رَسولون اَعمال 9

سولوسی ایمان وَردِ

1ولی سولوس کن هَتَرَکِه خداوندی شاگِردون تَهدید کَردِ و کِشتِه ایدامَه اَدَری، یالَه کاهِنی وَر شَه 2و اَیکا نامَه ایی دَمِشقی عیبادَتگا اونرا اَپیش بَه، تا اَیِنی کن عیسی پِیرو اینَه و اَوونَّه اَهل طَریقَت باتینَه، چِه ژِن و چِه مِرد، ویلاخِنِه و اورشَلیمیرا بوعَرِ.

3وَقتی کن سولوس راه دلَکا دَمِشقی نِزِک آرَبی، ایکَرَ ایی نوری آستامونیکا چَی دوور شَپَق ژِشَه 4سولوس زَمینی سَر گِنِستَه، و سَسی دَرَستِشَه کن بَی اَواجی: «شائول، شائول، چیرا بَمن اَیذَت و آزار بَکَش؟»

5سولوس جواب آداشَه: «خِداوَندا تِه کیشَه؟»

جواب آمَه: «اَز اَ عیسی ایمَه کن تِه بَی اَیذَت و آزار بَکَش. 6ایسَه، پِب و شَهریرا بش. اَ جِگاکا بَتِه واتِه بَبی کن پی چِبکَری.»

7سولُسی هَم سَفَرِن کن بَینَه دَرِ بین جوت پِگِنستین؛ اَیِن سَسی دَرَرَسین، ولی کَسی نَوینینَه. 8سولوس زَمینی سَریکا راست آبَه، هر چَنَه کن چَی چَمِنِ آج بینَه ولی چیی ایی نَشایَه ویندِ؛ پس چَی بالِشون گتَه و بَی دَمِشقیرا بَردِشون. 9سولوس سِه روج کوربَه و چیی ایی نَری و نِنجی.

10دَمِشقی دلَکا عیسی ایلَه شاگِردونکا، حَنانیا نوم اَمونیَه. خداوند رویا دلَکا بَش واتَه: «حنانیا!»

حنانیا جَوابِش دوعَه: «بله خداوندا، اِم جِگاکام.»

11خداوند حَنانیاش واتَه: «پِب و کوچَه ایرا کن ‘راست‘ نوم بَداشتی بش و یَهودا کَکا سولوسِ تارسوسی سورَغی بیگِه. اَ کا دِوا کَردِ، 12و رویا دِلَکا مِردی حَنانیا نوم ویندَشَه کن، آ و چَی سَریکا بال پِرَنا، تا اَ هَنی بوینِه.»

13ولی حَنانیا جوابِش دوعَه: «خداوندا، خَیلیونکا اِم مِردی خونِه دَرَستَمَه کن اِشتِه موقدسون اورشَلیمیکا اَیذَت آزار کَردَشَه، 14و اِم جِگاکا نی سَران کاهِنون طَرَف ایختیار بَداشتی تا هَر کَمی کن اِشتِه نومی بوعَرِ، ویلاخِنِه.»

15ولی خداوند حَنانیاش واتَه: «بش، اِمی خونِه کن اِم مِرد چمن اینتخاب آبَه وسیلَه اَ، تا چمن نومی غَیر یَهودیونرا و چَوون پادیشاهِن و یَهودی مردومیرا اییلام بکَرِ. 16اِمی خونه کن اَز بَی آمونِستِم کن چمن نومی خونِه چِه عذابِنی پی بکَشه.»

17پس حَنانیا را دگِنِستَه و اَ کَه دِلَه دَرمَه و اِشتَن بالون چَی سَریکا پِناشَه واتِش: «شائول برا، خداوند، یَعنی هَه عیسی کن، وَقتی کن اِم جِگا را کایبیش آمِه راه دلَکا تِرا اَیر آبَه، بَمنِش عَندَیَه تا اِشتَن بینایی هَنی بَه دست بوعَری و خدا موقدسَه روح کا پَتلَمَه آبی.» 18جَخت چیی ایی پولَکی شیوار شائولی چَمیکا بَرگِنِستَه و اَ هنی اَشایَه ویندِ، چَی دوملَه پِبَه تعمید گَتِش. 19چَی بَه دومله غذاش هَردَ و زبق گَتِش.

شائول عیسی خونه عیبادَگاکا گَف بَژَی

شائول چَند روجی شاگِردونَّه دَمِشقیکا مَندَ. 20اَ، جَخت یهودیون عیبادَتگا کا اِم پَیغومی اییلام کَردِ شِروو کَردِشَه کن، عیسی خدا زوعَه یَه. 21هَر کَم چَی پَیغومی دَرَرَسی حَیرون آرَبیَه و اَواجی: «مَگَم اِم هَه نیَه کن اورشَلیمیکا، اَیِنی دِلَکا کن عیسی نومی خِلِه بَکَن خَرا خِلِه راست آرَکَریَه، و اِم جِگارا آمَه تا اَوون ویلاخنِه و سَران کاهِنون وَر بِبَرِ؟» 22ولی شائول روج بَه روج قودور تَر آرَبیَه و دلیلِنی اَوَریَه کن نَبیَه اَوون رَد کردِ، و دمِشقی یَهودیون دیم پِرَنَری و ثابیت اَکَریَه کن عیسی، هَه وَعدَ آدوعَه مسیحَه.

