Luke 24
24
1မုၢ်ခီၣ်ထံးအနံၤ, ဂိၤထီၣ်သီအဆၢကတီၢ်နဲၢ်, ဘၠီၣ်မ့ၣ်ပှၢ်တလိၣ်လဲၤလိ တၢ်သွၣ်ခွိၣ်အပူၤ, ဘျီး စိၤဝူၤဝဲ တၢ်နၢမူလိ အဝဲဝီၤအိၣ်ကတဲၤကတီၤပၤဝဲတလိၣ်နဲၢ်လိ. 2အဝဲဝီၤထ့ၣ်လိ လၢၢ်တဖျၢၣ်နဲၢ်ဘၣ်တၢ်ဆီၣ်ကွံၤအီၤလိ တၢ်သွၣ်ခွိၣ်အပူၤအခွိၣ်ထွိးလိ. 3လိတၢ်နံၤအဃိ အဝဲဝီၤကွၢ်လီၤနုဝဲ, ဘျီး တထ့ၣ်န့ၢ်ကစၢ်ယ့ၣ်ရှူးအစွိၣ်ဘၣ်. 4ဖဲအဝဲဝီၤ, အိၣ်ဆ့ထၢၣ်ဖဲနံၤဘျီး ကမၢကမၣ်ဝဲလိ တၢ်ဒ့းအ့ၤအဂ့ၢ်နဲၢ်, တဘျီဃီဘၠီၣ်ခံဂၤကူသွိးတၢ်ကူတၢ်ကၤကတြ့ၣ်ကတြီၣ်ဆ့ထၢၣ်လိ အဝဲဝီၤအကပၤလိ. 5ဘၠီၣ်မ့ၣ်ပှၢ်တလိၣ်အံၤသးပလံၤတၢ်ဘျီး ဆူးလီၤအခွိၣ်ဘျီး ဘၠီၣ်ခံဂၤနဲၢ်စံးဘၣ်ဝဲ, ‘ဘၣ်မနီၢ်အဃိ သုချုးဘၠီၣ်အမူတဂၤလိ ဘၠီၣ်သ့းတလိၣ်အကျၣ်လဲၣ်. 6အဝဲဒၣ် တအိၣ်နိၤဖဲအံၤဟိ. အဝဲဂ့ၤထ့ဂ့ၤအီၤလ့. သ့းနီၣ်ထီၣ်ဂ့ၤတၢ်လိ အဝဲဒၣ်စံးဘၣ်ပၤစၢၤသုဖဲအအိၣ်ဝဲလိ ကီၢ်ကၤလံၤလါအဆကကတီၢ်နဲၢ်တကဲၢ်. 7ပှၤကညီဖွိခွါကဘၣ်တၢ်ဟ့လီၤကွံၤအီၤလိ ဘၠီၣ်တၢ်ဒဲးဘးဖွိတလိၣ်အစုၣ်ပူၤ, ကဘၣ်တၢ်ပျၤထီၣ်အီၤလိ ထူၣ်စုညါအလိၤဘျီး ကဂ့ၤထ့ထီၣ်ဂ့ၤဝဲဖဲသၢနံၤတနံၤနဲၢ်လိ. 8တုၤနုၤတဘျီ, ဘၠီၣ်မ့ၣ်ပှၢ်တလိၣ်သ့းနီၣ်ထီၣ်ဂ့ၤအတၢ်ကတိၤတလိၣ်. 9ဟးထီၣ်လိ ဘၠီၣ်သွၣ်ခွိၣ်အပူၤဘျီး က့ၤစံးဘၣ်တၢ်မၤအသးတလိၣ်အံၤခဲလုၤလိ ဘၠီၣ်တၢ်မၢဖိတဆ့တဂၤလါ ဘၠီၣ်အဂၤတလိၣ်ခဲလုၤလိ. 