Luke 23
23
1ဘၠီၣ်ထီဖူၣ်ထီခၠၢဂ့ၤထ့ဘျီး ဆှၢယ့ၣ်ရှူးလိ စီၤပံၤလးအမံၤညါလိ အဝဲဝီၤပၤတၢ်ကမၣ် 2လိ အဝဲဒၣ်အလိၤဘျီးစံး, ပဖီၣ်န့ၢ်ဘၠီၣ်တဂၤအံၤလိ အဆှၢကမၣ်ပပှၤကလုၢ်, တြီအဝဲဝီၤလိ အသုတဟ့တၢ်ခွိၣ်တၢ်သွဲလိ စီၤပၤဖးဒွိၣ်အအိၣ်တဂ့ၤ. ဘျီးစံးလီၤအသးလိ အနီၢ်ကစၢ်ဒၣ်ဝဲမဲၢ်ခရံာ်, စီၤပၤတဂၤနဲၢ်လိ.’ 3စီၤပံၤလးသ့းကွၢ်အီၤ, ‘နမဲၢ်ဘၠီၣ်ယူဒၤဖွိအစီၤပၤတဂၤနဲၢ်ဧါ.’ ယ့ၣ်ရှူးစံးဆၢဝဲ, ‘နစံးပၤစၢၤလ့ဝဲလ့.’ 4တုၤနုၤတဘျီ,စီၤပံၤလးစံးဘၣ်ဘၠီၣ်လုၢ်တၢ်အခွိၣ်အဒွိၣ်တလိၣ်ဘျီး ဘၠီၣ်ထီဖူၣ်ထီခၠၢတလိၣ်, ‘ယတထ့ၣ်နိၤတဂ့ၢ်လိ ယကဘၣ်စံၣ်ညီၣ်ဘၠီၣ်တဂၤအံၤနီတမံၤဘၣ်.’ 5လၢၤဘျီး, အဝဲဝီၤ စံးထီၣ်ဝဲဆူၣ်နဲၢ်အလီၢ်, ‘ဘျီး အဝဲဒၣ်မၤတၢထီၣ်တၢလီၤတၢ်လိ ဘၠီၣ်ထီဖူၣ်ထီခၠၢတလိၣ်အကျၣ်လိ ကီၣ်ယူဒၤထီကီၢ်ခီဖျိ အတၢ်သိၣ်တၢ်သီတလိၣ်လိ. အဝဲဒၣ်စးထီၣ်မၤဝဲလိ ကီၢ်ကၤလံၤလါ, ဘျီး ခဲနဲအံၤဟဲတုၤဝဲလိဖဲအံၤလ့.’ 6စီၤပံၤလးနၢ်ဟူတၢ်အဝဲအံၤနဲၢ်ဘျီး အဝဲဒၣ်သ့းကွၢ်ဝဲ, ‘ဘၠီၣ်တဂၤအံၤမဲၢ်ဘၠီၣ်ကၤလံၤလါဖွိတဂၤဧါ.’ 7အဝဲဒၣ်သံညါဘၣ်လိ ယ့ၣ်ရှူးဟဲလိတၢ်လီၢ်လိအဘၣ်တၢ်ပၢအီၤလိ စီၤဟ့ၤရိာ်နဲၢ်, ဆှၢဝဲလိ စီၤဟ့ၤရိာ်လိ အအိၣ်နဲၢ်နဲၢ်ဝဲဖဲ ဝ့ၢ်ယရူရှလ့ၣ်လိ ဖဲဆၢကတီၢ်အဝဲနံၤနဲၢ်လိ. 8စီၤဟ့ၤရိာ်အသးခူးနီလိ အထ့ၣ်ဘၣ်ယ့ၣ်ရှူးနဲၢ်လိ. တၢ်ဂ့ၢ်ဒ့းအ့ၤအဝဲနၢ်ဟူဘၣ်ပၤစၢၤဝဲယ့ၣ်ရှူးအဂ့ၢ်ဘျီး အဲၣ်ဒိးထ့ၣ်ဘၣ်ပၤစၢၤအီၤအိၣ်လ့ဖးယံၤလ့နဲၢ်လိ. အဝဲဒၣ်ဆၢဝဲလိ ကထ့ၣ်ဘၣ်ယ့ၣ်ရှူးမၤတၢ်လီၤလၣ်တခါခါလိ. 