across all your devices? Sign up or sign in
This translation of the Shwe Palaung Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