10ဘၠီၣ်မ့ၣ်ပှၢ်တလိၣ်နဲၢ်မဲၢ်ဝဲ ဘၠီၣ်မၤကဒါလ့ၣ်မုၣ်နီၢ်မၤရံ, နီၢ်ယိၤအၣ်နၢ်, ဘျီး စီၤယိၤသးအမွိၢ်နီၢ်မၤရံနဲၢ်လိ. အဝဲဝီၤဘျီး ဘၠီၣ်မ့ၣ်ပှၢ်အဂၤလိ အအိၣ်လါ အဝဲဝီၤတလိၣ်နဲၢ် စံးဘၣ်ဘၠီၣ်တၢ်မၢဖွိတလိၣ်လိ တၢ်ဂ့ၢ်တလိၣ်အံၤလိ. 11လၢၤဘျီး ဘၠီၣ်တၢ်မၢဖွိတလိၣ်အံၤဆိကမိၣ်ဝဲလိ တၢ်လိဘၠီၣ်မ့ၣ်ပှၢ်တလိၣ်စံးအီၤနဲၢ်မဲၢ်ဒၣ်တၢ်လိ အခီပညီတအိၣ်, ဘျီးတနၤအဝဲဝီၤဘၣ်. 12မဲၢ်မဲၢ်စီၤပ့းတရူးတခိဂ့ၤထ့ဘျီး လဲၤစံၣ်လိ တၢ်သွၣ်ခွိၣ်အပူၤသကူးလီၤအသးဘျီး ကွၢ်တၢ်လါထ့ၣ်ဘၣ်ဝဲထဲတၢ်ကံးယၤအဝၣ်တလိၣ်လိ. တုၤနုၤတဘျီ အဝဲဒၣ်က့ၤဂ့ၤလိ ဟံၣ်ဘျီး ကမၢကမၣ်ဝဲလိ တၢ်လိ အမၤပၤစၢၤအသးအဂ့ၢ်နဲၢ်လိ. 13တနံၤဃီအဝဲနဲၢ်, အဝဲဝီၤ အကျၣ်ခံဂၤလဲၤလိ သဝီအ့းမၤအူလိ အစီၤစုၤလါ ဝ့ၢ်ယရူၤရှလ့ၣ်ကဘၣ်နွံမံၤလၣ်. 14ဘျီး အဝဲဝီၤ ကတိၤပကိးတၢ်ဘၣ်ဃးတၢ်လိ အမၤပၤစၢၤအသးခဲလုၤလိ. 15ဖဲအဝဲဝီၤကတိၤပကိးတၢ် အဆၢကတီၢ်နဲၢ်, ယ့ၣ်ရှူးအနီၢ်ကစၢ်ဒၣ်ဝဲသူဘူးဝီၤအသးဘျီး လဲၤပကိးတၢ်လါအဝဲဝီၤလိ. 16အဝဲဝီၤထ့ၣ်အီၤ, လၢၤဘျီး အဝဲဝီၤတသံညါအီၤဘၣ်. 17ယ့ၣ်ရှူးစံးဘၣ်အဝဲဝီၤ, ‘ဖဲသုလဲၤတၢ်အဖၢမုၢ်နဲၢ်, သုကတိၤပကိးတၢ်ဂ့ၢ်မနီၢ်တမံၤလဲၣ်.’အဝဲဝီၤဆ့ထၢၣ်ဂၢၢ်တပၢၢ်, ဘျီးအမံၤလီၤသပှၢ်ဝဲလိ. 18အဝဲဝီၤအကျၣ်တဂၤလိ အမံၤမဲၢ်စီၤကျံအီးပၤနဲၢ်သ့းကွၢ်အီၤ, ‘နမဲၢ်ပှၤတမှံၤလိ ဝ့ၢ်ယရူရှလ့ၣ်ထဲတဂၤဧိၤလိ အတသံညါ ဘၣ်ဃးတၢ်လိ အမၤပၤစၢၤအသးလိ အပူၤကွံၤစှၤနံၤလိ ဝ့ၢ်အဝဲနံၤအပူၤလိဧါ. 19တၢ်သ့းကွၢ်ဝဲ, ‘တၢ်မနီၢ်တလိၣ်လဲၣ်.’
