YouVersion Logo
Search Icon

Maliko 14

14
Ulubatiko ulwakumughoghela u Yesu
(Mat. 26.1-5; Luk. 22.1-2; Yoh. 11.45-53)
1 # Ukf. 12.1-27 Kukasyalako bulo amasiku mabili ukuti Ulusekelo ulwa Pasa nu Lusekelo ulwa Chibama chicho chite ni chilungo lubeko. Abaputi abasongo na bamanyisi aba Ndaghilo bakalondagha izila iyakubusyefu iyakumulemela u Yesu nukumughogha. 2Bakati, “Tutakazibombe pakabalilo aka lusekelo pachifukwa ichakuti abantu banganda ivyongo.”
Umukolo akumupakazya u Yesu amafuta mu Betaniya
(Mat. 26.6-13; Yoh. 12.1-8)
3 # Luk. 7.37-38 U Yesu akaba mukaya aka Betaniya munyumba iya Simoni, umuntu yuyo akatamiwapo na mambombo. Bo u Yesu ali pakulya, umukolo yumo akiza ni botolo ilya alabasita ilyizule na mafuta aghamutengo nkani aghakununkila agha nalidi, ghagho batakongannyamo chimo. Umukolo akabontola akamutu aka botolo nukumukupulila u Yesu pamutu. 4Abantu bamo palapala bakakalala nukunenezannya benebene ukuti, “Nkimba choni chicho akunangannya amafuta aghakununkila? 5Naloli ngali ghaghuliziwa ni salabazya izyakuchila 300 nukubapazyo abapina!” Bakamukalalila nkani umukolo yula.
6Loli u Yesu akati, “Muleke! Nkimba choni chicho mukumutamya umukolo uyu? Chicho ambombela chiza nkani. 7#Ukk. 15.11Akabalilo kosi muli nabo abapina, sona akabalilo kosi kako mukulonda, mungabavwa. Loli mute mubanje nane akabalilo kosi. 8Umukolo uyu abomba chicho abaghiye pakuchibomba; apungulila amafuta pamubili wane pakughuyannya zila bo akabalilo akakusyiliwa kwane katakwanite. 9Naloli nkubabuzya ukuti kosi kuko Amazyu Amiza agha ghakulumbililiwa muchisu chosi ichapasi, chicho abomba umukolo uyu chikwiza pakuneniwa ukuti abantu bamukumbukilayepo.”
U Yudasi akumubika u Yesu munyobe izya balwani
(Mat. 26.14-16; Luk. 22.3-6)
10U Yudasi Sikaliyoti, yumo uwa bamanyili 12, akabuka pakukomana na baputi abasongo ukuti amubike u Yesu munyobe zyabo. 11Bo bivwa zinizi bakahoboka nkani, sona bakalayizya ukuti bakwiza pakumupa indalama. Po u Yudasi akanda pakulonda akabalilo akiza akakumubikila u Yesu munyobe zyabo.
U Yesu na bamanyili bache bakulya ivya pa Ulusekelo ulwa Pasa
(Mat. 26.17-25; Luk. 22.7-14, 21-23; Yoh. 13.21-30)
12Pisiku ilyakwanda ilya Lusekelo ulwa Chibama chicho chite ni chilungo, isiku lilyo bakaghogha umwana uwa ng'ozi uwa pachakulya icha Pasa, abamanyili aba Yesu bakamulalusya bakati, “Nkimba ukulonda ukuti tuluyanizizye kwiyi?”
13Po u Yesu akatuma babili mu bamanyili bache nukubabuzya ukuti, “Bukagha mukaya akakulu nkani. Mukomane nu mwanavuli anyamuye isonta iya mizi. Mumukonke 14mupaka munyumba yiyo akwinjilamo nukunena nu mwenenyumba ukuti, ‘Umumanyisi ukulalusya akuti nkimba ichipinda chili ko kwiyi chicho ane na bamanyili bane tukwiza pakusekelelamo Ulusekelo ulwa Pasa?’ 15Po akwiza pakubalanjizya ichipinda ichikulu chicho chili pamwanya pachamwabo, mumo vyosi vivyo vikulondiwa viyaniziwe. Mulamula mutuyanizizye vyosi.”
