مَتّی 20

اَنگِرَ باغی کارگَرون مَثَل

1« آستامونی پادیشاهی هِنتَه باغَه صاحیبی اَمونیَه کن سوکَه خون کَکا بِرِن شَه تا اِشتَن اَنگِرَ باغیرا کاریگرِ بیگِر. 2اَ اَوونَّ گَف ژِشَه کن روجی یَک دینار اَنگِرَ باغی کاریرا هَر کَمی بِدَر. چَی بَه دوملَه اَیِنِش اِشتَن اَنگرَ باغیرا عَندشَه. 3باغَه صاحیب، نِزِک نَه اِ صب هَنی بِرِن شَه و چَند نَفری کن شهری مَیدونیکا بیکار پا مَند بین ویندِش. 4اَیِنِش نی واتَه: ”شمه نی چمن اَنگِرَ باغیرا بشَه و اَچیی کن شمَه حقَ بَشمَه آمَدا.“ 5پس اَیِن نی شینَه. ناهاری موقه نِزِک ساعت دانزَ و آختاو ویگِنی موقه ساعت سه را بِرِن شَه و هَنی هَه کاری کردشَه. 6دییَرمازی نِزِک ساعت پِنجیرا نی بِرِن شَه و هَنی چند نفر دیَر کن بیکار پا مَند بین ویندشهَ. اَوونکا دَپرسِسته: ”چیرا روج دِراازَ اِم جِگاکا بیکار پا مَندیرون؟“ 7جواب داشون: اِمی خونه کن هیچ‌ کَسی اَمه مژدیرا نِگَتشَه.“ باغَه صاحیب اَیِنِش واتَه: ”شمَه نی چمن اَنگِرَ باغیرا بشَه و کار بکَرَ.“ 8دیَرماز، اَنگِرَ باغی صاحیب اِشتَن دَستَکی واتشَه کاریگَرون خِلِه بِکَه و آخریکا شروو بِکَه تا اَوَّلین گله، چَوون مژدی آدَ.“ 9اَ کاریگرِنی کن دییَرمازی نِزک ساعت پِنجیرا آمَه بینَه، هر کرَم یَک دینار ویگَتِشونه. 10وَقتی اَیِنی نوبَه آرَستَه کن گردیکا نارتَر آمَه بینَه، فکراَکَرین کن دییَرکسونکا ویشتَر مژد وینَّگت. ولی هَر کَم اَوونکا نی یَک دینار مژد ویگَتِشون. 11وَقتی اِشتَن مژدی ویگَتشون، اَنگِرَ باغی صاحیبیرا غَر ژِشونَه و واتِشون: 12”اِمِن کن آخیر آمینه فقط یَک ساعت کار کردَشونه و تِه اَوون اَمَنهَ کن روج دِرازَ اَسوجونَه آختاوی بن زَمَت کَشتَمونه، بَرابَر ساستِرَ!“ 13باغَه صاحیب چَوون ایی نفَری واتِش: رفِق اَز بَه تِه ظلمی کَردَم نی. مَگَم چَمَه گَف یَک دینار نِبَه؟ 14پس اِشتَن حَقّی ویگِه و بش! اَز بَپیمَه اِم آخرین نفَری، اِشتِه اندازَ مژد بدرم. 15نِمَشا اِشتَن مالینَه اَچیی کن بَپیمَه بکرم؟ چَم نِداری چمن بخششی بِوینی؟“ 16پس اَینی کن آخِرینَه اَول آنَّب و اَیِنی کن اَوَّلین هِستین، آخر ببین!»

عیسی سِوومین کَرَ اِشتَن مَردِ و مَردَ اونکا راست آبِه پیشگوویی بَکَی

17هَنگومی کن عیسی شهر اورشلیمی طَرَف اَشیه، را دِلَکا، اِشتَن دانزَشاگردی قِرَقیرا بردشَه و اَیِنش واتَه: 18«دَیسَه کایمون اورشَلیمیرا شِه. اَجگاکا اینسانی زوعَه سَران کاهینون و توراتی موعَلیمون تَسلیم بکَنَه. اَیِن بَی مَردِ را مَحکوم بَکَن. 19و اَیِن اینسانی زوعَه، غَیر یَهودیون دَست آنَّدا تا اَی دَسپَر بیگن و شَلاق بِژَنن و صَلیبیکا ای جیبَستن. و اَ سوُّمَه روجیکا زندَ آرَبن.»

