لوقا 3
3
یحیی، رئی مسیح آمادَه مِهِه
1اِ سال پُنزَئِم پاتِشائی تیبِریوس امپراطور روم، وخدی گه پُنتیوس پیلاتُس فرموندار هیال یهودیَه بی، هیرودیس حکِمرو هیال جلیل، بِرای فیلیپُس حکِمرو ایتوریَه ئو تُراخونیتیس، لیسانیوس حکِمرو آبیلینی، بی، 2ئو حَنّا ئو قیافا کاهنَل اعظم بین، کلوم خدا اِنوم بیاوو رَسیَ یحیی، کُر زکریا. 3یحیی مَچیا اِرَه سِرُسَر هیال روو اُردن ئو اَرِه مردِم موعظَه مَهَردی گه اَرِه بشخِش گنائَل ووژو توئَه بِهَن ئو خُسِل تیَمید بِگِرِن. 4هُنَ گه اِبارَه یَه اِنوم کِتاو اِشعیا پِخَمَر هاتیَ گه:
«دَنگ اَوَه گه اِنوم بیاوونَ مَقارونی،
”رئی خداون آمادَه کَن!
ئو ریئَل او راس کَن!
5کُل تنگَل پِر ئو کُل کَش‌وکویَل،
هُمارا ماو؛
ریئَل هویَل، راس ئو ریئَل چالی‌پُلوقی،
صافا موئن.
6ئو کُل آمَل نجاد خداءَ موئینِن.“»
7یحیی وِتیَ جیَمیَتی گه اَرِه تیَمید گِرتِن هاتوئینی اِرَه تک: «اِاِ حَفی‌زائَل! کی هُشتار داینونی‌ئون تا اژ خَضوئی گه ها نواتون‌اِر، بِحواینو؟ 8اِسَه کارَلی بِهَن گه نِشو دِ توئَه‌تو کِردیَ ئو وَه لا ووژتونا نوشِن: ”باوَه ایمَه ابراهیمَ.“ اَرِیَگه موشِم‌ئونتو، خدا مَتونی اژ ایی کُچِکِلَ آیلَلی اَرِه ابراهیم دُریس کِ. 9هَراِسگِه‌یشَ تیشَه نیریاس اَر ریشی دارَل. اِسَه هَر داری گه ثمر خو ناری، مُئرِنی ئو ماوژِنی اِنوم آگِر.»
10مردِم اَژینو پِرسی: «اَنی چَه بِهِیم؟» 11یحیی جوواوا داتی: «اَوَه گه دو کِراس دیری، یَکی بیَ اَوَه گه نِری، ئو اَویشَ گه خوراک دیری باس هُنَ بِهِه.» 12خِراجگیرَل‌یش هاتِن تاگَه تیَمید بِگِرِن. اونَل اَژینو پِرسی: «استاد، ایمَه چَه بِهِیم؟» 13یحیی وِتی‌ئونو: «ویشتِر اژ اَ چیئَه گه مَیِّن بیَ، خِراج نَسینِن.» 14سروازَل‌یش اَژینو پِرسی: «اَنی ایمَه، ایمَه باس چَه بِهِیم؟» وِتی‌ئونو: «هَراَ زور اژ کسی پیل نَسینِن ئو بُختِم نارُوا نیَن اَر هُیچ کس ئو وَه مِزدَس ووژتو قانی بوئن.»
15مردِم وَه شوقا چیَمَ‌رئی بین ئو اِ دل ووژونا فگِرونَ مَهَرد گه یانی ماو یحیی هَراَ مسیحَ بوءَ گه باس بای؟ 16جوواو یحییَ کُل اونَل یَه بیَ: «مِنَ آو تیَمیدتونَ میَم، مِنتائای کسی تَوُناتِر اژ مِنَ مای گه مِه جُ‌جُ لائق نیِم بَن کِلاشَل واز کَمی. او وَه روح‌القدس ئو آگِر تیَمیدتونَ مِ. 17او شَن ووژ هایتیَ دَسا تاگَه خَرمُجا ووژ پاکا کِ ئو گَنِم جیَم دِ اِنوم اَمار ووژ، مِنتائای کیَه اِنوم آگِری گه هرگِس کورا نِماو، مَسُزِنی.»
