Luke 3

1ကန်မင်စုံဗွယ် တိဗေရိခွမ်ဆက် လအစီ့ငေနိန်းကုခါ့ပုန္တိပိလတ်အွယ့် ပျန့်ခွမ့်ခံ ယုဒကန်ထွို့ ဟေရုဒ်အွယ့်ပျန့်ခွမ့်ခံဂါလိလဲ။၊ ဟေရုဒ်ပွော်ခူ ဖိလိပ္ပုအွယ့် ပျန့်လေ ခွမ့်ခံ ဣတုရဲဒေါင် တရာခေါနိတ် ကန်ထွို့၊ လုသာနိအွယ့် ပျန့်လေ ခွမ့်ခံ အဘိလင်ကန်ကု။ 2အွယ့်ခိန်းအွယ့် အန္နဒေါင်ကယာဖ ကားအွယ့် ပျန့်ပရောဟိတ်အဒူစွက်တွင် ကအိုဒါနွိုင်ကူ့ဇာခရိဖုခုယောဟန်ဆောင့်ဒီ ဖရာနှုတ်ကပါတ်တော် တွို့လေး။ 3ယောဟန်စထောင် ယော်ဒန်သျှီလိုးဒူ အဘောင်အာ့ထွို့ စဟိုတာ လကားချမ်းနောင်တစမ်းဝေးကာ့ဖုန်းထွို့ ဖီခွင်လွှတ်တလီခိုဟတာ ခံကားချန်း ငွတ်သျှီ မင်္ဂလားခရာဖုန်း။ 4ပရောဖက်ဟေရှာယကျမ်ကူ ကတျန်စေးကန်းဒါးဒီ ''ပလားအပလား အီစလေးဟိုတာနွိုင့်ကန္တာရကူ။ ဖီအာ ကလေ့ကတွို့။ 5ဖို့ဝေ့ကာတအုန်းဆောင်းခါ့ကူထွို့ မိုးဒွမ့်ကားကေ့ခေါင်းဖုန်း တရွဲဖုန်း။မိုးတွို့ ကားကေ့ ကလေကိုင်းဖုန်းထွို့ ကလေကြမ်ဖုန်း လဲ့ မိုးချော်မိုးခို ကားကေ့။ 6အွယ့်မကန်စာ့ ပလူးဖုန်းကားကအို အီသျှီကာဘာ ဗွယ်ဖရားကယ်ဆယ်ပလူးတနယ်" နိန်းအွယ့်ဟနေ။ 7အွယ်မဲ့ ယောဟန်ဒီ "နားက့နုဲင့် ပျန့်ပလူးဆုတ်ယုတ်ဗွမ့်နောင် ကူသေ့အိုနောင်စွူ။ ဖီးကတထွို့ကေ့ ဒေါသအီတွို့လင်းဒွို လမာကောဖီစသိနားက။ 8အွယ့်မဲ့ နားက့မိုးနေကာ တာအဘာဘာ ဖီးဒေါင်ဒါ နားက့ဖီကြွလိထွို့တလီခိုဟလုဲင်။ "က့ဒွို့ပျန့်တို အာဗြဟံမျိုဆက်တို" နားကကျန်းဒေါင့်ကားမာ နားက့နန်တိုးနိန်းအွယ့်မာ။ ဗွယ်ဖရာဒွို ဖန်ဆင်ဒါ လုံဒွိုးဘာ ဖီးပျန့်ဒါ အာဗြဟံမျိုဆက်။ 9ဒွိုးခါမသဲ အီးဒေါင်လင်ပိုင်းတွိုင်းမွိုင်အိုအကျွူကူ့တာ ခွအဘာဒွို အိုထွို့လိ။ အွယ့်မဲ့ တွိုင်းမွိုင်လီသာခိုဟဖုန်းအွယ့် ခံပေးဘာထွို့ ခံဆူဘာမီးကူ့" ဒေါင့်ပလူးလေးတွိုအာဆောင့်အီလေခံငွတ်သျှီမင်္ဂလာစာ နိန်းအွယ့်။ 10ထွို့မဲ့ "အွယ့်ဇွီး က့အီမိုးကာဘာ တာဟနာ" ပလူးပိန်ပလားလားအွယ့် တစီ့လေကားအာနိန်းအွယ့်။ 11ထွို့မဲ့ ယောဟန်ဒီ့ " နားကားဆောင့်နုဲင့် ကန်ကျိန်းဒူမေအိုး အန်ငြီ့ပွူးစာအွယ့် အိုလူဖီးလေကေ့ ပလားလီအိုဟစာအပွူး။ နားကားဆောင့် တအန်းတအိုမေပလန်ပလိုလဲ့ အိုလူဝေပန်ဖီးဘာ ပလားလငါ့" ယောဟန် ဖြေချာနိန်းအွယ့်။ 12ပလူးကျက် တခွန်စာပိန်ပလားလားလဲ့ အီလေခံကာ ငွတ်သျှီ့မင်္ဂလာတာ လေးကယောဟန်ဆောင့်ထွို့ "ဆရာ၊ ကားအီမိုးဘာ နိန်းမာစား" အာကားတစီ့ကာနိန်းအွယ့်။ 13ထွို့မဲ့ယောဟန်အွယ့် "ပလူးနားက့လူကျက်အခွန်စာဆောင့် ကျန်ကျက်လွို့ထိုင်မာအခွန်နားကဘာကျက်မာ" ဒေါင့်နိန်းအွယ့်။ 14အွယ့်ခါ့ ကျေ့စာ ပိန်ပလားပလားဖုန်းအွယ့် "ကားဟာ အီမိုးဘာနိန်းမာ" ထွိုင်းတစီ့ထွို့ ယောဟန်အွယ့် "နားကား ကျန်းကွူ့နွိုင်မာ ကွမ့်ပလားဆောင့်မာ၊ ကျန်းယွူလိုလေမာပလားမာ၊ကေနပ်ကားဘို့နောင် နားကားကွမ့်ကလဒါအွယ့်ငါ့လုဲင်" စွမ့်ဖီးနိန်းအွယ့်။ 15ဒွို့ခါ့ ပလူးဖုန်းအိုပွိုင်းလိုကာ ကယ်ဆယ်ဗွယ် မေရှိယအီလေးအွယ့်ကြား "ယောဟန်ဒွို ပျန့်ထိုင်ဗွယ်မေရှိယမတောဝ်" ပလူးဖုန်းထင်လေကာနိန်းအွယ့်။ 16အွယ့်ခါအွယ့်ယောဟန်" ငါးပြန်ဖြေချာဒါ့အာကာနိန်းဒွိုး "ငါးမိုးဖီငွတ်သျှီမင်္ဂလာဒေါင်သျှီဒွို မေတို။ ဒေါင်မားလဲ့ ပလူးတန်ခိုဒူးထိုင်ငါး အီးတွိုလေးတို။ ငါးဒွို အီချိဖီ အာခင်ဖာပီးငါလဲ့ လီထွိုက်တန်ဟ။ အာဒီ့ အီဖီပလူးဖုန်းငွတ်သျှီမင်္ဂလာ နောင်ဉာဏ်ရောင်တော် မေဟလဲ့ နောင်မီဖုန်း။ 17အာအီးခွဲခြာ ဂျုံကွောခိုဒေါင် အကုန့် နောင် ဘင့်တင်ကင်အိုအကျွော်ကူ။ဂျုံကွောခိုဖုန်းအွယ့် ဖီးကျန်းလင်တေးမာ အန္တရာယ်ကူ့မာ အာအီ ဈန်ခိုစေးအာကွို့င်ကူ ထွို့ အကုန့် ဖုန်းအွယ့် အာအီ ဖီးအုံ့ စို့ မီးလီကျိဒါဟဒွမ်းကူ့။ 18ယောဟန်အွယ့် အာစုံနည်းနိန်းဒွို့ထွို့ စာဟိုဖီပလူးဖုန်း ဖီလကာ နောင်တသံဝေဂထွို့ ဖီးလှည့်လေကာဖရာဒိုင့်။ 