Matewos 12

Beysani Wonni Chowaasik Mamuste Mamsu

(Mar. 2:23-28; Luqa. 6:1-5)

1Es kabaasik Yesus beysani wonaasik zagoni foshaasi ganesi kamo aatte hami. Nawobaasakito maktesete boor'a bona zagooson mo'e koya ephete. 2Ferisawini meya es baron biyefaat: «Ne nawoosakito beysani wonaasik zagtonak kalto wuzason zagsedifewa» yisete. 3Yesus dey baassok ekka yi: «Dawitnawa barneen ane fe asuni meena maktesefe kabaasik Dawit awu zaginamato aane feretuwetinoso? 4Ha'oosi keer girire maagni meyaktano barik sinun barneen fe asuni meyak kalto korto daabbooson#12:4 Betemeqdesiissi torban torban katta shoo'a imtefana tarabbezaasta kunfa korto daabbo. mewa. 5Wedey maagni meya beysani wonaason ooda beyye betemeqdesi wosto wostesefaatene boor'a sinna aane faadtefa sinnamato Museni tumaassin aane feretuwetinoso? 6Sinuntano ta nittok makefawungwa, betemeqdesiistan denalo sina bar hanta feerwa. 7‹Fakiyaasontu sholefantano Maa'aasontawa› yifa matsafaasi kaama awu sinnamato yaadateti sinfaanane boor'besi foonto baassosta mangsu kar'ati kabatawa. 8Ese Asuni Naa beysani wonaasiknu daamwa.»

Yesus Kushuba Laafa Asusin Fati

9Yesus estan kesse hamme Ayhudni shiiphoni keyaassi giri. 10Estak isa kushuba laafa asu feer. Yesusnin malatok sholet feese isa isa asuni meya: «Beysani wonaasik mettannin fatu faqqadtongwa aanenso?» yit mamussete. 11Yesus baassok wolgire: «Nitto ganeyaassin fantuba faana isa asu beysani wonaasik gawusi gandefaanane kisunor oonso?» yi. 12«Ese asu fantuustan denalo aakkak sina beynirinso? Es bari boor'a beysani wonaasik ma'a wuza zagu aane kaltowawa» yi. 13Esseen orfo kushuba laafa asusin: «Kushuneeson zeephwa» yin zeephi. Isa kushusimato dey ma'a kushu sini. 14Sinuntano Ferisawini meya estan kesere Yesusnin aakkak worsonemato merkesete.

Ha'o Korina Wostinynya

15Sinuntano Yesus baasso mangu safaraason araat estan shaate. Showo asuni meya dey barneen ane hamete. Mettanni meyanon dey zuutire fati. 16Bar oo sinnamato kisire maksonoytemato ajaje. 17Es bar dey sinnaas raajju Isayyasni matsafaassi tichchera kuni bar sinanakwa.

18Ese ta korina wostinynyataas han barwa;

barin ta shunnar dey bariktu girefan;

Ayyananaason basaasta zaguna;

bar futoni mangsuni kar'aason daraasik awasuna.

19Bar aafa karakkarona wuza;

dey aafa chaagana wuza;

kaambaas gero kessa aafa odona wuza.

20Mestera eesto sobboqoosonnu;

aafa kiir'ana wuza;

chuwet di kar'aason aafa tishkunawuza;

es baron zagunaas;

futoni mangsuni kar'aason meronanneengwa.

21Aazabni meya basa sunaasiktu abdi zagsone.

Yesusnawa Beelzebulna

(Mar. 3:20-30; Luqa. 11:14-23)

22Esseen orfo asuni meya kiina ayyana ephna aaftishu nibba taato asunin ephphe yeesete. Yesus dey fatin asus biyaknawa wollokna chimi. 23Daraas zuuttere diinqesere: «Han asus Dawitni naateeso?» yisete.

24Sinuntano Ferisawini meya odesere: «Han bar Beelzebul yistefa kiina ayyanaasi gaanynyanik sina shakaanane kiina ayyanaason aafa kisuna wuza» yisete.