9လိတၢ်နံၤအဃိ, စီၤဟ့ၤရိာ်သ့းကွၢ်ယ့ၣ်ရှူးလိတၢ်သ့းအိၣ်ဘျၢၣ်သး, လၢၤယ့ၣ်ရှူးတစံးဆၢဝဲတၢ်နီတဘီၣ်ဘၣ်. 10ဘၠီၣ်လုၢ်တၢ်အခွိၣ် အဒွိၣ်တလိၣ်လါ ဘၠီၣ်သ့းတၢ်ဘူၣ်တၢ်ဘါအတၢ်သိၣ်တၢ်သီတလိၣ်ဟဲထီၣ်လိ တၢ်မံၤညါဘျီး ပၤတၢ်ကမၣ်ထီဒါယ့ၣ်ရှူးဆူၣ်ဆူၣ်ကွိၢ်ကွိၢ်လိ. 11စီၤဟ့ၤရိာ်လါ အသုၣ်ဖွိတလိၣ်နံၤဘၣ်ဖၣ်လဲယ့ၣ်ရှူး, ဘျီး မၤတရိတပါအီၤလိ. အဝဲဝီၤ ဒွိးကူးဒွိးသွိးထီၣ်အီၤလိဆ့ကၤဖးထိလိ အဂ့ၤ, ဘျီး ဆှၢဂ့ၤအီၤလိ စီၤပံၤလးအအိၣ်လိ. 12တနံၤဃီအဝဲနံၤ, စီၤဟ့ၤရိာ်လါ စီၤပံၤလး ကဲၣ်ထီၣ်ဘၠီၣ်ထီမံဖီၣ်လိ. တချုးဒံးလိ ဆၢကတီၢ်အဝဲအံၤနဲၢ် အဝဲဝီၤ မဲၢ်ဘၠီၣ်ထီဒုၣ်ထီဒါတလိၣ်လိ. 13စီၤပံၤလး ကိးဖှိၣ်ဘၠီၣ်လုၢ်တၢ်အခွိၣ်အဒွိၣ်တလိၣ်, ဘၠီၣ်ခွိၣ်ဘၠီၣ်နၢ်တလိၣ်ဘျီး ဘၠီၣ်ထီဖူၣ်ထီခၠၢတလိၣ်. 14ဘျီး စံးဘၣ်အဝဲဝီၤ, ‘သုဟဲဆှၢဘၠီၣ်တဂၤအံၤလိ ယအိၣ်ဘျီး စံးလိ အဝဲဒၣ်ဆှၢကမၣ်ဘၠီၣ်ထီဖူၣ်ထီခၠၢတလိၣ်လိ ခဲနဲအံၤ, ယကသ့းကွၢ်သ့းဒိးအီၤဖဲအံၤလိ သုမံၤညါဘျီး ယတထ့ၣ်ဘၣ်တၢ်ကမၣ်လိ သုပၤလိ အလိၤတလိၣ်နီတမံးဘၣ်. 15စီၤဟ့ၤရိာ်နဲၢ်နဲၢ် တထ့ၣ်အတၢ်ကမၣ်ဘၣ်. ဝံၤဘျီး အဝဲဒၣ် ဆှၢဂ့ၤအီၤလိ ပအိၣ်လိ. တၢ်လိ ဘၠီၣ်တဂၤအံၤ မၤဝဲတၢ်လိ အကြၢးလါ တၢ်သ့းနဲၢ် တအိၣ်ဝဲနီတမံၤဘၣ်. 16လိတၢ်နံၤအဃိ ယကမၢဘၠီၣ်ဖျ့အီၤဂၢၢ်အီၤဝံၤဘျီး ယကပျဲလီၤကွံၤအီၤလိ. 