Luke 10
10
1နွို့ခေါင်း ကိုယ်တော်နောင်း ဘာအမ်ရွီးပိုမဲ့ တပည့်တော်အ့်ကွက်ပတ်ကျင်a နွို့ ဆိုတွဲတွို့အဲဉ်ကွက်အတွဲစီထာ ကိုယ်တော်အမ်းကြွပိုမဲ့ မြိုတွိုန်း၊ တဘိုတွိုန်းနို့ ကြိုတင်ပလွတ်ပို့အာနဲ့။ 2တပည့်တော်နွို့နား ခါပလွှတ်ကောနွို့ ကိုယ်တော်နား ခွိုနွို့နု့ ဟောဖြိုပို့ဇာ့နီးနွို့နဲ့။ ဇာ့နွို့ “အို့နား လို့ယုံကြည်လက်ခံနွို့ လို့ဘိုဘက်ဟိုမဲ့အဆင်သင့်နွို့လဲဉ်း တာလို့ဇာ့နွို့ မင်္ဂလာကတမ်းနွို့ လို့ဟောဖြိုဝေငှနွို့နား နည်းလွန်းလန်းဟောက်။ လို့ဇာ့နွို့နောင်း မောင်းဝိုက်နွို့ ဘာ့ယော့ယန်းလွန်းမဲ့ ရေ့လာ့နာအနုဲင်နုဲင်နွို့နဲ့။ စနွို့လဲ တာ့မောင်းဝိုက်နွို့နောင်း လို့ယို့အ့်ယို့လွံမ်ကောနွို့နဲ့။ နွို့နား အရှင်သခင်ဘာ့ထန်းဝိုက်နွို့ တာ့ဖြားနွို့နား လို့ဝိုက်ဘို့ဘက် ပလွှတ်ပိုဗောက်အောင် တောင်းလျှောက်ကြဘို့။ 3အခွပ် ပွို့နွို့နောင်း တာလို့နွို့ ဗို့တွို့သတိထာ ကု့ကြဘို့။ ရွားနွို့ပဒေကား လို့ကယ်ဘာ့ဟိုကော ပွို့နွို့နား နာ့ဝံပုလွေဘို့ဘက်ဘာ့ရက်စက်နွို့အတွိုန်း ပွို့နွို့နု့ တာ့လို့ဘာ့ဆန်ကျင်ပွို့နွို့ အို့ပလွှတ်ကု့ဝဲ့နွို့ခေါင်းနွို့နဲ့။ 4တာ့ပွို့ဘာ့ကု့နွို့ ပဆံ၊ အိပ်ခမ်းအွေကု့ခရီး၊ စိနပ်စာနွို့ လအွေကု့ကြနဘို့။ တာ့ကညွမ်းလဲဉ်း လို့နွို့နား နှုတ်ဆက်ယော့ လာ့ပရန်နအအချန်။ 5ပွို့နွို့ ညာ့အာ့်ညာ့နွို့နား တာ့ကွက်ထို့နွို့နား မိသားစုနွို့နု့ ‘ကွေညာ့နီးနား ဘာ့ငြိမ်းချမ်းဘာ့ကလို့နွို့တဟိုလဲ’ နွို့အာကြဘို့ဆု။ 6တကက်နွို့နု့ ညာ့နီးနား ဘာ့ငြိမ်းချမ်းနွို့နား လို့တာလိုလ့်လက်ခံနွို့နု့ မို့ဘာ့အာဆုနွို့နောင်း တာ့လွက်နွို့ တာဟိုလောက်ဟောက်။ တကက်နွို့နု့ ခွို့ဗင်ကြလောက်ဟောက်။ စနွို့လဲ တာ့လိုလ့်ကောနွို့နု့ တာ့လက်ခံလိုလ့်ကောနွို့နု့ ဘာ့ငြိမ်းချမ်းနောင်း တာ့လွက်နွို့ ဟိုလောက်ဟောက်နွို့နဲ့။ 7အာ့်ညာယော့အ်ာ့ညာ့ရေ့မန်းလေ ကောရော။ ညာ့အာ့်ညာ့နွို့စယ် မန်းတွို့ထာ ကစာ့ညားမွီးနွို စွေငွမ်းကျဗို့။ ရွှားပဒေနွိုကား