YouVersion Logo
Search Icon

Luke 9

9
1Boiyesuq loeq yaq ta'paiq hng'laihneiqa baeki haqloeq teq sa'simangca án thut noengai khoeqloeq a'mniq haq án boei noengai khoeq a'tat a'paek haq. 2Yaqkiyoeng Boiyesuq loeq yaq ta'paiq haqla Boipaw khomcaeng klong án hau wai khoeqloeq a'mniq mawq haqla án boeiyai khoeq a'hloeq haq. 3Boi loeq yaqhniq haqla, nanghniq hui tu pikhaw ciqiyaituk. Tauhwe, khi, ei-ok, haen, nán hlaiyi naukai khoeq wawt haq ciqiyaituk. 4Baung imapakseisei nanghniqa a'mdoudauwaq uk nak loeq yaq duna khoeq nán soq hmaungkaum yaq ima mdum boei tuk. 5Yaqhniq mloeqa khoeq nán soq tuna yaqhniq pa'toeng khoeq sauksi a'plaetai khoeq tawiya nán kho wa a'loki khoeq a'hmun haq thungi poeiqbaboei tuk taeng a'hau haq. 6Yaqhniq khaw sotba uk loeqteq namaki loeq namak cit uk loeqteq Boipaw mongsin sa'taung pawi hmyauk hoet uk loeqteq kaiyaq lataqsaw haqla khaw a'nmniq haq án boei paek. 7Galiqlae plei uksuksaw ba'yeinkhan Herouq loeq Boiyesuq sa'taung a'ya uk kateq nana a'pahaiyi. A'piyawoe naka boengak khlaung haqloeq hneitchin sa'la Yawhan a'duwa khoeq a'haeng ba hni, 8Boengak loeq Pa'rawphaeq Eliyaq a'lo ba hni, boengak loeq a'hyoema khoeq Pa'rawphaeq poemak a'sauk haeng loeqteq a'lo taeng án hau klongoeng a'phlaet. 9Seiloeqkhaw Herouq loeq, keiloeq Yawhanlu baet hang loeqteq ka'tuki hni. Yaqnaka keiloeq towa sa'taung ka'ya uk laq khoeq khlaung teq a'nyoe? taeng hau loeqteq Boiyesuqa a'khomiyai khoeq mlung nana a'moeiq. 10Ta'paiq haq án phaw ba loeq Boiyesuqa yaqhniq loeq án sai louq khoeqhaq án cauk paek ba. Yaqkiyoeng Boi loeq yaq ta'paiq haq baeki haqloeq teq Baeqzaedaq nama án ciq. 11Seiloeqkhaw khlaung haqloeq yaq sa'taung án ya uk loeq Boiyesuq hnu woeng án toemi pawq. Boi loeqkhaw yaqhniqa doudau haqloeq teq Boipaw khomcaeng klong hau haqloeq teq kaiyaq lataq uk khoeq haqla khaw a'mboei paek haq. 12A'mulawm a'phawhniyateq ta'paiq hnga'laihneiq khoeq Boi hma lo uk loeqteq nei dun khoeq khlaung haqloeng a'hlawyi khoeq dun a'phlaet klongoeng nei khlaung lui haqkhoeq nei phaela a'moeiq khoeq nam haqla teiq haq hme. Yaqhniqa án ei okai khoeqloeq án iqdun a'loe hni taeng a'nhau. 13Boi loeqkhaw nanghniq loeq yaqhniqa án ei-okai khoeq uwak paekouk taeng yaq ta'paiq haqla a'hau haqlateq yaqhniq loeqkhaw, keihniqa pongmuq hyaungcaw lunghngaw loeq ngaw thaekhneiq noeng a'moeiq. Nei khlaung awlum a ma'paekai naka ei-ok ma'hleiq hoet laq ba lai taeng án hau. 14Yaq khlaung lui tau wa pa'taw hongcawpak thonghngaw án moeiq. Boi loeqkhaw yaq ta'paiq haqla khlaung hngawgipci mcuqaka ngung sauk mtoeq haqle taeng a'hau haq. 15Ta'pai haq loeqkhaw yaqkhakhut khlaung haqla