LUKAS 14

Appakagassingi pole Isa ri allo Passambajangang

14:1-6

1Rie' se're allo Passambajangang mangei Isa ri saponna sala se're ponggaha ri sikuanna tau Farisi langanre ri injo. Sikuanna tau rie' ri injo latangara baji'i Isa. 2Sikalinna rie' se're tau garring amboro pomponna ammenteng ri a'rakanNa. 3Jari akkuta'nangi Isa mange risikonjo guru Tora' surang risikuanna tau Farisi injo, ”Ripakkulleang juaika appakagassing tau garring ampa allo Passambajangang iyareka gele?” 4Ammottoki kale-kale juai. Jari Isa latetengi limanna tau garring injo na lapakagassingi ampai lasuro muliang. 5#Mat. 12:11Maeng injo lakuamo Isa mange ri iyai, ”Inaimo ri kau ngase' intu gele lassiri laalle ana'na iyareka tedonna ampa a'dappe'i naung ri buhung, manna injo allo Passambajangang?” 6Manna se're tau gele rie' tuakkulle appihali ri Isa.

Tampa' nukaminang la'biri surang nukaminang tuna

14:7-11

7Saba' lajanjangi Isa ma'nassana sikonjo toana sanging a'ra'i lapattolongi tampa' kaminang rate injo, Ia lapaui pakkalebarang inni mange iyai, 8#Ams. 25:6-7”Ampa rie' se're tau lakeokiko mange ripa'buakiang, akolalo attolong kaminang rate ri ulu, barang rie' tau maeng lakeo' opuna bua' tula'birangang ia na kau; 9solanna tau injo, tau lakeo' injoko andamu mange ri kau na lakua: Sareangi tampa' inni mange tau intu. Jari siri' malongko'moko a'lampa mange attolong ri tampa' kaminang tuna injo. 10Mingka, ampa rikeo'ko, mangelaloko attolong ri tampa' nukaminang tuna. Barang komo apa opuna sapo battui na appaui mange ri kau: Urang siana', ri injoki mange attolong ri tampa' kaminang rate ri ulu. Ri appakonjona nguppako kala'birang ri a'rakanna sikuanna tau lohe langanre injo surangang kau. 11#Mat. 23:12; Luk. 18:14Saba' inai lapakala'biri kalenna, laripakatunai intu na inai lapakatuna kalenna laripakala'biri intu.”

Inai parallu rikeo'

14:12-14

12Maeng injo appaui pole Isa mange ri tau lakeo' injoi, ”Ampa laappakanre alloko iyareka laappakanre bangngiko, akolalo keo'i baha'-bahaammu iyareka bija-bijammu iyareka limbo-limbomu tukalumannyang injo, saba' iyai injo lalabalasai ri kau na lakeo' todo'ko na ri appakonjona muuppamu balasa'na. 13Mingka ampa laa'bua'ko panganre-nganreang, keo'i tau kaasi-asi injo, tau assala-salaang na tau pesuki injo surang tau buta injo. 14Lasungguko intu, saba' iyai injo gele rie' apa-apanna lalapa'balasang mange ri kau. Saba' lamuuppai sallo' pabalasa'na, ri allo ripakaattallasa'na muliang sikuanna tau naba.”

Pakkalebarang ripassala tau lohe bisaranna

14:15-24

(Mat. 22:1-10)

15Rilalangngere'na injo rie'mo se're tau battu ri toana injo appau mange ri Isa, ”Sunggulalo tau ripappatalaang injo kanre lalang ri Pakkaraengang Allataala.” 16Mingka appaui Isa mange ri ia, ”Maeng rie' se're tau a'buaki bakka' na lohe tau lakeo'. 17Rihattu laripakaramulanamo pa'buakiang injo, ia lasuroi atanna appabattu pau mange risikuanna tau maeng injo lakeo': Maemoko! saba' sadiamu sikuanna. 18Mingka iyai ngase', tasse're-se're tau, pakaramulamu ngera ampung. Tau makase're injo appau mange ri ia: Nakke maenga ammalli koko na parallui lamange kudowa'; riampungia. 19Tumaraeng injo lakua: Nakke maenga ammalli limangkalabini tedong na a'ra'i lamange kusoba; riampungi mamoa. 20Tumaraengang injo pole lakua: Nakke bau kalepa a'bonting na kanara injomo gelea akkulle lamange. 21Jari muliammu ata injo lajarrungang ngase'i injo ri karaenna. Jari kuku'i opuna sapo na lakua mange ri atanna: Lassiriko a'lampa mange risikonjo lalang bakka' surang risepe'-sepe' kota na urang ngase'i mae sikuanna tau kaasi-asi, tau assala-salaang injo na tau buta injo surang tau pesuki injo. 22Jari lapaui ata injo: Karaeng, apa nuripassuroang injo maeng ngase'mu kugeokang, mingka manna appakonjo rie' juapa tampa' pattolongang. 23Jari lakuamo pole karaeng injo mange ri atanna: A'lampako isse' mange risikonjo lalang bakka' surang lorong na passai mae konni tau rie' ri injo, solanna rassi ngase' sapongku. 24Saba' Nakke appau mange ri kaui: Gele rie' manna se're tau battu risikuanna tau maeng injo rikeo' lalakasia'i kanre pa'buakiangKu.”

Parallui ripela' sikuanna ampa laminahangki ri Isa

14:25-35

25Rie' se're hattu rie'mo siloheang tau a'rurung-rurung minahang ri Isa ripa'lingkaanNa. A'gilingi Isa ampai appau mange ri iyai, 26#Mat. 10:37-38”Ampa rie' se're tau laminahang ri Nakke na lapiamui juapai ammanna, idonna, bahinenna, ana'-ana'na, urang siana' bura'nena iyareka urang siana' bahinena, surang pole nyahana, ia gele akkulle a'jari ana' gurungKu. 27#Mat. 16:24; Mark. 8:34; Luk. 9:23Inai jua gele a'ra' marasai na minahangi ri Nakke, ia gele akkulle a'jari ana' gurungKu.

28Saba' inaimo ri kau intu ampa a'ra'i ambaung se're sapo nagele attolong riolo larekeng ongkoso'na, ganna' juaika doe'na lalapa'maeng jamaanna injo? 29Solanna ampa maeng lapatabamu pallanggana nagele lakulle lapa'maeng, tantu sikuanna tau anjanjang injo, attua-tuai mange ri ia, 30na lakuai: Tau intu ambaung todo'i sapo nagelejuai lakulle lapa'maeng.

31Iyareka, karaeng anteeang ampa a'ra'i a'lampa lamange bundu' laa'bali karaeng maraeng nagele attolong appikki'-pikkiri riolo apa sampulosa'bu tau ia akkulle juamu laa'raki bali labattu injo mange ri ia lohena ruampulosa'bu tau? 32Ampa gele, ia lassuro tau rihattu derena juapa balinna lalapakuta'nangangi lalang passidameang. 33Appakonjo todo'i ri kau intu, tau untu' injo assisala risikonjo pa'barang-baranganna, gele akkulle a'jari ana' gurungKu.

34 # Mat. 5:13; Mark. 9:50 Se'la intu toje'i baji', mingka ampa se'la injo a'jari la'bai, apamo laripake appakapa'ja ri ia? 35Gelemo rie' matu-matunna ri koko laappakaso'mo' tana iyareka laappakabaji' lamung-lamung, jari lapela'mamoi tau. Inai rie' tolinna, parallui appilangngeri!”

Currently Selected:

LUKAS 14: LAI_SLY

Highlight

Copy