LUKAS 11

Passala pangera dowaang

11:1-13

(Mat. 6:9-13, 7:7-11)

1Rie' se're hattu ngera dowaangi Isa rise're tampa'. Sungka'i maemmo ngera dowaang, rie'mo se're ri suro-suroNa appau mange ri Ia, ”Karaeng, riajarakang ngera dowaang, assimpole nulapangajarang injo Yahya mange ri ana'-ana' gurunna.” 2Pappihalinna Isa mange ri iyai, ”Ampa langera dowaangiko, paui appakonni:

Amma, ripakatangkasai aremMu:

rie'mu PakkaraengamMu.

3Sarekang kanre siganna'na allo bangngi

4na riampungi sikuanna kadorakaamba,

saba' manna kambe taampungi todo'i sikuanna tau rie' injo salana mae rikambe;

na andakang rilappasang laantama' ripasso'ri.”

5Maeng injo appaui pole mange ri iyai, ”Ampa rie' se're tau ri kaui rie' bahaanna na ritangnga bangngina a'lampai mange ri ia na appaui mange ri ia: Oe, urang siana', piinrangisai tallumbatu roti, 6saba' rie' se're tau bahaangku battu dere assekka ri sapongku na gele sikali rie' apa-apangku lakupattoanaang mange ri ia; 7tide'mo siri'na tau ri sapo injo ampa lappihali: Ako appabangka-bangka, saba' ta'lo'bi'mu babaang sapongku na tinro ngase'makang; bera'i kalengku lambaung kusareko urang siana'. 8Nakke appau mange ri kaui: Manna injo untu'i nyahana lambaung surang assare mange ri ia manna pole tau injo bahaanna, mingka saba' panggeokang gelena siri', jari ambaung juai na lapassareangi mange ri ia apa nulaparalluang injo.

9Injomo saba'na, Nakke appau mange ri kaui: Ngerako, larisareko; a'bojako, languppako; akkatto'ko jari ripambungkarangko pallo'bi'. 10Saba' inai ngera, larisare na inai a'boja, languppai; na inai akkatto', ripambungkarangi pallo'bi'. 11Tide' intu amma, ampa ngerai juku' ana'na, na laasare saa ana'na passambe juku'? 12Iyareka, ampa ia ngera tannoro, kalang lasareangi mange ri ia? 13Jari ampa kau tudaa intu sipa'na ngisse' assare ri ana'mu nubaji', la'bipa pole Ammammu Turie' injo ri Suruga! Ia laassare Nyaha Tangkasa mange ri tungera injo ri Ia.”

Isa na Beelzebul

11:14-23

(Mat. 12:22-30; Mark. 3:22-27)

14Rie' se're hattu Isa angga'gara setang appakapepe battu rise're tau. Sungka'i ansulu' setang injo, akkullemu appau tau pepe injo. Jari lannasai tau lohe injo. 15#Mat. 9:34, 10:25Mingka rie' se're ri tau lohe injo appau, ”Ia angga'gara setang battu rikahasana Beelzebul ponggahana setang injo.” 16#Mat. 12:38, 16:1; Mark. 8:11Rie' pole tau ngera se're tanra battu ri Suruga mange ri Ia, lalaso'ri. 17Mingka Isa latarrusu pikkirannai jari appaui, ”Sikonjo pakkaraengang ampa ta'bage-bage a'nassa lapanra'na, na sikonjo pakkalabiniang assisala-sala, a'nassamu lassipela'na. 18Ampa Ibilisi injo ta'bage-bage todo'i na assibaliangi, anteekamua pakkaraenganna laakkulle attahang? Saba' mupaui ma'nassana Nakke angga'gara setang battu ri kahasana Beelzebul. 19Jari, ampa pade' Nakke angga'gara setang battu rikahasana Beelzebul, battu ri kahasa anteeammo lapake papinahammu angga'gara setang? Injomo saba'na, iyaimo injo laa'jari hakkimmu. 20Mingka ampa Nakke angga'gara setang battu rikahasana Allataala, jari sitoje'na Pakkaraengang Allataala rie'mu mange ri kau. 21Ampa rie' tau sa'ga' na sangka' sanjatana lajagai saponna, a'nassamu salama' ngase'na pa'barang-baranganna. 22Mingka ampa rie' tau la'bi sa'gakang laehai na labetai, jari tau injo laalle ngase'i sanjata nulapa'baraniang injo, na lapa'dahu-dahuangi nulaalle injo.

