Marako 11

1Kandi babere bamahererana hakuhi na Yerusalemi, bahikire Besifage na Besaniya, ha buluka obwa Zeituni, mwatuma abasomesebwawa biwe babiri, 2mwababwera atya Mugende omu muyi owali omu meso: kandi munemuhika eryoneryo mukandyeya ekyana kyenkaina ekihangirwe, ekitakasambwako omuntu; muhankulekyo mukilete. 3Kandi owosye eyokandebya anemubabwera atya Mukakola kihi kino? inywe mubuge ambu Mukama wetu akakeyetaga; kandi eryoneryo akandisubulyakyo kuno. 4Mubagenda, kandi mubeya ekyana kyenkaina kihangirwe hakyaswa ehihya omunzera; kandi mubahangulakyo. 5Kandi abawuma hali abo ababya ebanemene aho, mubababwera ambu Mukakola ki erihangula ekyana kyenkaina? 6Mubababwera nka Yesu okuyababwera: kandi mubabaleka. 7Kandi mubaleta ekyana kyenkaina hali Yesu, mubakyiwusaho ebyambalo byabo; kandi mwaikala kukyo? 8Banene mubasesa ebyambalo byabo ha nzera; abandi mubasesa amakoma, owubatwa omu malema. 9Kandi ababya ebanemwebembera kandi ababya ebanemukwamera, mubabirikira Hosana; aherwe omuyisa eyokasa omu lina lyo Mukama; 10Buherwe omuyisa obukama bwamasa, obwasokulu wetu Daudi; Hosana ha lubula kutsebu.

11Kandi mwahika Yerusalemi, mwaingira omu yekaru; kandi abere amabuga eribungya ameso erilangera ebyosye, obutukwe bwabya bwamasa eriira, mwahuluka, mwagenda Besaniya nikumi nababiri.

12Kandi obutuku bwakere, obubabya balwire omu Besaniya, mwalumwa enzara. 13Kandi abere amalangera hali omutini owawete amakoma, mwasa mbeno akandibana ekiwuma hawo, kandi abere amahikawo mwatabana ekintu, mbeno amakoma masa: baitu byabya sibiri ebero byitini. 14Kandi mwasubamu mwabwerawo atya Eritandika hatya omuntu sasalya ha ebiwuma byawu ebero nebero. Kandi abasomesebwawa biwe mubowa.

15Kandi mubahika Yerusalemi: mwaingera omu yekaru, mwatandika erihiga ababya bakawulya, kandi ababya bakawula omu yekaru, mwatulika emeza zabakahingisaya efeza, nebitumbi byabo abawula etulikuku; 16kandi mwatakirirya omuntu owosye erirabya ekibindi omu yekalu. 17Mwasomesya, mwababwera atya sikiritahandikwa ambu Enyumba yage esyabirikirawa enyumba eyerisabiramu habwamahanga osye? baitu inywe mwahinduireyo obwingera bwa banyagi. 18Abanyakatagara abakulu nabahandiki babere bamowa mubasondya okubakandisyamuhwerekererya: baitu mubamusaga, baitu esyendeko esyosye mubasweka obwerisomesya liwe.

19Kandi obutuku obubwairaga mwahulukaga omu kikali.

20Kandi omu nkyakya, obubabya bakalaba mubalangera omutini enyomire erilwa ha kitina. 21Petero mwalenkekanya mwamubwera atya Rabi, langera omutini owuwakyena omire. 22Yesu mwasubamu mubabwera atya Mubye nerikirirya hali Nyamuhanga. 23Mazimakwo ngababwera ndya Owosye akandisyabwera oburuka buno ambu Lusayibwaho kandi osawe omu nketsi; osuliwulukawulukaya omu mutema wiwe, baitu mwikirirya ambu ekyakabuga kikandisyahikirira; neyo akandisyahebwa. 24Neryo ngababwera ndya Ebinywa ebimukandisyasaba ebyosye nerisengererya, mukirirayege ambu mubiherwe, kandi bikandibahebwa inywe. 25Kandi mukandisyabya mwamemana mwamasaba, muganyirege mwamabya munawete ekinywa ha muntu; neryo Tata wenyu ali omu lubula abaganyirege ebiribihya byenyu. [26Baitu obumutaganyira, na Tata wenyu eyoli omu lubula salisyaganyira ebiribihya byenyu.]

27Kandi mubasubula hali Yerusalemi; kandi obubabya bakagendera omu yekaru, muhasa ahali banyakatagara abakuru nabahandiki, nabakuru; mubamubwera ambu 28Busobozi kihi obukakukolaya bino? mbeno nendi oyowakuha obusobozi buno erikola bino? 29Kandi Yesu mwababwera atya Nangye ngandibabulya inywe ekinywa ekiwuma, munsubemu, nage ngandibatulirawo inywe obusobozi okubuli obukankolaya bino. 30Eribatiza erya Yohana mulyalwa omu lubula, nandiki omu bantu? munsubemu. 31Mubabulanya ebabene, mubabuga ambu tukandebya tumabuga ambu Mulyalwa omu lubula — akandibuga atya Kandi nikihi ekyabatanga erimukirirya? 32Baitu tukandebya tumabuga ambu Mulyalwa omu bantu — mubasaga abantu: baitu abosye mubalenkekanya mali Yohana eribya nabi. 33Mubasubamu Yesu mubabuga ambu Sitwamenyire. Yesu mwababwera atya Nage sindi ndibatulirawo inywe obusobozi okubuli obukankolaya bino.

Currently Selected:

Marako 11: KOO1914

Highlight

Copy