YouVersion Logo
Search Icon

Ubwandilo 19

19
Ukunanga ukwa bantu aba mu Sodomu
1Bo abantumi babili aba kumwanya bala binjila mukaya aka Sodomu pachamabwila, u Loti akikalagha pamulyango uwa kaya kala. Bo u Loti abennya bulo, akanyamuka pakubalamuka. Akafughama nukuti, 2“Mwee bamwene bane, nalamba, twende kunyumba yane, musukusule munyayo zyinyu nukutuzya ubusiku bunubu. Pandabindabi nkani mungendelela nu bulendo bwinyu.”
Bakamula bakati, “Awe, aswe tukwiza pakughona kuzi pamunalo uwa mukaya akakulu nkani kanaka.”
3Loli u Loti akabapepeka nkani mupaka bakitika nukubuka nawe kunyumba yache. U Loti akabayanizizya ulusekelo ulukulu nkani, poka ni vibama vivyo vite ni chilungo. Po bakalya. 4Loli bo bataghonite, abanavuli bosi aba mukaya akakulu nkani kala, abalumendo na basongo bulo bakazyungulila inyumba iya Loti. 5Bakamwitizya u Loti nukumulalusya ukuti, “Buli bali ko kwiyi abantu babo bizite pabusiku kuno? Bafumye kuzi kuno, ukuti tughone nabo!”
6U Loti akafuma kuzi nukwighalilako kumulyango. 7Akababuzya akati, “Mwee, bamanyani, mutakabombaye ichintu ichibibi chinichi. 8Ennya, indi na bana abalindu babili babo bataghonitepo nalumo nu mwanavuli. Buli munyitikizye ukuti nize nabo kukwinyu, umwakuti mubombe nabo chosi chicho mukulonda. Loli mutakababombelaye abanavuli banaba ichintu ichibibi pakuti bayeni bane, sona imbaghiye pakubasungilila akiza.”
9Loli bakati, “Epapo, we wakupona bulo wee! Nkimba wewenu awe ukuti utubuzye ichakubomba? Epapo, lumo tungakubombela ichibibi nkani ukuchila na bayeni bako.” Po bakamusunkila u Loti kulubazu nukupalamila kulwiyi ukuti balupankulannye.
10Loli abantumi babili babo bakaba mukasi mula bakamuwesela u Loti mukasi nukwighalilako kumulyango. 11Po bakabapela pakuba bafwamaso abanavuli bosi babo bakaba kuzi bala, umwakuti bakatakawagha umulyango.
U Loti akufumamo mu Sodomu
12Abanavuli babili bala bakamulalusya u Loti bakati, “Nkimba uli nabo bamo abakamu mukaya muno, abana, pamo abakwalima? Ubefyemo mukaya muno, 13pakuti tukwiza pakunangannya akaya aka. U Mwene ennya ububibi bubo abantu aba mukaya kanaka bakubomba, po atutuma pakukanangannya.”
14Po u Loti akababuzya abakwalima babo bakazingila abana bache abalindu akati, “Lubilo, twepemo mukaya aka, pakuti u Mwene ali papipi pakukanangannya.” Loli abene bakennya ngati po sunga bulo.
15Pandabindabi nkani bo kwacha, abantumi bala bakayezya nkani ukumwendelezya u Loti nukuti, “Lubilo, umusende umuchi wako na bana bako abalindu babili nukwepamo, umwakuti mupone bo u Chala ali pakukanangannya akaya akakulu nkani kanaka.”
16Bo akuzyelazyela, abantumi bala bakamulema panyobe u Loti nu muchi wache, na bana bache abalindu bala nukubefyamo mukaya akakulu nkani kala, pakuti u Mwene akabapelela ichisa. 17Bo babefyamo bulo mukaya mula, weka uwa bantumi bala akati, “Chimbila ukuti mwipoke! Mutakennyanje kwisinda, sona mutakimaye na napamopamo mwikombe. Chimbilila kumaghamba ukuti mutakaghoghiwe!”
