Matewos 13

Bukinynyaasa Beso

(Mar. 4:1-9; Luqa. 8:4-8)

1Yesus es wono keerun kesse baarisi tesha di. 2Showo dara basa tesha zuuttena boor'a bar goonuusta kese di. Daraas dey zuuttere baarisi tesha yersefeer. 3Estan showo wuza besok baassok mako ephi: «Isa bulinynya zala bukanak kesi. 4Bukfena kabaasik isa isa zalaas ugnaasta kere wor'i. Kasaasikito dey yaara kephpha ma. 5Oomaas akama hoi'ba foonto kaa'oosta kere wor'i. Akama ho'a aafa sinna boor'a geregere kayi. Esiis dey zalaas ho'aassi sikalera aane giruwa. 6Sinuntano awa kesfana kabaasik aliqi. Tasba tishina boor'a dey ichimi. 7Ooma zalaas dey seer'aasi ganesi kere wor'i. Seer'aas kayira geer'a fu'e. 8Ooma zalaas ma'a daasta kere wor'i. Isaas tiyanon, isaas issunasiron, isaas keezasiron gaani. 9Odoni odoba feena bar odowowa.»

Yesus Awuni Boor'a Besok Makenamato

(Mar. 4:10-12; Luqa. 8:9-10)

10Estan nawobaasakito barki tai'sere: «Awuni boor'a daraasik besok makefasso?» yisete. 11Bar dey wolgire: «Nittok den samaki Ha'oosi aacho chowanon arutik imtewa. Sinuntano baassok aane imtowawa. 12Feena barik fayista dayistera imtona dey arkuna. Sinuntano garo kiisku feena barkin es barik fa barnu basaastan ootterwa. 13Baasso biyefet biyonorne feeseter. Odefet odonorne feeseter dey yaadatonorne feeseter sinete boor'atu besok makefawungwa. 14Es bari boor'a raajju Isayyasniissi:

« ‹Odoson odetir;

sinuntano aane yaadatefeti;

biyason biitir

sinuntano nibnitiissi aane yaadatefeti.

15Han daraasa niba muumiwa, odobesiis oyewa; aafbesiis dey talmewa;

ekka sina shakaanane aafbesiisik biire;

odobesiisik odesere; nibbesiissi yaadatere

taaki wolseten fatuna kabawa.›

«Yistera maktera kuni raajiis baassosta sinanawa. 16Sinuntano nitto aafaas biyar; odontiis dey oder sinna boor'a suustowa. 17Futok nittok makefawungwa; showo raajjuni meenawa ookoni meena nitto biyefeti baron biyonek eenantesere aane biyoto. Odefeti baron eenantesere aane odosoto.

Bukinynyaasa Besoni Kota

(Mar. 4:13-20; Luqa. 8:11-15)

18«Ese nitto zalaasi bukinynyani besosi kotanon odotiwa. 19Ugnaasta bukte zalaas besifanaas Ha'oosi taatoni kaamanon odere yaadatonoy asusingwa. Dey geregere Sexana yaara nibaassin bukte kaamaason kephfa. 20Kaa'oosta bukte zalaas besifanaas kaambaason odere geregere girak ephpheteefe asusingwa. 21Sinuntano tasba aafa sinna boor'a Ha'oosi kaamtan kabi chowa shana wedey kabugto kar'fana kabaasik geregere tuusa'sefe. 22Seer'aasi ganesi bukte zalaasi besifanaas kaambaason odere ephpheteefe asuswa. Sinuntano han daastaki fooni safaraasewa otumni keeshtanaase kaambaason geer'a gaanba foonto zagifa. 23Ma'a daasta bukte zalaas besifanaas kaambaason odere yaadatefe asusingwa. Bar gaana gaanar. Isaas tiyanon, isaas issunasiron isaas keezasiron gaanfa» yi.

Kaxakaxaasi Beso

24Dey Yesus ooma beso ekka yit make: «Samaki taatoos foshaasta ma'a zala buka asune faarwa. 25Sinuntano asu zuuttere kunnanneen orfo guma yeere zagoossi kaxakaxa bukaat hami. 26Zagoos kayira gaanfana kabaasik kaxakaxaas dey ane kessa beste. 27Foshaasi abani wostinynyani meya barki hamere: ‹Daamiiso; foshneesta ma'a zalaatanoso buktari? Eekin kaxakaxa ayin yaso?› yisete.

28«Bar dey baassok wolgire: ‹Han baron zagiis gumaaswa› yi. Wostinynyabaasakito dey: ‹Eekin hamma es kaxakaxaason waar'anik sholefatoso?› yisete.

29«Sinuntano bar wolgire: ‹Kaxakaxaason waar'feti kabaasik zagooson dey waar'tir sinna boor'a aafawa sinanawuza› yi. 30Beyfaani katona wonaas kar'ananneen ane dichfoon. Kar'ni wono kar'ni baassok: ‹Kaxakaxaason zeemma waar'ti; geyak kiichchonamato basa basak basati. Sinuntano zagooson botonaassi gaagtiwa› una» yi.

