Luke 21
21
1Yaqkiyoeng Boi loeq a'sota teq khoeqmawq haqloeq a'hlu bunga a a'hlu haen haq án thoen khoeq a'hmuq haq. 2A'soulai khoeq hmeinu poemak loeqkhaw a'phu a'mlaet khoeq haen saw khaiqhneiq a'hlu bunga a'thoen khoeq a'hmuq. 3Yaqkhowa Boi loeq, nanghniqa keiloeq a'hmon ka'mhau haqlai, nei a'sounglai khoeq hmeinu loeq a'coe haq thauka thaengthaeng a'thoen. 4Nei khlaung haqteq yaqhniq án khoeq duka khoeq a'poe khoeqhaq noeng án hlu. Seiloeqkhaw nei hmeinu teq sounglaipak loeqkhaw yaqhma a'moeiq khoeq blaiq a'thoen poeiq taeng a'hau haq. 5Boipawa wotpyuq dun kyong a a'pawiyi khoeq lung ta'koeiq macaq loeqteq án hlu khoeq won thaung haqloeng án sang klongoeng nana a'pawiyi taeng boengak khlaung haqloeq án hau. 6Yaqateq Boi loeq, nanghniq loeq nán hmuq laq khoeqhaq a'klak poeiq yai. Lung lungak khaw yaq omduna a'moeiqhmai seiyaq. Awlum a'khlaq a'laqi yai khoeq khing a'pawai taeng a'hau haq. 7Yaqateq ta'paiq haqloeq Boiyesuqa, Boi yoe yaqhaq khoeq pi kho wa a'phlaetai yoe? Nei haq a'phlaetai khoeq pi bong na'maek haq so pu loeq ma'hmotai yoe? taeng án hiq. 8Boiyesuq loeqkhaw, nanghniq haqkhoeq khlaung hma a'hmlaekinauk laqi yaq tukong sa'diq tawyi boei tuk. Khlaung haqkhoeq keilong songi uk loeq lo uk loeqteq, kei khoeq a'klawn saw Mesiyaq ka'phlaet. A'khing a'mcouq hni taeng án hau wai. Yaqhniq hnu woeng toemiyai tuk. 9Nanghniq loeq caek a'phlaetai khoeq sa'taung haq, a'longlong khoeq sa'taung haq nán ya uk laqloeq keiqai tuk. Yaq bong haqkhoeq nei somdaek a'poeiq hmaungkaum a'yang a'phlaetai taeng a'hau haq. 10Khlaungmyoe myoe ak loeq myoe ak, taengblei bleiyak loeq bleiyak caek án phlaetai. 11Omdun ta'kuma li a'lo wai, ei ok a'kheiyai, án mniqnaw haq a'phlaetai. Mehona a'keiqpha khoeq na'maek haq a'pau wai. 12Seiloeqkhaw, nei bong haq a'phlaet mawoeng khlaung haqloeq nanghniq a a'man haqlai. Ta'lazalaiq haqla a'sam laqi tuk loeqteq thonga a'mtoen haqlai. A'platpaek nán laqi yai. Nanghniq khoeq kei hnu woeng a'mtoemi haq klongoeng mang loeq ana a'nmoeiq khoeq khlaung haq hma ta'la coi nán laqi yai. 13Yaqkhowa nanghniq loeq sa'taung pawi nán hau wai khoeq a'khwai nán laqi yai. 14Yaqklongoeng nanghniqa nanghniq kha nán hau laqai yoe? nakkhoeq pa'haiyi naukai tuk. 15Pi klongoeng naka khlaungsei haqloeq nanghniqa a'myang noenaq uk ong, nanghniq plaet sui uk loeq laqaq uk ong nanghniqa nán yungtha, plaenga haq ka'mpaek haqlai. 16Nanghniq nupaw, cinau ta nau, myoesaw haqloeq nanghniqa a'hmyaq haqlai. Nanghniq duka khoeq boengak kei klongoeng a'tuk nán laqi yai. 17Kei hnu woeng a'mtoemi haq klongoeng khlaung ta'kum loeq nanghniqa a'muni haqlai. 18Seiloeqkhaw nán luwa khoeq nán saum laengapak klak hlaqhlaq. 19Nanghniq loeq nán myumi khoeq noeng caetoeng ná khaeki naka ná sauk ná laqi yai. 20Yeruqsalein mloeq khoeq caektap loeq án waengi nauk khoeq nán hmuq laqhni nak loeq yaq mloeq a'klakai khoeq a'mcouq hni nakkhoeq nanghniq loeq nán hmotai. 