Ubwandilo 18
18
Nizya bayeni batatu
1U Mwene akamubonekela u Abulahamu mumakwi agha mupandapanda agha Mamule, bo u Abulahamu ikaye pamulyango uwa chisakasa chache pamusanya bo kupiye nkani. 2#Heb. 13.2Akatalankannya nukubennya abanavuli batatu bimiliye. Bo abennya bulo akachimbila pakubalamuka. Akafughama 3nukuti, “Mwee bamwene bane, nanti chingabahobosya, mutakadumusannyanje bulo pakaya aka mubombi winyu. Ane nkwiza pakubabombela. 4Leka imbasendele amizi aghakuti musukusule munyayo zyinyu, sona mungatuzya mukazundila pikwi pano. 5Leka imbape ichakulya ichakuti chibape amaka umwakuti mwendelele nu bulendo bwinyu pakuti mwafika panyumba iya mubombi winyu.”
Abantu bala bakamula bakati, “Bomba bulo vivyo wanena.”
6Lubilolubilo u Abulahamu akinjila muchisakasa nukumubuzya u Sala ukuti, “Lubilo, senda ubusu ubwiza nkani, upiye ivibama.”
7Wepe u Abulahamu akachimbilila kuchibagha chache, akasenda ingwata inyine, nukumupa uwambombo wache. Uwambombo yula akayighogha nukubayanizizya abayeni bala. 8Po akasenda ulukama ulutone nu lupyu, sona ni nyama iya ngwata yiyo akabaghoghela nukubapa. Bo bali pakulya, u Abulahamu akimilila papipi nabo mukazundila mwikwi lila.
9Po bakamulalusya u Abulahamu bakati, “Nkimba umuchi wako u Sala ali ko kwiyi?”
U Abulahamu akabamula akati, “Ali muchisakasa.”
10 #
Lom. 9.9
U Mwene akati, “Nkwiza sona mumwaka uwa indabi pakabalilo kanaka, umuchi wako u Sala akwiza pakuba nu mwana umulumendo.”
U Sala akimilila kwisinda kwa Abulahamu nukuteghelezya. 11Pakabalilo kalakala u Abulahamu nu Sala bakaba bantu baghosi nkani, sona u Sala akabalilo akakupapila kakaba kakuti kamalite kale. 12#1 Pit. 3.6Po u Sala akaseka bulo nukuti, “Mwee na mumumo naghosipila, sona umulume wane wepe aghosipite, nkimba ningilagha sona umulume wane?”
13U Mwene akamulalusya u Abulahamu akati, “Nkimba choni chicho u Sala akasekagha ukuti, ‘Nkimba naloli ningapapa umwana, bo naghosipa nkani?’ 14#Luk. 1.37Nkimba chilipo chimo chicho chingamupota u Mwene? Ukuyana namumo u Mwene anenela, mumwaka uwa indabi, pakabalilo kanaka, u Sala akwiza pakuba nu mwana umulumendo.”
15Pachifukwa icha ubogha, u Sala akakana akati, “Awe, intasekitepo.”
Loli akamula akati, “Eee, wasekite.”
U Abulahamu akukalambilizizya akaya aka Sodomu
16Bo abantu bala banyamuka, bakakennya akaya aka Sodomu. U Abulahamu akabuka pakubasindikila. 17U Mwene akati, “Intangamuvinda u Abulahamu chicho nkulonda pakubomba. 18Abaluko lwache bakwiza pakuba luko ulukulu nkani, sona ulwamaka. Inko zyosi pachisu ichapasi nkwiza pakuzisaya ukwendela mumwache. 19Namusala umwakuti angabalamula abana bache na baluko ukuti banyivwilaye nukubomba chicho chanaloli ni chigholosu. Nanti bakubomba bunubu, nane nkwiza pakumubombela zyosi zizyo nkamulayizya.”
20Po u Mwene akamubuzya u Abulahamu akati, “Nivwa ukuti abantu aba mu Sodomu nu Gomola bananga nkani, sona vivyo bakubomba vibibi nkani. 21Po nkulonda nike ukuti nennye nanti zizyo nivwa zyanaloli. Nanti zite zyanaloli, nkwiza pakuzimanya.”
22Po abantu babili bala bakepako nukubuka kukaya aka Sodomu, loli u Mwene akasyalikila nu Abulahamu pala. 23U Abulahamu akapalamila kwa Mwene nukumulalusya ukuti, “Wee Mwene, nkimba naloli ukwiza pakubazimizya abantu abagholosu poka na bambibi? 24Buli nanti mukaya akakulu nkani mulamula muli abantu abagholosu 50, nkimba pope bulo ungakazimizya akaya kosi? Utangakaleka, umwakuti ubapoke abantu abagholosu 50 bala? 25Naloli momumo utangabaghogha abantu abagholosu poka na bantu abambibi. Awe, ichi chitangabombiwa! Utangachibomba! Nanti ungachibomba, kokuti abantu abagholosu bangafundiwa poka na bantu abambibi. Umulongi uwa chisu chosi ichapasi abombaye ubwanaloli.”
26U Mwene akamula akati, “Nanti nabagha abantu abagholosu 50 mukaya akakulu nkani aka Sodomu, ntakwiza pakukazimizya akaya akakulu nkani kala pachifukwa icha bantu abagholosu 50 bala.”
27U Abulahamu akanena sona akati, “Mwene, nalamba unhobokele pakunena nawe mubujivu bunubu, ane ne muntu bulo pamaso papako. 28Buli nanti wabagha abantu abagholosu 45, mubuzilo ubwa bantu 50. Nkimba pope bulo ungakazimizya akaya kosi akakulu nkani kala pachifukwa ichakuti pakusobelwa abantu fayivi bulo?”
U Mwene akamula akati, “Ntangakazimizya akaya kala nanti nabagha abantu abagholosu 45.”
29U Abulahamu akamulalusya sona akati, “Buli nanti wabagha abantu abagholosu 40?”
U Mwene akamula akati, “Ntangakazimizya nanti nabaghamo abantu abagholosu 40.”
30Po u Abulahamu akati, “Mwene, nalamba utakankalalilaye, loli unyitikizye inene. Buli nanti baghiwamo bulo abantu 30?”
Po u Mwene akamula akati, “Ntangachibomba nanti nabaghamo bulo abantu abagholosu 30.”
31U Abulahamu akati, “Mwene, nalamba unhobokele pakwendelela pakunena mubujivu. Buli nanti mukaya kala baghiwamo bulo abantu 20?”
U Mwene akamula akati, “Ntangakazimizya akaya akakulu nkani kala nanti nabaghamo bulo abantu 20.”
32U Abulahamu akati, “Mwene, nalamba utakankalalilaye, loli unyitikizye inene koka sona. Buli nanti abantu mukaya akakulu nkani kala baghiwamo abantu 10 bulo?”
U Mwene akati, “Ntangakazimizya akaya akakulu nkani kala nanti nabaghamo bulo abantu 10.”
33Bo u Mwene amala pakunena nu Abulahamu, akepapo sona wepe u Abulahamu akabwela kukaya kache.
Currently Selected:
Ubwandilo 18: LMB2024
Highlight
Share
Copy
Want to have your highlights saved across all your devices? Sign up or sign in
Lambya Bible © Bible Society of Malawi, 2024.
