یوحنا 6

بِرَکت دائِن پنج نون ئو دو گِلَه ماهی

1دُما یَه، عیسی چی اَرِه اَ کو دریاچَه جلیل هَراَ دریاچَه گه نُم تیبِریَه سی. 2جیَمیَت فِرِه‌ی کَتِنیِ دُم، اَرِیَگه نشونَه‌ل ئو مُجِزَه‌لونی دوئی گه عیسی وَه شِفا دائِن مریضَل اَنجومَ ماتی. 3اَسَه عیسی چی اَرِه بِنار کوی ئو وَه‌گَرد شاگردَل ووژ نیشت اَر اورَه. 4عِد پِسَخ یهودیَل نزیک بی. 5وخدی عیسی چیَم هیزداتی ئو دیتی گه جیَمیَت فِرِه‌ی دیرِن مانی اَرِه تک، وِتیَ فیلیپُس: «نُو اژ کو بِخِریم تاگَه یوئنَ بیرِن؟» 6عیسی یَه وِتی تا اِنتحو کِیتی، اَرِیَگه ووژ خوءَ مَذِناسدی میا چَه بِهِه. 7فیلیپُس جوواو داتی: «اَرّ دوهیس دینار گه مِز شَش مُنگ یِه عمِلِئَه‌ بِیمون ئو نُو بِخِریم، بِر یوئنَ نِمِهِه، جُ‌جُ اَرّ هرکُمو فَخَد گُپی بیرِن.» 8یَکی‌تِر اژ شاگردَل گه بِرا شَمعونِ پطرس بی، ئو نُم آندریاس بیتی، وِتیَ او: 9«کُری هار ایرَه گه پنج نونِ جو ئو دو گِلَه ماهی دیری، مِنتائای یَه وَه کو ایی مردِمَ بِرَ مِهِه؟» 10عیسی وِتی: «ایی مردِمَ بنیشِنِن.» اَر اورَه مَرِن فِرَه بی. اَسَه اونَل گه نیشتِن، نزیک اَر پنج هزار پیا بین. 11اَسَه عیسی نونَل گِرتی، ئو دُما شگِر کِردِن، بیَرا کِردی اِنوم کسَلی گه نیشتوئین، ئو مایَل‌یش، اَخِه‌ی گه هِستو داءَ بینو. 12وخدی سیرو هُارد، عیسی وِتیَ شاگردَلی: «حُیردَه نونَلی گه مَنیَسا، جیَم دَن تاگَه چیئی تالون ناو.» 13دُماخِرِ حُیردَه نونَلو جیَم دا ئو اژ پَس‌مَنَه اَ پنج نونِ جوءَ گه مردِم هُاردوئیو، دوازَه سَلِه‌ئو پِر کِرد.

14مردِم وخدی ایی نشونَه ئو مُجِزِه‌ی گه عیسی کِردی دییو، وِتو: «اِراسی گه او هَراَ پِخَمَرَسَ گه موسی وِتی باس با اِنوم دنیا.» 15عیسی وخدی فیَمی گه میا بِگِرِنی ئو وَه زور بِهَنیَ پاتِشا، اژ اورَه چی ئو یِگِلی‌تِر ووژَ تَنیا چی اَرِه کوی.

عیسی اَر رُی آوَ مَچوءَ رئیا

16باایوارَه، شاگردَل عیسی ویرِ دریاچَه هاتِنَ هُار 17ئو سُوار قائِق بین، چِن اَرِه اَکو دریاچَه، ویرِ شیَر کَفَرناحوم. هُوا تیَریک بی، مِنتائای عیسی هَنی نِهاتوئی اَرِه تَکو. 18هَراَ وخدَ دریاچَه بیَ رُحِیل اَرِیَگه واهوفِه‌ی ماهات. 19وخدی چَن یِه فَرسَخ اژ حشگی دویرا بین، عیسی‌ئو دی گه اَر رُی آوَ مَچیاءَ رئیا ئو نزیک اَر قائِقِهَه موئیا. کُل زِلَ‌تِراقا بین. 20مِنتائای عیسی وِتیَ بینو: «مِنِم؛ زِلَتو نَچو.» 21اَسَه مِهِستو سُوار قائِق کَنی، گه قائِق هَراَ موقَع رَسی اَر اَ جاءَ گه مِهِستو بِچِن.

مِنِم، اَ نونَ گه ژییاینَ مِ

22وَه صوایکا، مردِمی گه مَنوئینِ اَکو دریاچَه، فیَمین گه بِخِر اژ یِه قائِق، قائِقی‌تِر اَر اورَه نوئیَ، ئو مَذِناسدو گه عیسی‌یش وَه‌گَرد شاگردَلی سُوار اَوَه نوئیَ، بلکِم شاگردَل تَنیا چوئین. 23اَسَه قائِقَلی‌تِر اژ دریاچَه تیبِریَه هاتِن ئو رَسینَ اَر نزیک جای گه اونَل دُما شگِر کِردِن خداون، نونو هُاردوئی. 24وخدی گه مردِم دییو گه نه عیسی هار اورَه ئو نه شاگردَلی، سُوار اَ قائِقِلَ بین ئو وَه مِنِی عیسی چِن اَرِه شیَر کَفَرناحوم.