21Yaq khing a'phaw loeq Yudaq pleiya a'moeiq khoeq khlaung haq tonghona conboei tuk. Mloeq duka a'moeiq saw haqkhaw mloeq planga sotboei tuk. Mloeq planga nán moeiq naka khaw mloeq duka wonai tuk. 22Klamcawa a'hau khakhut yaq hnup haqloeng Boipaw loeq nei mloeqa a'plaet a'paek khoeq hnup a'phlaetai. 23Yaq khinga honmawqnu haqloeq khawi ocaw a'moeiq khoeq nu haq tawiq nana a'khaukai. Nei somdaek khlunga nana a'laen khoeq sounglai patma phaw loeqteq Boipaw mlung hlok khaw khlaung haq hma a'phawai. 24Yaqhniq duka khoeq boengak haqkhaw cimoeng a'tuksawq án laqi yai. Boengak haqkhaw a'coe pleiya man uk loeq a'ciqi pui nauk án laqi yai. A'coe khlaungmyoe haqloeq Yeruqsalein mloeq khoeq sim uk loeqteq yaqhniq khaek a'poeiq mawoeng Yerusalein mloeq khaw a'kalunauk a'laqi yai. 25Yaqkiyoeng kha'ni, khlaw, asei haqla na'maek haq a'pau wai. Nei somdaek blaiq ya panleiya khoeq hloeng haq taiyoeng khlaung haqkhaw án pahaiyi poeiq yai. 26Hmaungkoma a'phlaetai khoeq na'maek tawiq uk loeqteq khlaung haq nana án keiyi. Mehona khoeq asei haqkhaw punghmonsei ta'ong ka'si ka'li án phlaet poeiq yai. 27Yaqkhowa khlaungcaw khoeq nana a'laen khoeq a'tat phumthaungoeng melikcum loeq a'lo khoeq nán hmuq laqai. 28Yaqklongoeng nei bong pawi yaq khoeq na'maek haq mcaq loeq a'phlaet nak loeq Boipaw loeq nanghniqa sounglai patma duka khoeq a'hmloeq haq hnai klongoeng ya tuk loeq a'hon touq boei tuk taeng a'hau. 29Boi loeq yaqhniqa pung pungak a'mthumi nauk haqkhoeq teq, paipei thing loeq a'coe thing haq sowouq. 30A'nawicaw haq a'soq khoeq nán hmuq nak loeq kha'hlok a'phaw hnowaiq nakkhoeq nán hmot. 31Yaqkhakhut, towa keiloeq ka'hau khoeqhaq a'phlaet khoeq nanghniq loeq nán hmuq nak loeq neisomdaeka Boipaw khomcaeng a'phaw hnai nakkhoeq hmot boei tuk. 32Keiloeq a'hmon ka'mhau haqkhoeq teq, nei khakhut haq phlaet poeiq kei loeqkhaw nei khlaungcaw haq án klok poeiq yai seiyaq. 33Mehon loeq somdaek saukak moeiq hlaq loeqkhaw kei plau khoeq saukak a'moeiq yai. 34Yaqklongoeng ei ok tuk loeq nanghniq somdaek khowawq tawiq pa'haiyi tuk loeq nanghniq khing haq a'poeiq yai khoeq sa'diq tawyi boei tuk. Yaqkha nán thonloki tuna yaq bong hnup haqkhoeq nanghniq loeq ma'lawiq ta'lawiq nán khom laqai. 35Yaq hnup khoeq somdaeka a'nmoeiq khoeq khlaung haq awlum hma a'phawai. 36Yaqklongoeng nanghniq khoeq a'phlatai khoeq haqla khoeq loet tuk loeqteq khlaungcaw hma nán phawai tawiq ya a'khing a'moeiq ta'kum daedae suq tongi boei tuk taeng a'hau haq. 37Yaqkhakhut Boiyesuq khoeq Boipawa wotpyuq dun kyong a a'hnupa ta'la sam haqloeq teq a'mu lawma tanlwein tonga cit loeqteq a'om. 38Khlaung haqkhaw Boiyesuq ta'la án hnyinai tawiq ya Boipawa wotpyuq dun kyong a a'ngeilawma tho uk loeq án ciq.
Currently Selected:
Luke 21: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Cumtu (Sumtu) Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
