OODEZHECHEGAWINEWAH 7
7
1Me dush oo‐oo keëkedood owh keche‐sahsahgewejega‐wenene, Menuh azhewabuk oonoo uhyeëen?
2Oo‐oo keëkedoo owh Stephen, Enenewedoog, nejekewaëdoog, kuhya wayoosemegooyag, bezinduhmook; Owh kache‐peshegandahgoozid Kesha‐Muhnedoo oogewahbuhmegoon enewh kooseminahbuneen Abraham, magwah ayahnid emuh Mesopotamiaïng, chepwah duhnuhkeenid emuh Charraning,
3Oo‐oo dush oogeënaun, Nuhguhdun ewh kedinduhnuhkeewin, kuhya nuhguzh egewh anuhwamudjig, peëzhaun dush emuh uhkeeng kawahbundahenaun.
4Me dush keoönjemahjaud emuh ooduhkeemewaung egewh Chaldæänug, keduhnuhke dush emuh Charraning: ewede dush, kahneboonid oosun oogeäunduhnuhkeeäun enewh oomah uhkeeng kepeduhnuhkeeäud, kenuhwah noongoom anduhnuhkeeyag.
5Kah dush oogemeenahseen ewh debandahsoowin emuh, kah kuhnuhga menik anegookoosittad: oogewahweenduhmahwaun dush wemeenaud ewh chedebanduhmenid, kuhya kaähneka‐bemahdezenejin oonejahnesun, chepwah oonejahnesenid.
6Oo‐oo dush keëkedoo owh Kesha‐Muhnedoo, kenejahnesug tahnahkoowa‐duhnuhkeewug emuh puhkaun uhkeeng; me emuh kaduhzhe‐ahwahkahneïndwah, kuhya kakooduggeïndwah newauk duhsoo pepoon.
7Egewh dush mayuggezejig kadoowahkahneëgoowahjin ningahtebahkoonaug, keëkedoo owh Kesha‐Muhnedoo; bahnemah tahpesahgahumoog, chebuhmeetahwewaud oomah uhkeeng.
8Oogemeenaun dush ewh kekenoowahje‐kishkishegahzoowine‐kekindewin; me dush owh Abraham keöogwissid enewh Isaacun, kahnishwahsoogoon‐uhgezenid dush oogekekenoowahje‐kishkishwaun; kuhya dush Isaac oogeöogwissenun enewh Jacobun; kuhya dush Jacob oogeöogwissenun metauswe ahshe neezh kooseminahbuneen.
9Egewh dush kooseminahbuneeg, kekeshahwanemahwaud, oogeähtahwahganahwaun enewh Josephun cheëzhewenemind ewede Egypting, oogeweejewegoon dush enewh Kesha‐Muhnedoon.
10Kuhya dush keëkoonuhmahgood kuhkenuh enewh ookooduggezewinun, kuhya dush kemeenegood ewh minwandahgoozewin kuhya nebwahkahwin emuh anahsuhmid owh Pharoah Egypting duhzhe‐oogemah; me enewh kahahnoonegood cheöogemahkundung Egypt kuhya kuhkenuh oowegewaum.
11Kekeche‐puhkuhdawenahgud dush, kuhya kekootug-gandahgwud emuh anegookookummegaug Egypt kuhya Canaan; kah dush oogemekunsenahwah egewh kooseminahbuneeg ewh meejim.
12Uhpe dush owh Jacob kahnoondung ahyahnid buhquazhegun ewede Egypting, oogemahjenahzhahwaun enewh kooseminahbuneen netum.
13Menuhwah dush keëzhahwaud oogewahweenduhmahgoowaun enewh Josephun ewh oowejekewaëmegoowaud; kuhya kewahweenduhmoowah owh Pharoah, ewh oodenuhwamahgunun owh Joseph ketuhgishenenid.
14Me dush keähnookeed owh Joseph, chenundoomemind enewh oosun Jacobun, kuhya kuhkenuh enewh oodenuhwamahgunun, neezhwauswe‐meduhnah‐ahshe‐nahnun keduhchewug egewh bamahdezejig,
15Me dush keëzhaud owh Jacob ewede Egypting, keneboo dush, ween, kuhya kooseminahbuneeg.
