Luke 20
20
1Hnupakteq Boiyesuq loeq Boipawa wotpyuq dun kyong duka khoeq khlaung haqla mcok hau haqloeq teq sa'taung pawi a'mhmyauk haq. Yaq tuna Yahaenpaw lang haq, klam hmotsaw haq khlaung cang haq lo uk loeqteq, 2Boiyesuqa, nang loeq nei haqkhoeq a'ni a'khwangoeng na'sai yoe? Yaq a'khwang ana khoeq nanga a'ni loeq a'mpaekoe? nakkhoeq keihniqa a'mhau haq hme taeng án hiq. 3Yaqateq Boiyesuq loeq, keiloeq nanghniqa uwak ka'mhiq haq hmai. Nanghniq loeq hau boei tuk. 4Hneitsein sa'la Yawhan loeq hneitsein a'paekai khoeq a'ni loeq a'khwai a'paekoe? Boipaw loeq a'paek moe? seiyaqloeq hmat poemak loeq a'paek moe? taeng a'hiq haq. 5Yaqateq Yaqhniq khaw poemak loeq poemak soiyi uk loeqteq, Boipaw hma khoeq taeng má hau loeq, neikhanaka nanghniq loeq Yawhana piya myumiya tuk koe? tang a'mhau haqlai. 6Khlaung poemak loeq a'paek taeng ma'hau naka khaw, khlaung haqloeq Yawhana Pa'rawphaeq poemak taeng án myumi klongoeng ma'hniqa lungoeng a'mweiq haq poeiq yai taeng án soiyi nauk. 7Yaqklongoeng yaqhniq loeqkhaw Yawhan loeq tuiyoeng hneichein a'paekai khoeq a'ni loeq a'khwai a'paekoe nakkhoeq hmawtaq uk hang taeng án hau. 8Yaqateq Boiyesuq loeq, kei loeqkhaw a'ni a'khwai yoeng nei khoeqhaq ka'sai yoe nakkhoeq nanghniqa a'mhau haq khoqaq hang taeng a'hau haq. 9Yaqkiyoeng Boi loeq khlaung haqla pung pungak a'mthumi nauk haq. Khlaung poemak khoeq ca'byeit khlai khlaiyak a'mcoeq kiyoeng yaq khlai khoeq khlaunga hnga loeqteq a'tawn kla ong kha'li a'soq. 10Ca'byeit khlaiya a'thaiq khing a'phaw loeq mya poemak teiq loeqteq yaq loeq a'laqi yai khoeq a'phoeq law hoet sauk a'mtoeq. Seiloeqkhaw yaq mya a khlai cong saw haqloeq souq poeiq uk loeqteq pikhaw paek ta'ong án teiq ba. 11Khlai mawq loeq a'la mya poemak a'teiq ta'ba. Seiloeqkhaw khlai cong saw haqloeq yaq khlaunga khaw án souq poeiq a'sali án khlaq poeiq kiyoeng pikhaw paek ta'ong án teiq ba. 12Khlai mawq loeqkhaw a'la mya poemaka a'teiq ta'ba loeq yaqhniq loeq a'mcaqa khoeq mya haq khakhut souq poeiq uk loeqteq ca'byeiq khlai planga an msoq. 13Yaqateq ca'byeit khlai mawq loeqkhaw kei kha ka'sai laqai yoe? Kei ka'khaeki laq khoeq ka'caw ka'teiqai. Yaqhniq loeq yaqa beinauk wop hlaq uk khoeq noeng taeng a'soiyi nauk kiyoeng yaq a'caw a'teiq. 14Seiloeqkhaw khlai cong saw haqloeq yaq a'cawa án hmuq loeq nei khlaung khoeq hnupak khu a'laqi yai khoeq khlaung a'phlaet. Yaq loeq a'laqi yai khoeq khu ma'hniq loeq ma'laqi yai tawiq ya ma'tukai taeng poemak loeq poemak án soiyi nauk kiyoeng, 15khlai cong saw haqloeq yaq khlaimawqcawa ca'byeit