17(ဘူၣ်လဲၤကပၤအဆၢကတီၢ်တဘျီဘၣ်တဘျီနဲၢ်, စီၤပံၤလးဘၣ်ပျၢ်ပူၤဖျဲးကွံၤဘၠီၣ်ဃွိၣ်ဖွိတဂၤလိ အဝဲဝီၤအဂီၢ်လိ.) 18ဘၠီၣ်ထီဖူၣ်ထီခၠၢ ကိးထီၣ်ဝဲ, ‘မၤသ့းအီၤတကဲၢ်, ပျၢ်လီၤကွံၤစီၤဘၤရးဘါလိ ပဂီၢ်တကဲၢ်.’ 19(စီၤဘၤရးဘါတၢ်တ့နုအီၤလိ တၢ်တ့ၢ်နုလီၢ်, မဲၢ်လိ တၢ်တၢထီၣ်တၢလီၤတဘျီလိ အမၤပၤစၢၤအသးလိ ဝ့ၢ်ပူၤ, ဘျီး မဲၢ်လိ အမၤသ့းတၢ်အဃိနဲၢ်လိ.) 20စီၤပံၤလးအသးအိၣ်ပျၢ်လီၤကွံၤယ့ၣ်ရှူးလိ. လိတၢ်နံၤအဃိ, အဝဲဒၣ်ကိးဃီၤသီတဘျီလိ ဘၠီၣ်ထီဖူၣ်ထီခၠၢတလိၣ်အအိၣ်လိ. 21လၢၤဘျီး အဝဲဝီၤကိကလူဂ့ၤဝဲ, ‘ပျၤထီၣ်အီၤလိ ထူၣ်စုညါအလိၤတကဲၢ်. ပျၤထီၣ်အီၤလိ ထူၣ်စုညါအလိၤတကဲၢ်.’ 22စီၤပံၤလးစံးဘၣ်သီတဘျီလိ အဝဲဝီၤသၢဘျီတဘျီ, ‘မဲၢ်အဝဲမၤကမၣ်ဘၣ်ထံကီၢ်အတၢ်သိမနီၢ်တမံၤလဲၣ်. ယတထ့ၣ်န့ၢ်တၢ်ကမၣ်လိ အဝဲဒၣ် မၤတၢ်လိ အကြၢးလါတၢ်သ့းနဲၢ်တအိၣ်နီတမံၤဘၣ်. ယကမၢဘၠီၣ်ဖျ့အီၤဂၢၢ်အီၤဝံၤဘျီး ပျၢ်လီၤကွံၤအီၤလိ.’ 23လၢၤဘျီးအဝဲဝီၤကိးကလူးထီၣ်ဝဲလိ အကလုၢ်ဒွိၣ်ကတၢၢ်လိ ယ့ၣ်ရှူးကဘၣ်တၢ်ပျၤထီၣ်အီၤလိ ထူၣ်စုညါအလိၤအဂီၢ်နဲၢ်လိ. ဘျီးလိခံကတၢၢ်နဲၢ် အဝဲဝီၤအကလုၢ်မၤနၢၤဝဲတၢ်ခဲလုၤလိ. 24လိတၢ်နံၤအဃိ, စီၤပံၤလးစံၣ်ညီၣ်ယ့ၣ်ရှူးဒ်အဝဲဝီၤဃ့ဝဲအသိးနဲၢ်လိ. 25အဝဲဝီၤပျၢ်လီၤကွံၤဘၠီၣ်တဂၤလိအဝဲဝီၤအဲၣ်ဒိးဝဲ, ဘၠီၣ်တဂၤလိ အဘၣ်တၢ်တ့ၢ်နုအီၤလိ တၢ်တ့ၢ်နုလီၢ်လိ အမၤတၢထီၣ်တၢလီၢ်တၢ်လါ မၤသ့းတၢ်အဃိ, ဘျီးဟ့လီၤယ့ၣ်ရှူးလိ အဝဲဝီၤအစုၣ်ပူၤ, ဒ်သိး အကမၤအီၤဝဲအသးဒၣ်ဝဲနဲၢ်လိ. 