ngung sauk a'mtoeq haq. 16Boiyesuq loeqkhaw muq lunghngaw loeq ngaw thaekhneiq louqi loeqteq mehon touq loeqteq Boipaw a a'mhmlok thaq kiyoeng muq khleiq loeqteq ta'paiq haq ta'thoq khlaung haqla phaiq sauk a'mtoeq haq. 17Khlaung haq awlum loeqkhaw ngawqong án ei laq khoeq tanaq a'kyan khoeq ta'paiq haqloeq án sim bala tong hngilaihneiq dingding án laq ba. 18Boiyesuq khoeq a'hoepoetcaw suq a'tongi tuna ta'paiq haq Boi hui tu án ompawq. Khlaung haqloeq keiya a'ni taeng a'mhau haqloe taeng a'hiq haq. 19Yaqhniq loeqkhaw boengak loeq Boi khoeq hneitchein sa'la Yawhan taeng a'mhau, boengak loeq Eliyaq, boengak loeq Pa'rawphaeq poemak a'sauk haeng loeq a'lo ba khoeq nakkhoeq a'mhau haq taeng án msoqi. 20Yaqateq Boi loeq, nanghniq loeqteq keiya a'ni taeng a'mkhin haq lo taeng a'hiq haq. Petaruq loeqkhaw, Boi khoeq Boipaw loeq a'mhloeq khoeq a'klawn saw Boikhreitaw na'phlaelt taeng a'hau. 21Boi loeqkhaw nei klong haqkhoeq a'niya khaw hau wai tuk taeng caetcaet maimai a'sin haq. 22Boi loeq yaq ta'paiq haqla, khlaung cang haq, Yahaenpaw lang haq klam hmotsaw haqloeq khlaungcaw taeng án hau khoeq Boiya án souqhauwai. Yaqhniq loeq yaqa myang uk loeqteq án tukai. Seiloeqkhaw yaqkhoeq hnupthum dunoeng a'sauk a'haeng ba lai taeng a'hau haq. 23Yaqkiyoeng Boiloeq, khlaung lui haqla a'ni pak seisei kei hnuwa a'mtoemi loeqteq kei ta'paiq a'phlaet waiq khoeq khlaung khoeq yaqa yaq myangi loeqteq yaq kutphawtoeng koeqi loeqteq keihnowoeng hnuptoeng a'mtoemi noeng khoeq khlaung a'phlaet laqai. 24Nanghniq sauk nán klawni waiq loeq nán sungi laqai. Seiloeqkhaw kei klongoeng yaqhniq sauk a'npaekiwawp khoeq khlaung teq yaq sauk a'klawn a'laqi yai. 25Nanghniq loeq neisomdaka a'moeiq khoeq awlum poengi tuk loeqkhaw nanghniq saukta a'klakci naka pikha a'phu a'tawn hmai yoe? 26Nanghniq khoeq kei klongoeng nán hyawqi nak loeq khlaungcaw khoeq Boipaw phumthaung loeq a'cimcai khoeq Boipaw mehon saw haqloeng án lo kho wa nanga a'mhyawq naukai. 27Nanghniqa keiloeq a'hmon ka'mhau haqkhoeq teq neiduna a'moeiq khoeq boengak haqkhoeq Boipaw khomcaeng a'pau hmaungkaum du laq hlaq uk taeng a'hau haq. 28Yaqkha a'hau kiyoeng hnupsaet baung a'kla loeq Boiyesuq loeq Petaruq, Yawhan, Yakouq tiq ciqi pui nauk haqloeq teq suq an tongi yai khoeq tonghona án kawi. 29Boi loeq suq a'tongi tuna yaq a'hmoi a'long plongi loeqteq a'wawt khaw bok loeqteq a'cimcai poeiq. 30Ma'lawiq ta'lawiq Pa'rawphaeq Mawse loeq Eliyaq pau hniq loeqteq Boi yoeng an soiyi. 