khlai planga msoq uk loeqteq án tuk paek. Yaqnaka yaq khlai mawq loeq yaqhniqa kha a'sai haqlai yoe? 16Khlaimawqpaw khaw lo loeqteq yaq khlai cong saw haqla a'tuk haq poeqyai. Yaqkiloeq yaq ca'byeit khlai khoeq a'coe khlaung haq kuta a'awpai taeng a'hau haq. A'ya uk laq saw haq loeqkhaw nei bong khoeq kho wa khaw phlaetaq bacaek taeng án hau. 17Seiloeqkhaw Boi loeq yaqhniqa cipcip so haqloeq teq, klamcaw duka im sauk saw haqloeq phaeng uk loeq án tauk khoeq lung khoeq a'lelang duna a'phaw ba theiq nakkhoeq pi khoeqa án hau woe? 18Yaq lung khlunga a'klawq saw khoeq a'msum a'baet cawa a'phaeti poeiq yai. Yaq lung khaw hmat khlunga a'klawq nanuk nak loeq yaq khlaung khaw a'hmun cawa a'phaeti poeiq yai taeng a'hau haq. 19A'hyinsaw Yahaenpaw lang haq klam hmotsaw haqloeq Boi loeq yaqhniqa mphaet haqloeq teq nei pung a'mthumi nauk haq nakkhoeq án hmot klongoeng yaq tuna Boiya manwaiq uk loeqkhaw yaqhniq loeq khlaung luiya án keiq. 20Yaqklongoeng yaqhniq loeq Boiya cawnak uk loeqteq a'soiyi khoeq plauwa a'plaet sui uk loeqteq ba'yeinkhan kuta án awpai khoeq tawiq ya khlaungpawi long songi saw ta'choe haq án hloeq. 21Yaq ta'choe haqloeq Boiyesuqa, Boi yoe nang loeq a'mcok hau haqkhoeq a'layi nakkhoeq keihniq loeq kán hmot. Boi loeq a'hmoi a'bau hyaung haeqati. Boipaw ta'la a'moeiq khakhut noeng na'mcok hau haq. 22Keihniq loeq Kaeta manga a'khon kán paek laqai moe? paek hlaq laq uk hang moe? taeng án hiq. 23Boiyesuq loeqkhaw yaqhniq loeq ta'liqnyan oeng án hiq khoeq a'hmot haqloeq, 24keiya haen saw khaiq khaiqyak a'mplaq hmouq. Nei haen khaiqya a'ni lup loeq a'ni likcaw a'pawoe? taeng a'hiq haq. Yaqhniq loeqkhaw Kaeta mang lup loeq likcaw a'paw taeng án msauki ba. 25Yaqateq Boi loeq Kaeta mang loeq a'poengi khoeq Kaeta mang a paek tuk loeqteq Boipaw loeq a'poengi khoeq Boipaw a paekouk taeng a'hau haq. 26Yaqhniq loeq khlaung haq hmaungkauma a'plaet sui uk loeq laqaq uk khoeq tanaq Boi loeq a'msauki ba khoeq plau haq mauqnauk uk loeqteq án dip toeq. 27Yaqduna khlaung haq án du kiyoeng án thoq ba nkkhoeq myumi yaq uk khoeq Zaeqdukae taeng án hau khoeq khlaung boengak Boi phaela cit uk loeqteq, 28Sa'la woe Mawse peinyat klama, a'peha a'moeiq khoeq khlaung poemak khoeq a'caw moeiq ta'ong a'du naka a'nau loeq a'ta myoe a'thin ba lai tawiq ya yaq hmenuwa a'omi laq ba. 29Cukhowa ta nau poemseiq án moeiq khoeq duka a'tacang loeq a'peha laqipak loeqkhaw a'caw moeiq ta'ong a'du. Yaq daunga khoeqloeq yaq hna'tawa louqi laqpak loeqkhaw an caw moeiq ta'ong yaq khaw a'du. 30A'la yaq dounga khoeqkhaw yaqkhakhut pak a'plaet. 