26အဝဲဝီၤဆှၢယ့ၣ်ရှူးဘျီးလဲၤတၢ်အဖၢမုၢ်နဲၢ်, ဘၣ်တဂၢၢ်လါဘၠီၣ်တဂၤလိအမံၤမဲၢ်စီၤရှံမိၣ်ဘၣ်ဃးလါကီၢ်ကူၤရ့ၤန့, လိအဟဲလိခိဘျီး ဟဲနုလီၤဝဲလိဝ့ၢ်ပူၤနဲၢ်လိ. အဝဲဝီၤဖီၣ်အီၤ, ပၤထီၣ်ထူၣ်စုညါလိ အလိၤဘျီး မၢအစိၤဝဲဘျီးလဲၤတၢ်လိယ့ၣ်ရှူးအလီၢ်ခံနဲၢ်လိ. 27ဘၠီၣ်ထီဖူၣ်ထီခၠၢဖးဒွိၣ်ပိၤထီၣ်အခံ, ဘျီးလိအကျၣ်နဲၢ်အိၣ်လါဘၠီၣ်မ့ၣ်ပှၢ်တလိၣ်လိ အဒဲၣ်လီၤအသးနါပှၢ်ဘျီးဟီၣ်ဝဲလိ အဝဲဒၣ်အဃိနဲၢ်လိ. 28ယ့ၣ်ရှူးဃၤဝီၤအသးလိ အဝဲဝီၤအအိၣ်ဘျီးစံးဝဲ, ‘ယရူရှလ့ၣ်အဖွိမုၣ်လိၣ်ဧၢ, ဟီၣ်လိယဃိတဂ့ၤ, မဲၢ်မဲၢ်ဟီၣ်လိ သုဃိဒၣ်သုဝဲဘျီး လိသုဖွိသုလ့ၤတလိၣ်အဃိနဲၢ်တကဲၢ်. 29ယ့ၣ်ရှူးဃၤဝီၤအသးလိ အဝဲဝီၤအအိၣ်ဘျီးစံးဝဲ, ‘ယရူရှလ့ၣ်အဖွိမုၣ်လိၣ်ဧၢ, ဟီၣ်လိယဃိတဂ့ၤ, မဲၢ်မဲၢ်ဟီၣ်လိ သုဃိဒၣ်သုဝဲဘျီး လိသုဖွိသုလ့ၤတလိၣ်အဃိနဲၢ်တကဲၢ်. 30အဝဲအံၤကမဲၢ်ဆၢကတီၢ်ဖဲဘၠီၣ်ကစံးဘၣ်ကစၢၢ်ကလိတလိၣ်, ‘လီၤတ့ၤလိပလိၤတကဲၢ်.’ ဘျီးတၢ်လုၢ်တလိၣ်, ‘ပၤကိသုၣ်ဘၠီၣ်တကဲၢ်’ နဲၢ်လိ. 31တၢ်ဂ့ၢ်ဒ့းအ့ၤ, တၢ်မဲၢ်မၤအသးလိ သ့ၣ်အသံဒံၤအခါဒ့းအ့ၤဘျီးဖဲသ့ၣ်ဃ့ထီအခါတၢ်ကမၤမသးဒ်လဲၣ်.’ 32အဝဲမိၤဂီၤဘၠီၣ်အဂၤခံဂၤလိ အမဲၢ်ဘၠီၣ်မၤကမၣ်ထံကီၢ်အတၢ်သိၣ်တၢ်သီခံဂၤလူၤ, ဒ်သိးအကဘၣ်မၤသ့းဟူၤလါယ့ၣ်ရှူးနဲၢ်လိ. 