رَسولون اَعمال 8

سولوس کلیسا اَیذَت آزار بَکَی

1سولُس اِستیفانی کشتِه نَه موافیق بَه. اَ روجیکا بَه دومله، چَتینَه اَیذَتی اورشَلیمی کِلیسا اون سَر شِرو بَه، اَدَ کن غَیراَز رَسولِن، گِردِ ایماندارن ولَته یَهودیَه و سامِرَ اَطرافیرا وِلاخ آبین. 2چنگِله خداشناسَه مِرد اِستیفانی چال کَردِشون و چَیرا یالَه عازیَه ایی گَتِشون. 3ولی سولُس کِلیسا اون سَر چَتینه غَضَبینَه اَتاجونیَه و کَه بَه کَه اَگَردی، و ژِنون ومِردون بِرِنیرا دَرَراکنی و زیندانیکا دَرَفَنی.

فیلیپُس سامِرَکا

4اَ ایمان دارِنی کن اَیذَت آزاری خونه وِلاخ آبَه بین، هَر جِگارا کن اَشینَه، خداکَلامی خَشَه خَبَری اَدَرین. 5فیلیپُس نی سامِرَ ایلَه شَهرونرا شَه و مسیح خونِه اَ جِگا آدَمِنِش آموج داشَه. 6وِرَ مَردوم وَقتی فیلیپُسی گَفِنِشون درَستَه و نِشونَه اِن و موعجیزَ اِنی کن اَیکا اَیر آرَبیَه ویندِشون، گِرد دیقَتینَه اَ چیی ایی کن اَواجی گوش اَدَرین؛ 7اِمی خونه کن پَلیدَ روحِن جِکَّلَنه و تَتَه لَسَّه نَه خَیلونکا کن چَوون خاطِر ویلاخیستَه بینَه، بِرِن آین و خَیلییِن فَلَجونکا و شِلونکا شفا اَگِرین. 8اِمی خاطِر اَ شَهر یالَه خَشینَه پَتلَمه آبَه.

شَمعون جاودوگری ایمان وردِ

9اَمّا اَ شَهریکا مِردی شَمعون نوم زندَگی اَکَریَه کن مُدَتی بَه اِشتَن جاودوگَرینَه سامِرَ آدَمون حَیرون آکَردَش بَه و اِیدعا اَکَری یالَه کَسی یَه. 10گِرد، گِچو یالیکا، بَی گوش اَدَرینَه و اَواجینَه: «اِم مِرد خدا هَه خِنَرَ کن بَی ’یالَه خِنَر‘ نی باتینَه.» 11آدَمِن چَی گفون گوش اَدَرین، اِمی خونِه کن خَیلی وَقت بَه اِشتَن جاودو گَرینَه، اَوون حَیرون اَکَریَه. 12ولی وقتی مردوم فیلیپُسی پَیغوم کن خدا پادیشاهی خَشَه خبر و عیسای مَسیح نومی خونِه بَه، ایمانِشون وَردَ، مِردو ژِن گِردی غَسل تَعمید گَتِشون. 13حتی شَمعون نی ایمانِش وردَ و تَعمید گَتِه بَه دوملَه، یَژَن فیلیپوسینَه دَرِ بَه. شَمعون، یالَه نِشونَه اِن و مُعجیزَ اونی کن فیلیپُسیکا اَیر آرَبیَه ویندِ خونِه، برک حَیرون آبَه بَه.

14وَقتی رَسولِن اورشَلیمیکا باخَبَر آبین کن سامِریِن خدا کَلامیشون قِبول کَردَیه، پِطروس و یوحنا شون چَوون وَر عَندَ. 15اَ دِ، سامِرَ را آمین و چَوونرا دِوا کَردِشون تا خدا موقدسَه روح ویگِرِن، 16اِمی خونه کن هَنوزَنی هیچ کِرَمی اَوون سَریکا خدا موقدسَه روح ویرمَه نِبَه، بَسکَم تاکَه عیسای خداوندی نومینَه تَعمیدِشون گتَه بَه و هِم. 17چَی به دوملَه پِطروس و یوحنا اِشتَن بالون چَوون سَریکا آناشون و اَیِن خدا موقدسَه روحِشون ویگَتَه.

18وَقتی شَمعون ویندِشَه کن رَسولِن آدَمون سَردِرِ بال آنوعِه نَه خدا موقدسَه روح عَطا بَبی، تلَکَه ایی پول وَردِش و 19رَسولونِش واتَه: «بَمن نی اِم اینجاری آدَرَ تا هَر کَسی سَر بال پِنَرِم، خدا موقدسَه روح ویگِرِ.»

20ولی پِطروس بَش واتَه: «اِشتِه نِقرَ بَتِنَه نیفیت ببو! اِمی خونِه کن فِکر بَکَشَه خداوندی خَلا بَشارَ پولینَه خِرییِه! 21تِه اِم خیدمَتیکا هیچ قِسمَت و رَسَتی نِداری، اِمی خونِه کن اِشتِه دِل خِداوَندینَه راست نیَه. 22پس اِشتِه اِم آوشَر گیریکا توبَه بِکَه و خِداوَندیکا بِپیا تا شایَد اِشتِه دِلی اِم فِکری بِبَخشِه؛ 23اِمی خونه کن بَویندیم اِشتِه وِجود تِلیکا و گِناخیکا اَسیرَ.»