အဝဲဝီၤစံးဆၢဝဲ, ‘တၢ်လိ အမၤပၤစၢၤအသးလါဘၠီၣ်နစၤရ့းဖိ ယ့ၣ်ရှူးအဂ့ၢ်တလိၣ်လိ. ဘၠီၣ်တဂၤအံၤမဲၢ်ဝဲဝံတဂၤဘျီး ကစၢ်ယွၤလါဘၠီၣ်ထီဖူၣ်ထီခၠၢခဲလုၤပၤအီၤဒ်, အအိၣ်လါတၢ်စိတၢ်ကမီၤလိ တၢ်စံးတၢ်ကတိၤဘျီး တၢ်ဖံးတၢ်မၤနဲၢ်လိ. 20ဘၠီၣ်လုၢ်တၢ်အခွိၣ်အဒွိၣ်လါဘၠီၣ်ခွိၣ်ဘၠီၣ်နၢ်တလိၣ်ဟ့လီၤကွံၤအီၤဒ်သိး အကဘၣ်တၢ်စံၣ်ညီၣ်သ့းအီၤ,ဘျီးအဝဲဒၣ်ဘၣ်တၢ်ပျၤထီအီၤလိ ထူၣ်စုညါအလိၤနဲၢ်လိ. 21ဘျီး မုၢ်လၢ်ပၤစၢၤပဝဲလိ အဝဲကမဲၢ်ဘၠီၣ်တဂၤလိ အကအုၣ်က့ၤခီၣ်က့ၤအံၣ်စရ့လးလိ. အါန့ၢ်အနံၤအံၤမဲၢ်ဝဲ တၢ်မၤအသးပှဲၤထီၣ်သၢနံၤတနံၤလိ. 22ဘၠီၣ်မ့ၣ်ပှၢ်လိ ပကဆူးကတ့ၤတနီၤမၤကမၢကမၣ်ဘၠီၣ်လိ. အဝဲဝီၤလဲၤဝဲဒၣ်ဂိၤထီၣ်သီလိ ဘၠီၣ်သွၣ်ခွိၣ်အပူၤ, 23လၢၤဘျီး တထ့ၣ်ဝဲအစွိၣ်ဘၣ်. အဝဲဝီၤဟဲက့ၤစံးဝဲလိ အထ့ၣ်ဘၣ်ကလူးတလိၣ်လိ အစံးဘၣ်အဝဲဝီၤလိ ယ့ၣ်ရှူးမူဝဲနဲၢ်လိ. 24ဘၠီၣ်လိ ပကျၣ်တနီၤလဲၤလိ ဘၠီၣ်သွၣ်ခိၣ်အပူၤဘျီး ထ့ၣ်ဘၣ်ဝဲ တၢ်တမံၤဃီဒ် ဘၠီၣ်မ့ၣ်ပှၢ်တလိၣ်စံးပၤစၢၤဝဲအသိးလိ. မဲၢ်မဲၢ်အနီၢ်ကစၢ်နဲၢ်အဝဲဝီၤတထ့ၣ်ဘၣ်.’ 25တုၤနုၤတဘျီ ယ့ၣ်ရှူးစံးဘၣ်အဝဲဝီၤ, ‘ဘၠီၣ်သူၣ်တဆးသးတဆးလိၣ်ဧၢ, သုကစူၤကနၤတၢ်ခဲလုၤလိ ဝံတလိၣ်စံးပၤစၢၤဝဲနဲၢ်ကီၣ်နီၢ်လဲၣ်. 26မဲၢ်အလီၢ်တအိၣ်လိ ခရံာ်ကတူၢ်တၢ်တလိၣ်အံၤ, ဘျီး နုၤလီၤလိ အတၢ်လၤကပီၤအပူၤဘၣ်ဧါ.’ 