25وخدی عیسی‌ئو اِ اَکو دریاچَه کِردَ دی، وِتونَ بی: «استاد، کِ هاتینَس اَرِه ایرَه؟» 26عیسی جوواو داتی: «حخیختاً، موشِمَ بینتو، مِنِی مِنَ مِهِینو نه اَرِه نشونَه‌ل ئو مُجِزَه‌لی گه دیتونَ، بلکِم وَه خاطر اَ نونَ گه هُاردتون ئو لَمتو سیر بی. 27کار کَن، مِنتائای نه اَرِه خوراکی گه اژ بِنَ مَچو، بلکِم اَرِه خوراکی گه تا ژییاین ابدیَ مَمینی، خوراکی گه کُر اِنسونَ مِئَه بینتو. اَرِیَگه خداءِ باوَه میر تایید داس اَری.» 28اَسَه اَژینو پِرسی: «چَه بِهِیم تاگَه کارَلمونی اَنجوم دائی گه خدا خَوشَ مایتی؟» 29عیسی جوواو داتی: «کاری گه خدا خَوشَ مایتی یَسَ گه ایمو بارینونَ اَ کسَ گه کِل‌کِردیِ.» 30اونَل وِتونَ عیسی: «چه نشونَه ئو مُجِزِه‌ی نشونمونَ مِین تا اَوَه بوئینیم ئو باوارِت کِیم؟ چَه مِهِین؟ 31اَژداد ایمَه اِنوم بیاوو مَنّا، اَ نُو آسمونیونَ هُارد، هُنَ گه اِنوم نُسَخ مقدّس نُیسیاءَ: ”او اژ آسمو نُو داتیَ بینو تاگَه بیرِن.“ 32عیسی جوواو داتی: «حخیختاً، موشِمَ بینتو، موسی نوئی گه اَ نونَ اژ آسمو داءَ بینتو، بلکِم باوَه مِنَ گه نُو حخیخی اژ آسمونَ مِئَه بینتو. 33اَرِیَگه نُو خدا اَوَه‌‌سَ گه اژ آسمو هاتیَسَ هُار، ئو ژییاینَ موئَشخیَ دنیا.» 34اَسَه وِتو: «آقا، ایی نونَ هَر بیَ بینمو.» 35عیسی وِتیَ بینو: «مِنِم، اَ نونی گه ژییاینَ مِ. هر کی با اَرِه تَکِم، وِرسِنی نِماوتی، ئو هر کی ایمو باری اَر مِه هرگِس تینی نِماوتی. 36مِنتائای هَرهُنَ گه وِتمَ بینتو، وَه‌یاآگه مِنتو دیَ، ایمو نِمارینو. 37کُل کسَلی گه باوَه بیَ بینِم، مان اَرِه تک مِه؛ ئو هر کی با اَرِه تَکِم، هرگِس اژ ووژِم تار نِمَهَمی. 38اَرِیَگه اژ آسمو نِهاتِمَسَ هُار تا اَ چیئَه گه دلمَ مِیتی اَنجوم دَم، بلکِم هاتِمَ تاگَه خواس اَوَه گه مِه کِل‌کِردیَسی اَنجوم دَم. 39ئو خواس اَوَه گه مِه کِل‌کِردیَسی، یَسَ گه اژ اَ کسَلی گه او داسیَ بینِم، هُیچ‌کُم اژ دس نیَم، بلکِم اونَل اِ روژ قیومت زِنیا کَم. 40اَرِیَگه خواس باوَه مِه یَسَ گه هر کی اَر کُر سِیل کِ ئو ایمو بارتیَ بی، ژییاین ابدیَ ماوتیَ نَصُی، ئو مِه اِ روژ قیومت او زِنیا مَهَم.»

41اَسَه یهودیَل بِنیائو نا اَر خُت‌خَت کِردِن اِبارَه او، اَرِیَگه وِتوئیتی «مِنِم، اَ نونَ گه اژ آسمو هاتیَسَ هُار.» 42یهودیَل وِتو: «مَر ایی پیا، عیسی کُر یوسف نیَ گه ایمَه باوِه ئو دایَ مَشتاسیم؟ اَسَه چطورَ موشی، ”اژ آسمو هاتِمَسَ هُار“؟» 43عیسی جوواو داءَ بینو: «وَه‌گَرد یَک خُت‌خَت نَهَن. 44هُیچ‌کس نِمَتونی با اَرِه تک مِه مَر یَگه باوِه گه مِه کِل‌کِردیَسی، بارتی ویرِ مِه، ئو مِه اِ روژ قیومت او زِنیا مَهَم. 45اِ نُسَخ پِخَمَرَل نُیسیاءَ گه ”کُل اژ خدا تیَلیمَ مَگِرِن.“ اِسَه هر کی گوش بِگِریَ خدا ئو اژ او تیَلیم بِگِری، ما اَرِه تک مِه. 46نه یَگه کسی باوَه دوئیتی، بِخِر اژ اَوَه گه اژ جونِم خداءَ؛ او باوَه دیَسی. 47حخیختاً، موشِمَ بینتو، هر کی ایمو دیری، ژییاین ابدی دیری. 48مِنِم، اَ نونی گه ژییاینَ مِ. 49اَژداد هُمَه، اِنوم بیاوو مَنّائو هُارد گه اژ آسمونَ ماهات هُار، وَه ایی حالا مِردِن. 50مِنتائای یَسَ اَ نونَ گه اژ آسمونَ ماءَ هُار تا هر کی اَژی بیرتی، نَمِری. 51مِنِم اَ نُو زِنیَ گه اژ آسمو هاتَ هُار. هر کی اژ ایی نونَ بیری، تا ابد زِنیَ مَمینی. لار مِنَ اَ نونَ گه ژییاینَ موئَشخیَ دنیا.»