23 # Mark. 9:40 Inai gele a'urang ri Nakke, iamo balingKu na inai gele minahang ri Nakke apparappung, ia appakahu'-kahurui.”

Pamulianna pole setang

11:24-26

(Mat. 12:43-45)

24”Ampa rie' setang ansulu' battu rise're tau, ia a'lampana jua mange amminroi ri parang a'boja pammari-mariang, na kanara gelena nguppa, jari lakuamo: Bajikanga muliang pole mange ri sapo numaeng kubokoi injo. 25Jari muliammu na lauppai sapo injo tangkasamu maeng ta'barrasa surang baji'mu atoro'na. 26Maenna injo a'lampai pole ansulu' mange akkeo' tuju setang maraeng nula'bi karrasang battu ri ia, jari antama' ngase'mu na ammari ri injo. Kamaenganna tau injo pela' daamu ta'ra tallasa'na na ribungasa'na.”

Inaimo lasunggu

11:27-28

27Rihattu a'bisarana juapa Isa ripassala injo, rie'mo bahine a'nga'ngara bakka' ritangngana tau lohe injo' na appaui mange ri Ia, ”Sunggui idong maeng injo latianangangKo na susu maeng injo appasusu ri Kau.” 28Mingka appaui Isa, ”Tulasunggu injo iamo intu sikuanna tau appilangngeri ri pau Allataala na lakatutui baji'i.”

Tanra Yunus

11:29-32

(Mat. 12:38-42)

29 # Mat. 16:4; Mark. 8:12 Sungka'i a'domummo tau lohe injo ri Isa, appaui Isa, ”Sikuanna tau konni-konni sanging tau daa sipa'na. Ngerai se're tanra, mingka mange ri iyai gelei larisare tanra rimaraenganna tanra ri Nabbi Yunus. 30#Yun. 3:4Saba' assimpole Nabbi Yunus a'jari tanrai ri taunna Niniwe, appakonjo todo'i Ana' Rupatau laa'jari tanrai ri tau konni-konni. 31#1 Raj. 10:1-10; 2 Taw. 9:1-12Rihattu pangadelannamo, karaeng bahine battu rateang laammentengi assurang tau konni-konni na iyaimo langadeli. Saba' karaeng bahine inni rie'i battu riappa'na lino mange appilangngeri pangisse' ri Suleman, na sitoje'na turie' injo ri inni la'bii battu ri Suleman! 32#Yun. 3:5Rihattu pangadelannamo, taunna Niniwe laammentengi assurang tau konni-konni na iyaimo langadeli. Saba' taunna Niniwe injo jarrai rihattu lalangngere'na pappiu'ranginna Nabbi Yunus, na sitoje'na turie' injo ri inni la'bii battu ri Nabbi Yunus!”

Sulo ri batangkale

11:33-36

33 # Mat. 5:15; Mark. 4:21; Luk. 8:16 ”Gele rie' manna se're tau appabola' sulo na lataroi ri siring sapo iyareka latongko'i talle, mingka lataroi rate ri panaroanna, solanna sikuanna tau antama', akkulle lajanjang saunna. 34#Mat. 6:22-23Matammu intu iamo sulo ri batangkalemmu. Ampa baji'i sipa'na matammu, sinarai intu batangkalemmu, mingka ampa daa sipa'na matammu, kalammangi intu batangkalemmu. 35Injomo saba'na, pariatisai solanna sinara rie' injo ri kau andai a'jari kalammang. 36Ampa sinarai sibatu kalemmu na tide' manna siso'di' nukalammang, jari sinara iangase'na, assimpole ampa sulo lasinariko ri saunna.”