24شَمعون واتِش: «شِمَه مِرا خداوندی وَر دِوا بکَرَ تا اَ چیی ایی کن واتِرون چمن سَر نا.»

25پِطروس و یوحنا، شاهیدی دوعِه و خداوندی کَلامی اییلام کَردِ بَه دوملَه، شهر اورشَلیمیرا ویگَردِستین و رادِلَکا خَیلی سامِرَ آوادیونکا اِنجیلی خَشَه خَبَری اییلام کردِشون.

فیلیپوس و درباری خواجه‌

26اَموقه خداوندی ایلَه فرشتَه فیلیپوسیش واتَه: «پِب و جُنُوبی طَرَف بش، اَ راهی نَه کن، اورشَلیمیکا غَزَه طَرَف بَشی.» اِم راه وَیاوونیَه. 27فیلیپوس راست آمَندَ و رَونَه آبَه، کن رادِلَکا حَبَشیَه خواجَه مردی گِنَه. اَ، کَنداکَه، حَبَشَه مَلَکَه، ایلَه یالَه دَرباریونکا و چَی خَزانَه دار بَه، اَ خواجَه مِرد خدا پرستِش کَردِرا اورشَلیمیرا آمَه بَه. 28اَ اِشتَن وِلَتیرا کایبَه آگَردِستَه و اِشتَن اَرَبَه سَریکا نِشت بَه و اِشعَیای پَیغمبَری کیتاوی اَخونییَه. 29اَموقه خدا روح فیلیپوسیش واتَه: «نِزِک بش و اَ اَرَبَه نَه هَمراه بِب.»

30پس فیلیپوس اَرَبَه طَرَف ویریتَه و دَرَستِش کن خواجَه اِشعَیایِه پَیغَمبَری کیتاوی کا خَندِ. بَی واتِش: «اَ چیی ایکا کن بَخَندیشَه، سَر آشَگِنِست؟»

31درباریَه خواجَه واتِش: «چِنتَه بَشام سَر آگِنِستِه، اَگَم کَسی بَمن راهنَمایی نِکَرِ؟» پس فیلیپوسیکا خاشتو خاز کَردِشَه تا اَرَبَه کا دَنِشِه و چَی وَریکا بِنِشِه. 32اَ قسمَتی کن خواجَه موقدسَه کیتاوی اَخونیَه، اِم بَه کن:

«دِرِست هِنتَه پَسی شیوار کن بَی سَر آبیردِرا بَبَنَه،

و هِنتَه وَرَ ایی شیوار کن اِشتَن رَمَبِرون وَر ساکیتَه،

اَ هَتَرکِه اِشتَن گَویی آنِکَردِش.

33چَی گِچ آبِه موقه، عیدالَت اَیکا دَریغ آبَه؛

کی چَی اودومی خونه بِشایَه گَف ژِ؟

اِمی خونِه کن زَمینی سَردِرِ چَی زندَگیشون ویگَتَه.»

34خواجه‌، فیلیپوسیش واتَه: «خاشتو خازِمَه بَمن بِواجی کن اِم جِگا کا پَیغمبر کیکا گَف بَژَی، اِشتَن خونه بَژَی یا دییَرَ کَسی خونه؟» 35چَی به دوملَه فیلیپوس دَمندَ گَف ژِ و موقدسَه کیتاویی هَه قِسمَتیکا کن عیسی خونِه خشَه خبری دوعشَه، شِروش کردَ.

36هَتَه کن راکا نار اَشینَه، آوَ جِگا ایرا آرَستین. خواجَه واتِش: «دَیَس، اِم جِگاکا آو هِستَه! ایسَه چِه چیی ایی بَشایَه چمن غسل تعمید گَتِه نَه بیگِرِ؟» 37فیلیپوس واتِش: «اَگَم صِدقِه دِلینَه ایمانِ وَردَرَ، هیچ چیی ایی اِشتِه نَه نییَگَت.» خواجَه واتِش: «ایمان دارِم کن عیسای مَسیح، خدا زوعَه یَه.»

38خواجه‌ فِرمون آداشَه اَرَبَه غَم بَرن، و فیلیپوس و خواجَه، هَر دِ آوی دِلَه دَشین و فیلیپوس بَش تعمید دوعَه. 39وَقتی آویکا بِرِن بَرمین، ایکَرَ ایی خداوندی روح فیلیپوسیش پِگَتَه و بَردِش و خواجَه دِ اَی نِویندِشَه، ولی خَشینَه اِشتَن راه را شَه. 40ولی فیلیپوس بَشتَنِش منطقَه اِ اَشدوویکا ویندِش. اَ، اَ منطقه گِردِ شَهرونکا اَگَردیَه و اِنجیلی خَشَه خَبَری اَدَری، تا شهر قِیصَریَه را آرَستَه.

Currently Selected:

رَسولون اَعمال 8: CTB

Highlight

Copy