Matewos 14

Haphqife Yohannisni Kitu

(Mar. 6:14-29; Luqa. 9:7-9)

1Es kabaasik Galiilaki daason ha'sife Herodis Yesusni chowaasi wollanon ode. 2Wostinynyabaasakitonik: «Haniis Haphqife Yohanniswa. Bar kitun kabiwa. Es bari boor'atu han biistera artonoy wuzaas barki kamo zagtedifawa» yi.

3Herodis ayba Filiphosni asu sina Herodiyadani boor'a Yohannisnin ootire taatoni keer taatire feer. 4Yohannis Herodisnik: «Ayneesa asunon ephatak tumaassi kaltowa» yire makena boor'a. 5Herodis Yohannisnin woruk sholet feer. Sinuntano daraas Yohannisnin raajju zagiretu biyefe sinna boor'a dige. 6Herodis koontena wonaason ulfinsifena wono Herodiyadani nawaas teegtere yeese baasso ganeyaassi suru surira Herodisnin girsi. 7Es bari boor'a Herodis bar shiiphena wuzason zuutire imanak teyire warege.

8Nawaas dey intobaasik kiittera: «Haphqife Yohannisni teetaason han koranaassi gedda hash taak imma» yi.

9Taatoos es chowaasik suume. Sinuntano girina teyyaasik barneen ane diise baasso boor'a iichchere Yohannisni teetaas imtonak zagi. 10Taatoni keer wosire Yohannisni teetaason kati. 11Es kate teetaason koranasi gedde teshshere nawaasik imete. Bar dey taamma intobaasik imi. 12Yohannisni nawoosakito yeesere dugnobaason ephphe kabbarsete. Hamere dey es chowaason Yesusnik maksete.

Yesus Uuch Kum Asunin Maasi

(Mar. 6:30-44; Luqa. 9:1-17; Yoha. 6:1-14)

13Yesus Yohannisni kituuson odenaase goonuussi diire bar bar duuk isa shaato dimsi hami. Daraas dey es baron odeseteyse katama katamabaassin kesse wochok barki hamete. 14Yesus goonuussin kerere showo darani biyaat baassok kenashte. Mettanni meyanon dey fati.

15Waalfana kabaasik nawobaasakito barki tai'sere «Han bar zabowa, gerok dey waali. Daraas hamme ke'esikitosin muubesi waagsonek geggessuwa» yisete.

16Sinuntano Yesus: «Nitto baasso muusoneeson imotitano hamonek aane sholsifawa» yi.

17Baasso dey: «Innoki fayiis uuch muuma daabbonewa hep kurxumminetano ooma hantak aafawa» yisete.

18Bar dey: «Es baron hang taaki teshshotiwa» yi. 19Daraas shaa'aasta duusonek ajaje. Estan uuch muuma daabboosonnawa hep kurxummiisonna ephphe den sama biire galatni shiipho shiiphe. Daabbooson dey batte nawobaasakitonik imin baasso dey daraasik woshete. 20Zuuttambesiise meere gawuseten nawobaasakito dey fu'te battoos asire heppe masa tuumanon zuutisete. 21Meese asuni meya mashkasusewa naanggotaase faadtonoyfeen uuch kum arqasu sinone.

Yesus Baariista Kuti

22Estan Yesus geregere nawobaasakitonin: «Daraasin geggessuna kabaneen goonuussi diisera zeemma yesalo fintiwa» yit ajaje. 23Daraasin geggessinayse Ha'o shiiphonak bar bar den aamaasta kesi. Waalfana kabaasik Yesus bar bartu estak feer. 24Es kabaasik Goonuus baarisi ganeta feen ek sinaastak siru faar sinna boor'a akaasi guubo shimsi. 25Wassi izgin sa'atiistak Yesus baariista kutit nawobaasakitoniki ye. 26Nawobaasakito dey akaasta kutit hamfeen biyefaat: «Han bar kitawa» yire digak chaagesete.

27Yesus dey geregere: «Harewa! Digotiitawa» yi.

28Es kabaasik Phexiros wolgire: «Daamiiso! Ne sinfaatane akaasta kutit neeki yoonak taan ajajowa» yi.

29Yesus dey: «Yowa» yi. Estan Phexiros goonuussin kerere Yesusniki hamanak akaasta kuti. 30Sinuntano sirusi hugnanon biire dige. Baariis barin koor'anak hambaase: «Daamtaaso! Taan fu'aywa» yit chaagi.

31Yesus geregere shongere kushubaason zatte: «Amantone yo'inar ne, awuni boor'a nibneessi ek hang yitso?» yi.

32Yesusnawa Phexirosna goonuussi girsefe kabaasik sirus yere. 33Goonuussi diise baasso dey zuuttere: «Futok ne Ha'oni Naawa» yit Yesusnik sagadesete.

Yesus Gensaretuk Mettanni Meyanon Fati

(Mar. 6:53-56)

34Yesusnawa nawobaasakitona baariison finere Gensaret sinfa daasta yeesete. 35Estak asuni meya Yesus sinbaason arseteyse biratoosta fa daa zuuttambaase asiissi wosseten mettanni meyanon zuutire barki teshshesete. 36Mettanni meya maybaasi fashanon ta'uk shiiphset feeseter. Ta'i baasso dey zuuttere merobesiissin farsete.

Currently Selected:

Matewos 14: YemsaNTL

Highlight

Copy