یوحنا 11

ایلعازری مردِ

1مِردی ایلعازَر نوم آزاری بَه. اَ آوادیی بِیت‌عَنْیا آدَمونکا بَه، هَه آوادیی کن مریم و چَی خالا مارتا اَ جِگا ایی بین. 2مریم هَه ژِنی به کن خداوندی لنگون عطر ژِشَه و اِشتَن ذلفینهَ چَی لنگونِ خشک آکَردش. ایسَه مریَمی برا ایلعازَر آزاری آبَه بَه. 3پس ایلعازَری خالا اِن عیسی را پَیغوم آداشونَه، واتِشون: «آقا. اِشتِه خاجَتیَه رَفق آزاریَه.» 4عیسی وَقتی اِم خبرَی دَرستِشَه، واتِش: «اِم آزار مَردِ را تَمون آنیَب، بَلکَم خدا جَلال دوعه خونِه یَه، تا خدا زوعَه جلال پَیدا بکَرِ.» 5عیسی، مارتا و چَی خالا و ایلعازَری رَی داری. 6پس وَقتی عیسی دَرَستِشَه کن ایلعازَر آزاریَه، دِ روج دییَر اَ جِگا ایکا کن مند بَه، مَندَ.

7چَی بَه دوملَه عیسی اِشتَن شاگردون واتِشَه: «بِرَ هَنی وِلَته یهودیَرا بشَم.» 8چَی شاگردِن واتِشون: «اِستا، خَیلی وَقت گذَشته نی کن یهودیِن اَپیشون بَه بَتهِ سِنگسار بکَن و ته هَنی بَپیرَ اَجگارا بشی؟» 9عیسی جواب داشَه: «مَگَم روج دانزَ ساعت نیَه؟ اَگَم کَسی روجیکا گَل بژَنِه نییَلِسکیست اِمی خونه کن اِم دِنیا نوری بَویندیَه. 10اَمّا اَگَم کَسی شَویکا گَل بَژَنِه بَلسکیستی، اِمی خونه کن چَی دِلَکا نوریی نیَه.» 11اِم گَفون بَه دوملَه اَیِنِش واتَه: «چَمَه رَفِق ایلعازَرخِتَه، ولی بَشیمه تا اَی پِکَرم.» 12شاگردِن عیساشون واتَه: «آقا، اَگَم خِتَه، سی آرَبن.» 13عیسی ایلعازری مَردِ خونه گَف اَژَنیَه، ولی شاگردِن فکر اَکَرینَه عیسی منظور اِمَه کن ایلعازَر ایستراحتیرا خِتَه. 14اَموقه عیسی آشکارا اَینِش واته: «ایلعازَر مردَیَه 15و شمه خونه را خَشیمه کن اَجگا کا نِبیمَه، تا ایمان بوعَر. ولی ایسَه بِرَ چَی وَر بِشَم.» 16پس توما، کن اَی دوقولو خِلِه اَکَرین، دییَرَشاگردِنِش واتَه: «بِرَاَمه نی بِشَم تا اَینه بِمرَم.»

