Maliko 13

U Yesu akunenela zila nizya kumongoliwa ukwa Nyumba iya Chala

(Mat. 24.1-2; Luk. 21.5-6)

1Bo u Yesu akwepamo mu Nyumba iya Chala, yumo uwa bamanyili bache akati, “Mumanyisi! Ennya, ubwiza ubwa mabwe ni nyumba izi!”

2U Yesu akamula akati, “Nkimba ukwennya inyumba inkulu izi? Nalimolimo ibwe lilyo likwiza pakusyala pamwanya pa lyamwabo; lyosi likwiza pakugumuliwa.”

U Yesu akunenela zila nizya ntamyo nukuvwimiwa

(Mat. 24.3-14; Luk. 21.7-19)

3U Yesu akikalagha Pighamba ilya Misyunguti, umwakwenannya ni Nyumba iya Chala, bo u Pitala nu Yakobo nu Yohani sona nu Andeleya biza kukwache nukumulalusya bo biyekeye bakati, 4“Tubuzye, ivintu vinivi vikwiza pakuboneka liyi? Nkimba choni chicho chikwiza pakuboneka ukulanjizya ukuti akabalilo kali papipi ukuti vinivi vibombiwe.”

5U Yesu akanda pakubabuzya ukuti, “Mubanje maso, ukuti patakabepo nayumo umuntu uwakubazimbula. 6Pakuti abantu abinji bakwiza pakubombezya itabwa lyane nukuti, ‘Ane ne Kilisitu,’ sona bakwiza pakubazimbula abantu abinji. 7Bo mukwivwa nizya bwite papipi pamo imbili iya bwite, mutakapasyanje. Ivintu vinivi vibaghiye vibombiwe, loli kute kokuti ubumalilo bwafika. 8Ichisu chikwiza pakulwana ni chinji; ubumwene bukwiza pakulwana nu bunji. Kukwiza pakuba utusenyenta posi na posi, sona kukwiza pakuba izala. Ivintu vyosi vinivi bo bwandilo bulo ubwa ntamyo.

9 # Mat. 10.17-20; Luk. 12.11-12 “Mubanje maso. Abantu bakwiza pakubalema nukubabika pamaso pa balaghili, po bakwiza pakubasyempa munyumba izyakwiputilamo. Pachifukwa icha nene bakwiza pakubasitaka pamaso pa balaghili napa bamwene ukuti mubikile ubwakaboni nizya ane. 10Loli bo ubumalilo butafikite, Amazyu Amiza ghalumbililiwanje tasi pakasi pabantu aba inko zyosi. 11Bo mwalemiwa nukulongiwa, mutakapasyanje ukuti, ‘Nkimba tukwiza pakunena ichoni?’ Bo akabalilo kakwana nena bulo zizyo zipeghiwe kukwinyu, pakuti mute mwemwe mukwiza pakunenagha, loli u Muzimu Umuzelu. 12Abantu bakwiza pakubabika abawamwabo ukuti baghoghiwe, sona na bawise bope bakwiza pakubabombela bunubu abana babo. Abana bakwiza pakubasambukila abapapi babo ukuti baghoghiwe. 13#Mat. 10.22Abantu bosi bakwiza pakubabenga pachifukwa icha nene. Loli umuntu wesi yuyo ajimba umoyo mupaka pabumalilo akwiza pakupona.

Nizya chinyazu Ichipalapala chicho chikunangannya

(Mat. 24.15-28; Luk. 21.20-24)

14 # Dan. 9.27, 11.31, 12.11 “Mukwiza pakwennya Ichinyazu Ichipalapala, chicho chikunangannya chimiliye pabuzilo bubo chitabaghiye.” (Umuntu yuyo akubelenga, ivwisye.) “Po babo bali mu Yudeya bachimbililaye mumaghamba.” 15#Luk. 17.31Umuntu yuyo ali pachisonje icha nyumba yache atakikaye nukwinjila munyumba ukuti asende chimo. 16Umuntu yuyo ali mumughunda atakanyokelaye kunyumba pakusenda inkazo yache. 17Kukwiza pakuba bupalapala nkani mumasiku ghanagho na bakolo babo bali ni nyanda, sona na ku bamayi babo bakonkezya abana! 18Mwiputaye kwa Chala ukuti ivintu vinivi vitakaboneke pachisiku! 19#Dan. 12.1; Ubv. 7.14Pakuti intamyo izya masiku ghala zikwiza pakuba mpalapala nkani ukuchila zyosi zizyo ichisu ichapasi chikomanitepo nazyo ukwandila ko kubwandilo, bo u Chala apela ichisu ichapasi mupaka ilelo. Po zite zikaboneke nalumo. 20Loli u Mwene akisyako ubwinji ubwa masiku ghala; nanti atakisyanga, nayumo umuntu yuyo angapona. U Mwene isizyeko amasiku ghala pachifukwa icha bantu bache abasaliwa.