23وِرَ روجِنی گِذَشَه، یَهودییِن شائولی کِشتِرا نقشَه شون کشتَه. 24ولی شائول چَوون نَقشَکا سَر آگِنَه. اَیِن شَو و روج شائولی کِشتِرا شَهری دَروازَاون سَریکا کِشَک اَدَرینَه. 25ولی شائولی شاگِردِن، شَویرا اَی زَنبیلَه کا آناشون، و شَهری دیواری شیکافیکا اَشون بنیرا آداشون.

26وَقتی شائول اورشَلیمیرا آرَستَه، اَپیش بَه شاگِردون آگِنِه، ولی گِرد اَیکا اَتَرسینَه، اِمی خونِه کن باوَر نَکَرینَه اَ واقییَن عیسی شاگِرد آبَه ببو. 27اَمّا بَرنابا شائولِش پِگَته و رَسولون وَر وَردِش، و واتِش کن چِنتَه دَمِشقی رادِلَکا خداوندی ویندِش و خداوند چِنتَرَکِه شائولینه گَف ژِشَه و اَ، چِنتَه دَمِشقیکا جورئَتینَه عیسی نومینَه آموج داشَه. 28پس شائول چَوون وَریکا مَندَ و آزادانَه اورشَلیمیکا شِه آمِه اَکَریَه و جورئَتینَه خداوندی نومینَه آموج اَدَریَه. 29اَ یَهودیونی نَه کن چَوون زبان یونانی بَه، بَحث و گَفَه ژَنِه اَکَری، ولی اَیِن اَپیشون بَه شائولی بِکِشِن. 30وَقتی بِرااِن اِمیکا سَر آگِنین، بَی شهر قیصَریَه را بَردِشون و اَ جِگاکا بَی، شهر تارسوسیرا عَندِشون.

31اِنتَرَکِه کلیسا گِردِ یَهودیَه و جلیل و سامِرَکا آلاویستَه و آمبَست آرَبی و ایماندارِن خداوندی تَرسیکا زندَگی اَکَرین و خدا موقدسَه روح تَشویقینَه هر روج چَوون تیعداد ایضاف آرَبیَه.

اینیاسی شفا

32پِطروس کن گِردِ اَ اَطرافیکا اَگَردیَه، موقدسَه آدَمِنی کن شهر لودَّه کا اَمونینَه چَوون ویندِرا شَه. 33اَ جِگاکا مِردی اینیاس نوم ویندِشَه، کن هشت سال فَلَج و زَمین گیر بَه. 34پِطروس بَش واتَه: «اینیاس، عیسای مَسیح بَتِه شفا آرَدا. پِب و اِشتَن خِتَه جِگا جَم آکَه!» اَ جَخت پِبَه، 35و چَی ویندِ خونِه گِردِ اَیِنی کن لودَّه و شارونیکا اَمونین، بَه خداوند ایمان وَردِشون.

36شهر یافا کا شاگِردی طابیتا نوم اَمونیَه. یونانیون زبانینَه بَه طابیتا دُروکاس باتین کن چَی معنی گَنزَ. اِم ژِن بَشتَن چاکَه کارون اَنجوم دوعَه و دَس دَریسون آرَستِه را وقف کَردَش بَه. 37طابیتا هَه روجون کا آزاری آبَه و مَردَ. پس چَی مَیِّتی شوشتِشون و بالا خونَه کا آناشون. 38چون لودَّه شهر یافا نِزِک بَه، وقتی شاگِردِن فَهمِستِشون پِطروس لودَّه کارَ، دِ نَفَر چَی وَر عَندِشون و واتِشون: «خاشتو خازِمونَه جَخت چَمَه وَر بای.»

39پِطروس پِبَه اَوونَّه شَه. وَقتی کن اَ جِگارا آرَستَه، اَشون بالاخونَه را بردَ. ویوَ ژِنِن گِرد چَی دووری گَتِشونَه، بِرَمِه نَه شِندِرِنی کن دورکاس، زندَ بِه موقه چَوونرا دَشتَش بَه، پطروسی آمونِستِشون.

40ولی پِطروس گِردِش اُتاقیکا بِرِن بَرکَردِش و زِنگ ژِشَه و دِوا کَردِش. چَی بَه دوملَه مَیِّتی طَرَف آگَردِستَه و واتِش: «طابیتا، پِب!» طابیتا اِشتَن چَمِنِش آکَردَ و وقتی پِطروسیش ویندَ، نِشتَه. 41پِطروس چَی بالی گَتِشَه و بَی راست آکَردِش. اَموقه موقدسَه آدَمِن و ویوَ ژِنون خِلِه کَردِشَه و طابیتاش زِندَ چَوون دَست آداشَه. 42اِم خَبَر یافا گِردِ جِگا اونکا پَخش آبَه و خَیلییِن بَه خداوند ایمان وَردِشون. 43پِطروس نی وِرَ روجونی شهر یافا کا ایلَه دباقی وَر کن چَی نوم شَمعون بَه، مَندَ.

Currently Selected:

رَسولون اَعمال 9: CTB

Highlight

Copy