عیسی مردَ اون زِندَ آرکَردو زندَگی سرچشمَه یَه

17وَقتی عیسی بیت عنیارا آمَه، سَر آگِنَه کن ایسَه چار روجه ایلعازَری تربَه کاشون دَنوعَه یَه. 18بِیت‌عَنْیا اورشلیمکا نِزِکِ سه کیلومتر فاصیله داری. 19خَیلی یهودیونکا مریم و مارتا وَرآمَه بینَه تا اَوون چَوون برا مَردِ خونِه آلاوِنِن. 20پس وَقتی کن مارتا دَرَستشَه عیسی اَجگارا بومَی چَی اِیستقبالیرا شَه ولی مریم کَکا مَندَ. 21مارتا عیساش واتَه: «آقا، اَگَم اِم جِگاکا بیشه چمن برا نَمِریَه. 22ولی بَموستیم کن حتی ایسَه نی هر چی ایی خدا کا بخای بَته آرَدا.» 23عیسی بَی واتِش: «اِشتِه برا راست آرَبن.» 24مارتا بَی واتِش: «بَموستیم کن اَ روجیکا کن مردَاِن زندَ آبون راست آرَبن.» 25عیسی واتِشَه: «اَزیمَه کن مردَاون زندَ آمَکَرد و از زندَگی هِستیم. اَ کن بَمن ایمان بوعَرِ حتی اَگَم بِمِرِ، زِندَ آرَبن. 26و هر کَم زندَیَه و بَمن ایمان دارِ هرگز نیَمَردِن؛ اِمی باور بَکَشَه؟» 27مارتا عیساش واتَه: «ها، آقا، اَز ایمان دارم کن تِه هَه وعدَ آدوعَه مسیح، خدا زوعَه ایشَه، هَه کن پی اِم دِنیا دِلَرا بای.»

28وقتی مارتا اِمی واتش، شَه اِشتَن خالا مریمی خِلِه کَردِشَه و خلوتیکا بَی واتِش: «اِستا اِم جگا کارَ و بَتِه خِلِه بَکَی.» 29مریم وَقتی اِمی دَرستشَه جَخت پِبه و عیسی وَر شَه. 30عیسی هَنوزَنی آوادیکا دَشه نِبَه، بَلکَم هَنوزَنی هَه جگااییکا بَه کن مارتا چَی ویندَیرا شَه بَه. 31یهودیِنی کن مریمَینه کَکا بین و اَی آلاوِنین وَقتی ویندِشونَه کن مریم جَخت پِبه و بِرِن بَرشَه چَی دوملَه رَونَه بین. اَیِن فکر اَکَرینَه مریم تربَه سَر بَشیه، تا اَجگاکا بِبرَمِه. 32وَقتی مریم اَجگارا کن عیسی مَند بَه آرَستَه و اَی ویندش چَی لنگون بِن بَرَگنستهَ و بَی واتِش: «آقا، اَگَم اِم جِگاکا بیشه چمن برا نَمِریَه.» 33وَقتی عیسی مریمی بَرمَستِه ویندشه و یهودینی کن اَینه درِ بینه ویندش، اِشتَن روح دِلَکا بَرک بَرضَخ آبَه و تَتَّه وَسَه دَگِنَه 34و واتش: «ایلعازری کِرَم جگا کا نوعرونَه؟» اَیِن واتِشون: «آقا به و بِوین.» 35عیسی برمِستَه. 36پس یهودیِن واتِشون: «دَیسَه چَنه ایلعازَری رَی داریَه!» 37اَمّا بعضی واتِشون: «مَگَم اِم شَخص کن اَ ناوینا اَ مِردی چَمون آج آکَردشَه، نَشایَه ایلعازَری مَردِ نَ بیگِرِ.»

عیسی ایلعازری زندَ آرَکَرد

38چَی بَه دوملَه عیسی، هَنی هَتَه بَرضَخَه حالینه تربه سَر آمه. تربَه، غاری بَه کن چَی گَویکا کازی آنوعَشون بَه. 39عیسی واتشَه: «کازی کَناریرا گِلِل آکَرَ.» مارتا، اَ مَردَ خالا عیساش واتَه: «آقا، ایسَه دِ بو دَگِنستَیَه، اِمی خونِه کن چار روجه کن مردَیَه.» 40عیسی بَی واتِش: «مَگَم بَته نِواتِمَه کن اَگَم ایمان بوعَری، خدا جلالی بَویندیشَه؟» 41پس کازی قِرَقیرا گِلل آکَردِشون. اَموقه عیسی آستامونی دَیَشتشَه و واتِش: « دَدَ بَتِه شِکر بکَم کن چم سَسی دَرَستَرَ. 42اَز اَزنیمَه کن اوزون چمن سَسی دَشَرَست. اَمّا اِمی اَیِنی خونه واتِمَه کن اِم جگا کا مَندینه، تا ایمان بوعَرن کن، تِه بَمن رَونَه آکَردَر.» 43اِمی واتشَه و چَی بَه دوملَه تَته لَسَّه نَه سَس آداشَه: «ایلعازَر، بِرِن بَرا!» 44پس اَ مِردی کن مَردَ بَه، هَته کن چَی بال و لِنگ کفنیکا دَبَسته به و دستَمالی چَی صَفَتی دووریکا پِپِشتَشون بَه، تِربه کا بِرِن آمَه. عیسی اَیِنِش واتَه: «اَی آج آکَر و بَرزَ بِشو.»

