یوحنا 10

چاکَه شونَه اَزیم

1«حییقتا بَه شمَه باتیم، اَ کن بَرَنگانَه پَسون گاچی دِلَه دَنیَش بَلکَم دییَرراکا کَفا بشی، پتارچی و راه زَنَه. 2اَمّا اَ کن بَرَنگاکا دِلَه دَرَش، پَسون شونه یَه. 3دربون، بَرَنگا چَیرا آج آرَکَرد. پَسِن چَی سَسی گوش آدرن و اَ اِشتَن پَسون نومینه خِلِه بَکَی و اَوون بِرِن بَبردی. 4وَقتی گردِ اِشتَن پَسون گِردی بِرِن بَروَردِش، چَوون ناردَکَربَشی و پَسِن نی چَی دومله بَشینَه اِمی خونِه کن چَی سَسی آزنِن. 5پَسِن خَلکی دوملَه نینَّش، بَلکَم اَیکا بَوریتینَه، اِمی خونه کن خَلکون سَسی آنینَزنی.»

6عیسی اِم مثالی چَوونرا واتِش، ولی اَیِن سَر آنِه گِنینَه کن اَوون چِه باتیَه.

7پس ایکرَ دییَراَیِنِش واتَه: «حَییقا بَه شمَه باتیم، اَز پَسونرا بَرَنگا ایمَه؛ 8گِردِ اَیِنی کن بَمنکا بَه نَ آمینَه پتارچیی و راه زَنینَه، ولی پَسِن چَوون سَسی گوش آنِداشونَه. 9اَز ’بَرنگا ’ ایمه؛ اَگَم کَسی چمن راه نَه دِلَه درَش، نیجات پَیدا بَکَی، آزادانه دِله دَرَش و بِرِن بَرَش و علَف چَر پَیدا بَکَیَه. 10پتارچی نییام غَیراز پتارستِه و کِشته و نیفیت آکَردِ خونِه؛ اَز آمَه ایمَه تا آدَمِن زندَگی بِدارن و اَیکا نی فِرَوون بِدارِن.

11«چاکَه شونَه اَزیمَه. چاکَه شونَه اِشتَن جانی پَسونرا دَرِ. 12کَسی کن پولی خونه کار بَکَی، شونه شیوار نیَه و پَسِن چَی شِن نیَنّه، هر وَقت بِوینه وَرگ کا آمِه، پَسون آهَرزِ و بَوریتی و وَرگ پَسون بَبَردیَه و اَوون ولاخ آرَکَرد. 13اَ بَوریتی اِمی خونه کن اَ مِژِدیرا کار بَکَی و پَسون فیکریکا نیه. 14چاکَه شونَه اَزیمَه. اَزاِشتن پَسون آمَموست و پَسِن بَمن آزنِن، 15هَته کن دَدَ بَمن آزنِه و اَز دَدَ آمَموست. اَزاِشتن جانی پَسونرا آمَدا. 16دییَرَ پَسِنی دارم کن اِم گاچیکا نینَّه. اَوون نی پی بوعَرم و اَیِن چمن سَسی گوش آنَّدا. اَموقه اَیِن ایلَه رَمه آنَّب، ایلَه شونه نَه. 17دَدَ بَمن اِمی خونِه رَی دارِ کن اَز اِشتَن جانی دَرِم تا اِشتَن جانی پس ویگِم. 18هیچ‌کَم چمن جانی بَمنکا وینیَگَت بَلکَم اَز اِشتَن مِیلینَه اَی آمَدا. اِختیار دارم اَی آدَرم و اِختییار دارم اَی پس ویگِم. اِم حکمی اِشتَن دَدَکا ویگَتَمَه.»

