مَتّی 18

چِه کَسی یال تَرَ

1هَه هنگومیکا، شاگردِن عیسی وَرآمینه و دَپَرسستین: «آستامونی پادشاهیکا کی گردیکا یال تَرَ؟» 2عیسی ایلَه خردَنی خِلِه کَردِشَه و اَی چَوون دِلَکا آناشَه 3و واتِش: «حَییقتا بَه شمَه باتیمَه، تا عَوض آمَبه و خردَنون شیوار مَبه، هرگز آستامونی پادیشاهیکا دِلَه دَنینَّش. 4هر کم بَشتَن اِم خردنی شیوارسَر بَجیر بِسازِ، آستامونی پادشاهی دِلَکا گِردیکا یال تَر بَبیَه. 5و هر کم چمن نومینه اِنتَرَ خِردَنی قِبول بِکَر، بَمن قبول کَردَشه.

6«اَمّا هرکم باعیث ببو کن ایلَه اِم گِچونکا کن بَمن ایمان دارن گِناخ بِکَرِن، اَیرا بِیتَرَ کن یالَه آستاوَ سِه ای اِشتَن مِلیکا آبَستِه، دَیرا دوله جگا اونکا غرق آبو! 7برامه اِم دِنیا حالیرا چَی وَس وَسَه اون خونِه! اَلبت کن وسوسَه اوزون هِستَه، ولی برامه اَ کَسی حالیرا کن وَس وَسَه باعیث ببو!

8«پس اَگَم اِشتِه بال یا اِشتِه لِنگ گناخ کَرده باعیث بَبی، اَی آبیرو بِرِن بَرَفَن، اِمی خونه کن ترا بیتَرَ شل و چُلاغ زَیرونَه زندَگی دِلَه دَشی تا اِم کن هَر دِ بال یا دِ لِنگینَه زیرونَه آراکا بَتِه دَرَفَنن. 9و اَگَم اِشتِه چَم اِشتِه گِناخ کرده باعیث بَبی، اَی بَروَ و بِرنیرا برفَن، اِمی خونه کن ترا بیترَ ایلَه چَمینه زیرونَه زندَگی دِلَه دَشی تا اِمکن هَر دِ چَمینه جَندَمی آرا کا تِه ویرَفنن.

گین آبَه پَسی مَثَل

10«حَواسِرون ببو کن هیچ‌کِرَم اِم گِچونکا تحقیر نِکَر، چون شمَه باتیمَه کن چَوون فرشتَه اِن آستامونیکا اوزون چمن آستامونیه دَدَ صَفَتی بَویندین. [11اِمی خونه کن اینسانی زوعَه آمَیه تا اَ کن گین آبَیَه نیجات بدَرِ.] 12چه فکر بکَرون؟ اَگَم مردی صد گله پس بدارِ و ایلَه اَوونکا گین آبو، اَ نود و نَه پَسی کومون دِله آنیَشت و اَ گین آبه دوملَه نیَش؟ 13حَییقتا بَه شمَه باتیم کن اَگَم اَی پَیدا بکَرِ، اَ ایلَه گین آبه پَسیرا ویشتَر خَش آرَب تا اَ نود و نه پَسیرا کن گین آبَه نینَّه. 14هِنتَرکه چمن آستامونیَه دَدَ نِپیستِشَه کن حتی ایلَه اِم گِچِونکا نیفلَه آبون.

اَگَم اِشتِه حَقّی کا بَدی بکَرِ

15«اَگَم اِشتِه برا بَه تِه گناخ بکَرِ، چِی وَر بش و تنخایی چَی خطا بَی بِواج. اَگَم اِشتِه گَفی قبول کَردِشَه، اِشتِه برا هَنی ویندَرَ؛ 16ولی اَگَم قِبول نِکردشه، یَک یا دِ نفر دییَر اِشتَنَّ ببَه تا ”هر گَفی بَبی دِ یا سِه شاهیدی نَه ثابیت ببو“ 17اَگَم نَپیشبه چَوون گَفی نی گوش آدَرِ کلیسا بواج؛ و اَگَم کلیساش نی قبول نِکردَ، اَموقه بَی اَجنبی یا خَراج ویگر خِلِه بکَ. 18حَییقتا بَه شمَه باتیمَه، هر چیی کن زَمینی کا دَبستَه، آستامونیکا دَبَسته بَبیَه؛ و هر چیی کن زمینیکا آج آکَرَ، آستامونیکا آج آرَبن. 19هَنی بَه شمَه باتیمَه کن هر وَقت دِ نفر شمَه کا زَمینی سَر هر مسئله‌ ای را کن چَی خونِه سؤال بکَنَه یِن دِنهَ موافق ببون، واقییَن چمن دَدَ طَرَفیکا کن آستامونیکارَ چوونرا اَنجوم ببَی 20اِمی خاطِر کن جگایی کا کن دِ یا سه نفر چمن نومینه جَم آبون، اَز نی اَجگا کا چَوون دلَکا هِستیمه.»