16Abamanyili bala bakanyamuka nukwinjila mukaya akakulu mula nukwagha ivintu vyosi vili bulo mumo u Yesu akababuzizya. Po bakayannya Ulusekelo ulwa Pasa.
17Bo kwila, u Yesu akiza poka na bamanyili 12 bala. 18#Mas. 41.9Bo bali pakulya, u Yesu akati, “Naloli nkubabuzya ukuti umuntu weka pakasi papinyu, yuyo ali pakulya poka nane, akwiza pakumbika munyobe izya balwani.”
19Abamanyili bala bakayimba nkani mumoyo nukwanda wekaweka pakumulalusya u Yesu ukuti, “Naloli, ningaba nene?”
20U Yesu akamula akati, “Umuntu yumo pakasi papinyu amwe mwe 12, yuyo akusazila poka nane ichibama mumbale. 21U Mwana uwa Muntu akwiza pakufwa ukuyana na Masimbo. Loli chighune nkani nu muntu yuyo akumubika u Mwana uwa Muntu munyobe izya balwani. Chikaba chizapo ukuti umuntu yula ngali atakapapiwanga!”
Ichakulya icha Mwene
(Mat. 26.26-30; Luk. 22.14-20; 1 Kol. 11.23-25)
22Bo bali pakulya, u Yesu akasenda ichibama, akamupalizya u Chala nukuchimenyannya. Akabapa abamanyili bache nukuti, “Senda, ughu gho mubili wane.” 23Po akasenda ulubako ulwa vinyo nukupalizya kwa Chala nukubapa abamanyili. Bosi bakang'wela uvinyo mulubako lulalula. 24#Yes. 13.10; Ezk. 32.7; Yow. 2.10, 31U Yesu akati, “Ili lyo libanda lyane ilyakusimikizya ulufingo ulwa Chala, lilyo lyatonya pachifukwa icha bantu abinji. 25Nkubabuzya ukuti ntakwiza pakung'welapo nalumolumo uvinyo uyu mupaka pisiku lilyo nkwiza pakung'wela uvinyo umupya mu Bumwene ubwa Chala.”
26Po bakimba, ulwimbo ulwakumuchindika u Chala nukubuka Pighamba ilya Misyunguti.
U Yesu akunenela zila ukuti u Pitala akwiza pakumukana
(Mat. 26.31-35; Luk. 22.31-34; Yoh. 13.36-38)
27 # Zek. 13.7 U Yesu akababuzya akati, “Mwebosi mukwiza pakuntoloka, pakuti Amasimbo ghakuti, ‘Nkwiza pakumughogha umudimi, po ing'ozi zyosi zikwiza pakunyampana.’ 28#Mat. 28.16Loli bo nazyuka kubufwe, nkwiza pakulongolela ku Galileya.”
29U Pitala akamula akati, “Ntakwiza pakukuleka nalumo, napapo abanji bosi bangachibomba.”
30U Yesu akamubuzya u Pitala akati, “Nkukubuzya ukuti bo ukolwe atakokolikite kabili ubusiku ubu, ukwiza pakunkana katatu ukuti utamenye.”
31Loli u Pitala akamula na maka nkani akati, “Napapo imbaghiye pakufwa poka nawe ntakwiza pakunenapo nalumolumo bunubu.”
Bope abamanyili abanji bosi bala bakanena bunubu.
U Yesu akwiputa mu Getisemani
(Mat. 26.36-46; Luk. 22.39-46)
32U Yesu akabuka na bamanyili bache kubuzilo bubo bukwitiziwanga ukuti Getisemani, po akababuzya abamanyili bache akati, “Ikala pano, nabuka pakwiputa.” 33Akamusenda u Pitala, u Yakobo nu Yohani. Akaba ni chitima nukuyimba nkani mumoyo wache. 34Akababuzya akati, “Umoyo wane wizuye ni chitima ichikulu nkani ichakufwa nacho. Ikala pano nukuba maso.”