31Yaqhniq khoeq Boipaw phumthaungoeng wang poeiq uk loeqteq Yeruqsalein mloeqa Boi a'tuk a'laqi yai khoeq klong án soiyi nauk. 32Petaruq loeq a'coe ta'paiq poemhneiq khoeq án iq tun. Yaqhniq án khak loeq saksang Boipaw phumthaungoeng a'wang khoeq Boiya án hmuq laq. Yaqhniq loeq Boi yoeng án soiyihom khoeq Pa'rawpaeq poemhneiqa khaw án hmuq laq. 33Mawse loeq Eliyaq an ciq tuna Petaruq loeq Boiyesuqa, Boi yoe nei dun khoeq máhniqtawiqya nana a'ompha khoeq dun a'phlaet. Boi tawiq ya tai lungak, Eliyaq tawiq tai lungak, Mawse tawiq tai lungak sa'diq laqnauk dun tai lungthum ka'msauk paek haqlai taeng a'hau. Seiloeqkhaw Petaruq loeq yaqa yaq pi a'hau taeng hmawti yaq. 34Petaruq loeq yaqkha a'hau tuna melik khoeq yaqhniqa kup loeqteq a'lik a'klawq. Yaqhniq khaw melik loeq a'kup haqlateq nana án pahaiyi poeiq. 35Yaq khinga melika khoeq a'thai a'soq khoeq teq, nei khluang khoeq keiloeq ka'haeq khoeq ka'khaeki laq khoeq caw a'phlaet. Yaq plau hnyini boei tuk taeng melika khoeq a'thai thaiyak a'lo. 36Yaqkha a'thai a'soq kiyoeng Petaruq, Yawhan, Yakouq tiloeq Boiyesuq poemak a'moeiq khoeq noeng án gmuq laq taek. Yaqhniq khaw Yaqhniq loeq án hmuq laq khoeq klong haq yaq hnup haqla a'niya khaw hau ta'ong thinthin caw án om. 37A'la hnupakoeng Boiyesuq loeq ta'paiq poemthum tiqoeng tonghona khoeq ánkom loeq khlaung thaengthaeng loeq án dou. 38Khlaung lui tau wa khoeq poemak loeq, keiya a'mhmyaen tiloeq teq keicaw kaiyibaong a'msai paek bahme. Yaqkhoeq keiya poemak hongcaw noeng a'moeiq khoeq caw a'phlaet. 39Yaqa sa'simangca loeq mani loeqteq ma'lawiq ta'lawiq khaw a'mpok theiq. Yaqkhoeq boeq loeqteq a'hakhowoeng khaw a'mcoephom haq soq poei loeqteq a'puma khlaqi peiq loeqteq yaq sa'si khoeq a'soq kung. 40Keiloeq Boi ta'paiq haqla khawqi haq hang loeqteq yaq sa'siya thutsauk mtoeq haq hang loeqkhaw yaqhniq loeq thut noenak uk taeng a'hau. 41Boiyesuq loeqkhaw yaq ta'paiq haqla nán myumi moeiq yaqkhoeq nanghniq haqloeng kei pi hyawq kla ong omhang loeqteq nanghniqa ka'mlung ka'msau paek haq laq hmai yoe? taeng a'hau haq. 42Yaq sa'mi caw a'lo tuna yaq duka sa'si a'wona teq a'boeq ta'ba. Boiyesuq loeq yaq sa'simangca a haunauk loeqteq sa'micawa a'mboeipaekba kiyoeng a'pawa a'paek ba. 43Khlaung ta'kum loeq Boipaw phumthaung laen án hmuq laqa teq nana án mauqnauk. Boiyesuq loeq a'sai louq khoeqhaq khlaung haqloeq ánmouqnauk tuna Boi loeq yaq ta'paiq haqla, 44Nanghniq loeq kei ka'hau khoeqhaq a'pawilanga hnyin boei tuk. Khlaungcaw khoeq khlaung haq kuta a'aup a'laqi hnai taeng a'hau haq. 45Seiloeqkhaw ta'paiq haqloeq Boi loeq pi a'hau woe? nakkhoeq hmawtaq uk. Yaq plau yawcuwaq uk loeqkhaw Boiya hiqwopaq uk. 46A'tawncaw a'moeiq loeq yaq ta'paiq haqloeq yaqhniq duka a'ni a'laen haekoe? nakkhoeq án myangi nauk. 47Boiyesuq loeq yaqhniq án myangi