LUKAS 15

Pakkalebaraang ripassala jimbala tappela'

15:1-7

(Mat. 18:12-14)

1 # Luk. 5:29-30 Sikonjo palele sima na tau doraka injo, mange ngase'i ri Isa laappilangngeri. 2Jari a'moro-moroimu tau Farisi na guru Tora' injo, lakua, Tau inni narimai sikuanna tau doraka na surangi nganrei. 3Jari lapaui pakkalebarang inni Isa mange ri iyai, 4”Inai ri kau intu rie' jimbala'na sibilangang kajunna, na ampa tappela'i sikaju, gele labokoi nukaassapulo kaassa injo ri parang luara na mangei laboja jimbala lingu injo sa'genna lapiuppai? 5Ampa lauppamu, lasompoi jimbala injo lalang rikarannuang, 6na riambattunamo ri sapo ia lakeo' ngase'i bahaanna surang limbo-limbona na lakua mange ri iyai: A'rannu-rannuki kakuuppai muliang jimbala'ku nutappela' injo. 7Nakke appau mange ri kau: Appakonjo todo'i injo larie' karannuang ri Suruga saba' rie' se're tau doraka jarra, mangeanna pole karannuang rikanara tau naba kaassapulo kaassa injo nagelei parallu jarra.”

Pakkalebarang bulaeng tappela'

15:8-10

8”Iyareka bahine anteeang rie' bulaenna sampulo batunna, na ampa tappela'i sibatu, gele lapappabolakang sulo ampai labarrasa saponna na laboja baji'i sa'genna lauppa? 9Ampa lauppamu, ia lakeo' ngase'i bahaanna surang limbo-limbona na lakua: A'rannu-rannuki saba' kuuppamu bulaengku nutappela' injo. 10Nakke appau mange ri kaui: Appakonjo todo'i rannuna sikonjo malaeka'na Allataala rikanara rie'na se're tau jarra battu ridorakana.”

Pakkalebarang ana' tappela'

15:11-32

11Appaui pole Isa, ”Rie' se're tau rie' rua ana' bura'nena. 12Lakuamo ana' bungko injo ri ammanna: Amma, sareang memamma mae pa'barang-barangang nua'jari injo dahuangku. Jari ammanna lapa'dahu-dahuang toje'mu pa'barang-baranganna mange ri iyai. 13Gele sallo maenna injo labalukang ngase' dahuanna ana' bungko injo ampai a'lampa dere ri kota maraeng. Konjomange lapela'-pela' barang-baranna lalang ritallasa a'labo-labo. 14Sungka'i la'busumo sikuanna, battumu kalara' bakka' ri kota lapammari injo na ia pakaramula tommo kalara'. 15Jari a'lampai na anjamai rise're tau ri kota injo. Tau injo lasuroi mange ri koko akkalahaki bahi. 16Jari a'ra' todo'mu laassi pomponna ri baru'bu' nua'jari injo kanre bahi, mingka gele rie' manna se're tau assare mange ri ia. 17Sikalinna ngu'rangii, nalakua: Sanna' lohe pajamana ammangku nukala'bi-la'biangi ri kanre, mingka nakke konni mae lamate pa're. 18Bajikanga muliang na a'lampa mange ri ammangku na lakukua mange ri ia: Amma, nakke dorakama mange ri Allataala surang mange ri Amma, 19gelema siratang riare' ana' Amma, ripaa'jari mamoa assimpole ata pajamamu Amma. 20Maeng injo a'lampamu na muliang toje'i mange ri ammanna. Rihattu derena juapa, lajanjammu ammanna, jari a'rikodommu saba' ripangamaseang. Allari ammanna mange laruppai ampai laraka' na lahau ana'na. 21Lakuamo ana' injo mange ri ia: Amma, nakke dorakama mange ri Allataala surang mange ri Amma, gelema siratang riare' ana' Amma. 22Mingka ammanna injo lasuroi sikonjo atanna: Lassiriko ngerang mae baju kaminang ballo, pipakeangi mange ri ia na mupipakei todo'i sinsing ri karameng limanna surang sapatui bangkenna. 23Ngalleko pole ana' tedong so'mo' injo, sumbelei na maemoko langanre-nganreki na a'rannu-rannuki. 24Saba' ana'ku inni maemmu mate mingka attallasai muliang, ia tappela'i mingka riuppai muliang. Jari pakaramulamu a'rannu-rannui. 25Mingka ana' lihuana rie' juapai ri koko na rihattu muliannamo surang riseppa'namo ri sapo, allangngeremu sa'ra suling surang kelong tari-tariang. 26Jari akkeo'mu se're atanna na akkuta'nangi mange ri ia apa kajariang. 27Appihalimu ata injo: Rie'i muliang arimmu na ammammu maeng assuro nyumbele tedong so'mo', saba' lauppai muliang na baji'-baji' juai. 28Jari kuku'i ana' lihua injo na gele a'ra' antama' ri saponna. Jari ansulukammu ammanna ampai lasihi-sihi. 29Mingka ia appihali mange ri ammanna: Janjangimu, nakke attaung-taungi kupanjamaangki Amma na gelepa minang a'bali ripassuroammu, mingka mae ri nakke Amma gelekalepa minang risare lanyumbele ana' bembe lakupake a'rannu-rannu surang baha'-bahaangku. 30Mingka ampanna jua rie' ana'mu Amma tumaeng injo mela'-melaki pa'barang-barangang Amma assurang bahine bandarang, na ripanyumbeleangi tedong so'mo'. 31Lakuamo ammanna mange ri ia: Oe ana', kau sanging assurang juaki na sikonjo anungku, anummu todo'i. 32Siratangki a'rannu-rannu surang atte'ne-te'ne saba' arimmu inni maemmu mate mingka attallasai muliang, maemmu tappela' mingka riuppai muliang.”

Currently Selected:

LUKAS 15: LAI_SLY

Highlight

Copy