Luke 8
8
1Yaqkiyoeng Boiyesuq khoeq mloeqak kiloeq mloeqak, naumak kiloeq naumak hlaiq loeqteq Boipaw khomcaengoeng a'saengi khoeq sa'taung pawi hmyauk haq. Ta'paiq hng'laihneiq khaw Boi hui tu án ciq pawq. 2Yaqhniq tanaq án mniq haqloeq sa'simangca haq kuta khoeq án loet ba khoeq hna'taw boengak án phlaet khoeq sa'simangca cumseiq hma khoeq a'loet ba saw Magadalaq mloeq saw taeng án hau khoeq Mariq, 3Herouq mang ei ok a'calangsaw Khuqzaq peha Yawhanaq ta'koeiq mcaq loeqteq Suqsanaq doe a'coe hna'taw haq taengtaeng án moeiq. Nei hna'taw haqkhoeq yaqhniq won thaung ola haqloeng Boi loeq ta'paiq haqla án yoeqson.
Caungci phuqsaw klong pungmthum 4Khlaung thaengthaeng khoeq mcuqi uk loeqteq mloeq naum ta'kuma khoeq khlaung haqkhaw a'phala án lowa teq Boi loeq pung a'mtumi nauk haqkhoeq teq 5caungci puqsaw poemak khoeq caungci phuqa a'ciq. Yaq caungci a'phuq tuna boengak caungci haqkhoeq lauma a'klawqa teq a'caeq laqi poeiq loeqteq mehona khoeq pha'yaw haqloeq lo uk loeq án ei poeiq. 6Boengak caungci khoeq lung khlunga a'klawqa teq a'yong sot loeqkhaw tui laqi yaqklongoeng a'ca poeiqba. 7Boengak haq nei hling haq laikla a a'klawqa teq caung hui tu a'soq pawq khoeq hling haqloeq án pit poeiq. 8Boengak caungci haqteq phluk a'pawi duna a'klawqa teq a'yongpai loeqteq a'phoeq klaak a'thaiq haq a'thaiq taeng a'hau haq. Yaqkha a'hau haq kiloeq a'yaukai khoeq a'nhnaw paw saw haqloeq a'pawilanga hnyin boei tuk taeng a'hau haq. 9Yaqkiyoeng ta'paiq haqloeq yaq pung khoeq piklong na'hau waiq yoe? taeng Boiya án hiq. 10Yaqateq Boi loeqkhaw nanghniq Boipaw khomcaengoeng a'saengi khoeq a'mthuk khoeq klong haq ná hmotai khoeq a'khwai a'mpaek haq. A'coe haqteq hmu uk loeqkhaw hmuwaq uk ong yaw uk loeqkhaw yawcuwaq uk ong yaqhniqa pungoeng ka'hau haq laq. 11Pung a'daekplei teq nei kha a'phlaet. Caungci khoeq Boipaw plauya a'phlaet. 12Lawma a'klawq nakkhoeq teq nei bong khlaung haqla a'hau haq. Ta'la plau yaqhniq loeq yaw laq uk loeqkhaw myumi uk loeqteq a'klawn laqi hlaq uk tawiq ya manaq loeq lo loeqteq yaqhniq mlung duka khoeq ta'la plau haq a'louqi poeiqba. 13Lung khlunga a'klawq nakkhoeq teq ta'la plau án ya uk laq kho wa mlungko oeqcaq oeng án doudaungi khoeq khlaung haqla a'hau haq. Seiloeqkhaw yaqhniq mlunga kopiyaq klongoeng ta'nakcaw noeng myumi uk loeqteq saukta duka a'kauk khoeqhaq soenglai patma haq án khom laq khoeq khinga yaq án myumi mlung haqkhoeq a'klok poeiqba. 