27ဘျီး ယ့ၣ်ရှူးစံးနၢ်ပၢၢ်အဝဲဝီၤဘၣ်ဃးတၢ်လိ အဘၣ်တၢ်စံးပၤစၢၤလိ အဂ့ၢ်လိ တၢ်ကွ့းအသးစီဆှံခဲလုၤအပူၤ,စးထီၣ်လိ လ့ၤမိၤရှ့တလိၣ်ဘျီး ဝံခဲလုၤအတၢ်ကွ့းတလိၣ်နဲၢ်လိ. 28ဖဲအဝဲဝီၤ ဟဲဘူးထီၣ်လါ သဝီလိ အကလဲၤဝဲနဲၢ်, ယ့ၣ်ရှူးမၤအသးဒ်အကလဲၤယံၤထီၣ်ဒံးလိ တၢ်မံၤညါအသိးနဲၢ်လိ. 29လၢၤဘျီး အဝဲဝီၤတြီအီၤဘျီးစံးဝဲ, ‘အိၣ်လါဘၠီၣ်တကဲၢ်. ဘူးနီၢ်လ့လိ မုၢ်ကဘၣ်ဝဲဘျီး တၢ်ခံးလီၤဝဲလ့လိတၢ်နံၤအဃိ အဝဲဒၣ်လဲၤနုအိၣ်လါ အဝဲဝီၤလိ. 30အဝဲဒၣ်ဆ့နီၤလိ စီၤနီၤခွိၣ်တလိၣ်ဃီဘျီး အဝဲဝီၤ,ဟံးန့ၢ်ကွိၣ်ဘျီး ဆိၣ်ဂ့ၤတၢ်အီၣ်လိ. တၢ်နံၤဝံၤဘျီး, အဝဲဒၣ်စိၢ်ပလ့းကွိၣ်ဘျီး ဟ့လီၤအဝဲဝီၤလိ. 31အဝဲဝီၤအမံၤအွိးထီၣ်အသးဘျီးသံညါ ဂ့ၤအီၤလၢၤဘျီး အဝဲဒၣ်ဟါမၢ်ကွံၤလိ အဝဲဝီၤအမံၤညါလိ. 32အဝဲဝီၤစံးလွိၤအသး, ‘ဖဲအဝဲဒၣ် ကတိၤတၢ်လါဘၠီၣ်လိကျဲၣ်ဘျီး စံးနၢ်ပၢၢ်ဘၠီၣ်ဘၣ်ဃးတၢ်ကွ့းအသးစီဆှံတလိၣ်အဂ့ၢ်နဲၢ်, တၢ်မၤနီၢ်အသးဒ်မဲၣ်အူအီၣ်တၢ်လိ ပပူၤ တမဲၢ်ဘၣ်ဧါ. 33အဝဲဝီၤဂ့ၤထ့တဘျီဃီ, ဘျီးက့ၤဂ့ၤလိ ဝ့ၢ်ယရူၤရှလ့ၣ်ဘျီး ဖဲနံၤထ့ၣ်အခ့အပှၤတဆ့တဂၤပၤဖှိၣ်အသးတလိၣ်ဃီဘျီ လါဘၠီၣ်အဂၤတလိၣ်. 34လိအစံးဝဲ, ‘ကစၢ်ဂ့ၤထ့ထီၣ်ဂ့ၤနီၢ်ကီၢ်လိ. အဝဲဒၣ်လီၤဖျါထီၣ်ပၤစၢၤအသးလိ စီၤရှံမိၣ်လ့,’နဲၢ်လိ. 35တုၤနုၤတဘျီ ဘၠီၣ်ခံဂၤနဲၢ်စံးဘၣ် ဝဲအဝဲဝီၤလိ ဘၣ်ဃးတၢ်မၤအသးဘျီး အဝဲဝီၤလိ အလဲၤတၢ်လိ ကျဲၣ်နဲၢ်အဝဲဝီၤသံညါဂ့ၤလိ အဝဲဒၣ်မဲၢ်ကစၢ်အတၢ်စိၢ်ပလ့ဝဲ ကွိၣ်အဂ့ၢ်နဲၢ်လိ. 