လို့ဘာယို့အ့်ယို့နွို့နား ခက်ယို့နွို့ လို့ဗင်ထိုက်ဟောက်နွို့နဲ့။ 8ဆောင်မြိုမားမြို ပွို့ကွက်တွို့ထာ လို့တာ့မြိုနွို့နု့နား တာကြိုဆိုလက်ခံပွို့နွို့နု့ ခွို့ဇာ့ဘာ့မွီးနွို့ စွေကြဘို့။ 9ဗဟိုမြိုနွို့ လို့ကစု့နွို့ ကုဟောက်နွို့ထာ ‘ထာထနာတော်ဖြား မောင်းပေါ်လေး အချန်တမေ့ပွိုတွို’ နွို့ခွို့နွို့နား ဟောဖြိုမနနဲ့။ 10စနွိုလဲ လို့သမြိုနွို့နား တာ့ကြိုဆိုကောပွို့နွို့နု့ လေးတွိုကွေကညွမ်းထာ 11‘ဖြားနောင်း ပွို့နွို့နား ခံမ့်စီရင်နွို့နု့ ပွို့နွို့နား အပန်အို့အာပွို့ကတိန ကောက်အေ့နား တဖက်နွို့နု့ ခါကလို့ပို့။ စနွို့လဲ ထာထနာတော်ဖြား မောင်းပေါ်လေးနွို့ အချန်တမေ့ပိုတွို’ နွို့ဖြိုကြဘို့နွို့နဲ့။ 12အို့ဘာ့ဆောင်ဖြိုပွို့နွို့နား ခံမ့်စီရင်တရားတာ့လောက်နွို့နု့ မြိုသောဒုံbနား ဘာ့လိုလ့်ဆို့ထက်ပေ့နွို့ထာ ဆို့ဆို့ရွားရွားမင်စီရင်ဟောက်ကိုး” နွို့ဖြိုမနနဲ့။ 13အခွပ် ကိုယ်တော်ယေရှုနား “အို လို့မြိုခေါရာဇိန်န ဗဟိုလို့မြိုဗက်ဇဲဒနွို့မေ့မေ့နွို့ တာပွို့နွို့နား မောင်းဗင်တွို့ဒုက္ခကိုး။ ရွားနွို့ပဒေကား လို့ဇာ့နွို့နောင်း ဗင်ကောပွို့နောင်တ။ မြိုတုရုန ဗဟိုမြိုဇိဒုန်နွို့ လို့မေ့မေ့နောင်း မြို့ပွို့နွို့ ပလေပို့မဲ့ အံ့ဖွယ်နိမိတ်လက္ခဏာနွို့နား ရင်ဖူးလောက်ကြဘို့။ လို့ဘာ့ဟိုတမြို့နွို့နောင်း ပလေပို့မဲ့ အံ့ဖွယ်နိမိတ်လက္ခဏာနွို့ တာ့ရင်ဖူးနွို့နု့ အပြစ်ခွို့နွို့နား ဗင်တွို့နောင်တထာ စိတ်ပိုက်ခရန်း ဗါ့တွို့ထာ၊ ကောင်ကသွနွို့ထု့စ်ယော့c ဗင်ကြဘို့နောင်တနွို့ ပလေလောက်ဟောက်နဲ့။ 14စနွိုလဲ ချန်စီရင်တရားနွိုနားလဲဉ်း ဖြားနောင်း ဘာ့ဗဟိုလို့မြိုတုရုန ဗဟိုမြိုလို့ဇိဒုန်နွိုနား ပွို့နွို့နောင်း ပလေလိုလ့်လောက်ဟောက် ကရုဏာနွို့နဲ့။ 15လို့မြို ကပေရနောင်၊ ပွို့နွို့နု့ ဖြားနောင်း ရွှေမြို့တော်နွို့နား ဘာ့ချီးမြောက်နွို့မင်ခံဟောက်နွို့ လာ့ထုန်ကြနဘို့။ တာနွို့နု့ ပွို့နွို့နားလဲဉ်း ငါရားနွို့စယ် မင်ဖုခံဟောက်” နွို့ဟောဖြိုမနနဲ့။ 