52اَسَه دَمَرَگَ سخدی کَت اِنوم یهودیَل ئو موئِتو گه «ایی پیا چطورَ مَتونی لار ووژ بیَ بینمو تاگَه بیریم؟» 53عیسی وِتیَ بینو: «حخیختاً، موشِمَ بینتو، گه تا لار کُر اِنسو نیرینو ئو خوین او خُرّ نِینو، ژییاین اِنوم ووژتو نِرینو. 54هر کی لارِم بیری ئو خوینِم خُرّ دِ، ژییاین ابدی دیری، ئو مِه اِ روژ قیومت، او زِنیا مَهَم. 55اَرِیَگه لارِم هُاردَنی حخیخی ئو خوینِم اَرِه خُرّ دائِن حخیخیَ. 56کسی گه لارمَ میری ئو خوینِم خُرَّ مِ، لیزَ مَگِری اِنوم مِه ئو مِن‌یش اِنوم او. 57هُنَ گه باوَه، باوِه گه هَر هَسی، مِه کِل‌کِردیَسی ئو مِه وَه خاطر باوَه زِنیئِم، هُنِ‌یشَ هر کی گه لار مِنَ میری، اوئیش وَه خاطر مِه زِنیَ مَمینی. 58یَسَ نونی گه اژ آسمو هاتَ هُار؛ نه اِجور اَ چیئَه گه اَژدادتو هُاردو، وَه ایی حالا مِردِن؛ هر کی اژ ایی نونَ بیری، تا ابد زِنیَ مَمینی.» 59عیسی ایی قصه‌لَ وخدی وِتی، گه اِنوم عَبادتگا یهود اِ شیَر کَفَرناحوم تیَلیمَ ماتی.

اعتراف پطرس

60ویشتِر شاگردَلی وخدی ایی قصَه‌لونَ شنَفت، وِتو: «ایی تیَلیمَ سخدَ، کیَ مَتونی قبول کِیتی؟» 61عیسی، باخَوَر اژ یَگه شاگردَلی اَر سر یَه خُت‌خَتَ مَهَن، وِتیَ بینو: «یانی ایی قصَه مِنَ هُمَه رَنجونیِ؟ 62اِسَه اَرّ کُر اِنسو بوئینینو گه دیری وَه جای مَچوءِ بِلِنگ گه وِرِکار بیَسی، چَه مِهِینو؟ 63روحِ خداءَ گه زِنیا مِهِه؛ جسم فادِه‌ی نِری. قصَه‌لی گه مِه وِتمَ بینتو، روح ئو ژییاینَ. 64مِنتائای اِنوم هُمَه بِری هَن گه ایمو نِمارِن.» اَرِیَگه عیسی اژ اَ اولَ مَذِناسدی چه کسَلی ایمو نِمارِن ئو کیَ گه اوءَ مِئَه گیر دشمن. 65ئو عیسی وِتی: «اَژونَبیَ گه وِتمَ بینتو هُیچ‌کس نِمَتونی با اَرِه تک مِه، مَر یَگه اَوَه اژ جونِم باوَه بَشخیائیتیَ بی.»

66اژ اَوِءِ دُما، ویشتِر شاگردَلی گِلوناهُاردِ دُما، ئو دیَر نَچِنَ گَرد عیسی. 67اَسَه عیسی وِتیَ اَ دوازَه شاگردَ: «یانی هُمِه‌یش میا بِچینو؟» 68شَمعونِ پطرس جوواو داتی: «آقا، ایمَه بِچیم اَرِه تک کی؟ قصَه‌ل ژییاین ابدی هار تک تو. 69ئو ایمَه ایمونمو آوِردیَ ئو فیَمیمونَ گه اَ قدوسِ خدا تونین.» 70عیسی جوواو داتیَ بینو: «مَر مِه هُمَه دوازَه نفرِم اِنتخاو نَهَردیَ؟ وَه ایی حالا، یَکی اژ هُمَه ابلیسی‌ کَ.» 71گَپ‌قصِه‌ی اَر سر یهودا، کُر شَمعونِ اَسخَریوطی بی، اَرِیَگه او گه یَکی اژ اَ دوازَه نفرَ بیَ، مِهِستی عیسی بیَ گیر.

Currently Selected:

یوحنا 6: LBT

Highlight

Copy