36ဖဲဘၠီၣ်ခံဂၤစံးဘၣ်အဝဲဝီၤလိ တၢ်တမံၤအံၤအဂ့ၢ်နဲၢ်, တဘျီဃီ, ကစၢ်အနီၢ်ကစၢ်ဒၣ်ဝဲအိၣ်ဆ့ထၢၣ်လိ အဝဲဝီၤအကဆူးကတ့ၤ, ဘျီး စံးဘၣ်အဝဲဝီၤ, ‘မ်တၢ်ဃူတၢ်ဖှိၣ်အိၣ်လါသုတကဲၢ်.’ 37အဝဲဝီၤသးပလံၤနီတၢ်ဘျီး ဆိကမိၣ်ဝဲလိ အထ့ၣ်ဘၣ်တၢ်မွိၢ်ဃၢ်လိ. 38လၢၤဘျီး အဝဲဒၣ်စံးဘၣ်အဝဲဝီၤ, ‘ဘၣ်မနုၤအဃိ, သုသးပလံၤနီတၢ်လဲၣ်. ဘၣ်မနီၢ်အဃိတၢ်သးကဒံကဒါတလိၣ်အံၤ ဟဲအိၣ်ထီၣ်လိ သုပူၤလဲၣ်. 39ကွၢ်ယစဒ့ခီၣ်ဒ့တလိၣ်, ဒ်သိးသုကထ့ၣ်ဘၣ်လိ အမဲၢ်ယၤ, ယနီၢ်ကစၢ်ဒၣ်ဝဲနဲၢ်တကဲၢ်. ပလၢၢ်ကွၢ်ယၤ ဘျီးသုကသံညါလိ. တၢ်ဂ့ၢ်ဒ့းအ့ၤ, တၢ်တဃၣ်နဲၢ်, တအိၣ်လါအညၣ်လါ အဃ့ဒ်သုထ့ၣ်ဘၣ်သုဝဲလိ အအိၣ်လါယၤအသိးနဲၢ်ဘၣ်.’ 40အဝဲဒၣ်စံးတၢ်အံၤဝံၤဘျီး ဒွိးနဲၣ်အဝဲဝီၤလိ အစဒ့ခီၣ်ဒ့တလိၣ်နဲၢ်လိ. 41ထဲနံၤနီၣ်ခၠါ, အဝဲဝီၤတနၤဝဲဒံးဘၣ်. အဝဲဝီၤလိပှဲၤလါ တၢ်သးခုဘျီး တၢ်ကမၢကမၣ်နဲၢ်လိ. လိတၢ်နံၤအဃိ အဝဲဒၣ်သးကွၢ်အဝဲဝီၤ, ‘သုအိၣ်လါတၢ်အီၣ်တၢ်အိဖဲအံၤတခါခါဧါ.’ 42အဝဲဝီၤ ဟ့အီၤညၣ်အကၣ်တကဲၢ်. 43လိ အဝဲဒၣ်ဟံးန့ၢ်ဘျီး အီၣ်ဝဲလိ အဝဲဝီၤအမံၤညါနဲၢ်လိ. 44တၢ်နံၤဝံၤဘျီးစံးဘၣ်အဝဲဝီၤ, ‘တၢ်အံၤတလိၣ်မဲၢ်ဒၣ်တၢ်လိ ယစံးဘၣ်ပၤစၢၤသုဝဲယအိၣ်ဒံးဝဲလါ သုအဆၢကတီၢ်နဲၢ်လိ. တၢ်ခဲလုၤလိ အဘၣ်တၢ်ကွ့းတီၢ်အသးလိ ယဂ့ၢ်ဖဲစီၤမိၤရှ့အတၢ်သိၣ်တၢ်သီအလ့ၤတလိၣ်အပူၤ, ဝံအတၢ်ကွ့းတလိၣ်ဘျီးလ့ၤစံးထီၣ်ပတြၢၤတလိၣ်အပူၤနဲၢ်, ကဘၣ်လိထီၣ်ပှဲၤထီၣ်ဝဲဒၣ်လိ.’ 45တုၤနုၤတဘျီ အဝဲဒၣ် အွိးထီၣ်အဝဲဝီၤအသးဒ်သိး အကနၢ်ပၢၢ်တၢ်ကွ့းအသးစီဆှံတလိၣ်. 