یوحنا 5

شِفا پیا علیل

1دُما اَوَه، عیسی اَرِه یَکی اژ عِدَل یهودیَل، چی اَرِه شیَر اورشلیم. 2اِ شیَر اورشلیم، پا ’دروازَه کاوِر‘ حوضی کَ گه وَه زوئو آرامی گه یهودیَل قصه‌ئونَ مَهَرد موشِنَ بی ’بِیت‌حِسْدا‘، ئو پنج طارِمی دیری. 3اَر اورَه بِری علیل اژ کورَل، شَلَل ئو فِلجَل وِلائِرا موئیان. [ئو چیَمَ‌رئی جویل هُاردِن آو بین.] 4[اَرِیَگه گُمونونَ مَهَرد گِلی یِگِل فریشدِه‌ی اژ جونِم خدا ماءَ هُار ئو آوَ مَجویلِنی؛ ئو اول کسی گه دُما جویل هُاردِن آو مَچیا اِنوم حوضِهَه، اژ هر مِرَضی گه داشدی، شِفا مَگِرتی.]

5اِنوم اونَل، پیای بی گه سی ئو هشت سال علیل بی. 6وخدی عیسی او دیتی گه اَر اورَه وِلائِرا بوئی ئو فیَمی گه مِدت فِرِه‌ی کَ گه ایی دردَ بیَسیَ دچارا، پِرسی اَژی: «آیا مِت شِفا بِگِرین؟» 7پیا علیلِهَه وِتی: «آقا، کسی نِرِم گه وخدی آوَ مَجویلی، مِه باوژی اِنوم حوض، ئو تا ووژمَ مَرَسِنِم اَر اورَه، یَکی‌تِر وِر اژ مِه چیَس اِنوم آو.» 8عیسی وِتَ بی: «هیزگِر، جِل‌ِجات هیزدَ ئو بِچوءَ رئیا.» 9اَ پیا جا‌وَرجا شِفا گِرتی ئو جِلِ‌جا ووژ هیزداتی، ئو بِنیا ناتی اَر اَرئیا چیئین.

اَ روژَ، روژ شَمَه مقدّس بی. 10اَسَه یهودیَل وِتونَ پیا شِفا گِرتی: «ایمِرو شَمِئَه، شرعاً صِلا نِرین گه جِل‌ِجات هیزدِین.» 11اَ پیا جوواو داتی: «اَ پیاءَ گه مِه شِفا داتی او وِتیَ بینِم ”جِل‌ِجات هیزدَ ئو بِچوءَ رئیا“.» 12اونَ اَژینو پِرسی: «اَ پیای گه وِتیَ بینِت جِل‌ِجات هیزدَ ئو بِچوءَ رئیا، کی بی؟» 13مِنتائای پیای گه شِفا گِرتوئیتی نِمَذِناسدی او کیَ، اَرِیَگه عیسی اِنوم جیَمیَت اورَه گم بوئی.

14گِری‌تِر، عیسی او اِنوم معبد کِردیَ دی ئو وِتَ بی: «اِسگَه گه آزاآ بینَ، دیَر گنا نِهَه تاگَه اژ یَه گَنتِرتَ سر نای.» 15اَ پیا چی ئو وِتیَ یهودیَل: «اَوَه گه مِه شِفا داتی، عیسیَ.»

16اَژونَبیَ گه یهودیَل عیسی‌ئو اذیتَ مَهَرد، اَرِیَگه اِ روژ شَمَه هُنَ کارَلی مَهَردی. 17مِنتائای جوواو عیسی یَه بیَ گه «باوَه‌م هَنی کارَ مِهِه، مِن‌یش کارَ مَهَم.» 18اَژونَبیَ، یهودیَل ویشتِر اِکِر یَه بینَ گه عیسی بِکُشِن، اَرِیَگه نه فَخَد شَمَه مَنیاتی اِ ژیر پا، بلکِم جُ‌جُ خداءَ باوَه ووژ هِنا مَهَردی. ئو ووژَ گَرد خدا مَهَردیَ یَکی.