18Loli u Loti akabamula akati, “Awe, mwene wane, utakabombaye bunubu. 19Wampelela ichisa nkani pakubupoka ubumi bwane. Loli intangachimbilila kumaghamba pakuti kutali nkani, lumo ukunanganika kunganyagha muzila nukungogha, bo intafikiteko nukufika. 20Ennya, akaya akanandi kala kali papipi kako ningachimbililamo. Napapo kaya kanandi nkani, loli ningaponelamo.”
21Uwantumi yula akamula akati, “Ubupala butalipo, bukagha. Ntakwiza pakukanangannya akaya kanako. 22Lubilolubilo, chimbila, pakuti ntakwiza pakunangannya akaya kanaka mupaka ufike mulamula.” Cho chifukwa akaya kala kakitiziwanga ukuti we Zowala.#19.22 Zowala: Itabwa ili likwivwika ngati ilya mu Chihebeli kokuti, Akanandi.
Ukunanganika ukwa Sodomu nu Gomola
23Bo izuba lyafuma u Loti akaba ukuti afika kale mu Zowala. 24Po u Mwene akalaghazya amabwe agha moto uwa sulufule mu Sodomu nu Gomola. 25Akatuzimizya utwaya tula ni kombe lyosi, sona na bantu bosi aba mutwaya tula, poka ni vimelwa vyosi muchisu chilachila. 26Loli umuchi uwa Loti akennya kwisinda, akanduka pakuba libwe ilya mbeya.
27Pandabindabi nkani, u Abulahamu akachimbilila kubuzilo bubo akimilila nu Mwene. 28Akennya utwaya utwa Sodomu nu Gomola ni kombe lyosi lila, nukwennya ilyosi ilyakoghofya likusuka mutwaya mula, lilyo likayana bulo ni lyosi ilyakusuka mumuvuno.
29Bo u Chala anangannya utwaya utwa mwikombe tula, akamukumbuka u Abulahamu, akamupoka u Loti kuluzimilo lula lulo lukanangannya utwaya tuto u Loti akikalaghamo.
U Loti na bana bache abalindu
30Pachifukwa ichakuti u Loti akanyila pakwikala mukaya aka Zowala, yuyo na bana bache abalindu babili bala bakakwela amaghamba nukwikala mumpako. 31Umwana usongo akamubuzya umunandi akati, “Utata witu akughosipa, po patalipo nayumo umuntu pachisu ichapasi uwakuti tungasendwako ukuti tupape nawe abana ngati mumo abantu bakubombela pachisu ichapasi. 32Zagha tumung'wesye uvinyo ukuti akolwe. Po nanti akolwa, tughone nawe ukuti tupape nawe abana umwakuti uluko lwitu lutakazimilaye.”
33Ubusiku bulabula abana bala bakamung'wesya uvinyo uwise. Umwana usongo yula akaghona nu wise. Pachifukwa ichakuti u Loti akakolwa nkani, atakazimanya zizyo zikabombiwanga.
34Indabi yache umwana usongo yula akamubuzya umuzuna wache akati, “Pabusiku naghonite nu tata. Zagha tumung'wesye sona uvinyo ukuti akolwe ukuti nawe ughone nawe. Pakubomba bunubu uluko lwitu lutakwiza pakuzimila.” 35Po ubusiku bulabula bakamung'wesya sona uwise uvinyo, po umwana umunandi yula akaghona nawe. Pope bulo uwise atakazimanya zizyo zikabombiwa, pakuti akakolwa nkani.
36Po abana bosi abalindu aba Loti bala bakamela ulwanda ulwa wise. 37Umwana usongo akapapa umwana umulumendo yuyo akamwita ukuti we Mowabu. U Mowabu we munyenya uwa ba Amowabu.#19.37 Mowabu: Itabwa ili likwivwika ngati lya mu Chihebeli kokuti, Ukufuma kwa tata wane. 38Wepe nu munandi akapapa umwana umulumendo nukumwita ukuti we Benami.#19.38 Benami: Itabwa ili mu Chihebeli kokuti, Umwana umulumendo uwa mukamu wane likwivwika sona ngati lya mu Chihebeli kokuti, Umuntu waku Amoni. U Benami we munyenya uwa aba Amoni.

Currently Selected:

Ubwandilo 19: LMB2024

Highlight

Share

Copy

None

Want to have your highlights saved across all your devices? Sign up or sign in