14Hling a'moeiq khoeq hlupa a'klawq khoeq caungci teq Boipaw plauya yaw laq uk loeqkhaw hnuptoeng saukta duka a'thiqcaek khoeq mlung haq, somdaek won thaung haq poengi saw loeq somdaek khuwaw haqloeng a'pyaw khoeq mlung haqloeq a'kupa teq a'thaiq thaiq yaqkhoeq khlaung haqla a'hau haq. 15A'pawi khoeq daeka a'klawq nakkhoeq teq a'cimcai khoeq mlungoeng Boipaw plau a'ya uk loeq a'mlunga saungi loeqteq a'sai louq klongoeng a'thaiq pawi a'thaiq khoeq khlaunga a'hau. 16Mikhoiq thoi loeqteq tongoeng a'kupsaw seiyaqloeq iqdun kha'dang kawa a'tauk saw nakkhoeq a'ni khaw moeiq yaq. A'won saw haqloeq a'lang án hmuqiyai tawiq ya khlaung khunga naoeng án tauk theiq. 17Sui pu loeq laqaq pu ong thuq pu loeq má tauk noeng nakkhoeq moeiq yaq. Hmotaq pu ong má kupneong nakkhoeq khaw moeiq yaq. 18Yaqklongoeng nanghniq loeq kha ná ya uk laq oe nakkhoeq sa'diq tawyi boei tuk. A'klong teq a'tauki khoeq khlaunga a'la a'paek hmai. Tawyi yaqkhoeq khlaung hma teq yaq hma a'moeiq taeng a'mkhini khoeq pak a'sim paek hmai taeng a'hau haq. 19Hnupakteq Boi a'nu loeq a'nau haq Boi hma án lo. Seiloeqkhaw khlaung haq lui yoeng Boi phela phawnoengak uk klongoeng 20Boengak khlaung haqloeq Boi na'nu loeq na'nau haqloeq Boiya a'mkhomi haq waiqya teq a'planga a'mcong haq taeng án hau. 21Seiloeqkhaw Boi loeq Boipaw mongsin ta'la yaw uk loeqteq án sai louq khoeq khlaung haqkhoeq kei ka'nau loeq ka'nau haq án phlaet taeng a'hau haq. 22Hnupakteq Boiyesuq khoeq yaq ta'paiq haqloeng hluiya án kawi kiloeq aeng phaukak pa'toeng má kawqai taeng a'hau haqlateq yaqhniq khoeq hlawiq mtun uk loeqteq án ciq. 23Yaqhniq hlawiq mtun uk loeq án ciq tuna Boi a'iq. Yaq khinga khli muntoeng a'lowa teq hlui khoeq hluiya tui a'won poeiqya teq hlui khaw a'mlup hnowaiq. 24Ta'paiq haqkhaw a'phaela thoeiq uk loeqteq Boi yoe Boi yoe, keihniq kán du laq hnai taeng án mkhak. Boi khaw tho loeqteq khli loeq hloeng haqla a'mcok hau haqlateq khli loeq hloeng khaw dip loeqteq a'oeqcaq phaba. 25Yaqkiyoeng Boi loeq nanghniq loeq nán myumi khoeq mlung baung a woe? taeng a'hiq haq. Ta'paiq haqkhaw pa'hayi uk loeqteq nei khlaung teq a'ni yoe? Khli loeq hloeng haqla a'maeng a'paek haqla yaqhniq loeq ánhnyinisa taeng poemak loeq poemak án soiyi nauk. 26Yaqkiyoeng yaqhniq khoeq Galilae plei pawkak pa'toeng a'moeiq khoeq Garacaq pleiya hlawiq mtun uk loeqteq án ciq. 27Yaq dun án phawa teq Boi khaw konga a'kawi loeq sa'simangca loeq mani khoeq khlaung poemak loeq Boiya a'dou. Yaq khlaunga sa'si loeq a'mani khoeq a'tawn kla hni loeqteq ima khaw omaq, wawtcaw ka'kaw mco wa mpat loeqteq a'om. 28Yaq khlaung loeq Boiya a'hmuq loeq mpoq loeqteq a'hmaungkauma bok loeqteq a'hlung haek khoeq Boipawcaw Boiyesuq oe, Boi khoeq keihniq oeng pi na'saengi yoe? Keihniqa a'mklunauk haq hmai tiq, ka'mkhawqi haq a'thai bau woeng mpoq loeqteq a'hauwi. 