Luke 20
20
1အူဆငည်း ခိင်စဝ်ဖြားယေရှု ဟောက္လာင်းပနံဝ်း ဆဒါင်မှိူမ်မံင်ဂလာ တကူန်ရဝ်မာဂါင်ကဲ ခေဲင်ဗိမာန်တော် တိုအီးဒါင်းဇူးပုရောဟေက်ဂဲ၊ ဆြာဆမားကျာမ်းဂဲ ကာည်း တိုအီးဒါင်း ခြိူဝ်းဇူးဂဲ ရောတ်ဒေဲႈ 2ကဲဆမွံတ်စဝ်ဖြား “ဘည်ဟောက္လာင်းပနံဝ်း ခေဲင်ဗိမာန်တော်နီန် မည်းရေဲန်တောပ် အခွါင်းအာဏာလှေမှော? အဆေဒဲႈအူန်း အခွါင်းအာဏာ။” 3ခိင်ဒီန် စဝ်ဖြားစီဒါႈ “အောနံင်ဆမွံတ်ပဲအူနဲ။ ပဲစီပ္လါန်။ 4ယောဟာန် ဒေဲႈမံင်ဂလာခါမ်ဘည်ညှူမ်နီန် အခွါင်းအာဏာဆေအ်ုန်ဒါ။ အခွါင်းအာဏာ စဝ်ဖြား? အခွါင်းအာဏာ အူအီးအူကဝ်?” 5ကဲလည်ကမိုန်ခနားကဲ “ဆာ်အယ်ပ္လါန်ဒါႈ မိုႈအခွါင်းအာဏာစဝ်ဖြား အ်ုန်နံင်ႎီရ်ဒါႈတအယ် ‘ဆာ်ဘာည်းဒီန် ဆေဘာည်းပဲစီအာဝ်ညှူမ် ယောဟာန်?’ 6ဆာ်အယ်ဒါႈမိုႈဂေါႇအူအီးအူကဝ်မာ် ဂေါႇမိုႈကူန်ရဝ်မာဂါင်ကဲ ဂီုည်ညှူမ်ဒါႈယောဟာန်မိုႈ အာရိယာတိုအီးမှိူမ် စီပဲန်ယောဘိုးကဲဒေါတ်အယ်ဒါမာဝ်း။” 7ဂေါႇဘည်ဒီန် ကဲဟည်လည်ထဴင် ဘည်အာဝ်နံပ်ကဲ တယောဟာန်တအဆေအ်ုန်ဘိူန်းလာ်ဒါ အခွါင်းအာဏာ ကနာည်ရေဲန်ဒဲႈ မံင်ဂလာခါမ်ဘည်ညှူမ်နီန်။ 8ခိင်ဒီန် စဝ်ဖြားစီဒါႈ “ဆာ်ဘာည်းဒီန် အောမာ်နံင်အာဝ်ပ္လါန်မပဲနံပ် ကနာည်အောရေဲန်ဘည်နီန် အဆေအောဘိူန်းအခွါင်းအာဏာ။” 9ဟောည်ႇဒီန် စဝ်ဖြားက္လာင်းနှဲ ပုင်တဲႇအူလှေ တကူန်ရဝ်မာဂါင်ကဲ “မိူဝ်ႈတိုအီးအူအီး တီႇဆ်ုမ်ဒေဲႈ လိုင်းပ္လေရာတ်အူလိုင်း။ ႎါည်းဒီန် အ်ုန်ဒဲႈအီးရေဲန်လိုင်းဒီန် အ်ုန်စီလည်လေႈဒေင်ဒိုင်း အခိင်လှေင်ခည်း။ 10ခိင်ပ္လေးပ္လေရာတ်ဒီန် အ်ုန်စီပ္လေႈဟာဝ်း တပဲ့အ်ုန်ဟာဝ်းတိူဝ်ႈလာည်း ထာန်လိုအ်ုန်တဘိူန်း။ ကဲအီရေဲန်လိုင်းကဲဒီန် လီလာမဲႈနဘာည်းဖါ်ႈ တတပဲ့အ်ုန်ဒီန် ပ္လေႈႎီရ်လိူည် တည်းလာပ်လာပ်လိုည်းလိုည်း။ 11ဟောည်ႇဒီန် ကညာလိုင်းဒီန်မာ် ပ္လေႈဟာဝ်းဘိုးတပဲ့အ်ုန်အူအီး။ ကဲအီရေဲန်လိုင်းဒီန်မာ် လီလာနဘာည်း မဲႈမောကံပ်ဘိူန်းဆဲဝ် ရေဲန်ဘိုးအ်ုန်ဘိူန်းဆာည်း ပ္လေႈႎီရ်လာပ်လာပ်လိုည်းလိုည်းဘိုး။ 12ခိင်ကညာလိုင်းဒီန် ပ္လေႈဟာဝ်းကဝ်နံမ်ဘာတ်အိုည် ကဲအီရေဲန် လိုင်းဒီန်မာ် မဲႈပ္လေႈႎီရ်ဘာည်းလိူည် ကဲရအာည်ႇကဲဒိူန်။ 13ခိင်ဒီန် ကညာလိုင်းစီဒါႈ ‘ဘည်မှောအောနံင်လိုဘာည်း? အောနံင်လို ပ္လေႈကောန်အောယာ့်။’ ဆာ်ကဲအီငှားရေဲန်လိုင်းကဲနီန် ယိူဝ်းကောန်အော ကဲနံင်တိူဝ်ႈကနေဲႈအူန်း ႎါည်းဟောည်ႇတဂေန်းအ်ုန်ဘည်ဒီန် အ်ုန်စီပ္လေႈဟာဝ်းကောန်အ်ုန်ဒီန်။ 14မိုႈလိူည် ခိင်ကဲအီငှားရေဲန်လိုင်းဒီန် ယိူဝ်းကောန်ကညာလိုင်းနီန် ကဲဂီုည်လည်ကမိုန်ဒါႈ ‘တိုအီးအူအီးနီန် အူဆငည်းအူဆငည်း အ်ုန်မိုႈအီနံင် ရံပ်ခါမ်ပစေးအုက်စာ ဆာ်ႈ အယ်ပျံမ်းယံမ်းပဲတ်အ်ုန်’ 15ကဲတီုတ်လေႈကောန်ကညာလိုင်းဒီန် နှာရိူဝ်ႇ ပျံမ်းယံမ်းပွံတ်အ်ုန်။ ဆာ်မိုႈဘည်နီန် ဆေပဲထာင် ကညာလိုင်းနီန် နံင်ရေဲန်တကဲ။ 16ကညာလိုင်းနီန် အ်ုန်နံင်ဒေဲႈပျံမ်းယံမ် ကဲအီငှားရေဲန်လိုင်းကဲဒီန်ယာ့်။ ဆာ်ဟောည်ႇ လိုင်းမာ် အ်ုန်နံင်ဒဲႈအာပ်ဒဲႈ ခေဲင်တည်းအီးဟံရ်ယာ့်။ ကဲအီယိူဝ်းဒေတငါဝ်းမာ် ကဲဂီုည်ဒါႈ ခိင်မှောမာ် မည်ဒဲႈအ်ုန်မိူဝ်ႈဒေဲႈ ခံင်ဘည်နီန်အေႇ” 17စဝ်ဖြားဟည်တိူရ်ႈစံပ်ကဲ “‘က္လိုန်းမာဝ်း ပ်ုန်ႎီုန်ကဲအီရေဲန်တဲက်နီန် အ်ုန်ပဲန်ဒေဲႈ မာဝ်းအရေးဒါင်း ပ်ုန်ခါမ်ရခြူမ်’ ပ်ုန်ကိက်အူန်းခေဲင်ကျာမ်းနီန် ဆေအ်ုန်ဆိင်ဒါႈ? 