25Sinuntano Yesus baasso safaraason arifaat ekka yi: «Bare bare oor oor keset fa taatoos zuuttera tishutu tishunawa. Esiisimato dey bare bare oor oor keset fa katamaas wedey keyaas aafa chimma yerona wuza. 26Sexanaas sexanaason kisir sinfaanane bare bare oor oor kesiwa uwa. Ese bari taatoos aakkak chimma yeronirinso? 27Ese ta Beelzebulnik kiina ayyanaason kisaanane nitto zoonsifeti baasso awuk kissonerinso? Ese nitto zoonsifeti baassonu nittoosta mangsu kar'eterwa. 28Sinuntano ta kiina ayyanaason kisifanaas Ha'oosi Ayyanak sinnanneen Ha'oosi taato nittoki yaara kar'iwa uwa. 29Dey isa asu zeemme hugnaba feena barin taar'noy basa keer girire waagbaason bo'ok aakkak chimnirinso? Hugnaba feena barin taar'attu keyaassi fayiison bo'ok chimanawa. 30Taneen ane sinnoy bar taan tugga'er; dey taneen ane zuutunoy bar siker. 31Es bari boor'a ta nittok makefawungwa; asu wostefena boor'aasewa me'aase zuuttera feeshun ustona. Sinuntano Ha'oosi Korto Ayyananon me'a bar boor'baas aafa feeshun ustona wuza. 32Asuni Naanita mei'ni kaama maksefe bar boor'baas feeshun ustona. Sinuntano Korto Ayyanaasta mei'ni kaama makefe bar han daastak sinun yooni daasta boor'baas aafa feeshun ustona wuza.

Ma'a I'oos Gaanbaastaktu Artefa

(Luqa. 6:43-45)

33«I'oos zuuttera gaanbaastaktu artefa sinna boor'a ma'a i'onti faafaanane ma'a gaana danati. I'oos mangu sinfaanane gaanbaas dey mangu sinana. 34Nitto ufoni naanggota mangu sinfaat aakkak ma'a wuza wollok chimtiso? Asu nibbaassi tuumma fu'te barontu noonobaasik wollefewa.

35«Ma'a asu nibbaassi zuutina ma'a mazgabiistan ma'a wuza kisifewa. Mangu asu dey nibbaassi zuutina mangu mazgabiistan mangu wuza kisifewa 36Futo nittok makefawungwa; asuni meya wolumsefe sinnoy mangu wolla zuuttambaase asik mangsuni kar'ni wono wolguba imonerwa. 37Wollefata kaamneesik neek mangsu katona. Dey wollefata kaamaasik neyista mangsu katona.»

Biistera Artonoy Wuza Biyak Mamuste Mamsu

(Mar. 8:11-12; Luqa. 11:29-32)

38Es kabaasik isa isa Ferisawini meenawa Museni tumaasi assinynyana Yesusnin: «Ne biistera artonoy wuza zagin biyanik sholefeniwa» yisete. 39Sinuntano bar wolgire: «Mangu koontoosewa amanonoy koontoose biistera artonoy wuza sholer. Sinuntano raajju Yonasni biistera artonoy wuzasneen ooma biistera artonoy wuza aafa imtona wuza. 40Yonas inya kurxummiisi katasi keez wonnewa waalne kunnamato Asuni Naa dey moogaassi keez wonnewa waalne kunana. 41Neneweni katamaasik asuni meya Yonasni awasuuson odesere boor'besiisik gaabbesere harmisete boor'a mangsuni kar'ni wono han neeni koontoosneen ane kabsere baassosta mangsu kar'osone. Ese hash Yonasniistan denalo hanta feerwa. 42Yeeshdaaki mashka taatoos Solomonni techmaason odok daani dilan kabira yaana boor'a mangsuni kar'ni wono han neeni koontoosneen ane kabira baassosta mangsu kar'ana. Ese hash Solomonniistan denalo hanta feerwa» yi.

Kiina Ayyanaasi Asunisi Wolle Giru

43Dey Yesus ekka yi: «Kiina ayyana asunisin kesfana kabaasik beysa sholet akaba foonto dimaassitu kutifa. Sinuntano sholena beysaason aafa danana wuza. 44Estan ‹Zeemoti kesna keyaassi wolla hamanawa› yifa. Wolla yeen es keyaas fa wuzba foonto sinna futtera kayimma diifen danfa. 45Estan dey hamma baristan denalo mangu naafun kiina ayyana ephpha yaara girira barneen ane esta faafa. Es asusik zeemoti foobaastan orfoti foobaas akamanon mangu sinfa. Esiisimato han mangu koontoosta sinniis esiisne faarwa.»

Yesusni Intoosewa Aybaasakitona

(Mar. 3:31-35; Luqa. 8:19-21)

46Yesus daraasik makefeen intobaasewa aybaasakitona barneen uphere wollok sholsefaat gerakalo yersefeer. 47Esta feese asuni meyaassin isaas Yesusnin: «Intoneesewa ayneesakitona neen uphsonek sholefaat gero yerseferwa» yi.

48Yesus dey es make asusik wolgire: «Intonaas oonso? Aytaasakito dey oonotnaysinso?» yi. 49Kushubaason nawobaasakitoniki besaat: «Ese intonaasewa aytaasakitona haniiswa: 50Den samaki Abataasa safaranon zagsefe baasso zuuttere ayta, eetna dey intonawa» yi.

Currently Selected:

Matewos 12: YemsaNTL

Highlight

Copy