16Keëzheweenahwug dush ewede Sycheming, keningwahwahwug emuh chebaguhmigoong kahkishpenuhtahwaud owh Abraham enewh oogwissun owh Emmor oosun owh Sychem shooneäun kemeenaud.
17Uhpe dush gagah zhuhyegwah wedebishkoosagebun ewh kahwahweendahmahgagoobunan owh Kesha‐Muhnedoo kekeche‐guhnoonaud enewh Abrahamun, kemeshenoowug kuhya ashkum kebahtuhyeïnewug egewh ahnishenahbag ewede Egypting.
18Nahnauzh kepuhsegweed bakahnezid keche‐oogemah kakanemahsig enewh Josephun.
19Mesuh owh kahwuhyazhemaud kedenuhwamahgunenahnin, kuhya kahmujje‐doodahwaud enewh kooseminahbuneen, cheöonjesahgeje‐wabenahnid oodahbenoojeemene cheneboonid.
20Me ewh uhpe keöondahdezid owh Moses, kekeche-minwahbuhmenahgooze, nesoo‐kezis dush kepuhmeäh emuh oosun oowegewaumening:
21Uhpe dush kahsahgeje‐wabenind, oogeöodahpenegoon enewh Pharoah oodahnissun oogenetahwuggeëgoon dush debishkoo tebenuhwa oogwissun.
22Kekekenooähmahwah dush owh Moses kuhkenuh oonebwahkahwinewah egewh Egyptianug, kemushkahweze dush emuh ekedoowining kuhya emuh ahnookeewining.
23Uhpe dush kahtanemeduhnuh‐duhsoo‐pepoon‐uhgezid, keënandum emuh oodaïng cheähwewahbuhmaud enewh wejekewaün oonejahnesun owh Israel.
24Uhpe dush kahwahbuhmaud pazhik mujjedoodahgood enewh bakahnezenejin, oogemetahgwanuhmoowaun, kuhya oogepuhkittawaun dush enewh Egyptian‐enenewun.
25Keënandum dush wenesittootuhmenid enewh wejekewaün cheweähnoonegood enewh Kesha‐Muhnedoon chebemahjeïndwah: kah dush oogenesittootunsenahwah.
26Kahwahbunenig dush oogewahbundahaun ewh weyow magwah megahdenid, oodahnooënaun dush chepoonanindenid, oo‐oo keënaud, Enenewedoog, kedoowejekewaïndeem; wagoonan wanje‐mujje‐doodahdeyag?
27Owh dush kahmujje‐doodahwaud enewh weejeduhnuhkeewamahgunun oogekaunje‐wabenaun, oo‐oo keënaud, Ahwanan owh kahahnoonik cheöodoogemahwemeyaung kuhya cheöotebahnoonega‐wenenewemeyaung?
28Keweneesh nah, debishkoo kahezhenesud owh Egyptian‐wenene pechenahgoo?
29Me dush keöozhemood owh Moses uhpe kahnoondung oo‐oo ekedoowin kebahbahduhneze ewede Madian duhzhe uhkeeng, oogeöogwissenun dush ewede neezh oogwissun.
30Uhpe dush kahnemeduhnuh‐duhsoo‐pepoonahguk, oogewahbuhmaun ewede puhgwuhduhkummig cheguhyeëe Sinai wahjewing enewh oodangenemun owh Jehovah emuh piskunnanig ishkootan emuh ahnebeeshekaung.
31Uhpe dush wuhyahbundung owh Moses, oogemahmahkahdandaun ewh kahwahbundung: kahpenaunzekung cheguhnuhwahbundung, oogepeöodissegoon ewh oodekedoowin owh Jehovah,
32Oo‐oo keëgood, Neen suh nindow Oo‐Kesha‐Muhnedoomewaun egewh koosebuneeg, oo‐Kesha‐Muhneedoomun owh Abraham, oo‐Kesha‐Muhnedoomun owh Isaac, oo‐Kesha‐Muhnedoomun owh Jacob. Kenuhningishkah dush owh Moses, keminjemeshahgwanemoo dush cheöombish-kinzhegwanid,
33Me dush oo‐oo keëgood enewh Jehovahun, Kesekun enewh kemuhkissenun emuh oonje kesittaung: kechetwahwandahgwud ewh uhkee emuh nebahweyun.