46ဘျီး စံးဘၣ်အဝဲဝီၤ, ‘တၢ်ကွ့းအသးမဲၢ်ဝဲ, ခရံာ်ကဘၣ်တူၢ်တၢ်ဘျီးဂ့ၤထ့ဂ့ၤလိ တၢ်သ့းဖဲသၢနံၤနဲၢ်လိ. 47ဘျီးလိ အဝဲဒၣ်အမံၤနဲၢ်, တၢ်ကစီၣ်ဘၣ်ဃးတၢ်ပီၢ်ယၢ်လီၤသးဘျီး တၢ်ပျၢ်တၢ်ဒဲးဘး, ကဘၣ်တၢ်ဟီတရါအီၤလိ ဘၠီၣ်ကိးကလုၢ်ဒ့းအဂီၢ်, အဆိလိ ဝ့ၢ်ယရူရှလ့ၣ်နဲၢ်လိ. 48ဘၣ်ဃးလါတၢ်တလိၣ်အံၤအဂ့ၢ်နဲၢ်, သုမဲၢ်ဘၠီၣ်အုၣ်အသးတလိၣ်လိ. 49ဘျီးယနီၢ်ကစၢ်ဒၣ်ယဲ ယကဆှၢလီၤတၢ်လိ ယပၢ်စံးပၤစၢၤတီၢ်ဝဲတမံၤနဲၢ်လိသုလိၤလိ. လၢၤဘျီး သုကဘၣ်အိၣ်ခိးလိ ဝ့ၢ်ပူၤတုၤလိ တၢ်စိတၢ်ကမီၤလိ တၢ်ဖီခွိၣ်ဟဲလီၤလိ သုလိၤတဘျီလိ. 50တၢ်နံၤဝံၤအလီၢ်ခံ, အဝဲဒၣ်ဆှၢထီၣ်အဝဲဝီၤလိ ဝ့ၢ်အချၢတုၤနီၢ်လိ ဘ့ၤသနံဘျီး ဖဲနံၤ, အဝဲယူၤထီၣ်အစဒ့ဘျီး ဆိၣ်ဂ့ၤအဝဲဝီၤလိ. 51အဝဲဆိၣ်ဂ့ၤအဝဲဝီၤအဖၢမုၢ်နဲၢ်, အဝဲဒၣ်သူးယ့ၤထီၣ်အသးလါ အဝဲဝီၤ, ဘျီး ဘၣ်တၢ်စိၤထီၣ်အီၤလိမွိခွိၣ်လိ. 52အဝဲဝီၤ ဘူၣ်ထီၣ်ဘါထီၣ်အီၤဘျီးက့ၤဂ့ၤပကိးဝဲလိ ဝ့ၢ်ယရူၤရှလ့ၣ်ပှဲၤလါတၢ်သးခုဖးဒွိၣ်, 53ဘျီး အိၣ်ဝဲလိ တၢ်ဘါလီၢ်အပူၤဘျီး စံးဘျုးစံးဖှိၣ်ကစၢ်ယွၤတစိၤသးလိ.
Currently Selected:
Luke 24: ktpv-rv
Highlight
Share
Copy
Want to have your highlights saved across all your devices? Sign up or sign in
This translation of the Karen, Paku Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
