Luke 10
10
1Yaqkiyoeng Boi loeq a'coe ta'paiq seiqkip khoeq haeq haqloeq teq a'ciqai taw khoeq nam haq mloeq haqla poemhneiq upak phauk haqloeq teq a'hmaungkauma a'teiq haq. 2Boi loeq yaqhniqa laicawiqya saung taengtaeng má yanai a'moeiq loeqkhaw a'yansaw a'mlaet. Yaqklongoeng yaq laicawiqya caungyansaw thaengthaeng a'hloeqai khoeq caungmawqhma suq tongi boei tuk. 3Nanghniq nán ciq laq khoeq teq hom haq tau wa toecaw ka'hloeq khakhut nanghniqa keiloeq ka'mhloeq haq 4Nanghniq loeq pawsa, khi, khocum haq ciqiyaituk, lawma ya tuk loeq khlaung haqla sa'taung hiq tuk loeq a'khing mkawtai tuk. 5Nanghniq khoeq im imaka nánwon nak loeq, nei ima khoeqhaq mlungko yaedam boei tuk taeng suq tongi paek boei tuk. 6Yaq ima khoeq khlaung haq hma mlungko yedamsaw a'moeiq loeq nang na'tongi paek khoeq suq yaqhniq loeq án laqi yai. Seiloeqkhaw yaqhniqhma yaqkha moeiq yaq loeq nang na'tongi paek khoeq suq yaqhniq loeq laqi hlaq uk. 7Nanghniq khoeq yaq ima nán om nak loeq im mawq loeq a'myoeq haqkhoeq ei boei tuk. Pi klongoeng naka bisaw haqloeq yaqhniq biphu án laqi laqai klongoeng a'phlaet. Imakiloeq imak hlaiq tuk loeq citai tuk. 8Baung mloeqapak seisei nanghniq nánwon loeq yaq mloeqa khoeq khlaung haqloeq a'mdoudau uk loeqteq nanghniq hmaungkauma a'myoeq haqkhoeq ei boei tuk. 9Yaq mloeqa khoeqhaq kailataq uk loeq yaqhniq mniq mboei paek tuk loeqteq Boipaw khomcaeng khoeq nanghniq hma a'pau wai khoeq khing a'mcauqhni taeng hau boei tuk. 10Seiloeqkhaw baung mloeqapak seisei yaq mloeqa khoeq khlaung haqloeq nanghniqa a'mdoudauwaq uk naka lauma sot uk loeqteq, 11Keihniq kho wa a'paw khoeq nanghniq mloeqa khoeq myaenhnui haq kán thungi hoetpoeiqba. Seiloeqkhaw Boipaw khomcaeng khoeq nanghniq hma a'phawai khoeq khing a'mcauqhni nakkhoeq hmot boei tuk taeng hau boei tuk. 12Nanhniqa keiloeq ka'mhau haqlai. Boipaw loeq ta'la a'ciyang khoeq hnup a'phaw naka Boipaw loeq yaq mloeqa khoeq khlaung haq thauka Tawdou mloeqa a'moeiq khoeq khlaung haqla ba'dakcaw noeng a'ciyang haqlai taeng a'hau. 13Khawrazoei mloeq saw haqloe, nanghniq khoeq pawi yaq tuk khoeq khlaung haq nán phlaet. Baeqzaedaq mloeq saw haqkhaw nei khakhut noeng. A'klong teq nanghniqa ka'mphlaq haqphu khoeq a'tat haq na'maek haqkhoeq Turuq mloeq loeq Ziqdou mloeqa ka'mphlaqphu naka yaq mloeqa khoeq khlaung haqloeq a'hyoem ta'koeiq sawte wawt wawt nauk uk loeqteq taphmuta ngung uk loeqteq sa'diq án laqai. 14Seiloeqkhaw ta'la a'caetcawq khoeq khing a'phaw nak loeq Turuq loeq Ziqdou mloeq khoeq nanghniq thauka nana a'ompha hmai. 15Ka'peyanau mloeq saw haqloe, nanghniq khoeq Boipaw omdun mehona a'mhlokthaq nán laqi yai taeng nánmkhini moe? Nanghniq khoeq hng'laiya nán ciq laqai khoeq khlaung haq nán phlaet taeng a'hau haq. 16Boi loeq yaq ta'paiq haqla, nanghniq plau hnyinisaw loeq kei plau a'hnyni khoeq khlaung a'phlaet. Nanghniqa a'mdoudau khoeq khlaung haqkhoeq keiya a'mhloeq sawa khaw án doudau khoeq khlaung án phlaet taeng a'hau haq. 17Yaqkiyoeng yaq ta'paiq seiqkip án phaw ba loeq yaqhniq khoeq án mlung oeqcaq uk loeqteq, Boi yoe, keihniq loeq Boi ming sumi uk hang loeqteq sa'simangca haqla kánthut noeng hni taeng án msoqi. 18Boiloeqkhaw, mehona khoeq khlaikhla a'wakwak khut Cadan a'klawq khoeq keiloeq ka'hmuq laq. 19Keiloeq nanghniqa, pho sei haq a'sit a'moeiq khoeq amti haqla náncaeq noenai khoeqloeq nanghniq tawiq ya pawi yaq khoeq Cadana náneoniyai khoeq a'tat ka'mpaek haq hni. Yaq pawi yaq khoeq haqloeq nanghniqa pikhaw a'msai haq khoq hlaq. 20Seiloeqkhaw nanghniq loeq sa'simangca haqla nánoeni yawqoeng oeqcaq hmai tuk. Nanghniq ming haq Boipaw mehon ima a'paw laqai khoeq noeng nana oeqcaq boei tuk taeng a'hau haq. 21Yaqkhowa Boiyesuq khoeq cimcai muikhlawoeng nana a'oeqcaq khoeq mlung a'moeiq yateq, mehon loeq somdaeka a'poengi khoeq pawu woe, Boi khoeq plaengnya moeiq loeqteq ánklani khoeq khlaung haqla nei bong haq thuq tiloeqteq sa'mi caw haqla námphlaq haq khlongoneg Boipaw kyezu ka'hmlokthaq. A'layi pawu woe, nei haqkhoeq teq na'hmaungkauma a'mlatnaukpha a'phlaet. 22Boipaw loeq a'moeiq khoeq awlum haq keiya a'mpaek hni. A'caw a'niyoe nakkhoeq Boipaw poemak loeqnoeng a'hmawt. Boipaw a'niyoe nakkhoeq khaw a'caw doe yaq a'caw loeq a'haeq khoeq khlaunga khoeq lawi loeqteq a'ni loeqkhaw hmawtaq taeng a'hau haq. 23Yaqkiyoeng Boiyesuq loeqkhaw yaq ta'paiq haq pa'toeng hlaengi loeqteq towa khoeqhaq nán hmuq laq klongoeng nanghniq khoeq a'hmon nánoeqcaq. 24Nanghniqa keiloeq ka'mhau haqlai, plaenga a'nmoeiq khoeq Pa'rawphaeq haq hnyangpalang haq loeqkhaw nanghniq loeq nán hmuq laq nányouk laq khoeq án hmuq ányaukai tawiq ya nana ka'mlung moeiq uk loeqkhaw hmuqlaqaq uk. Nanghniq loeq nán ya uk laq khoeqhaq yawaiq uk loeqkhaw yawlaqaq uk taeng ta'paiq haqla a'hau haq. 25Patak teq klam hmotsaw poemak loeq tho loeqteq sa'lapawoe msumaq khoeq sauk ka'laqi yai tawiq ya pi haq ka'sai laqai yoe? taeng Boiya mcam nauk waiqya teq a'hiq. 26Boiyesuq loeqkhaw peinyat klama kha yok loeq a'taukoe? nanhniq loeq kha na phawt laq oe? taeng a'hiq loeq 27Yaq loeqkhaw nang Boipaw a'sauk a'haeng khoeq Boiya na'mlung, na'muikhlaw, na'sai