Marako 12

1Kandi mwatanga erikanya nabo omu syefumo. Omuntu mwahera oruharo orwemizabibu, mwalwirako orukorobera, mwalimamu endeba, mwahimbamu ekilindiro, mwairamu abalimi, mwagenda omu kitaka ekindi. 2Kandi ekiremu kyabere kyamahika mwatuma omuiru rubale hali abalimi, ahebwawe hali abalimi, ha biwuma byemizabibu. 3Kandi mubamuwata, mubamuswirya, mubamuhiga, esyawete akantu. 4Kandi mwasubera eribatumera omuiru rubale owondi; noyu mubamuswirya orubale, mubamugirya esyesoni. 5Kandi mwatuma owondi noyu mubamuita: nabandi abanene; abandi mubabaswirya, abandi mubabaita. 6Abya enyakinawete omuwuma, omwana owakanza: hanyuma mwamutuma ahabali, mwabuga atya Bakandisaga omwana wage. 7Baitu abalimi abo mubabwerana ebabene ambu Ono neyo Omuwetwa, mwase tumuite, nobuwetwa bukandisyabya bwetu. 8Mubamuwata, mubamuita, mubamuwusa eyihya yoruharo rwemizabibu. 9Neryo mukama oworuharo rwemizabibu akandisyayira ati? Akandisyasa kandi akandisyahwerekererya abalimi, oruharo rwemizabibu akandisyaluha abandi. 10Simuli mwasoma eki ekyahandikirwe, ambu

Eribwe abahimbi eribagana,

Eri mulihindurwa omutwe woluhimbo:

11Eki mukyalwa hali Mukama,

Kandi kya ilolo omu meso etu.

12Kandi mubasondya erimuwata; mubasaga endeko; baitu mubamenya abatwerirwe abo orufumu oru: mubaleka, mubagenda.

13Kandi mubatuma ahali abamu Bafalisayo na Baherodiani, erimusonasona omu binywa. 14Kandi babere bamasa, mubamubwera ambu Omusomesya, tunasi iwe oli wamatsema, kandi ebinywa ebyomuntu owosye solibiirako omutema: baitu solisolola omu bantu, baitu okegesaya omuntsera owa Nyamuhanga omu matsema: kiwene erigemulera Kaisali ebintu, nandiki sikyo? 15Tuheyo nandiki tuleke? Baitu abere amamenya obugobya bwabo, mwababwera atya Mukanyoheraya ki? Mundetere edinali, ngibane. 16Mubaletayo, Mwababwera atya Ekisisani kino nebihandikirweho bino nebyandi? Mubamubwera ambu Bya Kaisali. 17Yesu mwababwera atya Muheyo hali Kaisali, ebya Kaisali, na hali Nyamuhanga ebya Nyamuhanga. Mubamuswekera kutsebu.

18Kandi muhasa ahali Abasadukayo, abakabuga ambu sihali erisuba; mubamubulya ambu Omusomesya, 19Musa mwatuhandikira atya Muwala womuntu amabya amakwa, amasiga omukali wiwe, atasigire omwana, muwala wabo atwale mukali wiwe, amubutire omuwala wiwe abana. 20Kandi habya abagala erinda; omumberi mwahikya omukali, mwakwa atasigire abana; 21kandi owakabiri mwamuhikya, mwakwa, kandi nayo mwatasigaho abana. Nowakasatu neryo atya; 22nabosye erinda mubatasigaho abana. Hanyuma abosye bahoireho, nomukali mwakwa. 23Omu Erisuba akandisyabya mukandi hali abo? baitu erinda mubamuhikya. 24Yesu mwababwera atya Nekyo mukatalira, eritandimenya Ebyahandikawa, mwanabya amani a Nyamuhanga? 25Baitu bakandisyabya bamasuba omu baku sibandisyahikya, mulyanabya eriherukya; baitu bakandisyabya nkabamaraika abomu lubula. 26Baitu ebyabakwire, nerisubirwa lyabo, simuli mwasoma omu kitabu kya Musa ha Kisaka, Nyamuhanga okuyamubwera, mwabuga atya Ningye Nyamuhanga wa Iburahimu, Nyamuhanga wa Isaka, Nyamuhanga wa Yakobo? 27Syali Nyamuhanga wa baku, baitu wabakalire: mwatere kutsebu.

28Kandi omuwuma hali abahandiki mwasa, mwabowa ebakabulanaya ibabene, kandi enyanasi abasubiremu endeke, mwamubulya atya Ekilayero kihi ekikatanga ha byosye? 29Yesu mwasubamu atya Ekikatanga kyakino, Owa Isareri; Mukama Nyamuhanga wetu, Mukama ali muwuma; 30kandi owanzege Mukama Nyamuhanga wawu nomutema wawu owosye, nobukali bwawu bwosye, namagezi awu awosye, namani awu awosye. 31Ekyakabiri kyakino, Anza omutahi wawu nkokayanza iwowene. Sihali ekilayero ekindi ekikarenga ebi. 32Omuhandiki mwamubwera atya Mazimakwo Omusomesya wabuyire endeke, ali omuwuma; kandi sihali owondi, mbeno eyo yowene; 33kandi erimwanza nomutema owosye, neritegererya eryosye, namani awosye, neryanza omutahi wawu nkokokayanza eyowene, kikalenga kutsebu ebibembo ebyosye ebihikirere ebyokibwe nebyonzera. 34Kandi Yesu abere amabana amusubiremu neritegererya, mwamubwera atya Suli hali nobukama bwa Nyamuhanga. Kandi hanyuma sihali omuntu eyowawuma erimubulya.

35Kandi Yesu mwasubamu, obwabya akasomesya omu yekaru, mwabuga atya Abahandiki nikihi ekikababuyisaya ambu Kristo mwana wa Daudi? 36Daudi eyowene mwabuga omu Mwoyo Ogurukwera atya

Mukama mwabwera Mukama wage atya

Ikala ha kuboko kwage okwokuli,

Erihikya obukandisyahindula abanyanziwa bawu akatumbi kebisando byawu.

37Daudi eyowene akamwahola Mukama wiwe; akabya ati omwana wiwe? Kandi abendeko mubamowa nerisemererwa.

38Kandi omu somesya liwe mwabuga atya Mwerinde Abahandiki, abakanza erigenda ebambete ebiryambala ebiri, neriramukibwa omu butale, 39nebitumbi ebyakatikati omu masoroleryo, nemyanya eyekinyimyo omu bugenyi, 40abakalya esyenyumba esyabakokali, kandi abakasaba kutsebu omu bugobya; abo bakandisyawerwa omusango owalengire obunene.

41Kandi mwaikala eritungerera bikero, mwalankera endeko okuyawusa erupiya omu bikero; abanene ababya bali abatungi mubawusamu enene. 42Kandi muhasa omukwakali omuwuma omunaku, mwawusamu obuhendi bubiri neyo kodolanti. 43Kandi mwabirikira abasomesya biwe, mwababwera atya Mazimakwo ngababwera ndya Omukwakali ono omunaku awusiremu ebinene erilenga abosye abakawusayo omu bikiro; 44baitu abosye bawusiremu ebikabasayerera, baitu oyu omu bunaku bwiwe awusiremu ebyosye ebyawete, neryo itungo liwe eryosye.

Currently Selected:

Marako 12: KOO1914

Highlight

Copy