یعقوب و یوحنی نَنَه دَرخواست

20اَموقه یعقوب و یوحنی نَنَه اِشتَن دِ گِلَه زوعَه نَه عیسی وَر آمین، یعقوب و یوحنی زبدی زوعَه اِن بینَه. چَوون نَنَه عیسی نَ کا زِنگ ژِشَه و اَپیش بَه عیسی چَی طَمارزو برآوُردَ بکرِ. 21عیسی دَپرسستَه: «چِه بَپیرَ؟» اَ ژِن واتِش: «بواج تا چمن اِم دِ زوعَه اِشتِه پادیشاهیکا ایلَه اِشتِه راستَه وَریکا و اَیلَه اِشتِه چَپَ وَریکا بنشِن.» 22عیسی جَوابیکا واتِش: «شِمَه نینَّموست کن چِه چیی بَپیرون. بَشارون گولَه ایکا کن اَز، هِم اوری صَبا اَیکا بِنتیم، بِنجَه؟» اَیِن جواب آداشونَه: «ها، بَشامون.» 23عیسی واتِش: «شکی نیَه کن چمن گولَه کا بِنتیرون، ولی بزونَه کن چمن راستُ و چپَ وَریکا نِشتِه، چمن اِختیاریکا نیَه تا اَی کَسی ببخشم. اِم جگا اَ کسِنی شنهَ کن چمن دَدَ چَوونرا آمادَ آکردَشه.»

24وَقتی اَ دَ گله شاگردِ اِم جَریانیکا سَر آگِنِستین، اَ دِ برا را آسرَنگستینَ. 25ولی عیسی اَیِنِش خِلِه کَردَ و واتِش: «شمَه بَموستیرون کن دییَرَ قامون حاکیمِن چَوون سَردِرِ حِکم بَکَن و چَوون رَئیسِن چَوون سَر فِرمون بَدان. 26ولی شِمَه دِلَکا اِنتَرَ مَبو. هَر کَم اَپیشَه شِمَه دِلَکا یال ببو پی شِمَه پاسَری ببو. 27و هر کَم اَپیشه شِمَه دِلَکا اَول ببو پی شمه وَزیَر آبو. 28اِمی خونه کن حتی اینسانی زوعَه نی آمَه نی تا بَی خیدمَت بِکَن، بَلکَم آمَه تا خیدمَت بکَرِ و اِشتَن جانی خَیلیون رَخِستِه خونه فِدا بکَرِ.»

عیسی دِ گِلَه ناوینا و گیدَلییَه مِردی شفا بَدای

29هَنگومی کن عیسی و چَی شاگردن اَریحا کا کایبین شِه، یالَه جَماعتی چَی دوملَه رَونَه بین. 30راه قِرَقیکا، دِ ناوینااَ مِرد نشت بینَه. وَقتی دَرستشون عیسی اَجگاکا کا دَیوَردِ، لَسَه اَژَنین: «آقا، اَی داوودِ پادیشا زوعَه، اَمه رَحم اَکَن!» 31جمعیت اَ دِ نفری سَر تَشَر اَژَنین و اَواجینه کن گَف نِژَنن؛ ولی اَ دِ نفر ویشتَر لَسَه اَژَنینَه کن: «آقا، اَی داوود پادیشا زوعَه، اَمه رحم اَکَن!» 32عیسی مَندَ و اَ دِ مِردی خِلِه کَردِشَه و دَپرسستَه: «بَپیرونَه شِمَرا چِبکَرم؟» 33جواب داشون: «آقا، بَپیمونه چَمه چَمِن آج آبون.» 34عیسی سیجیسته دلینه چَوون چَمون دَست آسا کَردِشَه و جَخت چَوون چَمن آج آبین و چَی دوملَه رَونَه بین.

Currently Selected:

مَتّی 20: CTB

Highlight

Copy