34Ningewahbundaun, ningewahbundaun ookooduggeegoowinewaun egewh nindahnishenahbamug ewede Egypting, kuhya ningenoondaun ooketemahgetahgoozewinewaun, ninpeöonjeëzhah chepuhgedenugwah. Umba dush kegahezhenahzhahoon ewede Egypting.
35Me suh enewh Mosesun enewh kahahgoonwatahwahwahjin oo‐oo keënahwaud, Ahwanan kahahnoonik cheoogemahweyun kuhya chetebahkoonega‐weneneweyun? me suh enewh kahahnoonahjin owh Kesha‐Muhnedoo cheoogemahwenid kuhya chebemahjeëwanid, ewh keguhnoonegood enewh angenun kahwahbuhmahjin emuh ahnebeeshekaung.
36Oogesahgecheweenaun dush uhpe kahwahbundahewad enewh mahmaundahwejegunun, kuhya kekenoowahjechegunun ewede Egypting duhzhe uhkeeng, kuhya miskoogumme‐kechegummeeng, kuhya ewede bahgwuhduhkummig nemeduhnuh‐duhsoo‐pepoon.
37Me suh wah‐owh Moses, kahenaud enewh oonejahnesun owh Israel, Aunwahjega‐wenenewun suh kegahpuhsegwinduhmahgoowah owh Jehovah ke‐Kesha‐Muhnedoomewah pazhik kejekewaëwah, debishkoo neen; me suh owh kabezinduhwag.
38Mesuh owh, kahweejewaud enewh anuhmeähnejin ewede buhgwuhduhkummig kuhya enewh angenun kahkuhnoonegoojin ewede Sinai wahjewing, kuhya enewh kooseminahbuneeg; kahmeenind dush bemahdezewine‐debahje-moowinun cheöonjeähneka‐meenenung.
39Kahween dush kooseminahbuneeg oogenuhittahwahsewaun, kekaunje‐wabenahwaud dush, emuh dush oodaëwaung keëzhekewawug ewede Egypting,
40Oo‐oo keënahwaud enewh Aaronun, Oozhetuhmooweshenaum muhnedoog kanegahneejig kaëneëzhahyaung; mahbuh Moses, kahoonjesahgejeweezheyummingid emuh Egypting duhzhe uhkeeng, kahween nekekanemahsenaun nuhmunj‐anekahgwan.
41Uhpe dush oonoo kezhegudoon oogeöozheähwaun enewh pezhekeensun, oogemeenahwaun dush enewh muzzenechegunun ewh sahsahgewejegun, oogewahwezhanemahwaun dush enewh kahoozheähwahjin tebenuhwa ooneenjewaung.
42Me dush owh Kesha‐Muhnedoo kenuhguhnaud, kepuggedenuhmoowaud cheähnuhmeätuhwahnid enewh meshuh‐kezhegoong ayahnejin, debishkoo azhebeëgahdag emuh oomuzzeëgunewaung egewh aunwahjega‐wenenewug, O emuh Israel oowegewauming andahyag, kegemezhemim nuh nasindjig ahwahkaunug kuhya sahsahgewejegunun nemeduhnuh‐duhsoo‐pepoon ewede buhgwuhduhkummig?
43Aahe, kegeöobenahnahwah oowegewaumansemun owh Moloch, kuhya oodahnungoomun owh kemuhnedoomewah Remphan, muzzenechegunun kahoozheägoog cheähnuhmeätuhwagwah; mesuh kaöonjemahjewenenuhgoog ahwus Babyloning.
44Kooseminahbuneeg oogeähyahnahwah ewh debahjemoowine‐ahnuhmeä‐weguhmig ewede buhgwuhduhkummig, debishkoo kahenahkoonegagoobunan owh Kesha‐Muhnedoo keënaud enewh Mosesun, cheëzheöozhetoonid debishkoo kahezhenahgwuk ewh kahwahbundung.