Isa assalla risikuanna tau Farisi surang risikonjo guru Tora'

11:37-54

(Mat. 23:1-36; Mark. 12:38-40; Luk. 20:45-47)

37Sungka'i maemmo ngajara Isa, rie' se're tau Farisi lakeo'i langanre ri saponna. Antama'i Isa ri sapo injo, ampai attolong nganre. 38Lannasa ngase' tau Farisi injo lajanjanna ma'nassana Isa gele labissai limanNa rigelenapa nganre. 39Mingka appaui Isa mange ri ia, ”Oe tau Farisi intu, mutangkasi bageang pantaranna galasi surang mangko' inni, mingka assinna lalang rassi lukkakang surang sipa' daa. 40Oe, kau tau ba'ga intu, gelejua Ia Tuappaa'jari injo bageang pantara, Ia to'jua appaa'jari bageang lalanganna? 41Mingka, passareangi assinna assimpole passidakka na sitoje'na laa'jari tangkasa ngase'i ri kau. 42#Im. 27:30Mingka silakamo ri kau, oe tau Farisi intu, saba' a'bajarako sidahu sampulona hassele'na lamung-lamummu, iamo intu kaju tanning, marisa na sikonjo rupanna rampa-rampa maraeng, mingka kaadelang na pangamaseang mange ri Allataala gele mujampangi. Se're passala parallu rigeokang andai rikaluppai numaraeng injo. 43Silakamo ri kau, oe tau Farisi intu, saba' mungaina attolong ri tampa' kaminang baji' ri sapo passambajangang na mungai narima pappakala'biri'na tau ri pasara. 44Balamo ri kau, saba' assimpoleiko kuburu gele rie' mesanna; sikuanna tau a'lisa' ribahonna, gelei laisse'.”

45Rie'mo se're tau battu ri guru Tora' injo appihali na lakua mange ri Isa, ”Guru, battu ripau appakonjo, Kau musalla todo'kang.” 46Mingka appihali Isa, ”Silaka tommo ri kau, oe guru Tora' intu, saba' mupierangi erang bera' nugele akkulle lasompo tau, mingka kau manna se're karamemmu gele laseru erangang injo. 47Silakamoko, saba' mubaungi too' sikonjo nabbi, na puwa-puwamu riolo attu lahunoi. 48Ri appakonjona, muakui ma'nassana nabai panggeokanna puwa-puwamui, saba' iyai injo attu lahuno nabbi-nabbi injo na kau mutembo'i jera'na. 49Injomo saba'na, pangisse' ri Allataala appau: Nakke lassuro mange ri iyai sikonjo nabbi surang sikonjo suro-suro, na sibageang battu ri nabbi-nabbi surang ri suro-suro injo lalasissai ampai lahunoi, 50solanna tau konni-konni ripassingari rarana sikonjo nabbi nutasso'lo' injo minang ripakaramulana ripaa'jari lino, 51#Kej. 4:8; 2 Taw. 24:20-21pakaramula battu ri rarana Habel sa'genna mange ri rarana Nabbi Zakharia tumaeng rihuno injo ripassa'lakanna pattunuang koro'bang na Sapo Allataala. La'bipa pole, Nakke appau ri kaui: Sikuanna injo larisingarai ri tau konni-konni. 52Silakamoko, oe guru Tora', saba' maeng mualle konsing pangisse' passala ri Allataala; mingka geleko antama' na muampangi tau laantamaki injo.”

53Sungka'i a'lampa Isa battu ri tampa' injo, lohemo guru Tora' surang tau Farisi tarru'-tarrusui lamata-mata na ladondoro Isa rilohe rupanna pakkuta'nang. 54Ri appakonjonamo na sanging laulu-ului, solanna akkulle lajakkala Isa passabakang ripappauNa.

Currently Selected:

LUKAS 11: LAI_SLY

Highlight

Copy