18အဆေဇောႈတေဲင်မာဝ်းဒီန် နံင်ကပံက်ပဲန်ဒိုႇ ပေန်ဒေါန်ပေန်ဒေါန်။ ဆာ်မာဝ်းဒီန် ဇောႈတေဲင်အူအီးအူကဝ်မာ် အ်ုန်နံင်တညဲ့ ကမူန်ဒိုႇယာ့်။” 19တိုအီးဒါင်း ဇူးပုရောဟေက်ဂဲ ကာည်း ဆြာဆမားကျာမ်းဂဲနီန် ဂေါႇမိုႈကဲနံပ် ပုင်တဲႇပ်ုန်နှဲစဝ်ဖြားနီန်မိုႈ ကနာည်ကဲ ခိင်ဒီန် ကဲဘိူည်ဆိင်တိုည်းစဝ်ဖြားမာ် ကဲဂီုည်ယောကူန်ရဝ်မာဂါင်ကဲ။ 20ဂေါႇဘည်ဒီန် ကဲနှံက်လာတိူရ်ႈ ဟြီုက်အီုင်ဂ္လံတ် ကနာည်နံင်တိုည်းစဝ်ဖြား အာပ်ခေဲင်တည်း ဟောခံမ်း စီပဲန်ကဲပ္လေႈ တိုအီးဒံင်ဒေရေဲန်ပဲန်တိုအီးကျန။ 21တိုအီးကဲဒီန် ဒါႈတစဝ်ဖြား “ဆြာ၊ ယဲနံပ်အူန်း ဆြာအာဝ်မိူဝ်ႈငါည်ဒဲႇငါည်ဒါင်း က္လာင်းဟောပနံဝ်း ငျားငျား တောပ်ဘည်သမ္မာတြား တြားတော်စဝ်ဖြား။ 22ဂေါႇဘည်ဒီန် အာပ်ဒဲႈအခူန်တရောမဧကရာဇ်နီန် အ်ုန်ကငျားလာ့် တောပ်တြားတော်? ဆာ်အာဝ်မိုႈ အာဝ်ကငျား မှာန်းစဝ်ဖြား က္လာင်းဒဲႈမေန်။” 23ဂေါႇမိုႈ စဝ်ဖြားနံပ်ပရိယာယ် ပ်ုန်ဒံင်ဒေရေဲန်ကဲ 24စဝ်ဖြားစီဆမွံတ်ကဲ “နှဲမေန် ဒေနာရီဒင်္ဂါး။ အရာင် ကာည်း ဇီုဝ်အဆေအ်ုန်တောပ်ပဒီန်။” တိုအီးကဲဒီန်မာ် ပ္လါန်ဒါႈ “တောပ်အရာင် ရောမဧကရာဇ်ဆီဇာ ကာည်း ဇီုဝ်အ်ုန်အောႏ။” 25ခိင်ဒီန် စဝ်ဖြားစီဒါႈ “ဂြိုအီကဆီုဝ်ကဆဲင် တောပ်ဧကရာဇ် ဒဲႈႎီရ်ဘိုး တဧကရာဇ်။ ခံင်အီကဆီုဝ်ကဆဲင် တောပ်စဝ်ဖြား ႎီရ်ကာပ်ဒိုႇတစဝ်ဖြား။” 26ဂဲကဲဒီန် ဆဲႈဒါႇကဲအာဝ်ဘိူန်းဒေ ဟြီုက်အီုင်ဂ္လံတ်တေဲင်စဝ်ဖြားယေရှု ကြောႈပ်ုန်ပ္လါန်စဝ်ဖြားယေရှု ကဲဟည်အာမ်း ဂေါည်ယေန်ဟာဝ်းဒိုႇ။ 27မိူဝ်ႈကဲမံင်ခ္လ အီအာဝ်ညှူမ် ယိူဝ်ႇယံမ်းႎီရ်အီမ်း ကဲအီဇီုဝ် ဇဒ္ဒုကဲနီန်a ဟာဝ်းကဒံတ်စဝ်ဖြား 