35Akatantama panandi nukwisumba pasi nukwiputa ukuti nanti zingabombiwa, akabalilo akantamyo kala kamuchile. 36Akanena sona akati, “Wee Tata, wee Tata wane! Ungabomba ivintu vyosi. Efya ulubako ulwa ntamyo ulu kukwane. Chitakabe mumo nkulondela awe, loli mumo ukulondela.”
37Po akiza nukubagha abamanyili bache batatu bala baghonite. Akamulalusya u Pitala akati, “Simoni, ughonite? Nkimba upotizwe pakuba maso akabalilo akanandi aka? 38Mubanje maso nukwiputa ukuti mutakawile munjelo. Umuzimu ghukulonda, loli ubuntu bute na maka.”
39Akabuka sona nukwiputa na mazyu ghali ghoka. 40Akanyokela sona nukubagha baghonite pakuti amaso ghabo ghakizula nu tulo. Po batakaba ni chakunena.
41Bo iza akabutatu, akababuzya akati, “Nkimba muchili mughonite nukutuzya? Mpela! Akabalilo kakwana, u Mwana uwa Muntu ali pakubikiwa munyobe izya bantu abambibi. 42Nyamuka twende tubukaye. Umuntu yuyo akumbika munyobe izya balwani uyo afika!”
Bakumulema u Yesu
(Mat. 26.47-56; Luk. 22.47-53; Yoh. 18.3-12)
43Bo u Yesu achili akunena, u Yudasi weka uwa bamanyili 12 bala, akafika. Akiza poka ni chilundilo chicho chikanyamula abapanga ni ntughu, chicho chikatumiwa na baputi abasongo, na bamanyisi aba Ndaghilo, sona na balongozi aba Chiyuda. 44Umuntu yuyo akamubika u Yesu munyobe izya balwani akachipa ichilundilo ichimanyilo ichakuti, “Umuntu yuyo nkumulamuka pakumufyofyonta, weyuyo mukumulonda. Mumuleme nukumusenda ukuti atakachimbile.”
45Bo u Yudasi afika, umwalubilolubilo akabuka kwa Yesu nukuti, “Wee Mumanyisi!” Po akamufyofyonta. 46Po abantu bala bakamulema u Yesu nukumupinya. 47Loli weka uwa bantu babo bakimilila palapala akawesa upanga wache, akamubola umuzya uwa muputi usongo nukudumula ikutu lyache. 48Po u Yesu akabalalusya akati, “Nkimba mukwiza na bapanga ni ntughu ukuti mundeme ngati ne livyondongo? 49#Luk. 19.47, 21.37Isiku ni siku nabanga namwe mu Nyumba iya Chala pakumanyisya, loli mutakandema. Zinizi zyabombiwa ukuti Amasimbo ghakwanilisiwe.”
50Po abamanyili bache bosi bakachimbila nukumuleka mwene.
51Umulumendo yumo, yuyo atakavwala chimo mukasi, loli akinnyembetelela nu mwenda wene, akamukonkagha u Yesu. Abantu bala bakayezya pakumulema, 52loli akachimbila nkule nukubalekela umwenda.
U Yesu pamaso pa balongi
(Mat. 26.57-68; Luk. 22.54-55, 63-71; Yoh. 18.13-14, 19-24)
53Po u Yesu bakabuka nawe kunyumba iya muputi usongo. Kulakula abaputi abasongo bosi, na balongozi aba Chiyuda, sona na bamanyisi aba Ndaghilo bakabungana poka. 54U Pitala akakonkagha pabutalipo nukwinjila mulubinjilo ulwa nyumba iya muputi usongo. Palapala akikala pasi poka na balindilili nukota nabo umoto. 55Abaputi abasongo na balongi bosi bakayezya pakubwagha ubwakaboni ubwabumyasi ubwakumughoghela u Yesu, loli batakabwagha nabumobumo. 56Abakaboni abinji bakanena ubumyasi, loli ubwakaboni bwabo butakayana.