33ဖဲအဝဲဝီၤတုၤတၢ်လီၢ်တတီၤလိ ဘၣ်တၢ်ကိးအီးလိ. ‘ကီၤလၤကီၤသါ’ လိ အခီပညီမဲၢ်, ‘တၢ်ခွိၣ်သၣ်ဃ့’ နဲၢ်အဝဲဝီၤပျၤထီၣ်ယ့ၣ်ရှူးလိ ထူၣ်စုညါအလိဖဲနံၤ, ဘျီး ဘၠီၣ်အၢၣ်ဘၠီၣ်သီခံဂၤနဲၢ်နဲၢ်,တဂၤလိ အစဒ့အတထွဲ, ဘျီးတဂၤလိအတစ့ၢ်နဲၢ်လိ. 34ယ့ၣ်ရှူးစံးဝဲ, ‘ပၢ်ဧၢ, ပျၢ်အဝဲဝီၤအတၢ်ကမၣ်တကဲၢ်. အဝဲဝီၤမၤတၢ်မနီၢ်လဲၣ်နဲၢ်တသံညါဝဲဘၣ်.’ အဝဲဝီၤနီၤဖးလီၤအဝဲဒၣ်အကူးအသွိးလိ အမံဖီၣ်ဒၣ်ဝဲ အကျၣ်ခီဖျိအဖီၣ်တၢ်ဖးလိ. 35ဘၠီၣ်ထီဖူၣ်ထီခၠၢတလိၣ်အိၣ်ဆ့ထၢၣ်ဝဲဖဲနံၤဘျီး ကွၢ်ပကိတၢ်ဖဲဘၠီၣ်ယူဒၤအခွိၣ်အနၢ်တလိၣ်ကတိၤနံၤဘၣ်ဖါလဲအီၤဘျီး စံး, ‘အဝဲဒၣ်အုၣ်က့ၤခီၣ်က့ၤဘၠီၣ်အဂၤတလိၣ်လိ. အဝဲမဲၢ်မဲၢ် ခရံာ်လိ ကစၢ်ယွၤဃုထၢထီၣ်အီၤတဂၤဘျီး, မ် အအုၣ်က့ၤခီၣ်က့ၤအသးဒၣ်ဝဲတကဲၢ်.’ 36ဘၠီၣ်သုၣ်ဖွိတလိၣ်နဲၢ်နဲၢ် နံၤဘၣ်ဖၣ်လဲအီၤလိ. အဝဲဝီၤလဲၤဝီၤလိ အအိၣ်ဘျီး ဒွိးအိတၢ်ထ့လိအဆံၣ်လိ. 37ဘျီး စံးဝဲ, ‘နမဲၢ်မဲၢ်ဘၠီၣ်ယူဒၤဖွိတလိၣ်အစီၤပၤနဲၢ်, အုၣ်က့ၤခီၣ်က့ၤလီၤနသးဒၣ်ဝဲတကဲၢ်.’ 38လိအဝဲဒၣ်အခိၣ်ထးနဲၢ်, တၢ်ကတိၤ ‘အဝဲအံၤမဲၢ်ဘၠီၣ်ယူဒၤဖိတလိၣ်အစီၤပၤ’ ဘၣ်တၢ်ကွ့းလီၤအီၤလိ. 39ဘၠီၣ်အၢၣ်ဖွိလိ အဘၣ်တၢ်ပျၤထီၣ်အီၤလိ အဝဲအကပၤအကျၣ်တဂၤကတိၤပစွိပစအီၤဘျီး စံး, ‘နတမဲၢ်ခရံာ်ဘၣ်ဧါ. အုၣ်က့ၤခီၣ်က့ၤလီၤနသးဒၣ်ဝဲလါဘၠီၣ်တကဲၢ်.’ 40လၢၤဘျီး ဘၠီၣ်အၢၣ်ဖိအဂၤတဂၤဒူၣ်အလိၤဘျီး စံးဝဲ, ‘နတပျံၤကစၢ်ယွၤဘၣ်ဧါ. နအိၣ်လိ တၢ်စံၣ်ညီၣ်တမံၤဃီအဖီလၤလိ. 