19ဒေါင့်မာလဲ့ ခွမ့်ခံဟေရုဒ်ဒီ့ တျက်အပွော်ခူဆက်အိုတုဲင်းခါ့ အာအန်းနီကေ့အာပွော်ခူမာ့ ဟာရောဒီ့အကြောင်ခရာ နောင် တလိခိုဟ လငါ့ဖုန်းတာ ယောဟန်အွယ့် ဒင်အပျက်ထွို့အန်းစွမ်အာ။ 20အွယ့်ကြားမဲ့ ဟေရုဒ်တလိခိုဟဒါအဘာဒီ အာအန်ချန့်အာကျေ့စာဖုန်း ကျန်းယောဟန်ထွို့ဆူထောင်ကု။ 21ယောဟန်ခံဘားကောင်းသွင်ထောင်ခိန်းခါ အာမိုးဖီးပလူးဖုန်း ငွတ်သျှီမင်္ဂလား။ယောဟန်အွယ့် မိုးဖီပါ ကိုယ်တော်ယေရှု ငွတ်သျှီမင်္ဂလာ။ထွို့မဲ့ ကိုယ်တော်ယေရှု အိုဆုတောင်တာတွင် မုအွယ့် တဘောင်ထန်းထွို့ 22ဉာဏ်ရောင်တော်အွယ့် ဗွမ်နောင်ထူကာဝူး လင်းလင် အလောင်ထွို့ ဗွယ်ဖရာ ကအိုဒါမုလောင်အွယ့် "နားနုဲင့် ပျန့်တို ငါးကရက်ဘာဒါ ငါးဖုတို၊ ငါးဟွမ်ခိုအားရနှိတ်ဆက်ယွမ်တွို့နား" ဒေါင့်ယေရှုနိန်းအွယ့်။ 23ကိုယ်တော်ယေရှု တေမိုးတာ့ ဖရာဗွယ်တမိုးခါအွယ့် အာဆက်တော်လ အန်းတွမ်စီအာ။ အာဒီ့ပျန့်ယောသပ်ဖုခုထွို့ယောသပ်ဒီ ပျန့်ဧလိဖုခု။ဧလိဒီ ပျန့် မဿတ်ဖုခု၊ 24မဿတ်ဒီ ပျန့် လေဝိဖုခု၊ လေဝိဒီ ပျန့် မေလခိ ဖုခု၊ မေလခိဒီ ပျန့်ယန္နဖုခု ၊ ယန္နဒီ ပျန့်ယောသပ်ဖုခု၊ 25ယောသပ်ဒီပျန့်မတ္တသိဖုခု၊ မတ္တသိဒီ ပျန့်အာမုတ်ဖုခု၊ အာမုတ်ဒီ ပျန့်နာဟုံဖုခု၊ နာဟုံဒီ ပျန့်ဧသလိဖုခု၊ ဧသလိဒီ ပျန့်နဂ္ဂဲဖုခု။ 26နဂ္ဂဲ ဒီပျန့်မာအတ်ဖုခု၊ မာအတ်ဒီ ပျန့်မတ္တသိဖုခု၊ မတ္တသိဒီ ပျန့်ရှေမိဖုခု၊ ရှေမိဒီ ပျန့်ယောသပ်ဖုခု၊ ယောသပ်ဒီပျန့် ယုဒဖုခု။ 27ယုဒဒီ ပျန့် ယောဟန္နဖုခု၊ ယောဟန္နဒီပျန့် ရေသဖုခု၊ ရေသဒီ ပျန့်ဇေရုဗဗေလဖုခု၊ ဇေရုဗဗေလဒီ ပျန့် ရှာလသေလဖုခု၊ ရှာလသေလ ဒီပျန့် နေရိဖုခု။ 28နေရိဒီပျန့် မေလခိဖုခု၊ မေလခိဒီပျန့် အဒ္ဒိဖုခု၊ အဒ္ဒိဒီ ပျန့်ကောသံဖုခု၊ ကောသံဒီ ပျန့် ဧလမောဒံ ဖုခု၊ ဧလမောဒံဒီ ပျန့်ဧရဖုခု။ 29ဧရဒီ ပျန့်ယောရှုဖုခု၊ ယောရှုဒီပျန့် ဧလျေဇာဖုခု၊ဧလျေဇာဒီ ပျန့်ယောရိမ်ဖုခု၊ ယောရိမ်ဒီ ပျန့်မဿတ်ဖုခု၊ မဿတ်ဒီပျန့်လေဝိဖုခု။ 30ဝေဝိဒီပျန့်ရှိမောင်ဖုခု၊ ရှိမောင်ဒီ ပျန့်ယုဒ ဖုခု၊ ယုဒဒီ ပျန့်ယောသပ်ဖုခု၊ယောသပ်ဒီပျန့် ယောနန်ဖုခု၊ ယောနန်ဒီပျန့် ဧလျာကိမ်ဖုခု။ 31ဧလျာကိမ်ဒီပျန့်မေလေဖုခု၊ မေလေဒီပျန့်မဲနန်ဖုခု၊ မဲနန်ဒီပျန့် မတ္တသဖုခု၊ မတ္တသဒီပျန့် နာသန် ဖုခု၊ နာသန်ဒီပျန့် ဒါဝိဒ်ဖုခု။ 32ဒါဝိဒ်ဒီပျန့် ယေရှဲဖုခု၊ ယေရှဲဒီပျန့် ဩဗက်ဖုခု၊ ဩဗက်ဒီပျန့်ဗောဇ ဖုခု၊ ဗောဇဒီပျန့် စာလမုန်ဖုခု၊ စာလမုန်ဒီပျန့် နာရှုန်ဖုခု၊ 33နာရှုန်ဒီပျန့် အမိနဒပ်ဖုခု၊ အမိနဒပ်ဒီပျန့် အဒ်မိန်ဖုခု၊ အဒ်မိန်ဒီပျန့် အာရံနိဖုခု၊ အာရံနိဒီပျန့် ဟေဇရုံဖုခု၊ ဟေဇရုံဒီပျန့် ဖာရက်ဖုခု၊ ဖာရက်ဒီပျန့် ယုဒဖုခု။ 34ယုဒဒီပျန့် ယာကုပ်ဖုခု၊ ယာကုပ်ဒီပျန့် ဣဇက်ဖုခု၊ ဣဇက်ဒီပျန့်အာဗြဟံဖုခု၊ အာဗြဟံဒီပျန့်တေရဖုခု၊ တေရဒီပျန့်နာခေါ်ဖုခု၊ 35နာခေါ်ဒီပျန့် စေရောက်ဖုခု၊ စေရောက်ဒီပျန့် ရာဂေါဖုခု၊ ရာဂေါဒီပျန့်ဖာလက်ဖုခု၊ ဖာလက်ဒီပျန့်ဟေဗာဖုခု၊ ဟေဗာဒီပျန့် ရှာလဖုခု၊ 36ရှာလဒီပျန့်ကာဣနန်ဖုခု၊ ကာဣနန်ဒီပျန့် အာဖာဇဒ်ဖုခု၊ အာဖာဇဒ်ဒီပျန့် ရှေမဖုခု၊ ရှေမဒီပျန့် နောဧဖုခု၊ နောဧဒီပျန့် လာမက်ဖုခု။ 37လာမက်ဒီပျန့် မသုရှလဖုခု၊ မသုရှလဒီပျန့် ဧနောက်ဖုခု၊ ဧနောက်ဒီပျန့် ယာရက်ဖုခု၊ ယာရက်ဒီပျန့်မဟာလေလဖုခု၊ မဟာလေလဒီပျန့် ကာဣနန် ဖုခု၊ 38ကာဣနန်ဒီပျန့် ဧနုတ်ဖုခု၊ ဧနုတ်ဒီပျန့် ရှေသဖုခု၊ ရှေသဒီပျန့် အာဒံဖုခု၊အာဒံဒီပျန့် ဗွယ်ဖရာဖုခု။

Currently Selected:

Luke 3: ltpv-rv

Highlight

Copy

Want to have your highlights saved across all your devices? Sign up or sign in

This translation of the Lahta Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.

Learn More About Lahta