louq theiq, na'hmot khoeq awlumoeng na'khaeki laqai taeng khaw, nang imcaengpui haqla khaw nanga nang na'khaeki khakhut na'khaeki laqai taneg a'hau. 28Boi loeqkhaw yaq khlaunga a'layi. Yaqkha sai boei. Yaqkha na'sai loeq na'sauk a'haengai taeng a'hau. 29Seiloeqkhaw klamtatsaw loeq yaqa yaq a'pawi nakkhoeq amphlaqiwaiq klongoeng Boiyesuqa, imcaengpui nakkhoeq a'ni haqloe taeng a'hiq 30Boiyesuq loeq khlaung poemak khoeq Yeruqsalein mloeqa khoeq Yeriqkhaw mloeqa a'ciq kho wa damblaq haqloeng an khomi. Damblaq haqloeq yaq wot haq a'hmlaiq poeiq kiyoeng souq poeiq uk loeqteq du waiq leilei hyaq uk loeq an ciq tauk toeq. 31Yahaenpaw poemak khaw yaq laumoeng a'lo wa teq yaq khlaunga a'khom loeq a'coe laumoeng mphaen loeqteq a'ciq tauk. 32Yaqkhakhut Lewiq khlaungmyoe poemak khoeq yaq dun a'phaw loeq yaq a'kluq khoeq khlaunga a'hmuq loeq a'coe laumoeng mphaen loeqteq a'ciq tauk. 33Seiloeqkhaw Sa'mariq mloeq saw poemak khoeq kha'li a'soq tuna yaq a'phaela a'phaw loeq yaqa a'hmuq loeq a'hmyaena teq, 34Cit loeqteq yaq a'hma a si loeq ca'byeit wai leinauk loeqteq wotcaq oeng a'laet. Yaqkiyoeng yaq a'kluq khoeq khlaunga yaq ta'laeksai khlunga taung loeqteq Taekhokhana a'ciqi pui nauk. 35A'la hnupakoeng haen khaiqhneiq taekhoekhan mawqa a'paeki yoeng, nei khlaunga phanauk pawq boei. A'la a'poeiq tawiq ka'lo naka ka'mpaek ba lai taeng a'hau. 36Yaq khlaung poemthuma a'ni khoeq damblaq haq khuta a'phaw khoeq khlaung imcaengpui yoe? taeng a'hiq. 37Yaq khlaung loeqkhaw yaqa a'hmyaensi khoeq khlaung phlaet bacaek taeng a'hau loeq Boiyesuq loeq nang khaw yaqkha citi loeq sai hoete taeng a'hau. 38Yaqhniq khoeq a'la kha'li an ciq loeq Boi khoeq naum naumaka a'wona teq Mataq taeng a'ming a'moeiq khoeq hna'taw poemak loeq Boiyesuqa a'dou. 39Yaq hna'tawa Mariq taeng an hau khoeq a'nau poemak a'moeiq. Yaqkhoeq Boiyesuq okkhoe wa ngung loeqteq Boi ta'la plau a'hnyin. 40Mataq teq buq a'yoeqai khoeq tawiq ya noeng a'mlung thiq loeqteq Boi phaela cit loeqteq Boi yoe kei ka'nau loeq ka'loeq ka'sai louq khoeq hong noeng a'mcongi khoeq hau ta'ong na'om moe? Keiya a'mku wai khoeq hau hme taeng a'hau. 41Boiyesuq loeqkhaw Mataq Mataqoe, nang khoeq a'moeiq khoeqhaq tawiq ya na'mlung thiqti loeq na'om. 42A'loe khoeq teq hmuqak noeng a'moeiq. Mariq loeq yaq a'pawi khoeq hmuq a'haeqi kihni. Yaq hma khoeq yaq a'pawi khoeq hmuq a'ni loeqkhaw phaeng loeq laqaq.
Currently Selected:
Luke 10: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Cumtu (Sumtu) Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