29Yaqkha a'hau laq khoeq teq Boi loeq yaq sa'simangca a yaq khlaung hma khoeq a'soqai tawiq ya a'maeng a'paek klongoeng a'phlaet. Yaq sa'si loeq yaq khlaunga ta'nak ta'nak mani loeqteq yaqa mthiyoi haqloeng a'kho wa khlun uk loeqteq cong uk loeqkhaw yaq yoi haq mbaeti poeiq loeqteq tau duka sa'si loeq a'ciqi pui nauk a'laqi 30Boiyesuq loeq yaqa nangming khawoe? taeng a'hiqa teq yaq khlaung hma sa'simangca thaengthaeng a'moeiq klongoeng yaq loeq Leyaung ka'phlaet taeng a'hauwi. 31A'la yaq sa'simangca haqloeq yaqhniqa nana a'mthuk khoeq duna a'mthaw haq hmai tiq taeng Boiya án khawqi 32Yaqduna wok lui laen luiyak khoeq tonggunga cauk án ei khoeq a'moeiq. sa'si haqloeq yaq wok haq duka án wonai khoeq Boiya án khawqiya teq Boi loeq wonsauk a'mtoeq haq. 33Yaqkhowa sa'simangca haqkhaw yaq khlaung hma khoeq sot uk loeqteq wok haq duka án wona teq wok haqkhaw tong hmei ta'thoq tui aenga án tongiya teq tui cuq uk loeq án du poeiq. 34Wok cong saw haq loeqkhaw yaqkha a'phlaet khoeqhaq án hmuqa teq con uk loeqteq mloeq taunam haqla án hmyauk hoet. 35Khlaung haqkhaw a'phlaet khoeqhaq án sotai án lo kho wa sa'simangca loeq a'manisaw khoeq wotcaw haq hyoeqi loeqteq Boiyesuq ok kho wa a'pawilanga a'ngung khoeq án hmuqa teq án keiq poeiq. 36A'mcaq a'msum a'hmuq laq saw haq loeqkhaw sa'si loeq a'manisaw pikha a'boei ba nakkhoeq yaq khlaung haqla án cauk paek. 37Yaqkhowa Garacaq plei saw haqkhaw nana án keiqa teq yaqhniq hma khoeq sot loeq a'ciqbalai tawiq ya Boiya án khawqi. Boi khaw hluiya kawi loeqteq a'ciqba. 38Sa'simangca haq a'soq ba khoeq khlaung loeqkhaw Boi hui tu a'ciq pawqi khoeq a'khawqi. Seiloeqkhaw Boi loeq 39nang ima cit tiloeq nanga Boipaw loeq a'msai louq paek khoeqhaq hmyauk hoete taeng hau loeqteq a'teiq ba. Yaqkhowa yaq khlaung khaw cit loeqteq Boiyesuq loeq yaqa a'sai louq paek khoeqhaq mloeq blaiq ya a'cauk paek haq. 40Boiyesuq plan loeq a'phaw ba loeq klaung haqloeq Boiya oeqcaq mlungoeng án doudaung. Piyawoe naka yaq khlaung haqloeq Boiya án congi klongoeng a'phlaet. 41Yaqkhowa Ya-iqruq taeng a'ming a'moeiq khoeq khlaung poemak a'phaela a'lo. Yaq khlaung khoeq ta'lazalaiq ya tawai a'moeiq khoeq khlaung a'phlaet. Yaq khlaung Boiyesuq ok kho wa bok loeqteq yaq ima a'lo wai khoeq a'khawqi. 