Marako 13
13
1Kandi abere amahuluka omu yekaru, omuwuma hali abasomesebwawa biwe mwamubwera atya Omusomesya, Langera amabwe ano okwali, nerihimbwa lino okuliri. 2Yesu mwamubwera atya Wabone erihimbwa lino erinene? sihandisyasigalaho hano eribwe eriri ha ribwe, eritandisyawuswa ahesi.
3Obwabya enyanikere ha buruka obwa Zeituni omu meso a yekaru, Petero na Yakobo na Yohana na Anderiya mubamubulya omu mbita ambu 4Tutulireho ebinywa ebi bikandisyabyaho muwulu wahi? Kandi akerilankereraho kali hayi akebi byamasusana erihikirira ebyosye? 5Kandi Yesu mwatanga eribabwera atya Mwerinde omuntu owosye aleke eribatalya. 6Banene bakandisyasa omu lina lyage, ebanemubuga ambu ningye oyu; kandi bakandisyatalya banene. 7Kandi munasabya mwamowa oluhe, neriranganwa eryoluhe, simusyatuntura: bihikirere eribyaho; baitu emperero esiriyabyaho. 8Baitu erihanga likandisyaramayera erihanga, nobukama bukandisyaramayera obukama; hakandisyabyaho emisiki omu myanya eyindi neyindi; hakandisyabyaho ebihe; ebi neryo eritanga eryobutsune.
9Baitu mwerindege inywabene: baitu bakandisyabahayo omu nkuratero: kandi omu masoloreryo neho mukandisyaswirirwamu: kandi mukandisyimana omu meso abalemi nabakama habwage, eribya mujulizi habali. 10Kandi kihikirere enjiri eribuga eribwererwa amahanga awosye. 11Kandi obubakandisyabya bamabatwala eribahererayo, simusatanga erituntura ebimukandisyabuga: baitu ekimukandisyahebwa ekyosye, omu kasumi ako, nekyo mwanasabuga, baitu syali inywe mukabuga, baitu Omwoyo Ogurukwera. 12Muwala wenyu akandisyahayo omuwala wabo eriitwa, na ise akandisyahayo omwana; abana bakandisyamanera abababuta, bakandisyabitisya. 13Kandi mukandisyanobwa abosye habwerina lyage: nayo akandisyawuma erihika ha mperero, neyo akandisyatsunwa.
14Baitu mukandisyabya mukalangera ekirinubwa ekikahwerekereraya ekyenemene ahali ekitowene (ayakasomamu ayetegerezaye) nubwo abali omu Buyudaya batebete ha buluka; 15eyoli ha hewulu yenyumba syandagale, mwanabya eriingiramu, erilusyamu ekintu omu nyumba yiwe: 16noyu eyoli omu rima, syasubeyo eryenda oruwoye ruwe. 17Baitu sikandisyababana abali nobukole, nabakonkaya omu bero ebi. 18Musabe sibihikirere omu bero ebyempeho. 19Baitu ebero ebi bikandisyabya byobutsune, ebitebyabaho biti Nyamuhanga abya erihanga ebyahangawa, na hatya hosye, kandi sibindisyabaho. 20Eribya Mukama ataratwireho ebero ebi, sihangatsunirwe muberi owosye; baitu habwabakomi, abayakomamu, mwatwaho ebero. 21Omu bero ebi owosye mwanababwera atya Langera, Kristo ali hano; mbeno ali oku; simusakiriraya: 22baitu Bakristo abamabehi nabanabi abamabehi bakandisyahagana, bakandisyakola ebyamahano nebirihuniriraho, batalaye, kikandebya kyamasoboka, abakomi. 23Baitu mwerinde inywe: langera, nababwerire ebyosye kera.
24Baitu omu bero ebi obutsune obu buhwereho, eryuba likandisyalima, nomwegesera syandisyakolerya nomwesera wawo, 25nesyangununu sikandisyabya sikatoga erilwa omu lubula, nobusobozi obuli ha lubula bukandisyatenganibwa. 26Nubwo bakandisyalangera Omwana womuntu enyane mwasera omu bilumbi namani manene nekinyimyo. 27Kandi nubwo akandisyatuma bamaraika biwe, akandisyasongya abakomi biwe erilwa hali empeho ini, erilwa ha mperero yekitaka erihika ha mperero eyolubula.
28Kandi mweyire hali omutini orufumu rwawo: omutahi lyawo lyamabya lyalobire, likalasa amakoma awo, bulya munasi omwaka enyali hakuhi. 29Kandi nainywe neryo mukandisyabya mwamalankera ebinywa bino byamahikirira, mumenye ali hakuhi, ha nyuyi. 30Mazimakwo ngababwera ndya Obusinge buno sibundisyahwaho neriwuma, mbeno ebi ebyosye bikandisyabya byamabiyehwa erihikirera. 31Lubula nekitaka bikandisyahwaho: baitu ebinywa byage sibindisyahwaho. 32Baitu ha kero eki mukanabya akasumi ako sihali eyobyasiho, mubanabya abamaraika abali omu lubula, mwanabya Omwana baitu Tata wage eyowene. 33Mwerinde, mulangere, musabe; baitu simwasi akasumi hakandisyahikira. 34Nkomuntu eyowasiga enyumba yiwe, enyakalala omu kitaka ekindi, amalire erilayera abairu biwe rubale, neribaha emirimu yabo omuwuma muwuma, enyanemulayera omukumirizi eribana. 35Neryo mulankere inywe: baitu simwasi nyinyeka hakandisyasera, mbeno obutuku buirire, mbeno omu itumbi, mbeno omu nkoko, mbeno omu nkyakya; 36akandisyabya amasa luba aleke eribeya mwayire otulo. 37Kandi ekyangababwera inywe nekyo ngababwera abosye ndya Mulangere.
Currently Selected:
Marako 13: KOO1914
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1914.