41လၢၤဘျီး, ပဝဲပတၢ်တူၢ်ဘၣ်တၢ်နဲၢ်, မဲၢ်တၢ်လိ အကြၢးဝဲဘၣ်ဝဲလါဘၠီၣ်လိ, တၢ်ဂ့ၢ်ဒ့းအ့ၤ, ပဒိးန့ၢ်ဘၣ်တၢ်စံၣ်ညီၣ်လိ. တၢ်လိ ပမၤပၤစၢၤပဝဲတလိၣ်အဃိလိ. မဲၢ်မဲၢ်အဝဲဒၣ်နဲၢ် တမၤကမၣ်နိၤတၢ်နီတမံၤဘၣ်. 42ဘျီး အဝဲဒၣ်စံးဘၣ်ယ့ၣ်ရှူး, ‘ယ့ၣ်ရှူးဧၢ, နဟဲလါဒ်စီၤပၤအသိးနဲၢ် သ့နီၣ်ထီၣ်ယၤတကဲၢ်.’ 43ယ့ၣ်ရှူးစံးဘၣ်ဝဲ, ‘ ယစံးဘၣ်နၤ မူၤမူၤနီၢ်နီၢ်လိ နၤခဲမဆါနကအိၣ်လါယၤလိပၤရဒံစူးအပူၤလိ.’ 44ဖဲမုၢ်ဆါခိ တဆ့ခံနၤရံၣ်ဘျဲၣ်နဲၢ်, မုၢ်အိၣ်ကတီၢ်ကွံၤအတၢ်ပီၤဘျီး တၢ်ခံလီၢ်လိကီၢ်ထီဘ့ၣ်တုၤလိ ဟါခိလီၤသၢနၤရံၣ် 45ဘျီးတၢ်ဘါလီၢ်အယၣ်ဘျးဘံတဘ့ၣ်နဲၢ်, ယၤကွံၤဝဲဒၣ်ခံခိ1လိ. 46ယ့ၣ်ရှူးကိးထီၣ်လိအကလုၢ်ဖးဒွိၣ်, ‘ပၢ်ဧၢ, ယကဟ့လီၤယသးလိနစုၣ်ပူၤလိ.’ အဝဲဒၣ်စံးတၢ်ဒ့းန့ၤဝံၤဘျီး အသးဟးထီၣ်ကွံၤလိ. 47ဘၠီၣ်သုၣ်ဖိ တကယၤအခွိၣ်ထ့ၣ်တၢ်လိ အမၤပၤစၢၤအသးတလိၣ်စံးထီၣ်ပတြၢၤယွၤဘျီးစံးဝဲ, ‘သပှၢ်ကတၢၢ်ဘၠီၣ်တဂၤအံၤမဲၢ်ဘၠီၣ်ဂ့ၤဘၠီၣ်ဝၣ်လိ.’ 48ဘၠီၣ်ထီဖူၣ်ထီခၠၢ, လိအပၤဖှိၣ်ထီၣ်အသးဖဲနံၤဒ်သိးအကကွၢ်တၢ်မၤအသးတလိၣ်, ထ့ၣ်ဘၣ်တၢ်လိ အမၤပၤစၢၤအသးနဲၢ်အဝဲဝီၤကိးဂၤဒ့းဒဲၣ်လီၤအသးနါပှၢ်, လိတၢ်သးတမူၤဘျီး က့ၤဂ့ၤဝဲလိ ဟံၣ်လိ. 49ဘၠီၣ်ကိးဂၤဒ့းလိ အသံညါ ပကိးယ့ၣ်ရှူးလါဘၠီၣ်မ့ၣ်ပှၢ်တလိၣ်လိ အဟဲပိၤယ့ၣ်ရှူးအခံလိ ကီၢ်ကၤလံၤလါနဲၢ် အိၣ်ဆ့ထၢၣ်လိ အယံၤဒ်သိး အကထ့ၣ်ဘၣ်တၢ်မၤအသးတလိၣ်အံၤနဲၢ်လိ. 50ဘၠီၣ်အိၣ်ဝဲတဂၤလိ အမံၤမဲၢ်စီၤယိၤသးလိ ဝ့ၢ်အရံၤမၤသဲဘၣ်ဃးလါကီၢ်ယူဒၤနဲၢ်လိ. 