بیرَحمَه پاسَری مَثَل

21چَی بَه دوملَه پِطروس عیسی وَرآمه و دَپرسِستَه: «آقا، تا چَنکَرَ اَگَم چمن برا بَمن گناخ بکَرِ پی اَی ببخشم؟ تا هف کَرَ؟» 22عیسی جواب داشَه: «بَه تِه باتیمَه کن نِکِن هف کَرَ، بسکَم هفتادْ گلَه هف کَرَ.

23« اِمی خونه کن بشامون واتِه آستامونی پادیشاهی، هِنتَه شاهی شیوارَ کن تصمیم گَتَشه اِشتَن پاسَریونّه تسویَه حیساب بکَرِ. 24پس وَقتی دمندَ حیسابرَسی کَرد، ایی نَفَری چَی وَر وَردشونه کن دَ هَزار قنطار بَی قرضدار بَه کن ایله کاریگری دویست هَزار سالی مِژد بَه، پادیشا قرضار بَه. 25ولی اِمی خونه کن اَ نَشایَه اِشتَن قرضی بدَرِ، چَی اَرباب دستور داشَه اَو چَی ژنو و خردَنینَه و گرد چَی دارایی بخرَشن و چَی طلبی ویگِن. 26پاسَری اِشتَن اَربابی خاشتو خازینَه واتِش: ”بَمن وقت بِدَ تا گردِ اِشتِه قرضی آدَرم.“ 27اَربابی دل چَی حالیرا سیجیستَه وچَی قرضی بَخشستشَه وبَی آزاد آکَردش. 28ولی هَنگومی کن اَ پاسَری بِرِن اَشیَه ایلَه اِشتَن هَمکارونکا بَویندی کن صد دینار کن ایلَه کاریگری سه ماه مِژد بَه، بَی قرضار بَه. پس اَش گَتَه و چَی لوکی فرچین آداشَه و واتِش: ”اِشتِه قرضی بدَه!“ 29چَی هَمکار چَی لنگون نَ کا برگِنِسته و خاشتو خازینه واتِش: بَمن فرصَت بِدَ تا گرد اِشتَن قَرضی آدَرم.“ 30اَمّا اَ قِبول نِکردشه، بَلکَم شَه و اَی زیندانیکا دَرَفندش تا اِشتَن قرضی بدَرِ. 31هَنگومی کن دییَرَ پاسَریِن ام ایتفاقی بَویندینَه، برک بَرضخ آبین و اِشتَن اَربابی وَرشینَه و گرد ایتفاقی چَیرا جیگیر کردشون. 32پس اَرباب، اَ پاسَری اِشتَن وَر خِلِه کَردِشَه و واتِش: ”اَی آوشَرَ پاسَری، مَگَم اَز اِشتِه خاشتو خازی خونِه گرد اِشتِه قَرضی نِبَخشستمَه؟ 33مَگَم نِباید ته نی اِشتِه همکاری رحم بِکَریشَه، هَته کن اَز بَه تِه رحم کَردِمه؟“ 34پس اَرباب آسَرنگستَه و بَی زیندانیکا درَفندش تا اَموقه کن و گرد اِشتَن قَرضی بدَرِ. 35و هِنتَرَکِه، چمن آستامونیَه دَدَ نی شِمَنَه کن اِشتَن برا دِلیکا مَبَخشِه، هِنتَه رَفتار بَکَی.»

Currently Selected:

مَتّی 18: CTB

Highlight

Copy