عیسی کِشتِه نَقشَه

45پس خَیلی یهودیونکا کن مریمی ویندِرا آمَه بین و کاری کن عیسی چی برا خونه کَردَش بَه ویندشون بَی ایمان وَردِشونه. 46ولی بَعضی اَوونکا، فَریسیِون فرقه عالیمون وَر شینَه و اَیِنشون واتَه کن عیسی چَش کَردَیَه. 47پس سرانِ کاهینِن و فَریسیِن گَفه ژَنَه را نشتینَه، واتِشون: «چِبکَرَم. اِمی مِرد وِرَ نِشونَه اِن و موعجیزَ اِنی بَکَی. 48اَگَم بَرزَم هنتَه نَ بشو، گرد بَی ایمان بوعَردینَه و رومیِن بومَنَه و هِم مَعبدی و هِم چَمَه قامی، چَمَه بالیکا وینَّگَت.» 49ولی ایلَه اَوونکا کن چَی نوم قیافا بَه و اَ سالیکا یالَه کاهین بَه، دییَرَ کَسون واتِشَه: «شمه هیچی ایی نینَّموست 50و نینَّفَهمست شِمَرا بِیتَرَ کن ایی نفر مردومیرا بِمِرِ تا اِم کن گِردِ قام نیفیت آبون.» 51اَمّا اِم گَف اَیکا نِبَه، بَلکَم اِمی خونه کن اَ سالیکا یالَه کاهین بَه، اِنتَرَ پیشگویی کردشَه کن عیسی قامی خونِه بَمَردیَه، 52عیسی بَمَردیَه ولی نه تاکَه قامی خونِه، بَسکَم تا خدا خِردَنون کن دِنیا گِردِ جِگا اونکا ولاخ آبَه اینَه ایی جِگا کا گِرد آکَرِ و اَوون یَکی آکَرِ. 53پس اَ روجیکا اَیِن نَقشَه کَشتِشونَه تا عیسی بِکِشن.

54اِمی خاطِر عیسی دِ یهودیون دلَکا آشکارا شِه و آمِه نَکَریَه، بَلکَم شهرییرا کن چَی نوم افرایِم بَه و جِگا اییرا کن وَیاوونییکا نِزِک بَرا شَه و اِشتَن شاگردونَّه اَجگاکا مَندَ.

55یهودیون پِسخَه عید نِزِک بَه و بَرکَه آدَمِنی هَمَه جِگاکا شهر اورشَلیمیرا شینهَ تا عیدَ روجون بَه نه، پاجا به رسمی اَنجوم بِدَن. 56اَیِن عیسی دومله بینَه وهه حالیکا کن معبدی صراکا پا مَندبین یَندِ اَواجینه: «چه فکر بَکَرون. عیسی اصلا عیدیرا نا؟» 57سران کاهینِن و فَریسیِن دستور آدعَشون بَه کن هروَقت کَسی بَموستی عیسی کِرَم جگاکارَ پی اَوون خبر بِدَر تا اَی ویلاخِنِن.

Currently Selected:

یوحنا 11: CTB

Highlight

Copy