Luke 23
23
1ထွို့မဲ့ ပလူးဖုန်းကားကအိုဖုန်းအွယ့် ဟောင့်လေးလိုကာကိုယ်တော်ယေရှု ရောမခွမ့်ခံပိလတ်ဆောင့်ထွို့ 2"ပလူးဒွိုးပလားဒွို့ ပျန့်ပလူးရေးကေ့ ဖီကျန်ဆက်ကာမာအခွန်ဖုန်း ဧကရာဇ်ဆောင့်မာထွို့ ဒေါင့်ချာဒါအာနန်ဒွို့ ပျန့်ခွမ့်ခမ်းအပါး ကဟောင့်ဒါ ဗွယ်ကယ်ဆယ် မေရှိယထွို့ က့သျှီဘာ အာဒွို ချိုဖီပလူးဖုန်း ဖီကတွို့ ကလေ့မားကု" ယွူ့လိုကာ ကိုယ်တော် ပိလတ်မေငါ့ နိန်းအွယ့်ကြား။ 3ပိလတ်အွယ့် "နားနုဲင့်ဂျူးခွိုမျို ခွမ့်ခမ်း မေနဲ့" မေတစီ့ကိုယ်တော်ယေရှုနိန်းအွယ့်ထွို့ ကိုယ်တော်အွယ့် "ပျန့်နောင် နားကဒေါင့်နိန်းအွယ့်ဟနေ" ပြန့်မိန့်ချာဒါနိန်းအွယ့်။ 4ခွမ့်ခံပိလတ်အွယ့် လှည့်လေး ပုရောဟိတ်အဒူအကဲဖုန်း နောင် ပလူးဖုန်းဒိုင့်ထွို့ "ပလူးဒွိုးပလားလောင် အပျက်တစွိုစွို ငါးလီသျှီဟာ" ဒေါင့်နိန်းအွယ့်။ 5ဒေါင့်မာလဲ့ အာကာကားကအိုအွယ့် "ပလူးဒွိုးပလားဒွို အိုဂါလိလဲရပ်ကုထွို့ တွိုတွို့ ယုဒကန်ကု အာစဟိုချိုကန်စာဖုန်းကားကအို ဖီကရှုပ်ချက်ထန်ထွို့ ဒွို့ခါ့တွိုလေလိထွို့ ဒွိုးကုပါ" ဒေါင့်သေချာကာတာ နိန်းအွယ့်။ 6ပိလတ် ထွိုင်းဟွမ့်ဒေါင့်နိန်းအွယ့်ထွို့ "ပလူးဒွိုးပလားဒွို ဂါလိလဲကန်စာ မေနဲ့" တစီ့လေးနိန်းအွယ့်။ 7ထွို့မဲ့ ထွိုင်သိ ကိုယ်တော်ဒီ့ ပျန့်တိုဟေရုဒ်ကအုပ်စိုဒါ ဂါလိလဲနယ်ကုစာထွို့မဲ့ အွယ့်ခါ့အွယ့် ဟေရုဒ်အွယ့်လဲ့ တွိုလေး ဂျေရုဆလင်ဝိန်းကုအွယ့်ကြား တုန်လေးကာကိုယ်တော် ဟေရုဒ်ဆောင့်။ 8ဟေရုဒ်အွယ် ဟွမ့်စေးကန်းထွို့လိ ကိုယ်တော်ယေရှုခရာထွို့ ဘာသသျှီငြီးလီအွယ့်မဲ့ ထွိုင်သျှီထွို့ ကိုယ်တော်ထွို အာဟွမ့်ခိုယွမ်တွို့။အာအွယ့် ဘာသသျှီ ကိုယ်တော်မိုးနေ တာဆန်အဘာဘာ။ 9အွယ့်မဲ့ ဟေရုဒ်အွယ့် တစီ့ဟေတန် ကိုယ်တော်လဲ့ ကိုယ်တော်အွယ့် ပြန်ဖရေချာဟ တစွို့စွို့။ 10ထွို့မဲ့ ပုရောဟိတ်အဒူအကဲဖုန်း နောင် ကျမ်ဒါဆရာဖုန်းအွယ့် ထွိုင်းထွို့ ယွူ့နွိုင်လိုကာကိုယ်တော်။ 11ဟေရုဒ် နောင် အာကျေ့ဖုန်းအွယ့် မိုးပလာ့လိုကား ကိုယ်တော်ထွို့ အာကားအွယ့် အန်းဆျန့်လိုကား ကိုယ်တော် အိုတို့ ကန်ကျိန်ထွော့်ခုနောင် တန်ဖိုဒူဗွမ့်နောင်ခွမ့်ခမ်းထွို့ ပြန်တုန်းလေးချာဒါ့ ခွမ့်ခံပိလတ်ဆောင့်။ 12ဟေရုဒ် ဒေါင် ပိလတ် အွယ့် အကီခါ့ ပျန့်ကားတိုရန်ဆူဖုန်းလဲ့ အွယ့်ငြီးကု ပျန့်လေးကာတွို့ မိတ်ဆွေဖုန်း။ 13ပိလတ်ခွမ့်ခံအွယ့် အန်ချန့်စု ပုရောဟိတ်အဒူအကဲဖုန်း၊ ဂျူးဖာစာရေခေါင်းဆောင်ဖုန်း နောင် လူထု ပရိသတ်ဖုန်းထွို့ 14"ပလူးဒွိုးပလားဒွို ချိုဖီပျန့်တရှုပ် ဒေါင့်ကာနိန်းအွယ့်ထွို့ နားက့ ဟောင့်လေးလိုကာငါးဆောင့်။ ဒေါင့်မာလဲ့ ကျက်ချေတစီ့တွို့အာ နားက့မေခါ့ကုဒွိုးလဲ့ နောင်နားက့အယွူ့ဒါ မိုးစေးကန်းအပျက်ဖုန်းအွယ့် ငါလီသျှီဟာ။ 15ဟေရုဒ်အွယ့်လဲ့ ကွင်းအာအပျက် လီမို့ဟမဲ့ ဖီဟအာအပျက်တစွိုစွိုထွို့ ပျန်တုန်းချားဒါ့ငါးဆောင့်။ ပလူးဒွိုးပလားကု ကစီ့ထွိုက်ဒါ့ အပျက်တစွိုစွို လီအိုဟဒွို့ အိုတင်ရှာတို။ 16အွယ့်ကြားမဲ့ ဖီအာ ဒဏ်ခံဘာတွယ် ထွို့ အီဖီကြွအာ" ဒေါင့်နိန်းအွယ့်။ 17ပိလတ်ကဒေါင့်ဘာဒါ နိန်းအွယ့်ဒီ့ ပျန့်တိုထုံစံ ပသာခါပွဲကုဒွို အီလွတ်ဖီဘာ ထောင်စာအပလားဟနေ။ 18ဒေါင့်မာလဲ့ လူထုဖုန်း ကားကအိုအွယ့် "မိုးစီ့အာထွို့ ဖီကြွဖီ ဗာရဗ္ဗ" က့ထွို့ ကျွူ့လိုကာအလိုင်ချင်။ 19ဗာရဗ္ဗဒီ့ ပျန့်ကောမိုး ဝိန်းကုကပျန့်ဒါ့ မိုးစီ့ပလူးမှုနောင် ပုန်ကန်တာမှုစာ အွယ့်ကြားမဲ့ အိုခန့်ဘာတာထောင်ကု။ 20ပိလတ်အွယ့် ဘသာဖီးကြွ ကိုယ်တော်ယေရှု အွယ့်ကြားမဲ့ အာတစီ့ထိုင်ဒါ့ လူထုဖုန်း နောင် ဖာစာရေခေါင်းဆောင်ဖုန်း ဒါ့အလိုင်။ 21ဒေါင့်မာလဲ့ အာကာအွယ့် "ဒင်ထန်အာ တထွမ်အျန်ကျွော်ယာလောင်လုဲင်" အိုကွူ့ထွိုင်လိုကာဘို့နိန်းအွယ့်အလိုင်ထွို့ အလိုင်။ 22ထွို့မဲ့ ပိလတ်အွယ့် "အာဒွိုး မိုးမားဘာ တပျက်မျိုနိန်းမာ။ငါးလီသျှီဟာအာအပျက်တွိုတွို့ ဖီဘာဒဏ်မိုးစီ့ဟာ။အွယ့်မဲ့ ဖီးဒဏ်အာထွို့ အီဖီကြွဖီအာ" ဒေါင့်ထိုင်ဒါ့ အန်တွမ့်လိုင်ကု။ 23ဒေါင့်မာလဲ့ လူထုပရိတ်သတ်ဖုန်းအွယ့် က့စင်လိုကာဘို့ ဖီဒဏ်စီ့ ကိုယ်တော်ယေရှုတာ။ 24ကန်စာ့စွက် ခွမ့်ခံပိလတ်လဲ့ ကျူလေးဘာနောင်လူထုဖုန်းကကွူ ထွို့ 25အာအွယ့် ဖီကြွကေ့ ပလူးမိုးပုန်းကန်မှုနောင် မိုးစီ့ပလူးမှုဖုန်းထွို့ အိုခံဘာတာထောင်ကု ထောင်စာ'ဗာရဗ္ဗ' နောင်လူထုဖုန်း