42A'klong teq yaqa poemak khlang caw a'moeiq khoeq a'sauk hnga'laihneiq a'hlawi a'cawhnu du waiq leilei a'phlaet. Boi a'lo loeq khlaung haqkhaw a'noeq a'noeq lo uk loeqteq Boiya án toeq peq. 43Yaq khlaung lui tau wa ka'kum hng'laihneiq sui a'hloi khoeq hna'taw poemak khaw a'paw. Yaq hna'taw loeq yaqhma a'moeiq khoeq khuwawq haq poeiq poeiqong ta'hlai sa'la ta'kumhma saiyi loeqkhaw yaq mniq klok ong a'ni loeqkhaw sai noengak uk. 44Yaq hna'taw khoeq Boi hnuwa lo loeqteq Boiyesuq wawtcaq khoeq a'kutoeng a'mhmlaem hyawqoeng saksang sui a'hloi khoeq a'dip toeq. 45Yaqateq Boiyesuq loeq keiya a'ni loeq a'hmlaemoe? taeng a'hiq haqloeq awlum loeq án myang. Petaruq loeqkhaw Boi yoe, khlaung haq taengthaeng loeq Boiya a'mwaengi nauk uk loeqteq a'mtoe haq peiq tu taeng a'hau. 46Seiloeqkhaw Boiyesuq loeq keiya hmat poemak loeq a'mhlaem peiq. Piyawoe naka kei hma khoeq ka'tat a'soq khoeq keiloeq ka'hmoti taeng a'hau. 47Yaq hna'taw khaw wini loeq laqcaq khoeq a'hmoti loeq pa'hai sa'dam a'hmaungkauma lo loeqteq a'mkhuklu khlawqi loeqteq Boiya a'hmlaem laq khoeq klong, a'mniq saksang a'klok khoeq klong haq khlaung haq hmaungkauma a'cauk paek haq. 48Boi loeqkhaw ka'cawhnu woe, nang loeq na'myumi klongoeng na'kailati ba hni. Mlungko yaedamoeng cit hne thaeng yaq hna'tawa a'hau. 49Boiyesuq loeq ta'lazalaiq yaqkha a'hau tuna Ya-iqruq ima khoeq khlaung poemak lo loeqteq nang na'cawhnu a'du hni. Boiya beiq nauk caqai tiq taeng a'hau. 50Yaq plau khoeq Boiyesuq loeq a'ya uk loeq Ya-iqruqa, pa'haiyi yai tiq, Na'myumi khoeq mlungnoeng tawyiye. Yaqnaka nang na'cawhnu a'kaiyi ba lai khoeq noeng taeng a'hau. 51Boiyesuq khoeq Ya-iqruq ima a'phaw loeq Petaruq, Yawhan, Yakouq loeq yaq sa'mi caw nupawa khoeq lawi loeqteq a'coe haqkhoeq imduka wawn sauk mtoeq haq laq. 52Khlaung ta'kum khaw yaq hna'taw caw tawiq ya án kang beiqi uk loeqteq nana án kaq. Boi loeqkhaw kapai tuk. Hna'taw caw a'du khoeq seiyaq. A'iq khoeq noeng taeng a'hau haqlateq 53Yaq khlaung haqloeq Boiyesuqa án mnuiq nauk. A'pi klongoeng naka yaq hna'taw caw a'du hni nakkhoeq awlum loeq án hmawt klongoeng a'phlaet. 54Seiloeqkhaw Boi loeq hna'taw caw kut khaek loeqteq hna'tawcawoe, thowe taeng a'hau loeq 55yaq hna'taw caw muikhlaw won ba loeqteq saksang a'thoq. Boi loeqkhaw yaqa ei haq án paekai khoeq a'hau haq. 56Yaqkhowa yaq hna'taw caw nu paw hoeiq loeqkhaw nana an mauk nauk. Seiloeqkhaw Boi loeq nei a'phlaet khoeq klong haq a'niya khaw hau wai tuk taeng a'sin haq.
Currently Selected:
Luke 8: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Cumtu (Sumtu) Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