21“Po nanti yumo akubabuzya ukuti, ‘Ennya, u Kilisitu ali pano,’ pamo, ‘Ali pala!’ mutakazisubile zizyo akunena. 22Pakuti abantu abinji abamyasi bakwiza pakuboneka nukuti bo abapoki abasaliwa, pamo abalaghuzi. Bakwiza pakupela ivyika ni viswigho ukuti nanti chingabombiwa babazimbule na basaliwa aba Chala bulo 23Mubanje maso! Imbabuzizye vyosi bo akabalilo katakwanite.

Ukwiza ukwa Mwana uwa Muntu

(Mat. 24.29-31; Luk. 21.25-28)

24 # Yes. 13.10; Ezk. 32.7; Yow. 2.10, 31, 3.15; Ubv. 6.12 “Mumasiku ghalaghala, bo intamyo zyamala, izuba likwiza pakuba muchisi, umwezi ghute ghukalame nalumo, 25#Yes. 13.10; Yow. 2.10; Ubv. 6.13intondwa zikwiza pakuwa kumwanya, sona ivintu ivya maka kumwanya vikwiza pakuyingana. 26#Dan. 7.13; Ubv. 1.7Po abantu bakwiza pakumwennya u Mwana uwa Muntu, akwiza mumabingu na maka nu buchindamu. 27Akwiza pakubatuma abantumi bache kunkuto zyosi folo izya chisu ichapasi nukubungannya abantu bache abasaliwa ukwandila ko kubumalilo ubwa chisu ichapasi mupaka kubumalilo ubunji.

Ichimanyilo pachikuyu

(Mat. 24.32-35; Luk. 21.29-33)

28“Mumanyilepo pachikuyu. Nanti mwennya bulo isamba zyache zyanda pakulemba amani, mukumanya ukuti ichisiku chili papipi. 29Umwakuyana bulo, nanti mukwennya ivintu vinivi vikuboneka, manya bulo ukuti u Mwana uwa Muntu ali papipi, pamulyango.#13.29 ali papipi, pamulyango: Pamo akabalilo kali papipi pakwanda. 30Naloli nkubabuzya ukuti ivintu vyosi vikwiza pakuboneka bo abantu abankulilo iyi batafuye bosi. 31Kumwanya ni chisu ichapasi vikwiza pakumala, loli amazyu ghane ghakwiza pakuba na maka bwila na bwila.

Nayumo umuntu yuyo akumanya isiku pamo akabalilo

(Mat. 24.36-44)

32 # Mat. 24.36 “Loli nayumo umuntu yuyo akumanya isiku pamo akabalilo, bate bantumi kumwanya, ate Mwana; Utata mwene weyuyo akumanya. 33Muchebaye, sona mubanje maso pakuti mutakumanya akizile aka kabalilo. 34#Luk. 12.36-38Chiyanite bulo nu muntu yuyo akuchula nukuvileka vyosi munyobe izya bambombo bache. Akamupa umuntu wesi imbombo iyakuti abombe nukumulayizya umulindilili uwa nyumba ukuti abanje maso. 35Po mubanje maso pakuti mutakukamanya akabalilo kako umwenecho uwa nyumba akwizila. Angiza pachamabwila, pamo pakasi pabusiku, pamo bo ukolwe uwakwanda akukokolika, pamo bo izuba likufuma. 36Nanti akwiza umwakuchenusya, atakaghe mughonite. 37Zizyo nkubabuzya amwe, nkunena sona namwe mwebosi ukuti, ‘Mubanje maso!’ ”

Currently Selected:

Maliko 13: LMB2024

Highlight

Copy