مَتّی 17

عیسی صَفَتی عَوَض آبِه

1شَش روج بَه دوملَه، عیسی، پِطروس و یعقوب و چَی برا یوحنا پِرَگت و اَوون اِشتَنَه بَرزَکوهی سَر بَردِشَه تا اَجِگاکا تنخا ببون. 2اَجگا کا ، چَوون ناریکا، عیسی نمود عوض آبه، چَی دیم آختاوی شیوار شَپَق اَژنی و چَی شندر، نوری شیوار ایسبی آبه بَه. 3اِم هنگومیکا، موسی و اِیلیا پیغمبر چَوون چَمی نَ کا اَیر آبین و عیسی نه گَفاگف دَرِ بین. 4پِطروس عیساش واتَه: «آقا، چَنَه چاکَه کن اَمه اِم جِگاکامون. اَگَم بَپیر سه گِلَه پَرَسِی آمَکَرد، ایلَه تِرا، ایلَه موسی را و ایلَه نی ایلیاسیرا.» 5هنوزَنی اِم گَف پِطروسی زونی سَر بَه کن ایکَرَ ایی خِری چَوون سَریکا سا بَرَفَندشه کن شَپَق اَژَنیَه وسَسی خِریکا آرَستَه کن اَواجیَه: «اِم چمن خاجَتیَه زوعَه یَه کن بَیکا راضی ایمه؛ بَی گوش آدَرَ!» 6اِم سَسی دَرستِه خونِه، شاگردِن بَرک تَرسِستین و صَفَتینَه خاکی سَردِرِ برگِنستین. 7ولی عیسی نِزِک آمه و اِشتَن بالی چَوون سَریکا آناشَه و واتِش: «راست آبَه و مَترسه!» 8وَقتی کن شاگردِن اِشتَن چَمون آکردشون، غَیر اَز عیسی دیَیرَ کَسی نِویندِشون.

9هَتَه کن اَیِن کایبین کوکا ویرمِه، عیسی اَیِنِش دَستور داشَه و واتش: «اَچیی کن ویندِرون کَسیرا جیگیر نِکرَ، تا زمانی کن اینسانی زوعَه مَردِ بَه دوملَه زندَ آبو.» 10شاگردِن اَیکا دَپَرسِستین: «چیرا توراتی موعَلیمِن باتینَه کن اَولیکا پی ایلیاسِ پَیغمبَر با؟» 11عیسی جواب داشَه: «البت کن ایلیاس بومَیَه و گردِ چیون اَوَلنَه شیوار سِی آرَکَرد. 12ولی اَز بَه شمَه باتیمَه کن ایلیاس آمَه یَه، ولی اَی نِه آزنِستِشون و هر چیی اَپیشون بَه بَینه کَردشون. هِن تَرَکِه اینسانی زوعَه نی چَوون بالینه آزار بَویندینَه.» 13اَموقه شاگردن سَر آگِنینَه کن تَمعید اَدَر یحیی خونِه اَوونَّه گَف اَژَنیَه.

پَریانیَه زوعَه شفا

14وَقتی جَماعَتی وَر ویگَردستین، مِردی عیسی کا نِزِک آبه و چَی نَ کا زِنگ ژِشَه و واتِش: 15«آقا، چمن زوعَه سَر رحم اَکَن. اَ غَشیَه و چِتین عذاب بَکَشتی. اِمی خاطر کن اوزون آرا کا و آویکا بَرَگنست. 16اَی اِشتِه شاگردون وَر وَردمَه ولی نشاستشونَه بَی شفا بِدَرن.» 17عیسی جَوابیکا واتِش: «اَی بی‌ایمان و مونحریفَه اودوم، تا کَینی شمَه نَه ببوم و شِمَه تَحمل بکَم؟ اَی اِم جِگارا و چمن وَر بوعَرَ.» 18عیسی پَریانی سردِرِتَشَر ژِشَه و پَریان زوعَه کا بَرشه و اَ جَخت شفا گَتشَه. 19اَموقه شاگِردِن عیسی وَرآمینه و خَلوتیکا بَیکا دَپَرسِستین: «چیرا اَمه نِشاستِمونَه اَ پَریانی بِرِن بَرکَرم؟» 20عیسی جواب داشَه: «اِمی خونه کن شمه ایمان کَمَه. حَییقتا بَه شمَه باتیمَه، اَگَم ایلَه خَردَلَه دونَه اَندازَ ایمان بِدارَ، بَشارون اِم کوه بواجَه اِم جگا کا اَجگارا بِشو“ و اَ بَشیَه و هیچ چیی ایی شِمرا ناممکن نیَه. 21[ولی اِم جِنس پَریان غَیراز روجَه و دوا هیچ چینَه بِرِن بَنیَش.]

عیسی اِشتَن مَردِ وزنده آبِه دِوومین کَرَ پیشگویی بَکَی

22هَنگومی کن عیسی و چَی شاگردن جَلیلیکا یَندِ وَرجَم آبَه بینَه، عیسی اَیِنِش واته: «اینسانی زوعَه مردومی بالیکا تسلیم بَبیَه. 23اَیِن بَی بَکشتینَه و اَ سوُّمَه روجیکا زندَ آرَبن.» شاگردِن برک بَرضَخ آبین.

معبدی مالیات

24وقتی عیسی و چَی شاگردن کَفَرناحومیرا آرَستین، مأمورِنِ، مالیاتی کن دِ دِرْهم بَه و معبدی شن بَه ویرَگِرینَه، اَیِن پِطروسی وَر آمینَه و دَپَرسِستین: «شمه اِستا مَعبَدی مالیاتی آنیَدا؟» 25پِطروس جواب داشه: «البت کن بَدایَه!» وَقتی پِطروس کَرا شَه، قَبلِ اِمکن چیی بواجِه عیسی بَی واتِشَه: «شَمعون تِه چِه فِکَر بَکَش، دِنیا پادیشاهِن کیکا باج و خراج وینَّگَت؟ اِشتَن خردَنونکا یا خَلکیکا؟ چیش باتی؟» 26پِطروس جواب داشه: «خَلکیکا.» عیسی بَی واتِش: «پس چَی خردنن موعافینَه! 27ولی اِمی خونه کن اَوون بَرضَخ آمَکَرم، دَیراچه وَر بش و میکالی ویرَفَن. اولین مای کن گَتِرَ چَی گَوی آج آکَه کن چار دِرْهَمیَه سِکَّه ای بَویندیشَه. اَینه چمن و اِشتِه مالیاتی رَسَتی اَوون بِدَ.»

Currently Selected:

مَتّی 17: CTB

Highlight

Copy