Fi'fi'oni Gaanni Beso

(Mar. 4:30-32; Luqa. 13:18-19)

31Dey Yesus ooma beso ekka yit make: «Samaki taatoos asu ephphe taamme buloossi bukna fi'fi'oni gaanane faarwa. 32Bar zala zuuttambaase asiistan hater. Sinuntano dichfana kabaasik akakilti zuuttambaase asiistan arkifa dey i'o sinfa. Kasaasikito dey yaara waa'baassi keeba keer'a diifa.»

Masoosi Beso

(Luqa. 13:20-21)

33Dey Yesus ooma beso ekka yit make: «Samaki taatoos isa mashkasu keez safare buwaneen tushina masone faarwa. Es masoos dey tushoos kesanak zagi.»

Yesus Awuni Boor'a Besok Assinamato

(Mar. 4:33-34)

34Yesus es baron zuutire besok daraasik make. Beso foontonon isa wuzane aane makowe. 35Es barnu ekka sinnaas raajjuniki kamo:

«Wolumnaason besoktu makona;

han daa testenanneen kabira;

aachera fa wuzason makona»

yistera tichche bar sinanakwa.

Qaxaqaxaasi Besonon Koti

36Estan Yesus daraasin geggessaat keer giri. Nawobaasakito dey barki tai'sesere: «Buloostaki kaxakaxaasi besoni kotanon innok makowa» yisete. 37Yesus dey ekka yit wolgi: «Ma'a zalaason bukaas Asuni Naawa. 38Buloos han daaswa. Ma'a zalaas Ha'oosi taatoni naanggotawa. Kaxakaxaas dey sexanni naanggotawa. 39Kaxakaxaason bukaas guma sina Dabuloswa. Kar'ni wonaas dey han daasi ko'awa. Kar'niis dey Ha'oosi wosiyanikitowa. 40Es Kaxakaxaas kephtera kiichchefanaasimato han daasi ko'ak dey esiisimatotu sinana. 41Es kabaasik Asuni Naa wosibaasikitonon wosuna. Barikito dey oomiisin boor'a wostosonek zagsefe mangu meyanon zuutira basa taatoossin kephpha kissona. 42Dey kayo geyaassi ha'sona. Estak waasnewa ay'ni koyet foone sinana. 43Sinuntano ookoni meya ababesiisa taatosi awanimato chaarosone. Odoni odoba feenaas odowowa.»

Aacho Otmaasi Beso

44Tusire dey Yesus ekka yi: «Samaki taatoos buloossi aachera kuni otmane faarwa. Isa asu es otmaason danne aachi. Akamanon girobaastan kabi chowa hamme fa foobaason zuutire kisire waagaat es bulooson waage.» 45Hepsa Yesus ekka yi: «Dey samaki taatoos keeshu Inqu#13:45 Baariissi faafa miizzani kolaassin bestefa waagba chima wuza waagok shole naggaddene faarwa. 46Es naggaddees akamanon sholsu inquuson danynaayse hamme fa wuzbaason zuutire kisire waagaat es baron waage.»

Yugudoosi Beso

47Tusire dey Yesus: «Esiisimato dey samaki taatoos baariissi ha'tefaat showo tesa kurxummiison zuuti yugudone faarwa. 48Yugudoos tuumnanneen orfo kurxummiison eshefe baasso zatte baarisi ha'ta kissefe. Estan diisere ma'a ma'aason korisere masaassi gedesefe. Mangu manguuson dey gero ha'sefe. 49Esiisimato han daasi ko'ak ekkatu sinana. Ha'oosi wosiyanikito yaara boor'ni meyanon ookoni meyaassin koruna. 50Manguni meyanon dey kayo geyaassi ha'sone. Estak waasnewa ay'ni koyet foone sinana.» 51Dey Yesus: «Han baron zuutira yaadatetiyoso?» yi. Baasso dey: «Aa» yisete. 52Yesus dey: «Ese samaki taatosi aacho chowanon mai'sire arife tumaasi assinynyaas; koda kunfana keyaassin gaddo sinaaysewa kur'u sinaayse ephphe kisife waagni abane feerwa» yi.

Yesus Koontena Daastaki Asuni Meya Barin Tugga'sete

(Mar. 6:1-6; Luqa. 4:16-30)

53Yesus es besosikitonon makere koi'sinaase estan kesse hami. 54Koontena katama Naaziret yeere Ayhudni shiiphoni keyaassi daraasin assit feer. Asuni meya dey diinqere: «Han asus han techmaasewa biistera artonoy wuzaase asin ayin ephphe yeso? 55Han bar kar'inynya Yosefni naastenoso? Intobaas dey Maaramitanoso? Aybaasakito dey Yaqob, Yosef, Simonnawa Yuudanatenoso? 56Eetbaasikito dey innoneen anetanoso faasenari? Eekin han asus effatena aruuson zuutire ayin daniso?» yisete. 57Es bari boor'a basa chowaasik tuusa'sere ephphetoo beyete. Sinuntano Yesus: «Raajju ulfina dana beyfenaas koontena daastanawa keebaassina koi'bawa» yi. 58Baasso amano beyaastan kabi chowa estak showo biistera artonoy wuza aane zaguwe.

Currently Selected:

Matewos 13: YemsaNTL

Highlight

Copy