YouVersion Logo
Search Icon

Luke 24

24
1Nhxpseq duk kj kxq cxkcxk nhxp Khovalawm cxn nj jn mhutaw heq khrawng an'punghaw na an'poqcai cjn o-ing tiq nenta heq ciq-e theqna 'Boipaw Yesyuq' mji nawk co-gu pawt an'cet. 2Jn mhutaw heq na co-gu kjt an'khaq nawk lung lenpaw nhjt te luk na a'mji khrawng an'khom me. 3Co-gu duk kj an'vawng na ce 'Boipaw Yesyuq' pumyo khrawng khom tiyju uq. 4Nhi tiq na i-baw a'thon nawk khrawng khin na laq khoq yju uq. Jn tun nj angseu tiq suisawk bok khoq-e tiq khrawng pjinhiq dawng lo theqna nhi tiq ka vj a'hiq tung lo. 5Jn hxvj jn mhutaw heq khrawng kiqca theqna dek khrung ngj an'mun ne tung kyaq. Sinakha jn khrawng hji na "bjt tiq an'tawk nawk co-gu vj ibahai yj heng tiq khrawng nan'sui lo. 6'Boipaw Yesyuq' khrawng ni dxn nj mji tiyju. Nhi khrawng a'bjt nawk kj kxq a'heng ba pjn. 'Galiqle' kre yj nhi dj nan'mji nghxt nghaq khaw vj nang'hi yj nhi na a'hawu nghxt khrawng heq khin ne naw ba vjn. 7"'Ceqcaw' khrawng a'kret a'sisaw poqcai tiq heq kut tj awp khrawng, kutyvaw koptjng ngj an'tuk khrawng khawm laq ai. Nhxpthum nhxp pj a'thju ba vai tiyj 'Galiqle' kre yj a'mji khaw hxvj nang'hi yj a'hawu nghxt siyju vaw tiyj a'hiq hawu. 8Jn hxvj yawng jn mhutaw heq na 'Boipaw Yesyuq'' sin nghxt khrawng heq an'khin ne nawk ba. 9Jnpjnnj ce co-gu vj kxq cet ba theqna 'Tavawkaq' pji kalainghawt na a'kyaw khrawng heq j kha jn sitawng heq an'soqsai ba. 10'Tavawkaq' heq j ni sitawng heq soqsai ba tiq mhutaw heq ce 'Magaqdaqlaq' luqsaw 'Mariq', 'Yawhennaq', 'Yakuk' nu 'Mariq' j thoq cat na nhi tiq dj mji nghaq pui a'kyaw mhutaw heq j an'thon. 11'Tavawkaq' heq na jn mhutaw heq soqsai ba khrawng kheukhaw si khoq yju tiyj xt naw u-na nhi tiq na yum yju uq. 12Sinakha 'Petaruq' khrawng co-gu pawt con ne na a'duk kj a'so ve na ce 'Boipaw Yesyuq' pumyo khom tiyaq na a'pumyo an'lhom nawk suisawk yawng a'mhu ve. Jnkhennj nhi na khrawng jn thonlok heq mhawnkau theqna a'im nghaw pawt a'cet ba. 13Jn nhxp kung ngj 'Boipaw Yesyuq' tabeq duk kj kxq pjinhiq khrawng 'Yeruqsalawng' luq dj mai seq bawng lhawm tiq 'Iqmok' nam pawt a'hiq cet. 14Nhi hji khrawng 'Boipaw Yesyuq' sitawng heq na thonne nghxt khrawng heq krju kheu ve pheng a'hiq cet. 15Jn baw a'hiq lutlai ye tun nj 'Boipaw Yesyuq' khrawng hawp lo theqna nhi hji dj a'cet nghaq. 16Sinakha nhi hji mik khrawng 'Pxtpaw Phawlaw' na 'Boipaw Yesyuq' mhawt te khoq yaq hawn nj a'sindya khennj nhi hji na mhawt te yju hji. 17'Boipaw Yesyuq' na "nang'hiq na krawk ke pheng i-mhuqlam heq na'hiq hawu" tiyj a'nghiq na ce nhi hji khrawng a'hiq mhawi pawi yaq pheng a'hiq tung. 18Jn hji duk kj 'Kalawphaq' tiyj ming naw tiq na 'Boipaw Yesyuq' j "ni nhxpnghawt nhiq j 'Yeruqsalawng' luq j i-heq thonne nghxt nawk khrawng co yaq tiq nang pjinghawt yawng na'mji" tiyj a'hawu. 19'Boipaw Yesyuq' na "i-mhuqlam heq tiyj a'nghiq na ce jn hji na kha 'Nacarek' luqsaw 'Yesyuq' mhuqlam heq ka'hiq hawu. Jn khrawng khrawng 'Pxtpaw Phawlaw' mhawimhaw khrawng heq mhawimhaw vj a'mong cu-kraw tiq a'kut cu-kraw tiq 'Parawphek' pjinghawt tj a'thonne. 