18اُهُنَ، یحیی وَه نصیَتَل فِرَه‌تِری خَوَر خَوش پاتِشائی خدا اِلومَ مَهَردی اَر مردِم. 19مِنتائای هیرودیسِ حکِمرو، وَه‌چوینا یحیی اِبارَه هیرودیا، ژَن بِرای ئو هَمیش کارَل گَنی‌تِر گه کِردوئیتی، خِض کِردوئی اَری، 20او آوشدی اِنوم زندو ئو هُنَ، خطای آوشدی اَرسر خطائَل ووژ.
تیَمید عیسی ئو تَجِرَنُامچَه او
21وخدی گه مردِم کُل، تیَمیدونَ مَگِرت ئو عیسی‌یش تیَمید گِرتوئیتی ئو دوعا مَهَردی، آسمو تاقا بی 22ئو روح‌القدس وَه شکِل جسمونی، چُی کموتری هاتَ هُار ئو نیشت اَرسر او، ئو دَنگی اژ آسمو رَسی گه «تو کُر عزیزگرامی مِنین ئو تو فِرَه وَه دل مِنین.»
23عیسی نزیک سی سالو بی گه بِنیا خِلمت ووژ ناتی. او وَه گُمو مردِم کُر یوسف بی، ئو یوسف، کُر هِلی، 24هِلی کُر مَتّات، مَتّات کُر لاوی، لاوی کُر مِلکی، مِلکی کُر یَنّا، یَنّا کُر یوسف، 25یوسف کُر مَتّاتیا، مَتّاتیا کُر عاموس، عاموس کُر ناحوم، ناحوم کُر حِسلی، حِسلی کُر نَجَّی، 26نَجَّی کُر مَعَت، مَعَت کُر مَتّاتیا، مَتّاتیا کُر سِمِعین، سِمِعین کُر یُسِک، یُسِک کُر یهودا، 27یهودا کُر یوحَنان، یوحَنان کُر ریسا، ریسا کُر زِروبابِل، زِروبابِل کُر شِئَلتیئیل، شِئَلتیئیل کُر نیری، 28نیری کُر مِلکی، مِلکی کُر اَدّی، اَدّی کُر قوصام، قوصام کُر اِلمادام، اِلمادام کُر عیر، 29عیر کُر یوشَع، یوشَع کُر اِلعازار، اِلعازار کُر یوریم، یوریم کُر مَتّات، مَتّات کُر لاوی، 30لاوی کُر شَمعون، شَمعون کُر یهودا، یهودا کُر یوسف، یوسف کُر یونام، یونام کُر اِلیاقیم، 31اِلیاقیم کُر مِلیا، مِلیا کُر مِنّا، مِنّا کُر مَتّاتا، مَتّاتا کُر ناتان، ناتان کُر داوود، 32داوود کُر یَسا، یَسا کُر عوبید، عوبید کُر بوعَز، بوعَز کُر سَلمون، سَلمون کُر نَحشون، 33نَحشون کُر عَمّیناداب، عَمّیناداب کُر رام، رام کُر حِصْرون، حِصْرون کُر فِرِص، فِرِص کُر یهودا، 34یهودا کُر یعقوب، یعقوب کُر اسحاق، اسحاق کُر ابراهیم، ابراهیم کُر تارَح، تارَح کُر ناحور، 35ناحور کُر سِروج، سِروج کُر رِعو، رِعو کُر فِلِج، فِلِج کُر عِبِر، عِبِر کُر شِلَخ، 36شِلَخ کُر قینان، قینان کُر اَرفَکشاد، اَرفَکشاد کُر سام، سام کُر نوح، نوح کُر لَمِک، 37لَمِک کُر مَتوشالَح، مَتوشالَح کُر خَنوخ، خَنوخ کُر یارِد، یارِد کُر مَهَلَلئیل، مَهَلَلئیل کُر قینان، 38قینان کُر اَنوش، اَنوش کُر شِیث، شِیث کُر آدم ئو آدم کُر خدا بی.
Currently Selected:
لوقا 3: LBT
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