57Po abakaboni bamo bakimilila nukumutamantila u Yesu ukuti, 58#Yoh. 2.19“Tukamwivwa umuntu uyu akuti, ‘Nkwiza pakuyimongolannya Inyumba iya Chala iyi, yiyo abantu bazengite, po bo ghachilapo amasiku matatu nkwiza pakuzenga iyinji yiyo yitazengiwe na bantu.’ ” 59Loli pope bulo ubwakaboni bwabo butakayana.
60Umuputi usongo akimilila pantazi papabo nukumulalusya u Yesu ukuti, “Nkimba ute ni lyamulo pa zizyo abantu banaba bakukunenela?”
61Loli u Yesu akaba myee, atakanenapo chimo. Umuputi usongo akamulalusya sona akati, “Nkimba awe we Kilisitu, u Mwana uwa Chala Umusayiwa?” 62#Dan. 7.13U Yesu akamula akati, “Nene! Mwebosi mukwiza pakumwennya u Mwana uwa Muntu ikaye kunyobe indilo iya Chala Uwamaka Ghosi akwiza mu mabingu!” 63Umuputi usongo yula mubukalale akazepula inkazo yache nukuti, “Nkimba tukulonda sona abakaboni abanji? 64#Lev. 24.16Mwivuye mwebene mumo amusamuliye u Chala. Nkimba mukuti choni?”
Bosi bakivwana ukuti aghoghiwanje. 65Bamo bakanda pakumufwinila amati u Yesu, bakamuzigha kumaso nukumukoma na mapi. Bakati, “Sakizya, wewenu akukoma!” Abalindilili bakamusenda nukumukoma.
U Pitala akumukana u Yesu
(Mat. 26.69-75; Luk. 22.56-62; Yoh. 18.15-18, 25-27)
66U Pitala akaba achili ikaye pasi mulubinjilo ulwa nyumba iya muputi usongo, po uwambombo umulindu uwa muputi usongo akiza mulamula. 67Bo amwennya u Pitala ali pakota umoto, akamwenelezya nukuti, “Nawe bulo ukabanga poka nu Yesu uwamu Nazaleti.”
68Loli u Pitala akakana akati, “Ntazimenye, intakwivwisya zizyo ukunena.” Po akepapo nukubuka pamulyango. Umwalubilolubilo ukolwe akakokolika.#14.68 Umwalubilolubilo…akakokolika: Amasimbo ghamo aghakale ghate nu Umwalubilolubilo ukolwe akakokolika.
69Umulindu yula akamwennya sona nukwanda pakubabuzya abantu babo bakimililagha palapala ukuti, “Umuntu uyu wa bamo uwa bantu banaba.” 70Loli u Pitala akakana sona.
Bo pachilapo bulo akabalilo, abantu babo bakimilila palapala bakamubuzya u Pitala ukuti, “Naloli nawe bulo we uwa bamo uwa bantu banaba pakuti nawe bulo we mu Galileya.” 71Po u Pitala akati, “Nkulapa ukuti nkunena ubwanaloli! U Chala anfunde nanti nkutamanta. Naloli intamumenye umuntu yuyo mukumunena.”
72Panapo ukolwe akakokolika akabubili, po u Pitala akakumbuka zizyo u Yesu akamubuzya ukuti, “Bo ukolwe atakokolikite akabubili, ukwiza pakunkana katatu ukuti utamenye.” Po u Pitala akanda pakulila na masozi.

Currently Selected:

Maliko 14: LMB2024

Highlight

Share

Copy

None

Want to have your highlights saved across all your devices? Sign up or sign in