31Yaqkhakhut ta nau poemseiq blaiq loeq yaq hmeinuwoeng án laqi kiyoeng án caw moeiq ta'ong án du poeiq. 32A'suma yaq hna'taw khaw a'du. 33Yaqkhanaka yaq hna'taw khoeq ta nau poemseiq blaiqyoeng a'laqi klongoeng yaqhniq haq án duwa khoeq án thoq ba khoeq khomhnupoeng nei hna'taw khoeq a'ni peha a'phlaetai yoe? taeng án hiq. 34Yaqateq Boiyesuq loeq nei somdaeka a'moeiq khoeq khlaung haqla án koiyi nakkhoeq a'moeiq. 35Seiloeqkhaw hmaungkauma a'duwa khoeq a'thoq laq ba lai khoeq khlaung tawiq a'koeiyi nakkhoeq khaw moeiqcaq khakhut án paeki nakkhoeq khaw moeiqcaq hlaq. 36Yaqhniq khoeq dunoen caq uk khoeq mehon saw haq khkut án phlaetai. Yaqhniq khoeq a'duwa a'thoq ba khoeq khlaung haq tawiq Boipaw caw haqkhaw án phlaet. 37Mi yoeng a'o khoeq hlup klonga Mawse loeq Boipaw a Abarahan, Izaeq, Yakouq tiq Boipaw taeng a'hau khoeq plau woeng án duwa khoeq án thoq ba nakkhoeq a'phlaq hni. 38Nei kha a'phlaq khoeqoeng Boipaw khoeq a'dusaw haq Boipaw seiyaq. A'sauk haeng saw haq Boipaw a'phlaet. A'hau waiq khoeq teq khlaung ta'kum khoeq Boipaw loeq a'loeyi khakhut a'sauk án hmloyi taeng a'hau. 39Yaqateq boengak klam hmotsaw haqloeq, sa'la loeq a'pawilanga na'msauki theiqba taeng án hau. 40Yaqkho ta'koeiq baung poemak loeqkhaw yaq khakhut a'plaet sui uk loeq hiq wawp caq uk. 41Yaqkiyoeng Boiyesuq loeq khlaung haqla, a'klawn saw Boikhreitaw khoeq Dawoeiq mangcaw taeng piya án hau woe? 42Salan klama Dawoeiq mang loeq Boipaw loeq kei Boiya, 43Pawi yaq khoeq khlaung haqkhoeq nang na'kho taungi dun khung khakhut keiloeq ka'mkhlawq paek khoeq khing phawong kei saet pa'toeng ngung boei taeng a'ha. 44Dawoeiq loeq a'klawn saw Mesiyaqa kei Boi taeng a'hau klongoeng a'klawn saw Mesiqyaq khoeq Dawoeiq caw kha a'phlaetai yoe? taeng a'hau.
Khlaung haqloeq án hnyin tuna Boi loeq yaq ta'paiq haqla, 45Khlaung haqloeq án hnyin tuna Boi loeq yaq ta'paiq haqla, 46Klam hmotsaw haqla sa'diq taw tuk loeq mphaen boei tuk. Yaqhniq khoeq lawma án soq loeq wawtsau án hyoeqi theiq. Ziduka khlaung ta'kum loeq án doudau khoeq loeyi uk loeqteq ta'lazalaiq ya khaw a'hmaungkaum omdun án louqi theiq. Pawi haqla khaw ei pawi waenga án gung theiq. 47Hmenu haq im khaw hmonaq khoeq hmuq oeng sim uk loeqteq a'plaet án kupi ba lai tawiq ya suq khaw a'sauwa án tongi theiq. Boipaw loeq yaqhniqa a'plaet laen a'paek haqlai taeng a'hau haq.
Currently Selected:
Luke 20: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Cumtu (Sumtu) Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