20Sinakha 'Mhawpaw' canglen heq mawnglen heq na an'tuk khrawng khawm hai tok kj an'awp khennj kutyvaw koptjng ngj an'tuk pjn. 21Jn khrawng khrawng 'Icare' yx heq ljulawk ke hai tiq j a'thonne khennj han'hi na khin nghxt u-na kha ni mhuqlam heq a'thonne khrawng tuq j ce nhxpthum a'mji pjn. 22Sinakha ke'hi pekpui mhutaw caw heq co-gu pawt ngomyawn an'cet khaw hxvj 23A'yok mhu tiq yaq u-na an'lo ba. 'Boipaw Yesyuq' ce a'sawk heng ba pjn nawk khrawng hawu lo tiq hawn cipaw hji ljklaw kha an'mhuqkhom nghxt khrawng an'soqsai ba khennj ke'hi na kan'mhawnkau nghxq yawng. 24Jnkhennj a'kyaw khrawng heq na kha co-gu duk pawt an'so ve khaw hxvj jn mhutaw heq hawu baw vj khom me u-na kha 'Boipaw Yesyuq' ce khom me tiyj uq tiyj an'hawu. 25Jnpjnnj ce 'Boipaw Yesyuq' na 'Parawphek' heq na an'hawu nghxt khrawng kheukhaw yum khoq hawn nj nan'nyen mji yaq tiq nan'lung cang tiq heq j 26'Kharittaw' na ni baw a'sisaw heq khawm na a'punghaw phun heq a'laq ba laq ai siyju vaw tiyj a'hawu. 27Jnpjnnj ce 'Boipaw Yesyuq' na 'Mawsye' yok nghxt khrawng kyengcaw vj thoq cat theqna 'Parawphek' heq yok nghxt khrawng kyengcaw duk kj kxq a'punghaw dj soisen ne tiq kyeng pek heq j hi-i a'hawu ve ljk nawk khrawng a'soqsai. 28Nhi hji pjinhiq cet nawk 'Iqmok' nam ka khrai hxvj 'Boipaw Yesyuq' khrawng a'tha sawp na cet batx hai yj a'thon. 29Sinakha jn hji na 'Boipaw Yesyuq' j khomx lo vai nghxq khennj ke'hiq dj dxn nghawt tj om lo va tiyj a'nghiq khawq-e. Jnkhennj 'Boipaw Yesyuq' khrawng nhi hji dj om nghaq hai yj a'yun ne. 30Jnpjnnj e-o hai yj an'ngvaw hxvj 'Boipaw Yesyuq' na mung kjng na 'Pxtpaw Phawlaw' a'tjuqkauq ve nawk. Mung khrawng pit na jn hji yj a'pet. 31Jnkhaw hxvj 'Pxtpaw Phawlaw' na nhi hji yj a'mhuq ba sawk khen cuvj 'Boipaw Yesyuq' j thonne tiyj a'hiq cok laq. Jn tun nj 'Boipaw Yesyuq' khrawng nhi hji mhawimhaw vj kxq a'khrxk txm. 32Nhi hji na kha lawm mj 'Boipaw Yesyuq' na ha'hiq dj kheu pheng kyengcaw vj kxq na hi-i a'hawu ljk nawk khrawng heq a'coksawng khaw hxvj ha'hiq lungbong duk khrawng a'o baw vj a'mji siyju vaw tiyj a'hiq punghaw ko a'hiq hawu ve tong. 33&amp;nbsp;Jnpjnnj ce nhi hji khrawng thju palat theqna 'Yeruqsalawng' luq pawt a'hiq cet ba. Jn hxvj 'Tavawkaq' pji kalainghawt khrawng a'kyaw khrawng heq dj cuq-e na an'mji khrawng a'hiq khom me. <span class="usfm_v" id="cv24_34"><span class="marker"></span></span> 34Jn cuq-e tiq heq na 'Boipaw Yesyuq' khrawng a'bjt nawk kj kxq a'mhawnmx a'heng ba pjn. 