قدِرت‌واختیار کُر خدا

19عیسی وِتیَ بینو: «حخیختاً، موشِمَ بینتو گه کُر اژ وَر ووژ نِمَتونی کاری بِهِه مَر کارَلی گه موئینی باوِه اَنجومَ مِ؛ اَرِیَگه هر چی گه باوَه مِهِه، کُریشَ مِهِه. 20اَرِیَگه باوَه، کُر دوس دیری ئو هر کاری مِهِه نشونَ مِیتی. ئو کارَل کَلِنگتِریشی نشونَ مِیتی تاگَه بِلُجوئیتو بای. 21اَرِیَگه هَراَ جورَ گه باوَه مِردیَل زِنیا مِهِه ئو ژییاینَ موئَشخیَ بینو، کُریش وَه هر کی گه بِیتی، ژییاینَ موئَشخی. 22اَرِیَگه باوَه اَر کسی داوری نِمِهِه، بلکِم کُل کار داوری داسیَ دس کُرا. 23تا کُل مردِم عزّت بِنِن اَر کُر، هَراَ جورَ گه عزّتَ مَنِن اَر باوَه. اَرِیَگه کسی گه عزّت نِمَنی اَر کُر، عزّت نَنیاسی‌ اَر باوِه گه او کِل‌کِردیَسی. 24حخیختاً، موشِمَ بینتو، هر کی کلوم مِه گوش بِگِری ئو ایمو باری اَر کسی گه مِه کِل‌کِردیَسی، ژییاین ابدی دیری ئو داوری اَری نِماوتی، بلکِم اژ مرگ، جاواز بیَسَ ژییاین. 25حخیختاً، موشِمَ بینتو، زمونی مای، بلکِم هَراِسگِه‌یشَ هاتیَ، گه مِردیَل دَنگ کُر خداءَ مَشتوئِن ئو کسَلی گه بشتوئِن، زِنیا موئن. 26اَرِیَگه هَراَ جورَ گه باوَه ژییاین اِنوم ووژ دیری، وَه کُریش بَشخیَسی گه ژییاین اِنوم ووژ داشدوئیتی، 27ئو ایی قدِرتَ داسَ بی گه داوری‌ش بِهِه، اَرِیَگه کُر اِنسونَ. 28اژ ایی قصه‌لَ بِلُجوئیتو نای، اَرِیَگه زمونی مای گه کُل اونَلی گه هان اِنوم قور، دَنگ کُرَ مَشتوئِن ئو مانَ دِریر. 29اونَلی گه خوئیو کِردیَ، زِنیا موئن گه تا ابد ژییاینو داشدوئی، ئو اونَلی گه گَنیو کِردیَ، زِنیا موئن تا داوری بوئن. 30مِه اژ وَر ووژِم نِمَتونِم کاری بِهَم، بلکِم مِطابق اَ چیئَه گه مَشتوئِم داوریَ مَهَم ئو داوری مِه اژ رُی عدلَ، اَرِیَگه وَه دُم خواس ووژما نیِم بلکِم هامَ دُم خواس اَوَه گه مِه کِل‌کِردیَسی.

31«اَرّ مِه ووژِم اَر ووژِم شاتی بیَم، شاتی مِه اِتِبار نِری. 32مِنتائای یَکی‌تِر هَس گه اَر مِه شاتیَ مِ ئو مَذانِم گه شاتی او اِبارَه مِه اِتِبار دیری. 33اَلوَت هُمَه کَسَلتونی کِل‌کِرد اَرِه تک یحیی ئو، او اَر حخیخت شاتی داتی. 34نه یَگه مِه شاتی اِنسو قبول کَم، بلکِم ایی قصه‌لَ موشِم تاگَه هُمَه نجاد بِگِرینو. 35یحیی چراخی بی گه مَسُت ئو مَدَرَشخیا، ئو هُمَه هِستو گِری اِنوم نُیر او خَوشی بِهِینو. 36مِنتائای مِه شاتی‌ای کَلِنگتِر اژ شاتی یحیی دیرِم، اَرِیَگه کارَلی گه باوَه سپارتیَسیَ بینِم تا اَنجوم دَم، یانی هَرایی کارَلی گه مِنَ مَهَم، ووژون اَر مِه شاتیَ میَن گه باوَه، مِه کِل‌کِردیَسی. 37ئو هَراَ باوَه گه مِه کِل‌کِردیَسی، ووژ اَر مِه شاتیَ مِ. هُمَه هرگِس دَنگ اوتو نَشتَفتیَ ئو رُی اوتو نِئیَ 38ئو کلوم او لیز نَگِرتیَس اِنوم هُمَه، اَرِیَگه کسی گه باوَه کِل‌کِردیَ باوار نِمِهِینو. 39هُمَه نُسَخ مقدّسَ مَجورینو، اَرِیَگه گُمونَ مِهِینو اِنوم اونَ، ژییاین ابدی دیرینو، اِسگَه هَرایی نُسَخَ اَر مِه شاتیَ میَن. 40مِنتائای اِژیر نِمَچینو باینون اَرِه تک مِه تاگَه ژییاین بارینونَ دس.

41«مِه جِلال اژ جونِم اِنسونَل قبول نِمَهَم، 42مِنتائای هُمَل خوءَ مَشتاسِم گه مِحبت خدا اِنوم دلتو نِرینو. 43مِه وَه نُم باوَه ووژِم هاتِمَ ئو هُمَه نِمَچینون‌ِ گِرد مِه. اَرّ یَکی‌تِر وَه نُم ووژ بای، مَچینونی‌ِ گِرد. 44هُمَه چطورَ مَتونینو باوار کِینو وخدی گه جِلال اژ یَکتِری قبولَ مِهِینو، مِنتائای وَه دُم جِلالی گه اژ خداءِ یَکونَه بو نیئینو؟ 45گُمو نَهَن یَه مِنِم گه اَر تک باوَه مَکومتونَ مَهَم؛ کسی گه مَکومتونَ مِهِه موسیَ، هَراَ کسَ گه امیدتونَ بی بَسدیَ. 46اَرِیَگه اَرّ موسی‌تو باوار داشد، مِن‌یشتو باوارَ مَهَرد، اَرِیَگه او اِبارَه مِه نُیسونیَسی. 47مِنتائای اَرّ نُسَخ او باوار نِرینو، چطور قصَه‌ل مِه باوارَ مِهِینو؟»

Currently Selected:

یوحنا 5: LBT

Highlight

Copy