OODEZHECHEGAWINEWAH 6
6
1Me dush oonoo kezhegudoon, uhpe kahmeshenoowaud egewh anuhmeähjig, egewh Hellenistug oogenahnahpahgaunzoomahwaun enewh Hebrewun, oonje enewh ooshegahmewaun gagoo kemeenahsememind ewh anduhsoo kezhik mahdahoonedewining.
2Egewh dush metauswe‐ahzhe‐neezh oogenundoomahwaun kuhkenuh enewh kekenooahmahgunun, oo‐oo dush keëkedoowaud, Kahween enandahgwussenoon nenuhwind chenuhguhduhmaung ewh oodekedoowin owh Kesha‐Muhnedoo, chebuhmeetuhmaung enewh wesenewahgunun.
3Umba dush nejekewaëdoog, nunduhwahbuhmik kenuhwah anduhcheyag neeshwauswe enenewug manwahjemindjig, kuhya mwaushkenashkahgoojig enewh Keche‐Oojechaugwun kuhya nebwahkahwin, kaähnoonungejig oo‐oo cheühnuhnookewaud.
4Nenuhwind edush ween ningahpuggedenedezoomin moonzhug cheähnuhmeähyaung, kuhya chekuhgequayaung debahdoodahmaung ewh ekedoowin.
5Kuhkenuh dush anduhchewaud egewh kahmahwunjeëdejig oogemenootahnahwah ewh ekedoowin: me dush kewuhwanahbuhmahwaud enewh Stephenun, enenewun mwaushkenashkahgood dabwayanduhmoowin kuhya Keche‐Oojechaugwun, kuhya Philipun, kuhya Prochorusun, kuhya Nicanorun, kuhya Timonun, kuhya Parmenasun, kuhya Nicolasun kahquakeenejin Antioch duhzhe enenewun:
6Me suh enewh kahahsahwahjin emuh enahsuhmuhbenid enewh apostleün: uhpe dush kahahnuhmeähwaud, oogeëzheneenjetuhwahwaun enewh.
7Ashkum dush kemahjegemahgudene oodekedoowin owh Kesha‐Muhnedoo; ashkum dush kekeche‐bahtuhyeënoowug egewh anuhmeähjig ewede Jerusaleming; kuhya dush keche nebewah egewh sahsahgewejega‐wenenewug oogepahbahmetaunahwah ewh dabwayanduhmoowin.
8Stephen dush, mooshkenashkahgood ewh dabwayanduhmoowin kuhya mushkahwezewin, kekeche‐mahmaundahwejega emuh anduhzhe ahyahnid enewh ahnishenahban.
9Me dush kepuhsegwewaud ahnind dabandahgoozejig emuh ahnuhmeä‐weguhmigoong, ewh azhenekahdag oodahnuhmeä‐weguhmigoowah egewh Libertinug, kuhya egewh Cyrenianug, kuhya egewh Alexandriaïng duhzhe enenewug, kuhya Ciliciaïng kuhya Asiaïng duhzhe enenewug, ahzhedakahwahwaud enewh Stephenun.
10Kah dush oogetamahmauzheähsewaun apeech kenebwahkah‐kezhwanid, kuhya keweedookahgood enewh Keche‐Oojechaugwun.
11Me dush keähnoonahwaud enewh enenewun, oo‐oo cheëkedoonid, Ningenoondahwahnaun mahbuh chemujje‐duhzhemaud enewh Mosesun, kuhya enewh Kesha‐Muhnedoon.
12Oogeoömbahzoomahwaun enewh ahnishenahban, kuhya enewh katezenejin, kuhya enewh oozhebeëga‐wenenewun, kepenaunzekahwahwaud, ketuhkoonahwaud dush, kuhya kepeëzhewenahwaud emuh anduhzhe kahkekedoong,
13Oogeähsahwaun dush enewh kakenuhwishke‐debahjemootahganejin, oo‐oo kahekedoonid, Wah‐owh enene kah ekah poonetooseen mujje‐duhzhindung maunduh kachetwahwandahgwuk wegewaum, kuhya ewh tebahkoonegawin:
14Ningenoonduhwahnaun muh oo‐oo cheëkedood, Mahbuh Jesus Nazarething duhzhe enene oogahbahnahjetoon maunduh wegewaum, kuhya oogahaunjetoonun enewh ezhetwahwinun kahpuhgeduhnuhmoonung owh Moses.
15Kuhkenuh dush egewh namuhduhbejig emuh kahkekedoo‐weguhmigoong, kekeche‐guhnuhwahbuhmahwaud, oogewahbuhmahwaun dush angening cheëzhenahgwudenig oodangwyene.
Currently Selected:
OODEZHECHEGAWINEWAH 6: OTW
Highlight
Share
Copy
Want to have your highlights saved across all your devices? Sign up or sign in
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