'Syiqmung' ngj kha a'dawn ne pjn tiyj an'hawu. 35Jnkhaw hxyawng 'Iqmok' nam mj kxq khrawng pjinhiq na kha lawm mj nhi hji na a'hiq khom nghxt khrawng na mung a'pit khaw hxyawng 'Boipaw Yesyuq' nawk khrawng nhi hji na a'hiq cok laq khrawng a'hiq hawu ba. 36Jn baw an'sai ye tong tun nj 'Boipaw Yesyuq' khrawng nhi tiq lungdxm mj dawng lo theqna yadik dawmdak bjiq cuq tiyj a'bek ke. 37Sinakha a'tabeq heq na phruk an'mhuq tiyj taw na an'kiqca kyaq. 38Jn hxvj 'Boipaw Yesyuq' na "nang'hi na ibahai yj nan'kiqca laq. Ibahai yj yum yaq ling ngj nan'mji. 39Ke kutkho heq so vjn. Ke kha lhem lo cok kjn. Phruk ce a'yoq a'saw mji yju. Ke ce nang'hi na nan'mhuq laq baw tjng ngj ka'saw heq ka'yoq heq a'mji" tiyj a'hawu. 40Jn baw hawu theqna a'kutkho heq khrawng a'tabeq heq j a'dawn ne. 41A'tabeq heq kha a'lhji yj an'lung lhju na yum khoq yaq hawn nj an'mhawnkau tun nj 'Boipaw Yesyuq' na nhi tiq j "e-hai u-nghawt e-nghawt a'mji yaw" tiyj a'nghiq. 42Jn hxvj yawng nhi tiq na ngaw haiq cung-nghawto an'pet. 43'Boipaw Yesyuq' na kha lju ve theqna nhi tiq mhawimhaw kung ngj a'e. 44Jnpjnnj ce 'Boipaw Yesyuq' na "'Mawsye' petnyet kyeng khrawng, 'Parawphek' kyeng heq na 'Saleng' kyengcaw heq j yo ve tiq ke dj soisen ne tiq heq tomti a'thonne lo laq ai tiyj nang'hi dj ka'mji nghxt nghaq hxvj ka'hawu nghxt pjn' tiyj a'hawu. 45Jnpjnnj ce kyengcaw heq yawcu hai tok nhi tiq nyen pawi hawn nj a'poqcai nghxt pet. 46'Boipaw Yesyuq' na 'kyengcaw duk kj ni baw a'yo ve. "Ljulawk ke tiq 'Ceqcaw' khrawng a'bjt khawm na nhxpthum nhxp pj a'bjt nawk kj kxq a'heng ba vai. 47'Ceqcaw' ming sum me theqna a'kret a'sisaw heq na an'lung suisaw ye hai tala heq khrawng lhjq khrawng khawm laq hai tok 'Yeruqsalawng' luq j thoq cat na khrawng yx takaq j a'sai yok laq ai. 48Nang'hi heq kha ni mhuqlam thonne nghxt tiq heq tok sawksi yj nan'thonne. 49Ke na ke paw 'Pxtpaw' na a'pet khrawng katiq baw tjng ngj nang'hi ceng ngj cimkya tiq muikhraw ka'tjq lo vai. Jn baw na kha nang'hi khrawng hawn luq j ka'thoq phunkhji a'pet hawm yaq tjq 'Yeruqsalawng' luq j cong nge bjiq cuq" tiyj a'hawu. 50Jnpjnnj ce 'Boipaw Yesyuq' na a'tabeq heq khrawng 'Betaqniq' nam tjq a'ceq pui nawk. Pjnnj yawng hawn pawt a'kut lhawm na khunkhjipawi a'pet. 51Jn baw khunkhjipawi a'pet tun nj nhi tiq dj khau ve theqna hawn luq pawt a'cet ba. 52A'tabeq heq na kha 'Boipaw Yesyuq' khrawng yum me theqna an'khjt te cawng na ce 'Yeruqsalawng' luq pawt an'cet ba. 53'Yeruqsalawng' luq an'khrai ba pjnnj nhi tiq khrawng Phawlaw kyong duk kj 'Pxtpaw Phawlaw' a'bjikhji khrawng heq i-hx tomti yj tjuqkauq ve pheng an'mji.

Currently Selected:

Luke 24: ctpv-rv

Highlight

Share

Copy

None

Want to have your highlights saved across all your devices? Sign up or sign in