Luke 23
23
1Jnpjnnj ce tala yung ngj cuq e-tiq khrawng heq na 'Boipaw Yesyuq' khrawng 'Piqlet' mawng ceng pawt an'ceq pui nawk. 2Jn khrawng heq na "ni khrawng na somdek kj kxq khrawng heq lawm mhaw khrai hawn nj a'cokhawu. 'Sica' mawng ngj a'phukhawq pe hai kha a'nga ye. A'punghaw ko a'punghaw 'Mesyiyaq' ming naw tiq mawng pjinghawt" tiyj kha a'hawu ve. Jn baw thonlok na a'hawu ve khrawng heq ke'hi na kan'khom me tiyj 'Rawmaq' Ikarek 'Piqlet' mawng mhawimhaw vj an'bju ve nawk. 3Jnkhaw hxyawng 'Piqlet' mawng na 'Boipaw Yesyuq' j nang khrawng Kyu heq mawnglen a'si yaw tiyj a'nghiq. 'Boipaw Yesyuq' na kha nang na na'hawu baw tjng ngj a'si tiyj a'hawu ba. 4Jn hxvj 'Piqlet' mawng na Kyu 'Mhawpaw' canglen heq na khrawng heq j "ni khrawng ceng ngj a'kret u-nghawt kha ke khom hx" tiyj a'hawu. 5Jn baw na kha nhi tiq na "ni khrawng na 'Galiqle' kre yj ka'thoq cat na ni dxn tjq khrai hawn nj 'Yuqdaq' kre yj mji tiq khrawng heq tomti yj a'cokhawu yok khen cuvj khrawng heq khrawng thju ve hawn nj a'poqcai" tiyj pang na a'hawu. 6Jn baw an'hawu khrawng 'Piqlet' mawng na a'yawk khaw hxvj ni khrawng ce 'Galiqle' kresaw vaw tiyj a'nghiq. 7Boipaw Yesyuq' khrawng 'Heruk' mawng na a'pjng nawk somdek kj kxq kresaw pjinghawt tj a'thon tiyj a'cok laq khennj 'Piqlet' mawng na khrawng 'Heruk' mawng ceng tjq 'Boipaw Yesyuq' a'thawk. Jn hxvj 'Heruk' mawng khrawng 'Yeruqsalawng' luq j a'mji. 8'Heruk' mawng na 'Boipaw Yesyuq' a'khom hxvj a'lhji yj a'lung lhju. Ibahai yj nawk hxce 'Boipaw Yesyuq' sitawng heq yaw theqna nhi a'mhuq laq hai diu hawn nj a'cong nge nghxt laq. 'Boipaw Yesyuq' na a'poqcai hai mhawnkau nawk nimik heq kha mhu laq hai a'lx ve. 9Jnkhennj 'Heruk' mawng na 'Boipaw Yesyuq' j nghiq hai a'lx khrawng heq a'nghiq. Sinakha 'Boipaw Yesyuq' na ce kheukhaw khaw nghawt kha khran ba yju. 10Jnpjnnj ce Kyu 'Mhawpaw' canglen heq na uqpade yawcu tiq sarapaw heq khrawng thju theqna si lx pheng an'bju ve nawk. 11'Heruk' mawng na nhi seksaw heq na 'Boipaw Yesyuq' khrawng an'nuiqkheu nawk. Jn pjnnj 'Boipaw Yesyuq' j a'lhji yj pawi ye tiq suisawk khoq e-sawk theqna 'Piqlet' mawnglen ceng pawt an'thawk ba. 12'Heruk' mawng na 'Piqlet' mawng kha hjmmj sunpui hji yj thonne tx na kha jn nhxp pj khepui hji yj a'hiq thonne lo. 13'Piqlet' mawng na Kyu 'Mhawpaw' canglen heq, Kyu uqpade yawcu tiq heq na kresaw heq batnghawt sawu theqna 14"Nang'hi na ni khrawng, khrawng lingsok hawn nj thju mhaq tiq tiyj ke ceng tjq nan'lo pui nawk khennj nang'hi mhawimhaw vj ka'nghiq min pjn. Sinakha nhi ceng ngj nang'hi bju ve nawk khrawng a'kret heq i-kha khom hx. 15'Heruk' mawng na kha nhi kret i-kha a'khom yaq khen cuvj ke ceng tjq a'thawk lo ba. Ni khrawng ceng ngj bjt naw laq hawn nj a'kret i u-nghawt kha mji yju. 16Jnkhennj nhi khrawng mvaw theqna ka'lhjq ba vai" tiyj a'hawu. 17"Jn pji yj 'Piqlet' mawng na a'kresaw heq tok a'mawn cjn khrawng thongsaw pjinghawt a'lhjq ba pet soi. 18Sinakha jn khrawng heq na nhi khrawng tu sawk ka. Ke'hi tok 'Barabaq' yawng lhjq pet ta tiyj mhoknghawt pjttj an'pang kyaq. 