16နွို့ခေါင်း ကိုယ်တော်နွို့ တပည့်တော်နွို့နား “ပနောင်ပွို့နို့ လို့ပကမ်းနွို့နား လို့ကမ်းပနောင်အို့ကိုးနွို့နဲ့။ ပွို့နွို့နု့ လို့ဘာ့လက်ခံကောနွို့လဲဉ်း ကလုဲင်လို့ဘာ့လက်ခံကောနွို့ကိုးနွို့ထာ လို့ဘာ့လက်ခံကောအို့ပဒေနွို့နား လို့အို့ဘာ့လွှတ်နွို့နား လို့လက်ခံကောအဖဖြားနွို့ကိုး” နွို့ဖြိုမနနဲ့။ 17နွို့ခေါင်း တပည့်တော်အာ့ကွက်ဘက်ကျင်နွို့ဆောင့်လေးပွန်ယော့နောင်း ခွို့နွို့နောင်း ကိုယ်တော်ယေရှုဟောဖြိုပွို့နွို့အာ့်တွိုန်း ဆောင်ရွက်ကြဘို့နွို့နဲ့။ ခွို့နွို့ဆောင့်လောက်ရန်းနောင်း နွက်တူးတူးနရန်းပိုတွို့ထာ “ကိုယ်တော်၊ အေ့နီးနား ကနံဆို့နွို့နု့ တန်ခိုးတော်န အခွင်အာဏာ ကိုယ်တော်နွို့ ထုံးတွို့ထာ ဆောင့်အာအမိန့်နောင်း ခွို့နာခံကြဘို့” နွိုဖြိုကြဘို့နွို့နဲ့။ 18ကိုယ်တော်နားလဲဉ်း “ပနောင်ပွို့နွို့နောင်း ကနံဆို့ဘိုဘက် နာခံယော့ မာရ်နတ်နောင်း ရုတ်တရက် ကလို့ကု့နွို့နား တအောင်နား ဒပ်လားနွို့အတွိုန်း အို့ရင်ဟောက် နွို့ဟောဖြိုပလောက်အခွပ်နွို့နဲ့။ 19ကမ်းကြပွို့။ အို့နောင်း ပွို့နွို့နု့ ပထိုင်ဆို့ဘို့ဘက်န ကန်းကောက်ဆို့ဘို့ဘက်နွို့နု့ မောင်းသင်တမန်နွို့န တန်ခိုးရန်သူမေ့မေ့နွို့ ကနံဆို့ ဒေါက်လေးနိုင်းအောင် အခွင့်အာဏာနွို့ အာပို့ယော့တွို့နု့နဲ့။ စနွို့နား ပွို့နွို့နု့ ဆောင်မွှားမှ ကစုအောင်း လာ့ယိုကောနွို့နဲ့။ 20စနွိုလဲ ကနံဆို့နွို့နု့ ဒေါက်လေးနိုင်းကြဘို့နွို့နား လာနွက်တူးနပွို့။ ဇာ့နွို့နု့ မာတ်ပွို့နွို့နား ရွှေမြို့တော်နွို့ တဲင်းမှတ်ပို့နွို့ခေါင်း နွက်တူးကြဘို့” နွို့ဖြိုမနနဲ့။ 21ချန်နွို့နု့ ကိုယ်တော်ယေရှုနား ဉာဏ်အလင်းတော်နောင်း နွက်တူးဟောက်နွို့ခေါင်း ကိုယ်တော်နား “ရွှေမြို့တော်နွို့ ကမ္ဘာလောကကသေ့န ဘာအုပ်စိုးပိုမဲ့ ဖြား၊ သိုလ်အမ်သိုလ်အမ် ဉာဏ်ပညာဟိုဟောက်နွို့ လို့ဘာ့ထုံမဲ့နွို့နား အမှန်တရားနီးနွို့ ငန်းကောနွို့ခေါင်း နာ့လို့ပေနွို့ အသိပညာကြွယ်ဝကောနွို့ ဆောင့်အာငန်းဟောက်နွို့ခေါင်း ချီးမွမ်းမနကျေးဇူးနဲ့။ ရွားနွို့ပဒေကား ဖြားဘာ့ခှိက်တော်မူဟောက်နွို့နား အို့ငန်းဟောက်နွို့” နွို့ချီးမွမ်းမဲ့ဖြားကိုးနွို့နဲ့။ 22နွို့ခေါင်း ကိုယ်တော်ယေရှုနား တာ့လွက်နွို့ဘာ့ဟိုမဲ့ လို့မေ့မေ့နွို့ “အဖဖြားအို့နောင်း ဇာ့ဘာ့ဟိုမေ့မေ့နွို့မောင်း ဘာ့အုပ်ချုပ်နိုင်မဲ့ အခွင်အာဏာ အာပို့ယော့တွို့နု့နဲ့။ တာ့လိုလ့်အဖဖြားနား ကွန်ဖြားနွို့နား နာကွေမှငန်းကောနွို့ ကွန်ဖြားန ကွန်ဖြားဘာ့ဆောင်ငန်းလို့နွိုစယ် အဖဖြားနောင်း ကွေမှငန်းကော” နွို့ဖြိုကြဘို့နွို့နဲ့။ 23နွို့ခေါင်း ကိုယ်တော်နောင်း ဖက်တပည့်တော်အမ်ဘို့ဘက်နွို့ လှည့်တွို့ထာ “အခွပ်နွို့ ပွို့ဘာ့ဆောင်ရင်ဇာ့နွို့နု့ လို့ဘာ့ရင်မန့်တွို့နွို့ ဖြားအာတွို့ကောင်ကြီးမင်္ဂလာနွို့ကိုးနဲ့။ 24အို့တာ့ဖြိုပွို့ အမှန်နွို့နု့ ကစာနို့တွိုန်း ပရောဖက်နွို့န ဖရင်မြတ်ဘိုဘက်နွို့စယ်မှ ပွို့ဘာ့ရင်နွို့မာန့်ဇာ့နွို့နု့ ဆောင်ရင်နွို့န၊ မင်အွမ်နွို့ဖုန် လိုလ့်လွန်းကြဘို့နွို့လဲဉ်း ခွို့နွို့နောင်း လာရင်ကော လာအွမ်ကြကောဘို့” နွို့ ခွိုနွို့စယ် တရားရားဟောဖြိုမနနွို့နဲ့။ 25အာ့်ရှိနွို့ ကိုယ်တော်နောင်း လို့ဖုန်ကုန်းနွို့နား တန်ကဟောကရီမဲ့နွို့ ဆာယာပါလိတ်ကျမ်းအာ့်ကွက်နား ကိုယ်တော်နောင်း ဆောင်စမ်းသပ်ဟောက်နွို့ခေါင်း မောင်မားမေးခွန်းနား အောက်အိုမနနွို့နဲ့။ နွို့ခေါင်း အမ်နွို့ ကိုယ်တော်နား “ဆာယာ၊ အထက်နိစ္စထာဝရdနွို တာ့ခမ်းဗင်နွို့နု့ ဗင်ယို့တတ်ထား” နွို့မားမနနဲ့။ 26ချန်နွို့နု့ ကိုယ်တော်နား “ပညက်တရားကျမ်းနွို့တဲင်းပို့ဇာ့မား၊ ဇာ့နီးနား မို့ငါးလည်ဇာ့မွှား” နွို့မားပလောက်မနနွို့နဲ့။ 27လို့နွိုနား “ကျမ်းဇာ့နွို့ ဘာ့လုဲင်မဲ့အရှင်သခင်ပွို့နား သိုလ်၊ ကောင်နွက်၊ နှလုံးနိုအွီးပါးနွို့န ဖော်ပလေတွို့ထာ ဇာ့ဘာ့ဟိုအသိဉာဏ်ပညာနွို့န အစွမ်းမေ့မေ့နွို့ ဗွို့ကြဘို့အခှိက်မေတ္တာနွို့နဲ့။ စနွို့ဖုန် လို့ကစာ့ညာ့နွို့ဖုန် နာ့ခှိက်သိုလ်မို့နွို့ အတွိုန်း ခှိက်ကြဘို့နွို့ တဲင်းပွို့ကိုး” နွို့ဖြိုဘက်မနနဲ့။ 28ကိုယ်တော်နားလဲဉ်း “မို့ဖြိုနွို့မှန်ပန။ တာ့ယို့ဇာ့နွို့နို့နု့ မို့နား အထက်နိစ္စထာဝရနွိုဗင်ကြလောက်ဟောက်” ဖြိုမနနဲ့။ 29စနွိုလဲ ဆာယာပုဲင်လိတ်ကျမ်းနွိုနား သိုလ်အမ်သိုလ်အမ်ဖြောင့်မတ်မှန်ကန်အာ့နွိုနို့ အမ်ဆောင်ဖော်ပလေဟောက်နား ကိုယ်တော်ယေရှုနွို့ “ဇာ့နွို့နိုု့နု့ လို့ကစာညာ့အို့ပဒေနွို့နား ကွားကိုးရား” နွို့မားမနနဲ့။ 30ချန်နွို့နု့ ကိုယ်တော်ယေရှုနား ပုံဥပမာအမာ့နဘာ့ဟောဖြိုနွို့နား “ကရှိ လို့မျိုးဂျူးအာ့်ကွက်နွို့နား စမြိုဂျေရုဆလင်မှ မြိုဂျေရိခေါနွို့ ကုမဲ့ခရီးနွိုနဲ့။ တာ့ကညွမ်းခရီးနွို့ တောင်မြဘို့ဘက်နောင် ရင်ဟောက်နွို့နဲ့။ တောင်မြဇာ့နွို့နောင်း လို့နွို့နား ဒုကြဘို့တောင်မြခေါင်း တာ့အမ်နွို့ဇာ့ဘာ့ဟိုနွို့န ခရိုန်အမ်ဘို့ဘက်စယ်မှ လလွှတ်တွို့ထာ အွေကု့ကြဘို့နွို့နဲ့။ တောင်မြနွို့နောင်း အမ်နွို့ မောင်းဗီးနာ့ပေါ်ယော့ကြဘို့ လေးပွန်ကု့အငါတွိုန်းနွို့နဲ့။ 31နွို့ခေါင်း ဂျူးပုရောဟိတ်အာ့်ကွက်နား တာ့ကညွမ်းနွို့အတွိုန်းဆောင့်ပို့ပိုနွို့ အ့်ကစုနတာ့လန်မဲ့ ရင်မနနွို့လဲဉ်း ကညွမ်းအ့်တာခြားနွို့ ရှောင်လေးကု့ဟောက်ကိုးနဲ့။ 32နာ့ဇာ့နွို့န လို့မျိုးလေဝိအာ့်ကွက်နားလဲဉ်း ဆောင့်လောက်ပိုတာ့လွက်နွို့နား ရင်မနအမ်နွို့လဲဉ်း ရှောင်ကု့ကူးကညွမ်းဖက်အခြားကိုးနွို့နဲ့။ 33စနွို့လဲ တာ့လွက်နွို့နား ဘာ့လေးပိုမဲ့ခရီး ရှမာရိအာ့်ကွက်ဆောင့်လောက်ပိုနွို့နောင်း ဆောင့်ရင်တွို့အမ်န နွက်သနားဟိုဟောက်နွို့ခေါင်း 34ကု့တွို့တာ့စအမ်နွို့ထာ အ့်ကစုနွို့ တကံသံလွင်၊ စပျစ်ဝိုင်နွို့န ကဌေတွို့ထာ ပတ်အာမဲ့ခရိုန်းနာ့နဲ့။ နွို့ယော့ အမ်ဒံတွိုကွေမြည်းe ထာ ဟက်ကုကူးတာ့ညာ့ခမ်းနားနွို့ကိုးနဲ့။ ဆောင့်လောက်ပိုနွို့နားလဲဉ်း ယို့မွီးအာမနနဲ့။ 35ဆောင့်လောက်အာ့်ရှိသေ့ဆောင့်လန်းနောင်း အမ်နား ညာ့ကစာနွို့နု့ ဒေနာရီဒင်္ဂါး အဲဉ်ပြားနွို့အာယော့ ‘ကျေးဇူးတံတွို့ထာ လို့ကစုနီး ယို့မွီးအာစမ်း။ မို့တာယို့မွီးအမ်နွို့နား တာ့မေ့ဘို့ထက်နီးလဲ အို့တာ့ရန်းပို့နွို့ အားလောက်ဟောက်’ နွို့ဖြိုမနနဲ့။” 36နွို့ခေါင်း ကိုယ်တော်နား ဆာယာပါလိတ်ကျမ်းနား “ကောင်လို့အွီကွက်နွို့ လို့တောင်မြဘာ့ဒု့မာန့်မဲ့ လို့တာစညာ့မို့အစစ်နား ကွား” နွို့မားမနနဲ့။ 37ချန်နွို့နု့ ဆာယာပါလိတ်ကျမ်းနား “တကွေအမ်သနားကြင်နာယော့ လို့ဘာကူညီနွို့ကိုး” နွို့ဆောင့်ဖြိုအွမ်နွို့ ကိုယ်တော်ယေရှုနား လို့နောင်း “မို့လဲနာ့နွို့အတွိုန်းကျင့်စေးနေ” နွို့ဖြိုမနနဲ့။ 38နွို့ခေါင်း ကိုယ်တော်ယေရှုနောင်း တပည့်တော်နအနုဲင်နုဲင် တန်ကု့မဲ့ခရီး တဘိုအာ့်တဘိုနွို့ လောက်ပိုနွို့နဲ့။ တာ့တဘိုနွို့ မာတ်ဘာ့ဟိုမဲ့မာသ ကမြအာ့်ကွက်နောင်း ကိုယ်တော်နတပည့်အမ်ဘို့ဘက်နား မောင်မန်းအစု ဖိကု့ညာ့အမ်နွို့နု့နဲ့။ 39သမြနွို့ ဘာ့ဟက်မာတ်မာရိ တွေကမြ ပေ့လဲဉ်းဟိုဟောက်။ မာရိနောင်း တာဇာ့ကောက်ကိုယ်တော်နွို့ထုစ်တွို့ထာ တရားဘို့ဘက်နွို့ နာကြမဲ့ပို့နွို့ကိုးနဲ့။ 40မာသနွို့နား တာ့ဧည့်ထည်ဘို့ဘက် မောင်းဧည်ခံ အ့်ယို့ဘို့နားဟိုမနနဲ့။ ဘတ်ထက်ဘေ့နွို့ မာသနောင်း တာ့ကိုယ်တော်နွို့ တာ့ဗောက်တွို့ထာ “ကိုယ်တော်၊ တွေကမြပေ့အို့နား ညာ့အမှုကိစ္စမေ့မေ့နွို့ အို့ကွက်တိုင်းတိုင်း မင်ယို့အောင်နွို့ ပတောပို့နွို့ခေါင်း ကူညီအာအို့နွို့ ဖြိုအာစမ်းကမြနွို့” နု့ဖြိုမနနဲ့။ 41ချန်နွို့နု့ ကိုယ်တော်နား “မာသ၊ မို့နား အာမ့ာမာ့နွို့နနွက်လက်မဲ့နွို့ အယို့ဘို့မဲ့နွို့လဲဉ်း 42ခါလောလောနွို့ ဘာ့ကလို့ဇာ့နွို့စယ် ဟို့အမာ့စယ်နွို့နဲ့။ မာရိနွို့ကား ဇာ့နွို့နု့ ရွီးဘို့ယော့တွို့နွို့နား ဇာ့နွို့နု့ တာ့ကမြနွို့ ယို့တောဗင်ကော” နွို့ဖြိုမနနဲ့။
Currently Selected:
Luke 10: dtpv-rv
Highlight
Share
Copy
Want to have your highlights saved across all your devices? Sign up or sign in
This translation of the Dannau Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