45Ewh dush ahnuhmeä‐weguhmig kahoodahpenuhmoowaud egewh kooseminahbuneeg oogepeetoonahwah kepeweejewahwaud enewh Joshuaün emuh ooduhkeemewaung egewh mayuggezzejig, mesuh enewh kahsahgejenahzhahwahjin owh Kesha‐Munedoo emuh enahsuhmewaud kooseminahbuneeg, nahnauzh uhpe ookezhegudoomun owh David;
46Mesuh owh kahminwanemegood enewh Kesha‐Muhnedoon, ahpeche dush keënandum chemekuhmoowaud enewh oo‐Kesha‐Muhnedoomun owh Jacob oowegewaumene.
47Solomon dush oogeoozhetuhmahwaun ewh wegewaum.
48Kah ween ahnahwe dahse owh Kache‐ishpandahgoozid emuh ahnuhmeä‐weguhmigoong ooneenjemaung kahoonjeöozhechegahdag; debishkoo akedood owh aunwahjega‐wenene.
49Ewede keche‐kezhegoong nindoogemah‐wuhbewin, kuhya ewh uhkee nenahpishkaun, wagoonan wegewaum kaöozhetuhmahweyag? ekedoo owh Jehovah: ahneende dush kaduhzhe‐aunwabeyaun?
50Kah nuh ween neen ningëoozhetoosenun kuhkenuh oonoo uhyeëen tebenuhwa neneenjeen keähyooyaun?
51Kenuhwah kagaunzetuhmag kuhya kakenoowahje‐kishkizhegahzoosewag emuh kedaëwaung kuhya emuh ketuhwuggahwaung, kahgenig kedahgoonwatahwahwah owh Keche‐Oojechaug, debishkoo kahezhechegawaud egewh koosewahbuneeg, mesuh kuhya kenuhwah azhechegayag.
52Ahwananun enewh aunwahjega‐wenenewun kahpwahkooduggeähwahwahjin egewh koosewahbuneeg? oogenesahwaun dush enewh kezhah kahdebahjemoonejin wepeëzhaud owh Kache‐quuhyuk‐ezhewabezid, mesuh enewh kenuhwah noomuhyuh kahbahtahag kuhya kahnesag:
53Kenuhwah kahoonjeöodahpenuhmag ewh tebahkoonegawin emuh ooneeenjewaung egewh angenug, keguhnuhwanduhsewag dush.
54Uhpe dush kahnoonduhmoowaud oonoo uhyeëen, kekeche‐nishkahdezewug emuh oodaëwaung, me dush kahezhemadwayahbitashenootuhwahwaud.
55Ween dush, kemooshekenashkahgood enewh Keche‐Oojechaugwun, quuhyuk keënahbe keche‐kezhegoong enuhkuhkayah, oogewahbundaun dush oopeshegandahgoozewin owh Kesha‐Muhnedoo, kuhya enewh Jesusun nebahwenid emuh ookechenekahning enewh Kesha‐Muhnedoon.
56Oo‐oo dush keëkedood, Benuh, newahbundaun kezhik nesahkoosing, kuhya enene Oogwissun nebahwenid emuh ookechenikaung owh Kesha‐Muhnedoo.
57Me dush kekeche‐pepahgewaud kuhya kekuhkebe-shaëdezoowug, kuhya oogequaushkoonoodahwahwaun mahmahwe.
58Keche‐oodanaung dush oogeöonjesahgeche‐wabenahwaun kuhya oogepemwuhsinahahwaun enewh: egewh dush dabahjemoojig oogeähtoonahwah enewh oodahgwewinewaun emuh oosittaung owh pazhik ooshkenuhwa Saul kahezhenekahzood.
59Oogepemwuhsinuhahwaun dush enewh Stephenun, magwah ahnuhmeätuhwahnid enewh Kesha‐Muhnedoon, oo‐oo keëkedoonid, Tabaningayun Jesus, oodahpin ninjechaug.
60Keöojecheengwunetum dush kuhya kekeche‐kezhewa, oo‐oo keëkedood, Tabaningayun, kagoo ahpuhgesetahwahkan maunduh mujjeëzhewabezewin. Uhpe dush oo‐oo kahekedood kenebah.
Currently Selected:
OODEZHECHEGAWINEWAH 7: OTW
Highlight
Share
Copy
Want to have your highlights saved across all your devices? Sign up or sign in
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