nauk khoeq a'hmawt loeq sa'mi caw poemak baeki loeqteq a'phaela a'tauk. 48Yaqkiyoeng Boiloeq ta'paiq haqla nei sa'micawa a'doudau khoeq khlaung khoeq keiya a'mdoudau khoeq khlaung a'phlaet. Keiya a'mdoudau khoeq khlaung loeq keiya a'mhloeq khoeq Boipaw a khaw a'doudau khoeq khlaung a'phlaet. Nanghniq tau wa a'mlung mhnaemi loeqteq a'omtheiqsaw khoeq a'laen khoeq khlaung a'phlaet taeng a'hau haq. 49Yaqkiyoeng Yawhan loeq, Boi yoe Boiming sumi loeqteq khlaung poemak loeq khlaung haq hma khoeq sa'simangca a'thut paek haqkhoeq kán kom. Yaq khlaung khoeq keihniq hui tu lopawqaq klongoeng yaqkha a'la saicaqai tiq taeng án hau hoet. 50Seiloeqkhaw Boiyesuq loeq yaq loeq a'sai khoeq mdipai tuk. Nanghniq oeng taiqiyaq tuk duna omaq khoeq khlaung khoeq nanghniq pa'toeng a'om khoeq khlaung a'nphlaet. 51Boi khoeq mehona a'ciqi pui nauk a'laqi yai khoeq a'khing a'mcouq hni khlongoeng Yeruqsalein mloeqa a'ciqai khoeq a'mlung a'saungi. 52Boi loeq yaq ta'paiq boengak a Sa'mariq nama yaq tawiq án klanyangai tawiq ya a'yang a'teiq haq. 53Seiloekhaw Boi khoeq Yeruqsalein mloeqa taiqtaiq án ciqa teq Sa'mariq nam saw haqloeq Boiya douwaq uk. 54Ta'paiq Yakouq loeq Yawhan loeqkhoeq yaq a'phlaet khoeqhaq án hmuq loeq, Boi yoe Eliqyaq loeq a'sai khakhut keihniq loeqkhaw mehona khoeq mi klawq sauk mtoeq uk hang loeqteq yaqhniqa kánkhlaqai khoeq na'loeyi moe? taeng án hiqi. 55Seiloeqkhaw Boi loeq yaqhniq poet hlaengi loeqteq yaqhniq mkhin layiyaq nakkhoeq a'mcok hau hoeiq. 56Yaqkiyoeng yaqhniq awlum khoeq a'coe nam pa'toeng án ciq. 57Boi loeq yaq ta'paiq tiq án ciq dun lawma khlaung poemak loeq Boiya, kei khaw Boi na'ciqduna ka'mtoemi pawqai taeng a'hau. 58Boiyesuq loeqkhaw keiwa haqla ánkom a'moeiq. Mehona khoeq pha'yaw haqla khaw ánbu a'moeiq. Seiloeqkhaw khlaungcawa a'lu a'klawqiyai khoeq omdun moeiq yaq taeng a'hau. 59Boi loeq a'coe khlaung poemaka yaq hui tu toemisauk a'mtoeqateq yaq khlaung loeq, Boi yoe ta'nak a'mconghme. Kei ka'pawyok a'yang ka'bum hoetcahmai taeng a'hau. 60Yaqateq Boi loeqkhaw, a'dusaw haqla a'nmlung dusaw haqloeq án bum khaemai. Nang loeqteq Boipaw khomcaeng klong ta'la pawi khoeq khlaung haqla hmyauk haq boei taeng a'hau. 61A'coe khlaung poemak loeq, Boi yoe, kei khaw nanghuitu ka'nmtoemi pawqai. Seiloeqkhaw ima plan hang loeqteq nupaw haqla sa'taung ka'hiq haq hoet hmai taeng a'hau. 62Boiyesuq loeqkhaw lai mthondun aiq khaek loeqteq a'hnu poet a'laengi khoeq khlaung khoeq Boipaw khomcaengoeng tawniyaq taeng a'hau.

Currently Selected:

Luke 9: ctpv-rv

Highlight

Share

Copy

None

Want to have your highlights saved across all your devices? Sign up or sign in