28“ဆြာ၊ ခေဲင်ကျာမ်း မောရှေb ဒါႈ ‘တိုအီးမိူဝ်ႈပီးအူအီး ဆာ်အာဝ်မိူဝ်ႈလာ်ဒါကောန် ယံမ်းဟာဝ်း ယာကမာည်းအီဒါ့်ကီုတ်ဒီန် ဘ်ုပ်ခံတ်လာည်း ႎါးကဝ်အီယံမ်းဟာဝ်းဒီန်။ ကောန်တံင်ဂါရ်ဒီန်မာ် ဘ်ုပ်ဆွံန်အ်ုန်မိုႈ ကောန်ကဝ်အီယံမ်းဟာဝ်းဒီန်။’ 29ဆာ်ဘာည်းနီန် ကဲႎါႎည်ပူရ်အီး ကဝ်ႎည်းဒါင်းကဲ ဟည်ခံတ် အာဝ်မိူဝ်ႈဒါကောန်ယံမ်းဟာဝ်း။ 30ကဝ်နံမ်ဘာတ်အာရ် ဘိူည်ခံတ်လာည်း ယာကမာည်းအီဒါ့်ကီုတ်ဒီန်မာ် အာဝ်မိူဝ်ႈကောန် ယံမ်းဟာဝ်းဘိုး။ 31ကဝ်နံမ်ဘာတ်အိုည်မာ် ဘာည်းလိူည်ဒီန် ႎါည်းကဲႎါႎည်ပည်ပူရ်အီး ဟောည်ႇခံတ်တိူဝ်ႈလာည်း ယာကမာည်းဒီန် ကဲဟည်ယံမ်းဟာဝ်းဒိုႇ။ 32ဒီဆူတ်အ်ုန် ယာကမာည်းဒီန်မာ် ဟည်ယံမ်းဟာဝ်း။ 33ဆာ်ဘာည်းဒီန် ဂေါႇမိုႈကဲႎါႎည်ပည်ပူရ်အီး ခံတ်တိူဝ်ႈလာည်း ယာကမာည်းနီန် ခိင်စဝ်ဖြားဒဲႈဘိုး ကဲႎီရ်အီမ်းဒီန် ကောန်အီပ်ုန်နီန် ပီးကဝ်မှော အ်ုန်နံင်မိုႈ?” 34ခိင်ဒီန် စဝ်ဖြားစီဒါႈ “ခေဲင်လောကကောန်ကံမ်ဖာနီန် မိူဝ်ႈအ်ူန်း လည်ခံတ်တိူဝ်ႈလာည်း။ 35မိုႈလိူည် ဇိုချီုင်အနာဂါတ် ကဲအီတာန်ကနာည်နံင်ႎီရ်အီမ်း ဘည်အာဝ်မိူဝ်ႈကဲတခံတ်တိူဝ်ႈလာည်း ဘည်ယံမ်းဒါႈအီးမာ် အာဝ်မိူဝ်ႈယာ့်။ 36ကဲဒီန် ကဲဟည်လောတ်ယံမ်း နံင်ပဲန်ဘာည်း ကန်ုမ်ဒေဝါကဲ။ ဂေါႇမိုႈကဲမိူဝ်ႈအခွါင်းႎီရ်အီမ်း ကဲနံင်မိုႈလိူည် ကောန်စဝ်ဖြားယာ့်။ 37ဘည်မိုႈဘည်ဘာည်း ကဲအီႎီရ်အီမ်းကဲနီန် မောရှေယီုဝ်နှဲအူန်း စဲင်စဲင်ဟြဟြ ဘည်မိုႈ ငံရ်ကဆူမ်ဘြည် ‘စဝ်ဖြားနီန် အ်ုန်မိုႈဖြား အာဗြဟံ၊ စဝ်ဖြားဣဇာတ် ကာည်း စဝ်ဖြားယာကုက်။’ 38စဝ်ဖြားနီန် အ်ုန်အာဝ်မိုႈမဖြားကဲအီဟောည်ႇယံမ်းကဲဒိူန် အ်ုန်မိုႈလိူည် စဝ်ဖြားကဲအီဆီုင်ဂီုည်ကဲနီန်။ ပ်ုန်ဆိင်ဒါႈအယ် တောန်ကဝ်တောန်အီး အီမ်းဒိုႇ ဘည်အလိုတော်စဝ်ဖြား။” 39ခိင်ဒီန် ဆြာဆမားကျာမ်းမံင်ခ္လကဲဒိူန်ဒါႈ “ပ်ုန်ပ္လါန်ဆြာ ချဲမ်ကငျားပွံတ်ခည်းယာ့်။” 40ဇူႈပွံတ်ခိင်ဒီန် အဆေမာ် အာဝ်ယယာ့်ဒေဆမွံတ် ပ်ုန်ဆမွံတ်။ 41ဟောည်ႇဒီန် စဝ်ဖြားစီဆမွံတ် တိုအီးကဲ “ဆေဘာည်းအီးစီဒါႈ မေရှိယ မိုႈကောန်ဟောခံမ်းဒါဝိဒ်။ 42ခေဲင်ကျာမ်းဆာလံ တိုဟောခံမ်းဒါဝိဒ် စဝ်ဖြားနီန် အ်ုန်ဒါႈတအဆျှီန်အော ဘည်နီန်။ အံက်ကဒါႇလံပ်တံမ်အော 43‘ဂါအောအာဝ်တိူဝ်ႈရာန်ဆူမည်း ဟံပ်ခြူမ်ဇိူင်မည်း ဒဲႈအ်ုန်ပဲန်ရမာ့်တာင်ဇိူင်မည်း။’ 44ဆာ်ဒါဝိဒ် ဒါတမေရှိယ (ကညာကဇောည်) နီန် ‘အဆျှီန်အော’ ဘည်မှော မေရှိယနီန် နံင်ဘာည်းမိုႈကောန်ဒါဝိဒ်။” 45စဝ်ဖြားနီန် ခိင်ကူန်ရဝ်မာဂါင်ကဲတငါဝ်း အ်ုန်ဒါႈတတပဲ့အ်ုန်ကဲ 46“အူန်းဆဒိဒါင်းဒါင်း ႎဲႈဒါႈ ဆြာဆမားကျာမ်းကဲ။ ခိင်လေႈဒေဲႈကဲ တေဲင်ဒေင် ကဲချှူပ်ဖါ်ႈဒါ ဂြူဒိုင်း ကဲဆမာကျိူက် ပ်ုန်တိူဝ်ႈကနေဲႈ တိုအီးခေဲင်က္လာႈကဲ။ ခေဲင်ကျောင်အံက်တြားမာ် ကဲဆမားအံက်ဒါရအာည်ႇ ပပ္လေါည်မာ် ကဲဆမာအံက်ပွံတ် ပပဒဲန်ချဲမ်။ 47ကဲဆမာအဓမ္မဆီမ်းလာည်း ဂါင်ယာကမာည်းကဲ ခိင်မှာန်းတဆုမာ် ကဲဆမာဒံင်ဒေ မှာန်းဒိုင်းဆု။ စဝ်ဖြားနံင်ဒဲႈ အီုင်ဂ္လံတ်ဒါင်း တတိုအီးကဲဒီန်ယာ့်။”
Currently Selected:
Luke 20: stpv-rv
Highlight
Share
Copy

Want to have your highlights saved across all your devices? Sign up or sign in
This translation of the Shwe Palaung Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.