Luke 4
4
1ထွို့မဲ့ ကိုယ်တော်ယေရှုအွယ့်အိုကိုနောင်ဉာဏ်ရောင်တော်ထွို့ အိုဂျော်ဒန်သျှီလိုးကူ့ကျိန်းထွို့မဲ့ ဉာဏ်ရောင်တော်အွယ့်အွမ့်ကျိန်းလေးအာ အွိုက်နွိုင့်ကန္တာရကူ့။ 2အာအွယ့် ခံဘာမာရ်နတ်မိုးရှုပ်တလျှပ် ကြာမငြီးအမ်းလွှီစီ့အာ့ထွို့ အွယ့်အခိန်းတွင် အာအမ်ဟတစွို့စွို့ထွို့မဲ့ မငြီးအွယ့်ဘာ ထွိုင်ပွမ်းထွို့ ကိုယ်တော်ယေရှုအွယ့် ဘာတဝီထန်။ 3မာရ်နတ်အွယ့် "နားနုဲင့် မေပျန့် ဖရာဖုခုလဲ့ ဒေါင့်လုံးဒွိုးဘား ဖီးပျန့်ထန်း တကိုးလုဲင့်" ဒေါင့်ယေရှုနိန်းအွယ့်။ 4ဒေါင့်မားလဲ့ ကိုယ်တော်အွယ့် " ကျမ်ကုဒီ့ပလူးဖုန်း ကဆက်ကျိဆက်တာဒီ အိုဘို့တအန်းအဘာလောင်ဟို့ မေဟ ဒေါင့်စေးကန်းနိန်းအွယ့်" မိန်းချားဒါ့နိန်းအွယ့်။ 5ထွို့မဲ့ မာရ်နတ်အွယ့် ဟောင့်ထန်ကိုယ်တော်ယေရှု အွိုက် ခေါင့်နာ့စွိုင်းလောင်ထွို့ အခိန်းအစင်ကုအွယ့် အာနေ့ဖီလူးတွို့ ကန်ကားကအိုးဒါး ကမ်းဖာလောင်။ 6မာရ်နတ်အွယ့် "ကအပ်စေးကန်းဒါငါး တန်ခိုအာဏာကားကအိုနောင် တစည်းကျိန်းဖုန်းဒွို ငါးဘာသဖီလမား ငါးဖီဒါးအွယ့်မဲ့ ငါးအီ ဖီအပ်နား။ 7အွယ့်မဲ့ နားမေဝယ်ငါး ငါးအီဖီနား အုပ်စိုးတာဒွိုးဟို ကားကအိုခွင်" ဒေါင့်နိန်းအွယ့်။ 8ဒေါင့်မာလဲ့ ကိုယ်တော်ယေရှုအွယ့် "လိတ်ကျမ်ကူဒီ ဝယ်ဘာဘို့နားဗွယ် ဗွယ်ဖရာဟို့။မိုဘဘို့အာတမိုးဟို့ တျန်နေစေကန်းနိန်းအွယ့်" ဖြေပလန်းချာဒါ မာရ်နတ်နိန်းအွယ့်။ 9ထွို့မဲ့ မာရ်နတ်အွယ့် ဟောင်လေးကိုယ်တော် အွိုက်ယေရုရှလင်ဝိန်းဗိမာန်တော်အစွိုင်းစွက်ကူထွို့ "နားနုဲင့် မေပျန့်ဗွယ်ဖရာဖုခုလဲ့ အိုဒွိုးကုထွို့ တန်ဗုတ်လင်လုဲင်။ 10ကျမ်းကူဒီ ဗွယ်ဖရာအွယ့် မိန့်စေးကန်းလွှော်ဖုန်း ဖီးဟွိုင့်လွန်လာကာနားအွယ့်မဲ့ နားလီစာ့ ဘားဟာ။ 11အာကားအွယ့် အီဖို့ပင်စေးကန်းကားတိုနား ဖီနားခင်းခွိုင်းလုံးထွို့ ကျန်းစာ့ဘားမာ" ဒေါင့်နိန်းအွယ့်။ 12အွယ့်ခါ့ ကိုယ်တော်ယေရှုအွယ့် "ကျမ်ကူဒီ ကျန်းကျန်မှာ ဗွယ်ဖရာမာ နေစေးနိန်းအွယ့်" မိန့်လေနိန်းအွယ့်။ 13ထွို့မဲ့ မာရ်နတ်လဲ့ ကျန်အာအမျိုးမျိုးထွို့ အိုကိုယ်တော်ဆောင့် စစွာ့ထန်ထွို့မဲ့ အိုပွိုင့်ဒါ့ အခါကို့လိုင်း။ 14ထွို့မဲ့ ကိုယ်တော်ယေရှုအွယ့် ကြွာ့ကျိန်းချာဒါ ဂါလိလဲ ဒေါင်ဉာဏ်ရောင်တော် ဝေ့ကျွမ်းနောင်တန်းခို။အာစတင်းဖုန်းလဲ့ တွိုကြွက်တွို့ အရပ်အာ့။ 15ကိုယ်တော်ယေရှု ထွိုင်းဖီဩဝါဒ ဓမ္မာရုံကုထွို့ လူထုဖုန်းလဲ့ အန်ဖရာလိုကား အာတစွမ့်ချက်ဖုန်း။ 16ထွို့မဲ့ ကိုယ်တော်ယေရှုအွယ့် ပြန်ကြွာ့ကျိန်းချာဒါ့ အာကဒူစို့ဒါ နာဇရပ်ဝိန်းကူ့။မငြီး ဆောက်တေးတာငြီးကူအွယ့် အာလေးဓမ္မာရုံးကူ့ နောင်အာအိုလေး တစေစေ။ အွယ့်ကူပါးအွယ့် ဖတ်လိတ်ကျမ်ထုတာ အာအိုထွိုင်ထန်တာ။ 17ထွို့မဲ့ ဖီလေကိုယ်တော် ပရောဖက်ဟေရှာယ လိတ်ကျမ်စောင်အွယ့်မဲ့ အာဘောင့်ထွို့ ဖတ်ကျမ်။ 18" ဗွယ်ဖရာရွေးငါး ဖီးဒေါင်ငိုစတင်း အီးကယ်ဆယ်ပလူးဖရန်ဖုန်း။ ဗွယ်ဖရာဒွို ကြွလေငါး ဖီးကဒေါင့်ဖီ ပလူးအိုခံ့ထောင်းစာဖုန်း၊ ဖီကလ တလွတ်ခွင်၊ ပလူးမေးသျှီ့စာ ဖီးကလတခါ့ နောင် ပလူးအိုခံစာဘာ တခုဲင်းတဖရန်ဖုန်း ဖီမိုးလွတ်လိထွိုခရာ။ 19ဒွိုးနိန်းကာလကူ့ဒွို ပျန့်တို နေဘာ ဗွယ်ဖရားဂရုဏာတော်အခိန်း" နိန်းအွယ့်ဟနေ။ 20ကိုယ်တော်ယေရှုအွယ့် ထူ့ချားဒါ့ လိတ်ကျမ်ထွို့ ဖီးချာဒါ့ ဓမ္မာရုံးတာဝန်းခံထွို့ အိုနန်းလင်တာ။ ထွို့မဲ့ ပလူးကအိုဒါ ဓမ္မာရုံးကူကာကအိုးအွယ့် ဟိုင့်ကြိုင်လိုကားကိုယ်တော်ယေရှု။ 21ထွို့မဲ့အာဒီ "နားက့ကဟွမ့်ဘာဒါ လိတ်ပါလိတ်ကျမ်းကူ့ဒီ ပျန့်ထန်ယွမ်လိမငြီးဒွိုးခါ့" အာမိန့်ပလူးနိန်အွယ့်။ 22ပလူးအွယ့်ကူ့ပါ ကဟွမ့်ဘာဒါ ကိုယ်တော်ဒေါင့်ငိုစာဖုန်းအွယ့် ဟွမ့်ဆန်လွန်လိုကား။ အာကာအွယ့် ဟွမ့်ဆန်လိုကား ငိုကထန်ဒါ ကိုယ်တော်နာပလောင်ကူထွို့ ပလူးပိန်ပလားပလားအွယ့် " နုဲင့်ပလားနုဲင့် ယောသပ်ဖုခုမေဟနောဝ်" ဒေါင့်လိုကားနိန်းအွယ့်။ 23ကိုယ်တော်ယေရှုအွယ့်လဲ့ "နားက့အီဒေါင့်ကာငါး နောင်းငိုဒေါင့်စေကန်းဒါ ဆရာဝန်ဒွို အိုလူကူချာတိုးနမ်တိုး။" နောင်းကဟွမ့်ဘာဒါး တကပျန့်ဒါး ကပေရနောင်ဝိန်းကူဒီဟို က့ဇာတိကူ့လဲ့ အီအန်ချန့်မိုးပျန့်နိန်းအွယ့်။ 24ဒေါင့်မားလဲ့ ငါးမေဒေါင့်ဘာ နားက့ငိုမှန်ဒွို၊ အရိယာ သူတော်ကောင် လာမားမားယောဝ်း အာဇာတိရပ်ကူ့အွယ့် လီလက်ခံကားဟာ။ 25ဒေါင့်မာလဲ့ ငါးမေဒေါင့်ဘာ အမှန်တရာဒွို ပရောဖက်ဧလိယခေတ်ခါ့ အစ္စရေးကူ့ မယ်မုဲင်ဖုန်းအိုဟေကာတန်။ အွယ့်ကူ့အွယ့် ကန်ခေါင်တွို့အန်တွမ်နိန်းခွဲအာ့အွယ့်ကြား ကန်အကန်လူး ခံအိုဝီလိုကားဘားတာ။ 26ဒေါင့်မားလဲ့ဗွယ်ဖရာဒီ့ ကူညီတာ ကြွလင်းဖီးဟအစ္စရေးကူ့ မယ်မုဲင်လငါ့ဖုန်းဆောင့်ထွို့ ကြွလေးဖီဘို့ ဧလိယဖီလင်ကူညီဖီဇိဒုန်ဝိန်းဆောင့် ဇရတ္တဝိန်းကူ့ကအိုဒါး မယ်မုဲင်အပလားဆောင့်။ 27ပရောဖက် ဧလိရှဲခေတ်ခါ့ အစ္စရေးကုကအိုဒါ ပခူကျန်ဟေဟေကူးအွယ့် ပျန်ထန်ကား တစာ့နားဒူး။ ဒေါင့်မားလဲ့ ဆီးရီးကန်စာကူ့ လွို့ နေမန်ထွို့ လမား ခံကူဘာဟ" မိန့်လင်းနိန်းအွယ့်။ 28ပလူးအဖုန်းကအိုဒါ ဓမ္မာရုံကုအွယ့် ထွိုင်းဟွမ့်ကိုယ်တော်ယေရှုငိုထွို့အာကာသဒွိုင်းလွမ့်လိုကားတွို့။ 29အာကားအွယ့်အိုထွိုင်းကားထွို့ မိုလိုကား ဖီးအာကစစွာ့ထန်ကေ့ဝိန်းအွယ့်ဝိန့်ကူ့။ အိုခေါင့်လှိုင်လောင်ထွို့ဘာသဖီထူးစီ့ကာကိုယ်တော်ယေရှု အွယ့်စားမဲ့ အာကာဟောင်လေးလိုကာအာဝိန်းခူနောင့်။ 30ဒေါင့်မားလဲ့ ကိုယ်တော်ယေရှုအွယ့် စစွာ့ထန်းကေ့ပလူးဖုန်းခါးထွို့ စစွာဆွက်လေဒါ့ အာကလေ့။ 31ထွို့မဲ့ ကိုယ်တော်အွယ့် လေးလေ ဂါလိလဲဒေသကူ့ ကအိုဒါ ကပေရနောင်ကူ့ထွို့ မငြီးဆောက်တေးတာငြီးအွယ့် အာဟိုထွို့ စွမ့်ဖီး ပလူးကအိုဒါ ဓမ္မားရုံကူ့စာ။ 32ကိုယ်တော်ငိုဖုန်းအွယ့် ဝေ့ကျွမ်းနောင် အခွင်အာဏာ အွယ့်ကြားမဲ့ ပလူးဖုန်း ဟွမ့်ယန်အားရလိုကား အာတစွမ့်ဖုန်း။ 33ဓမ္မာရုံးကူ့အွယ့် ပလူးအပလားခံဘား လွှော်သေပူးထွို့က့စင်နောင်တာထွို့ 34"နာဇရက်ဝိန်းစာ ယေရှု၊နားအီမိုက့နိန်းမာ၊ နားကြွလေ အီလေမိုးကေ့ကေက့နောဝ်။နားနုဲင့်လာမာ က့သိတို။ပျန့်တိုဗွယ်ဖရာဖုခုမြတ်တို"ဒေါင့်ကိုယ်တော် နိန်းအွယ့်။ 35အွယ့်ခါ့ ကိုယ်တော်ယေရှုအွယ့် "အိုကျွော်ကျွော်၊ အိုအာကူ့စစွာ့ထန်ချန်းနုဲင့်"ထွိုင်မိန့်လွှော်သေထွို့ အလိုင်ချင် လွှော်သေအွယ့် ဖီမိုးလင်ပိုင်းဗွီဗွီပလူးအွယ့်ပလားဟန်လောင် ပလူးအမျာခါးကူထွို့စစွာ့ထန်ကေ့ ပလူးအွယ့်ပလားကူ့ ဆောင့်။ 36ပလူးကားကအိုဓမ္မာရုံးကူ့ဖုန်း ဟွမ်ဆန်လိုကား ထွို့ "နုဲင့်ဒို့ ငိုနိန်းမာလေစီ့။ မေဝါစွာ့ထန်းကေ့လွှော်သေ အိုပလူးကူ့ထွို့ စစွာ့ထန်းဘာတွို့ တန်ခိုအာဏာဒွို့ အီအိုအာဆောင့်လေစီ့" အချင်ချင်ဒေါင့်လိုကားနိန်းအွယ့်။ 37ထွို့မဲ့ ကိုယ်တော်စတင်းဖုန်းလဲ့ ကြွက်ကျက်တွို့ အရပ်အာ။ 38ကိုယ်တော်ယေရှုအိုဓမ္မားရုံးကူ့ စစွာ့ထန်းထွို့ ကြွာ့လေးရှိမုန်ယွမ်ခိန်းခါ့ ရှိမုန်သျှီ့အွယ့် အလားဆန်ထန်းငါးထွို့အိုပျန့်ဒူးတာ။ ပလူးအိုအွယ့်ကူ့ပါး ပိန်ပလားပလားအွယ့် အန်းချန်လိုကာကိုယ်တော်ယေရှုကူ့ဖီးအာ။ 39ကိုယ်တော်လေးအာဆောင့်ထွို့ ဝါစွာ့ထန်းကေ့ တစာ့ရောဂါ။ အာတစာ့ရောဂါ တမာတွို့ အလိုင်ချင်ထွို့ အန်ထွူ့လေဖီ အာကာတအန်။ 40မွိုင့်ထွိုင်းနျူးထွို့ ဟောင်လေလိုကာ ပလူးကပျန်ဒါ ရောဂါးအမျိုမျိုစာဖုန်း အာဆောင့်အွယ့်ကြားမဲ့ ကိုယ်တော်ယေရှုအွယ့် ဒင်ထန်းအာကျော့ ပလူးစာပလားထွို့အပလားလောင်ထွို့ ကုသမာဖီ။ 41မိစ္ဆာဖုန်းလဲ့ စစွာ့ထန်ကေ့ ပလူးစာ့ဖုန်းကူ့ထွို့ "နားနုဲင်း ပျန့်ဖရာဖူ" ကာ့ကားနိန်းအွယ့်။ ကိုယ်တော်ယေရှုဒီ့ပျန့်ကယ်ဆယ်ဗွယ် မေရှိယ အာကာအိုသိအွယ့်ကြားမဲ့ ကိုယ်တော်အွယ့် ရေးစေးကန်းအာကာ ဖီးကျန်းဒေါင့်မာ နိန်းအွယ့်မာ။ 42ဒါ့အငြီး မွိုင်ထွိုင်းလီ့ထွို့ ကိုယ်တော်စစွာ့ထွာဒါ့ ခမ်းလန်လငါ့ကူ့။ လူထုဖုန်း စကွင့်တွယ်လိုကား၊ ထွိုင်ခွဲထွို့ တောင်ပလန်းလိုကား ဖီးကျန်လေးမာ ခမ်းလန်လငါ့ကူ့မာ။ 43ဒေါင့်မားလဲ့ ကိုယ်တော်အွယ့် "ဝိန်းလာငါ့ကူ့လဲ့ လူစဟိုဖီတုဲင်း ဗွယ်ဖရာ သာသနားခရားဖုန်း။ ကွက်အွယ့်ဘာတာမဲ့ အန်ကြွ့လင်ငါး" မိန့်လေနိန်းအွယ့်။ 44ထွို့မဲ့ ကိုယ်တော်ယေရှုအွယ့် ဟိုဆွက်လေဒါ့ အွိုက် ယုဒကန် ဓမ္မာရုံးကူ့ဖုန်း။
Currently Selected:
Luke 4: ltpv-rv
Highlight
Share
Copy
Want to have your highlights saved across all your devices? Sign up or sign in
This translation of the Lahta Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