19'Barabaq' khrawng ce luq duk kj thju ve theqna khrawng a'tuk khennj a'mawn khawm laq theqna thong duk kj a'mji laq. 20'Piqlet' mawng na 'Boipaw Yesyuq' lhjq ba hai a'lx mji khennj khrawng heq j a'tha krawn-nghawt a'nghiq batx. 21Sinakha jn khrawng heq na nhi khrawng "kutyvaw koptjng ngj tu va. Kutyvaw koptjng ngj tu va" tiyj yawng an'pang. 22Jnkhaw vjyawng 'Piqlet' mawng na nhi na i-bawng a'kret bong heq a'poqcai nghxt. Nhi tu laq hawn nj a'poqcai nghxt khrawng a'kret heq kha ke na khom hx. Jnkhennj nhi khrawng mvaw theqna ka'lhjq ba vai tiyj a'thum nawk thawp na a'hawu batx. 23Sinakha khrawng heq na 'Boipaw Yesyuq' khrawng kutyvaw koptjng ngj tuk hai yawng tha vj pang na an'tong. Jnkhennj nhi tiq thai na 'Piqlet' mawng an'njn. 24Jnkhennj 'Piqlet' mawng na khrawng heq na an'tong khrawng baw vj a'kret a'pet. 25Jn khrawng heq tong baw tjng ngj thju ve na khrawng a'tuk khennj a'mawn kawm laq na thong duk kj mji laq tiq 'Barabaq' khrawng a'lhjiq pet. 'Boipaw Yesyuq' ce nhi tiq lx baw vj an'poqcai hai tok 'Rawmaq' seksaw heq j a'awp lak. 26Seksaw heq na 'Boipaw Yesyuq' an'ceq pui nawk tun nj 'Syiqmung' ming naw tiq 'Kuqrene' luqsaw pjinghawt tju lawm mj kxq a'lo khrawng nhi tiq na an'mhuq na ce mawn na kutyvaw koptjng ba sawk u-na 'Boipaw Yesyuq' nhu an'yun sawk. 27Khrawng batnghawt na kha 'Boipaw Yesyuq' nhu an'yun lo. Jn khrawng batnghawt duk kj 'Boipaw Yesyuq' tok an'lung oi na kap tiq mhutaw heq kha an'pui. 28'Boipaw Yesyuq' khrawng jn heq ceng pawt mawng na 'Yeruqsalawng' luq j kxq mhutaw heq j ke tok kj kap kawq cuq. Nan'punghaw tok na nan'punghaw caw-nawu tok yawng kap pjn. 29Ibahai yj nawk hxce lum tiq mhutaw, a'bjikhji. Dikcaw hjn naw phu yaq tiq hjntung na dikcaw na a'ok phu yaq khrawng cui khrawng a'bjikhji tiyj an'hawu hai khonhxp a'khrai lo vai. 30Jn pjnnj khrawng heq na j tong heq j ke'hi khrung ngj cim lo vjn. J kong hawn nj ke'hi kep naw va tiyj an'pan ne yai. 31Ibahai yj nawk hxce heng tiq thing kung ni baw an'poqcai khaw hxce jn thing a'ca lo na ce i-baw a'thonne lo vai tiyj a'hawu. 32Jnkhaw hxvj 'Boipaw Yesyuq' dj a'kret mji tiq pjinhiq kha tuk hai yj an'ceq pui nawk. 33Karani ming naw tiq tong hawn tjq an'khrai na ce 'Boipaw Yesyuq' dj jn a'kret mji tiq hji kha khet lawm mj pjinghawt khalem lawm mj pjinghawt kutyvaw koptjng ngj hendya na an'tawk. 34Jnkhaw hxyawng 'Boipaw Yesyuq' na j paw 'Pxtpaw' nhi hji a'kret lhjq pet maw va. Nhi hji na a'hiq punghaw na a'hiq poqcai khrawng co ve yju hji tiyj a'hawu. Jnpjnnj seksaw heq na 'Boipaw Yesyuq' suisawk khrawng me nhek theqna an'pheq-e. 35Khrawng batnghawt heq na kha tung u-na an'sot te. Jn khrawng heq dj Kyu canglen heq na ni khrawng na khrawng kyaw heq ce a'ljulawk ke theq. 