ကဘာသဖီကြွကာအတွိုင် ထွို့ အပ်ကိုယ်တော်ယေရှု အာကာဆောင့် ဖီကမိုးနောင် ပလူးအွယ့်ဟို ဆန္ဒအတွိုင်။ 26ကျေ့စာဖုန်း အိုဟောင့်လေးကိုယ်တော်တွင် သျှီလိုကာ ကုရေနေရပ်ကုကအိုဒါ ပလားနျန်းရှိမုန် အိုလေးလေဂျေရုဆလင်ဝိန်းအွယ့်ကြားမဲ့ ကျန်းလိုကာထွို့ အန်ချန်ယိုးလိုကာ တထွမ့်ကျွော့်ယားအျန်ထွို့မဲ့ တွယ့်ကိုယ်တော်ကန်စာ့။ 27ကိုယ်တော်တာ တွက်လိုကာအင့်ထွို့ ငွိုလိုကားတာ ပမွော်ဖုန်းအွယ့်ဟိုလဲ့ တွယ့်လေးလိုကာ ကိုယ်တော်ကန်စာ့ နောင်ပလူးဟေဖုန်း။ 28ကိုယ်တော်အွယ့် ခွယ်လေး အာကာဒိုင့်ထွို့ "ပမွော်ဂျေရုဆလင်ဖုန်း၊ကျန်းငွိုကားမာ ငါးတာမာ။ငွိုလိုကာဘို့ နားက့တာနောင် နားက့ဖုဖုန်းတာငါးလုဲင်" 29'မမွော်ဒုဲင်း၊ ပမွော်လီအိုဒွိုင့်ဖိုးဟ နောင် မမွော်လီဖီအို့ဖိုဟ ညွှော်စာဖုန်းဒွို့ ကံခိုးလွို့တို' အခိန်းပလူးအီဒေါင့်ကာနိန်းအွယ့် အီတွိုလေး။ 30မေတွိုအွယ့်ခါ့ ပလူးဖုန်းအွယ့် အီဒေါင့်ကာခေါင့်ဖုန်း 'ဖီးကပလုဲင်လင် က့လောင်လုဲင်' နိန်းအွယ့်ဖုန်း၊ 'အိုပါအွို့ဖီက့' နိန်းအွယ့်ဖုန်း။ 31ဗွမ့်နောင် တွိုင်မွိုင် အိုတွမ်စို အပျက်ကကင်ဒါ ငါးဒွိုမသဲ တပျန့်ကေ့ဖုန်းအိုပျန့်အွယ့် ဗွမ့်နောင် တွိုင်မွိုင်ဆိုင့်ဖုန်း ကပျန့်အပျက်စာ နားက့ဒွို အီပျန့်ထန်းကာနိန်းမာကြား"မိန့်နိန်းအွယ့်။ 32အပျက်စာဒါ့အန်တငြီ့အွယ့်လဲ့ အီမိုးစီ့ တွို့နောင်ကိုယ်တော်တာ ဟောင့်လေးလိုကာ။ 33မေတွိုထွို့ ခေါင့်နျန်း ခူကလောက်လောင်ထွို့ ဒင်းထန်ကာ ကိုယ်တော် တထွမ်အျန်ကျွော့်ယာလောင်ထွို့ သောက့်လိုကာထ။ဒင်ထန်လိုကာ့ အပျက်စာအန်တငြီ့ တထွမ်အျန်ကျွော့ယာလောင် ကိုယ်တော်တီး ပန်တီဒိုင့်အပလား၊ ပန်ချိုဒိုင်အပလားထွို့ သောက်လိုကာထ။ 34ထွို့မဲ့ ကိုယ်တော်အွယ့် "ဖာ့ဗွယ်ဖရာ၊ အာကာဒွို မိုးလိုကာတဟနာ လီသိကာဟအွယ့်ကြားမဲ့ ခွင်လွတ်ဖီ အာကာ "ဆုတောင်နိန်းအွယ့်။ကျေ့စာဖုန်းအွယ့် ခင်လောင်ကာထွို့ ပါးလိုကာ ကိုယ်တော်ကွမ်လာ။ 35ပလူးဖုန်း အိုထွိုင်ထွို့ ဟွိုင့်လိုကာတွင် ဂျူးခေါင်းဆောင်ဖုန်းအွယ့် မိုးပလာလိုကာ ကိုယ်တော်ယေရှုထွို့ " အာဒွို ကယ်ပလူးလငါ့ဖုန်းထွို့ မေပျန့်တို ဗွယ်ဖရာကရွေစေးကန်းဒါ ဗွယ်ကယ်ဆယ် မေရှိယလဲ့ ဖီအာကယ်တိုအနန်လုဲင်" ဒေါင့်လိုကာနိန်းအွယ့်။ 36ကျေးစာဖုန်းအွယ့်လဲ့ မိုးပလာလိုကား ကိုယ်တော်ထွို့ ဖီအို့လိုကာဝိုင်စာထွို့ 37"နားနုဲင့် မေပျန့်ယွမ်းတို ဂျူးခွိုမျိုခွမ့်ခမ်းလဲ့ ကယ်ချာတို နားနန်လုဲင်"ဒေါင့်လိုကာနိန်းအွယ့်။ 38'ပလူးဒွိုးပလားဒွို့ ပျန့်ဂျူးဖုန်းခွမ့်ခမ်း' ကတျန်စေးကန်းဒါ ဆိုင်းဘုတ်အွယ့်ဘာအွယ့် သောက်နောင်မီနာထွို့ ဖီးပွိုးလိုကာ ကိုယ်တော်ခူ ခမ်လွို တထွမ်အျန်ကျွော့်ယားလောင်။ 39ပလူးလိကင်ဟဒေါင်မူ့စာ အဆောင့် အပလားကူအွယ့် "နားနုဲင့် မေပျန့် 'မေရှိယ' လဲ့ ကယ်ချားဒါးတိုး နားနန်မွိုင်။ ကယ်ဖီးပါးကို ငါးမွမ်" ဒေါင့်ပလာ နိန်းအွယ့်။ 40အပျက်စာ ကခံဘာဒါ ဖီပွိုး တထွမ့်အျန်ကျွော့်လောင်အပလားကုအွယ့် "နားနုဲင့် မေပျန့်ဗွယ်ကယ်ဆယ် မေရှိယအွယ့် ကယ်ချာတိုနားနန်ထွို့ ကယ်ဖီပါက့လုဲင်" ဒေါင့်ပလား ကိုယ်တော်နိန်းအွယ့်။ 41ဒေါင့်မာလဲ့ အပျက်စာ လငါ့ပလားအွယ့် "နားနုဲင် အိုခံဘာလိထွို့ ချမိန့် ဗွမ့်ဗွမ့် အာဒွိုလဲ့ စကန်ဟဗွယ်ဖရာနောဝ်။က့ဒွို့ မိုးအပျက်ထွို့ ခံဘာအပျက်ဒွို အိုတန်တို။ ဒေါင့်မာလဲ့ အာနုဲင့် မိုးဘာအပျက်တစွိုစွို့ လီအိုဟာ" ဒေါင့်နိန်းအွယ့်။ 42ထွို့မဲ့ အာအွယ့် "ယေရှု၊ နားမေကြွာ့ကျိန်းချာဒါ အီအုပ်စိုဘာ နောင်ခွမ့်ခမ်းအပါးခိန်း ယူလပါငါးလုဲင်" လျှောက်ဆက်ဒါ့နိန်းအွယ့်။ 43ကိုယ်တော်အွယ့် " ငါးဒေါင့်နားအမှန်ဒွို၊ နားနုဲင် ဒွိုးငြီးကူတွို့ အီအိုတွယ်နောင်ငါး ပရဒိသုဘုံကု" မိန့်နိန်းအွယ့်။ 44အွယ့်ခိန်းအွယ့် ပျန့်တို မွိုင်တ့တနိုင်းခိန်းလဲ့ တွိုတွို့မွိုင်ဟ အန်တွမ့်နာရီခိန်း ကမ္ဘာအဘာအာ့ သျှီ့တိန်းနေတွို့။ 45မွိုင်ရောင်ဖုန်းလဲ့ တမာကေ့ထွို့ ပကင်းဒူ ကအိုပါအွို့စေကားဒါ အမြတ်စွက်ခမ်လန် ဗိမာန်တော်ကုအွယ့် ဖာ့ကေ့အန်ငြီ့ခို့။ 46အွယ့်ခါ့ ကိုယ်တော်အွယ့် "ငါးအပ်တို ငါးဝိဉာဉ် ဖာ့ဗွယ်ဖရာကျွော့်ကု" ရွက်စင်နိန်းအွယ့်ထွို့ ကျွမ်ကေတို့ဆက်။ 47ပလူးကသျှီဒါတပျန့်နိန်းအွယ့်စာ တပ်မှူးအွယ့် အန်ဖရာဗွယ်ဖရာဂုဏ်တော်ထွို "ပလူးဒွိုးပလားဒွို ပျန့်တိုပလူးတွို့ယွမ်တို"ဒေါင့်နိန်းအွယ့်။ 48အီလေဟွိုင့်ကား တသျှီးကွင်အွယ့်ဘာတာ ထွို့ လေးစုလိုကာတာ လူထုပရိသတ်ဖုန်းအွယ့် ထွိုင်သျှီကာကိုယ်တော်တပျန်ထွို့ သပီးကာတာနောင်တွို့ သတာအီဖထွို့ ကျိန်းလိုကားချာဒါ့ အာကာယွမ်။ 49ဒေါင့်မာလဲ့ ကိုယ်တော်ယေရှု ဖောဝ်ကားကအို နောင် ပွော်ဝေဖုန်း၊ အိုဂါလိလဲကုထွို့ ကပါလေးတွယ့်ဒါ ပမွော်ဖုန်းအွယ့် အိုထွိုင်ပွိုင်းလိုကာတာ ခမ်းလန်ပေါင်းယားယားအတောင်ကု။ 50အွယ့်ခိန်းအွယ့် ယုဒကန် အရိမဿဲရပ်ကုအွယ့် ပလူးကနျန်းဒါ ယောသပ်အိုအပလား။ အာအွယ့် ပျန့်ပလူးတွို့ ပလူးခိုအပလားထွို့ ပျန့်ဂျူးလွှတ်တော်ကျွို့ကု အပလား။ 51အာအွယ့် စဖိုတူဟ အီမိုးစီ့ ကိုယ်တော်ယေရှတာ ကကြံလိုကာဒါ ပလူးလွှတ်တော်ကျွိုကုစာလငါ့ ကဆုံဖြတ်တာ နောင် ကမိုးတာဖုန်း။ထွို့ဒါ့ အာအွယ့် ပျန့်တိုပလူ အိုလူ ဗွယ်ဖရာသာသနာတော် တွိုလင်း ကမ်ဖာဒွိုးဘာကုစာအပလား။ 52အာအွယ့် အီစင်ဂြိုဟ် ကိုယ်တော်နန်တာ ထွိုင်ကျွူပိလတ်ဆောင်ထွို့ ပိလတ်အွယ့်လဲ့ ခွင့်ဖီအာ။ 53အွယ့်မဲ့ အာအွယ့် ချာ့လင်းကိုယ်တော်နန် အိုတထွမ်အျန်ကျွော်ယားလောင်ထွို့ ဗျန့်ဖီနောင် ပိတ်ယာခို။ထွို့မဲ့ အာအွယ့် အန်ဒင်ခို ကိုယ်တော်နန် ကဒူ့စေးကန်းဒါ လုံဒူးအမာ့ ခချဖိုကောင်း လမားမား စင်ခိုင်အောင့်တကု။ 54အွယ့်ငြီးအွယ့် ပျန့်မငြီးပဲင်းတာ သောကြာငြီးထွို့ အီကူးမငြီးဆောက်တေငြီးတာ အခိန်ဘို့လိ။ 55ပမွော် အိုးဂါလိလဲ ကပါးလေးတွယ့်ဒါး ကိုယ်တော်ဖုန်းအွယ့် သျှီလိုကာဘာ စင်ခိုင်အောင့် ဖီအိုငြီ့စေးကန်းဒါ ကိုယ်တော်နန်။ 56ထွို့မဲ့ အာကားအွယ့် ကျိန်းကားယွမ်းထွို့ အီးပူးဇော်ကိုယ်တော်တာ ပဲင်းစေးကန်းကား နမ်းမန်ဟွမ် နောင် နံစားဟွမ်းဖုန်း။ ဒေါင့်မားလဲ့ အာကားအွယ့် နောင်မောရှေဥပဒေစည်းကမ်းကုအတွိုန် အိုနာကာတာ မငြီးဆောက်တေးငြီး။
Currently Selected:
Luke 23: ltpv-rv
Highlight
Share
Copy
Want to have your highlights saved across all your devices? Sign up or sign in
This translation of the Lahta Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