19اِم گَفون خونِه ایکَرَ دییَر یهودیون دلَکا ایختلاف دَگنستَه. 20خَیلی اَوونکا واتِشونَه: «اَ پَریانیه و تُورَ؛ چیرا بَی گوش آدَرَ؟» 21دییَرَ کَسِن واتِشون: «اِم ایله پَریانیَه آدَمی گَفِن نیَنَّه. مَگَم پَریان بَشایَه ناوینا چَمون سی آکَرِ؟»

اَز و دَدَ ایلَه هِستیمون

22شهر اورشَلیمیکا، عید وقف معبَد، آرَستَه بَه. زمِستون بَه، 23و عیسی معبدیکا، سلیمونی اِسبو سَر گَل اَژَنیَه. 24یهودیِن چَی دوور جَم آبینَه و بَی واتِشون: «تا کَینی بَپیرَ اَمه چیمَه میمَه کا غَم بَری. اَگَم تِه وَعدَ آدوعَه مسیح ایشَه، چَمَرا دیار آکَه.» 25عیسی جواب داشَه: «اَز شمَرا واتم، ولی شِمَه باور نِکَرَ. اَ کارونی کن اَز اِشتَن دَدَ نومینه بَکَم، چمن خونه شاهیدی دَرِن. 26اَمّا شمه باور نِکَرَ، اِمی خونِه کن چمن پَسونکا نینّه. 27چمن پَسِن چمن سَسی گوش آنَّکَرد؛ اَز اَوون آمَموست و اَیِن چمن دوملَه بومَن. 28اَزاَوون زَیرونَه زندَگی دَرِم و اَیِن هیچ موقه نیفلَه آنینَّب. هیچ کس نییَشا اَوون چمن بالیکا آبَرِ. 29چمن دَدَ کن اَوون بَمن آدوعَشَه گردیکا یال تَرَ و هیچ‌کَم نیَشا اَوون چمن دَدَ بالیکا آبَرِ. 30اَز و دَدَ ایلَه هِستیمون.»

31اَموقه ایکَرَ دییَر یهودیِن سِه پگَتشون تا عیسی سِنگ سار بکَن. 32عیسی اَیِنِش واتَه: «وِرَ چاکَه کارون دَدَ طَرَفیکا شمَرا آمونستِم. کِرَم گلَه اَ کارون خونه بَپیرونَه بَمن سِنگسار بکَرَ.» 33یهودییِن بَی جواب داشون: «اِشتِه چاکَه کاری خونِه نییَه کن بَپیمون بَته سِنگسار بِکَرَم. بسکَم اِشتِه کفر واتِه خونِ یَه کن بَپیمون بَته سنکسار بِکرم. اِمی خونه کن تِه اینسانیشَه و باتیشَه کن خِداایشَه.» 34عیسی چَوون جوابیکا واتش: «مَگَم شمَه موقدسَه نوشتَه اونکا آمَه نیَه کن ”واتِمَه، شمَه خدایان هِستینَه“؟ 35اَگَم اَیِنی کن خدا کلام اَوون آرَستَه، ’خدایان‘ خِلِه بَبینَه- و موقدسَه نوشتَه اِن نی هیچ آنییَب - 36چِنتَر بَشانَه کَسی کن دَدَ بَی وقف کردشَه و دِنیا دِلَرا عَندشه، بواجه ”کفر باتیش،“ تاکَه اِمی خونِه کن واتمَه اَز خدا زوعَه ایمهَ؟ 37اَگَم چمن دَدَ کارون اَنجوم آنِدامه، اَموقه بَمن ایمان مَوَرَ. 38ولی اَگَم اَ کارون اَنجوم دَرِم، حتی اَگَم بَمن ایمان نینَّورد، اَ کارون ایمان بوعَرَ تا بزنَه و سرآگِنَه کن دَدَ چمن دلکارَ و اَزَ نی دَدَ دلَکا.» 39اَموقه دییَرَکَرَرا اَپیشون بَه اَی ویلاخنِن اَمّا چَوون بالیکا بَروَشتهَ.

40عیسی هَنی اوردونی رِباری اَوَریرا شَه و اَ جِگاکا مندَ. اَجگا ایی کن یحیی چیمی بَه نَ تعمید اَدَریَه. 41خَیلیِن چِی وَر آمینَه. اَیِن اَواجینه: «هر چَنَه یحیی هیچ نشونه و معجیزایی نِکردشَه، ولی هر چی ایی اِم مِردی خونه واتِشَه راست بَه.» 42پس خَیلیِن اَجگا کا بَه عیسی ایمان وَردشونَه.

Currently Selected:

یوحنا 10: CTB

Highlight

Copy