51အဝဲဒၣ်မဲၢ်ဘၠီၣ်အဂ့ၤအဝၣ်လါအမူၤအနီၢ်တဂၤ, လိအအိၣ်ခိကွၢ်လၢ်ယွၤအဘီအမုၢ်အတၢ်ဟဲနဲၢ်လိ. အဝဲမဲၢ်တၢ်စံၣ်ညီၣ်ကရၢဖွိတဂၤနီၣ်ခၠါ, တဘၣ်သူၣ်ဘၣ်သးလိ အဝဲဝီၤအတၢ်အၢၣ်လီၤ စံၣ်ညီၣ်လါ အတၢ်ဖံးတၢ်မၤတလိၣ်ဘၣ်လိ. 52အဝဲဒၣ်လဲၤလိ စီၤပံၤလးအအိၣ်, ဘျီးဃ့ဂ့ၤဝဲယ့ၣ်ရှူးအစွိၣ်လိ. 53တၢ်နံၤဝံၤဘျီး, အဝဲဒၣ်စိၤလီၤယ့ၣ်ရှူးအစွိၣ်ဘိၣ်ဘံဝဲလိ တၢ်ကံးယၤအဝၣ်တဘ့ၣ်ဘျီးပၤလီၤအီၤလိ တၢ်သွၣ်ခွိၣ်အပူၤလိအဘၣ်တၢ်ပျၤန့ၢ်အီၤလိ လၢၢ်လိၤဘျီးတဘၣ် တၢ်သူဒံးအီၤနိၤနီတဘျီဘၣ်နဲၢ်လိ. 54မဲၢ်ဝဲဒၣ်မုၢ်ယဲၢ်နံၤ ဘျီး မုၢ်အိၣ်ဘှံၤနံၤကတုၢ်ဂီၤဘူးထီၣ်ဝဲလ့နဲၢ်လိ. 55ဘၠီၣ်မ့ၣ်ပှၢ်လိအဟဲပိၤယ့ၣ်ရှူးအခံလိ ကီၢ်ကၤလံၤလါတလိၣ်လဲၤပကိးလါစီၤယိၤသးဘျီးထ့ၣ်ဘၣ်တၢ်သွၣ်ခွိၣ်အပူၤ, ဘျီးယ့ၣ်ရှူးအစွိၣ်ဘၣ်တၢ်ပၤလီၤအီၤလိ အပူၤဒ်လဲၣ်နဲၢ်လိ. 56တၢ်နံၤဝံၤအလီၢ်ခံအဝဲဝီၤက့ၤဂ့ၤလိ ဟံၣ်ဘျီး အိၣ်ကတဲၤကတီၤပၤတၢ်နၢမူးလါမူရၣ်လိ အကဖှူအစွိၣ်အဂီၢ်နဲၢ်လိ ဖဲမုၢ်အိၣ်ဘှံးနံၤနဲၢ်, အဝဲဝီၤအိၣ်ဘှံးဝဲဒ်တၢ်သိၣ်တၢ်သီအိၣ်ဝဲအသိးနဲၢ်လိ.
Currently Selected:
Luke 23: ktpv-rv
Highlight
Share
Copy
Want to have your highlights saved across all your devices? Sign up or sign in
This translation of the Karen, Paku Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