'Kharittaw' tiyj 'Pxtpaw Phawlaw' na lui na a'tawk khrawng a'mhaw hxvj ce a'punghaw na a'punghaw ljulawk ke lhaq lhji tiyj an'nuiqkheu nawk. 36Seksaw heq kha 'Boipaw Yesyuq' ka vj lo u-na tho tiq 'Capyek' voi mtjk u-na 37Nang khrawng Kyu heq mawnglen na'mhawn nawk hxvj ce na'punghaw ko na'punghaw ljulawk ke ya tiyj nuiqkheu naw na an'hawu. 38'Boipaw Yesyuq' luki hawn nj kha ni khrawng ce Kyu heq mawnglen tiyj cawlung yo na sengbuk an'bawq. 39Kutyvaw koptjng ngj bawq khrawng khawm laq tiq pjinhiq duk kj kxq pjinghawt na 'Boipaw Yesyuq' j nang khrawng 'Kharittaw' na'mhawnmx khaw hxce na'punghaw kha siyj seq ke'hiq kha siyj seq ljulawk ke maw va tiyj setsui naw na a'hawu. 40Jn baw na kha a'kyaw a'kret saw pjinghawt na ce jn khrawng ngj nang ce ni khrawng dj nghawt tj a'kret khawm laq pheng ngj 'Pxtpaw Phawlaw' khrawng kiq hawm yju tiq aw. 41Ha'hiq ce a'kret mji theqna a'kret khawm laq hai yj ha'tawn ne. Sinakha ni khrawng ce i a'kret kha poqcai nghxt yju tiyj a'hawu. 42Jnpjnnj ce nhi na sawp na 'Boipaw Yesyuq' j nang khrawng mawnglen pjinghawt tj thon na om ba hai yj na'lo ba na ce ke nyhaq kawq tiyj a'cuhyawk. 43Jnkhaw hxyawng 'Boipaw Yesyuq' na nang ngj ke na a'mhawn ka'hawu vai tuq nhxp kung ke dj 'Paraqdiqtuqbungn' ngj ke dj na'mji yai tiyj a'hawu. 44Jn a'cxn khrawng khosun nari kalainhiq j thonne theqna a'mxlawm nari thum tjq somdek cu a'hyungtu kyaq. 45Khoni a'ang khrawng khrxk txm theqna Phawlaw kyong kalaka khrawng mhawi nhiq j a'kayang. 46Jnpjnnj 'Boipaw Yesyuq' khrawng a'thai lenpaw vj j paw 'Pxtpaw' ke muikhraw khrawng nang kut tj ka'awp pe tiyj pang theqna a'sawk thok. 47Ni bawng heq mhuyaw laq tiq 'Rawmaq' seksaw na ni khrawng, khrawng krun mhawn tiq yawng tiyj hawu theqna 'Pxtpaw Phawlaw' a'tjuqkauq ve nawk. 48Ni khonhxp mhu hai yj cuq-e na khrai lo tiq khrawng heq kha 'Boipaw Yesyuq' khawm laq khrawng mhu theq u-na an'kang koi yai thuiq hawn nj an'lung oi pheng an'im nghaw pawt an'cet ba. 49'Boipaw Yesyuq' khepui heq, bongbawi heq 'Galiqle' kre yj kxq yun lo tiq mhutaw heq na kha a'lhawm nawk caw dxn nj ka'thoq tung na an'sot te. 50Jnkhaw cxn nj 'Yuqdaq' kre 'Ariqmaqte' dxn nj 'Yawtep' tiyj an'hawu khrawng, khrawng pjinghawt a'mji. Nhi khrawng krundiu tiq pjinghawt tj thon na tala phansa tiq heq duk kj kxq pjinghawt tj a'thonne. 51Nhi khrawng a'kyaw tala phansa tiq heq na tala an'sa khrawng na an'poqcai khrawng heq lx nghxt yaq tiq j a'thonne. Jnpjnnj 'Pxtpaw Phawlaw' neng-ngeng pjudawng lo hai cong nge tiq j kha a'thonne. 52Nhi khrawng 'Piqlet' mawng ceng ngj vawng nge na 'Boipaw Yesyuq' yok a'tong nge. 53Jn pjnnj nhi na 'Boipaw Yesyuq' yok khrawng kutyvaw koptjng ngj kxq a'dawng pawt khom na pawi dj tiq hyawq j a'lhom. Jn pjnnj u-bawng kha an'mhyaq phu yaq nawk lung co-gu duk kj a'tawk. 54Jn nhxp khrawng krangsa hai nhxp pj thonne theqna uqpuk nhxp dj a'hyju ve lo. 55'Galiqle' kre yj kxq 'Boipaw Yesyuq' dj lo nghaq tiq mhutaw heq na 'Yawtep' nhu an'yun ne khen cuvj co dxn nj 'Boipaw Yesyuq' yok i-baw an'tawk nawk khrawng an'mhuq nghxt. 56Jnpjnnj ce nhi tiq khrawng im pawt cet ba na 'Boipaw Yesyuq' ceng ngj an'daw hai yj o-tiq situi na o-ing tiq nenta heq an'poqcai. Jn pjnnj nhi tiq na an'sin nghxt baw vj uqpuk nhxp pj an'dxm.
Currently Selected:
Luke 23: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Laitu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
